1. Weh aala wi waahn fi wi relitiv dehn?

WAHN sista weh naym Pauline * seh: “Fahn di taim Ah mi laan di chroot, Ah mi waahn evribadi eena mi famili fi deh da Paradais wid mi. Ah mi espeshali waahn mi hozban, Wayne, ahn wi son fi jain mi di serv Jehoava.” If yoo ga relitiv weh noh kohn fi noa ahn lov Jehoava yet, den yu praabli feel di saym way laik how Pauline mi feel bowt fi shee famili.

2. Weh kweschanz wi wahn diskos eena dis aatikl?

² Wi kyaahn foas wi relitiv dehn fi aksep di gud nyooz, bot wi ku inkorij dehn fi tink bowt di Baibl mesij ahn mek chaynjiz eena dehn laif. (2 Tim. 3:14, 15) Wai wi shuda witnis tu wi relitiv dehn? Wai wi shuda chrai fi andastan how dehn feel? Weh wi ku du fi help wi relitiv dehn fi kohn fi lov Jehoava laik how wee lov hihn? Ahn how evribadi eena wi kangrigayshan ku help wi?

3. Akaadn tu 2 Peeta 3:9, wai wi shuda witnis tu wi relitiv dehn?

³ Soon, Jehoava wahn bring dis werl tu wahn en. Onli dehn wan weh ga di “rait haat kandishan fi evalastin laif” wahn servaiv. (Aks 13:48, NW) Wi spen wahn lata taim di preech tu schraynjaz weh liv eena wi ayrya, soh af koars wi waahn preech tu wi relitiv dehn soh dat dehn ku serv Jehoava wid wi. Wi lovin Faada, Jehoava, ‘noh waahn non a  wi geh dischrai, bot ih waahn aala wi ton fahn wi sin dehn.ʼ—Reed 2 Peeta 3:9.

4. Weh mistayk wi mait mek wen wi di witnis tu wi relitiv dehn?

⁴ Wi need fi memba dat dehn ga wahn rait way ahn wahn rang way fi shayr di Baibl mesij. Fi egzampl, wi mait taak eena wahn kain way wen wi di preech tu sombadi weh wi noh noa, bot wen wi di taak tu wi relitiv dehn wi mait bee tu dairek.

5. Weh wi shuda memba bifoa wi chrai taak bowt di chroot wid wi relitiv dehn?

⁵ Wen wi tink bak tu di fos taim wi mi chrai fi witnis tu wi relitiv dehn, wahn lata wi mait feel bad bowt how wi mi du it ahn wish wi mi witnis tu dehn eena wahn nada way. Di apasl Paal mi kongsl Kristyanz fi mek dehn aalwayz ‘taak tu peepl eena wahn nais an inchrestin way weh wahn mek dehn waahn yehr moa. Ahn yu wahn kohn fi noa how fi gi di rait ansa tu evribadi.ʼ (Kol. 4:5, 6) Ih gud fi mek wi memba dis kongsl wen wi taak tu wi relitiv dehn. If nat, wi mait en op di ofen dehn raada dan help dehn.

6-7. Yooz di egzampl eena di paragraaf fi shoa wai ih impoatant fi mek Kristyanz shoa andastandin tu dehn marij mayt weh noh di serv Jehoava.

⁶ Shoa andastandin. Pauline, weh wi mi menshan erliya, seh: “Fos, Ah onli mi waahn taak tu mi hozban bowt Gaad ahn di Baibl. Wi neva ga no ‘naamalʼ kanvasayshan.” Bot, Pauline hozban, Wayne, neva noa moch bowt di Baibl ahn neva andastan weh Pauline mi-di taak bowt. Tu hihn, ih mi luk laik aal weh shee mi tink bowt da ih rilijan. Hihn mi wori dat shee mi-di jain wahn daynjaros rilijan weh mi-di chrik shee.

 ⁷ Pauline admit dat fi wahn wail shee mi spen wahn lata taim eena di eevninz ahn pahn di weekenz wid di bradaz ahn sistaz—da meetin, eena di minischri, ahn da lee get-tugeda. Pauline seh: “Sohntaim, Wayne doz kohn hoam tu wahn emti hows ahn dat yoostu mek ih feel loanli.” Af koars, Wayne mi mis ih waif an ih son. Hihn neva noa di peepl weh dehn mi deh wid, an ih mi luk laik ih waif nyoo fren dehn mi moa impoatant tu shee dan hihn. Soh Wayne chretn fi divoas Pauline. Yoo ku tink a sohn wayz how Pauline kuda mi bee moa andastandin?

8. Akaadn tu 1 Peeta 3:1, 2, weh wuda afek wi relitiv dehn di moas?

⁸ Set wahn gud egzampl. Wahn lata taim, weh wi du afek wi relitiv dehn moa dan weh wi seh. (Reed 1 Peeta 3:1, 2.) Afta wahn wail, Pauline mi riyalaiz dat. Shee seh: “Ah mi noa dat Wayne lov wi ahn dat hihn neva reeli waahn wahn divoas. Bot wen hihn mi chretn fi lef mi, ih mek Ah riyalaiz dat Ah mi need fi staat du tingz Jehoava way. Ih mi moa impoatant fi du gud tingz dan fi kip di preech tu ahn.” Pauline mi stap chrai foas Wayne fi taak bowt di Baibl, an ih mi staat taak tu ahn bowt evriday mataz. Wayne si ih waif geh moa frenli, an ih si dehn son geh moa obeedyant. (Prov. 31:18, 27, 28) Wen Wayne mi si how di Baibl mesij mi chaynj ih famili fi di beta, hihn mi staat tu tink bowt di Baibl mesij ahn mek chaynjiz eena ih laif.—1 Kor. 7:12-14, 16.

9. Wai wi fi kip di chrai fi help wi relitiv dehn?

⁹ Kip di chrai fi help yu relitiv dehn. Jehoava set di egzampl fi wi. “Oava ahn  oava” hihn gi peepl di apachooniti fi aksep di gud nyooz ahn geh laif. (Jer. 44:4) Ahn di apasl Paal mi tel Timoti fi noh stap help adaz. Wai? Bikaaz if ih kip aan di du dat, ih wahn sayv dehn wan weh di lisn tu ahn, an ihself tu. (1 Tim. 4:16) Wi lov wi relitiv dehn, soh wi waahn dehn noa di chroot weh wi fain eena Gaad Werd. Afta wahn wail, Pauline werdz an akshanz mi afek ih famili eena wahn gud way. Now, shee hapi di serv Jehoava lang wid ih hozban. Di too a dehn di painyaa, ahn Wayne di serv az wahn elda.

10. Wai wi need fi bee payshent?

¹⁰ Bee payshent. Wen wi mi disaid fi obay Gaad standadz, wi mi mek chaynjiz eena wi laif an eena weh wi mi bileev. Ih ku bee haad fi wi relitiv dehn aksep dehnya chaynjiz. Wahn lata taim, di fos ting dehn noatis da dat wi noh selibrayt haliday wid dehn nohmoh, ahn dat wi stap tek paat eena palitiks. At fers, som a wi relitiv dehn mait geh beks wid wi. (Mach. 10:35, 36) Bot wi noh waahn giv op pahn dehn. If wi stap chrai fi help dehn andastan wi bileef dehn, den da laik wi di seh dat dehn noh dizerv evalastin laif. Jehoava neva gi wi di jab fi joj—hihn gi da jab tu Jeezas. (Jan 5:22) If wi payshent, wi relitiv dehn mait wilin fi lisn tu wi mesij laytaraan.—Si di baks “ Yooz Wi Websait fi Teech.”

11-13. Weh yu laan fahn di way Alice mi deel wid ih payrents?

¹¹ Bee kain, bot noh mek yu relitiv dehn chaynj yu disizhan. (Prov. 15:2) Kansida Alice egzampl. Fi shee payrents neva bileev eena Gaad ahn dehn mi intu palitiks. Shee mi laan bowt Jehoava wen shee mi-di liv faar fan ih payrents. Shee mi riyalaiz dat az soon az pasabl, shee mi need fi tel dehn bowt di gud tingz weh shee mi-di laan. Alice seh: “If yu wayt tu lang fi tel yu relitiv dehn bowt di nyoo tingz weh yu bileev eena, den dehn wahn bee opset bowt it.” Shee mi chrai fi fain sohn difrent tapik weh ih hoap ih payrents wuda mi bee inchrestid eena, laik di tapik a lov. Den shee mi rait letaz tu ih payrents ahn menshan weh di Baibl seh bowt dehnya tapiks an aks dehn weh dehn tink. (1 Kor. 13:1-13) Shee mi tank ih payrents fi rayz shee ahn fi tek kayr a shee, an ih wuda sen dehn gifs. Wen ih vizit ih payrents, shee wuda du evriting ih kud fi help ih ma wid di werk rong di hows. At fers, wen Alice mi tel ih payrents bowt di nyoo tingz weh ih bileev eena, dehn neva hapi ataal.

¹² Wen Alice mi deh hoam wid ih payrents, shee mi kantinyu reed di Baibl evri day. Alice seh: “Dis mi help mi ma fi andastan how impoatant di Baibl tu mee.” Meenwail, Alice pa mi disaid fi laan sohnting bowt di Baibl fi mek ih ku andastan wai ih daata mi chaynj di way ih tink. Hihn mi aalso waahn fain reeznz fi kritisaiz di Baibl. Alice seh: “Ah mi gi ahn wahn Baibl, an Ah rait wahn persnal noat tu ahn eena it.” Wat da-mi di rizolt? Alice pa neva fain notn fi kritisaiz eena Gaad Werd. Insted, hihn mi reeli impres wid weh ih mi reed.

¹³ Wi need fi bee kain, bot wi noh fi mek wi relitiv dehn chaynj wi disizhan, eevn if wi haftu bayr op anda chraiyalz. (1 Kor. 4:12b) Fi egzampl, Alice mi haftu indyoar wen ih ma mi ton gens ahn. Shee seh: “Wen Ah mi geh baptaiz, mi ma mi seh dat Ah neva lov ahn. Bot Ah neva hoal bak fahn taak bowt mi nyoo rilijan. Insted, Ah eksplayn tu ahn eena wahn rispekful way dat Ah don mek op mi main fi  bee wan a Jehoava Witnisiz ahn dat Ah noh wahn chaynj mi main. Ah chrai fi mek mi ma noa dat Ah stil lov ahn. Di too a wi mi krai, ahn den Ah mi kuk sohnting nais fi ih eet. Fahn deh goh bak, mi ma mi staat tu agree dat di Baibl mi-di mek mi wahn beta persn.”

14. Wai wi mos neva mek wi relitiv dehn chaynj wi disizhan fi serv Jehoava?

¹⁴ Ih mait tek sohn taim bifoa wi relitiv dehn ku reeli andastan jos how impoatant ih impoatant tu wee fi serv Jehoava. Fi egzampl, wen Alice mi disaid fi painyaa insteda fala di kareeya weh ih payrents mi waahn ih ga, ih ma mi krai agen. Bot Alice neva chaynj ih main. Shee seh: “If yu alow yu famili fi chaynj yu disizhan bowt wan ting, dehn wahn praabli chrai fi chaynj yu main bowt ada tingz. Bot if yu kain ahn noh mek yu famili chaynj yu disizhan, som a dehn mait lisn tu yu.” Dat da weh mi hapm eena Alice kays. Now, di too a ih payrents di painyaa, an ih pa da wahn elda.

15. Akaadn tu Machyu 5:14-16 ahn 1 Peeta 2:12, how di “gud ting dehn” weh adaz du ku help wi relitiv dehn?

¹⁵ Jehoava yooz di “gud ting dehn” weh ih servants du fi jraa peepl kloas tu Hihn. (Reed Machyu 5:14-16; 1 Peeta 2:12.) If yu hozban er waif da noh wan a Jehoava Witnisiz, hihn er shee don meet di bradaz ahn sistaz fahn yu kangrigayshan aredi? Pauline, weh wi mi menshan erliya, mi invait bradaz ahn sistaz da ih hows soh dat ih hozban, Wayne, ku geh fi noa dehn.  Wayne memba how wahn brada mi help ahn fi andastan weh di Witnisiz dehn mi reeli stan laik. Hihn seh: “Hihn mi tek wahn day aaf fahn werk jos fi wach wahn baal gaym wid mi. Den Ah seh tu miself, ‘Hihn da wahn naamal persn!ʼ”

16. Wai wi shuda invait wi relitiv dehn fi aten meetinz?

¹⁶ Wan way fi help wi relitiv dehn da fi invait dehn fi goh da meetin wid wi. (1 Kor. 14:24, 25) Di fos meetin weh Wayne gaahn, da-mi di Memoaryal bikaaz da mi afta werk ahn da mi wahn shaat proagram. Wayne seh: “Ah neva andastan weh di taak mi bowt, bot Ah memba how di peepl dehn mi chreet mi. Dehn mi kom op tu mi ahn shayk mi han ahn welkom mi. Ah kuda mi tel dat dehn da gud peepl.” Wahn kopl, Henry ahn Sally, mi kain tu Pauline aredi. Dehn yoostu help Pauline wid ih son da meetin er wen dehn deh pahn feel servis. Soh wen Wayne mi disaid dat hihn need fi andastan moa bowt Pauline nyoo bileef, hihn mi aks Henry fi stodi di Baibl wid ahn.

17. Weh wi noh fi blaym wiself fa, bot wai wi noh fi giv op pahn wi relitiv dehn?

¹⁷ Wi hoap dat aala wi relitiv dehn wahn jain wi fi serv Jehoava. Bot, eevn doa wi werk haad fi chrai help wi relitiv dehn fi kohn fi bee servants a Jehoava, dehn mait noh kom eena di chroot. If dat da di kays, wi noh waahn blaym wiself fi di disizhan weh dehn mek. Aftaraal, wi kyaahn foas enibadi fi aksep weh wi bileev. Bot if yu relitiv dehn si how hapi yoo hapi bikaaz yu di serv Jehoava, ih ku afek dehn eena wahn gud way. Pray fi dehn. Taak tu dehn eena wahn kain way. Noh stap chrai fi help dehn! (Aks 20:20) Bee kanfident dat Jehoava wahn bles yu haad werk. Ahn if yu relitiv dehn chooz fi lisn tu yu, den dehn wahn geh sayv!