1. Weh Kristyanz need fi du fi finish di rays fi laif?

KRISTYANZ di ron eena wahn rays fi laif. Weda wi jos staat tu ron er wi deh eena dis rays fi yaaz, wi need fi kantinyu ron til wi kraas di finish lain. Di kongsl weh di apasl Paal mi gi Kristyanz da Filipai ku inkorij wee fi finish di rays. Som a di Kristyanz eena di kangrigayshan da Filipai mi-di serv Jehoava fi yaaz wen dehn mi geh Paal leta. Dehn mi aredi faytful eena dehn servis tu Jehoava, bot Paal mi rimain dehn dat dehn mi need fi kip di serv Jehoava ahn noh giv op. Hihn mi waahn mek dehn kip di fala fi hihn egzampl ahn “push fi reech di finishin lain.”—Fil. 3:14.

2. Wai di advais weh Paal mi gi di kangrigayshan da Filipai mi helpful?

² Di advais weh Paal mi gi di kangrigayshan da Filipai mi helpful. Di peepl da Filipai mi-di persikyoot di bradaz fahn eva sins di kangrigayshan mi faam. Di persikyooshan mi staat eena di yaa 50 C.E. wen Paal ahn Sailas mi aksep di invitayshan fahn Gaad fi ‘goh da Masidoanya.ʼ Soh dehn gaahn da Filipai fi preech di gud nyooz. (Aks 16:9) Rait dehsoh dehn mi fain wahn laydi weh naym Lidya, weh mi-di lisn, ahn “di Laad [er, “Jehoava,” NW] oapm fi shee haat” tu di gud nyooz. (Aks 16:14) Noh tu lang afta dat, shee an evribadi fan ih hows mi geh baptaiz. Bot di Devl neva mi-di play; ih mi staat tu kaaz lata chrobl. Sohn man fahn da siti mi jreg Paal ahn Sailas fronta di siti roolaz ahn di man dehn mi akyooz Paal ahn Sailas seh: “Dehnya man . . . di kaaz lata chrobl eena fi wee siti.” Weh mi hapm tu Paal ahn Sailas? Wel, dehn mi geh wahn gud beetn, dehn mi geh pich eena jayl, ahn den di siti roolaz mi aks dehn fi  lef di siti. (Aks 16:16-40) Yu tink Paal ahn Sailas mi giv op? Neva! Ahn how bowt di bradaz ahn sistaz eena di kangrigayshan weh mi jos geh faam? Dehn neva giv op needa! Fi shoar, dehn mi geh inkorij bai di gud egzampl weh Paal ahn Sailas mi set.

3. Weh Paal mi riyalaiz ahn weh kweschanz wi wahn kansida?

³ Paal mi mek op ih main fi neva giv op. (2 Kor. 4:16) Hihn mi noa dat fi mek ih kantinyu fi serv Jehoava til di en a ih laif, hihn wuda haftu stay foakos pan ih goal. Weh wi ku laan fahn Paal egzampl? Wat da sohn egzampl a faytful bradaz ahn sistaz tudeh weh shoa dat wi ku indyoar eevn doa wi ga prablemz? Ahn how wi hoap fi di fyoocha ku help wi fi mek op wi main fi neva giv op?

4. How Paal mi aybl fi stay bizi eena Jehoava servis noh mata wat da-mi ih sichuwayshan?

⁴ Tink bowt aal weh Paal mi-di du wen hihn mi rait tu di kangrigayshan da Filipai. Hihn mi deh anda hows ares da Roam. Hihn mi kyaahn goh owt ahn preech. Bot stilyet, hihn mi kip ihself bizi di preech tu vizitaz ahn di rait letaz tu ada kangrigayshanz. Jos laik dat, tudeh, lata Kristyanz weh haftu stay hoam maybi bikaaz a wahn siknis er oal ayj, tek advantij a evri apachooniti fi shayr di gud nyooz wid peepl weh kohn da dehn hows. Dehn aalso rait sohn inkorijin letaz tu peepl weh wi kyaahn meet fays-tu-fays.

5. Akaadn tu Filipiyanz 3:12-14, weh mi help Paal fi foakos pan ih goal?

⁵ Paal neva alow tingz weh hihn mi du eena di paas fi dischrak ahn fahn serv Jehoava. In fak, hihn mi seh dat hihn “di faget aal weh don deh bihain” soh dat hihn ku reech owt “fi geh weh deh heda” ahn. Dat meenz fi ron di rays tu di finish. (Reed Filipiyanz 3:12-14.) Wat da som a di tingz weh kuda mi dischrak Paal? Fos, Paal mi ga lata sokses monks di Jooz bifoa hihn mi kohn fi bee wahn Kristyan. Stil, hihn mi luk pahn dehndeh tingz laik loan “gyaabij.” (Fil. 3:3-8) Sekant, eevn doa hihn mosi mi feel gilti fi persikyoot di Kristyanz eena di paas, hihn neva alow dehndeh feelinz fi stap hihn fahn serv Jehoava. Ahn terd, hihn neva tink dat aal di gud tingz weh hihn mi du fi Jehoava mi gi hihn reezn fi stap werk haad. Paal mi du wahn lat eena di minischri eevn doa hihn mi geh pich eena jayl, geh flag, geh stoan, geh shiprek, ahn noh ga food ahn kloaz. (2 Kor. 11:23-27) Bot, noh mata weh aal hihn mi don du ahn weh aal hihn mi haftu sofa, Paal mi noa dat hihn mi fi kantinyu serv Jehoava. Wee fi du di saym.

6. Wat da som a di tingz “weh don deh bihain” weh wi mait need fi faget?

⁶ How wi ku kapi Paal egzampl ahn “faget aal weh don deh bihain”? Som a wi mait need fi get oava gilti feelinz fi weh wi mi du eena di paas. If dat da fi yoo kays, maybi yu ku staat wahn persnal stodi proajek weh foakos pahn Krais ransom sakrifais. If wi stodi, meditayt, ahn pray bowt di ransom, ih wahn help wi fi feel les gilti bowt wi paas sinz. Wi mait eevn stap feel gilti fi sinz weh Jehoava don fagiv wi fa. Kansida wahn nada impoatant lesn weh wi ku laan fahn Paal. Soh dat dehn ku put di Kingdom fers, som bradaz ahn sistaz lef wahn jab weh kuda mi mek dehn rich. If wee mi du dat, yu tink wi ku faget aal weh don deh bihain wi, maybi eevn mateeryal tingz, ahn noh wish wi mi stil gat dehn? (Num. 11:4-6; Eccl. 7:10) Di tingz “weh don deh bihain” ku aalso  inklood tingz weh wi du eena Jehoava servis er di chraiyalz weh wi mi indyoar eena di paas. Af koars, wen wi luk bak pahn di way Jehoava bles wi ahn sopoat wi oava di yaaz, ih help wi fi jraa kloasa tu wi Faada. Bot, wi neva waahn tink dat wi don du inof ahn dat wi werk don.—1 Kor. 15:58.

7. Akaadn tu 1 Korintyanz 9:24-27, how Paal mi seh wahn Kristyan fi ron di rays fi laif? Yooz di egzampl eena di paragraaf.

⁷ Paal mi andastan Jeezas werdz gud: “Unu beta chrai unu bes.” (Look 13:23, 24) Paal mi noa dat, laik Krais, hihn mi fi du ih bes ih hoal laif. Soh dats wai hihn mi kompyaa wi laif az wahn Kristyan tu wahn rays. (Reed 1 Korintyanz 9:24-27.) Wahn rona weh di ron eena wahn rays foakos pahn di finish lain ahn noh mek tingz rong ahn dischrak ahn. Yu tink dat sombadi weh di ron eena wahn rays chroo wahn tong er wahn siti wuda stap ahn luk pahn tingz weh deh eena di difrent shap dehn? Af koars ih wudn du dat if ih waahn win! Eena di rays fi laif, wee need fi stay foakos. If wi stay foakos pahn wi goal, ahn kip di du wi bes jos laik Paal, wi wahn win di praiz!

8. Weh chree chalenjiz wi wahn kansida?

⁸ Mek wi kansida chree chalenjiz weh ku sloa wi dong er diskorij wi. Di fos wan da wen tingz noh hapm wen wi ekspek. Di sekant wan da wen wi geh weeka az wi geh oalda, ahn di terd wan da wen wi fays prablemz weh noh goh weh. Wee ku benifit wen wi laan how adaz koap wid dehnya chalenjiz.—Fil. 3:17.

9. How tingz weh noh hapm wen wi ekspek dehn fi hapm ku afek wi?

⁹ Wen tingz noh hapm wen wi ekspek. Ih nachral fi mek wi hoap fi di gud tingz weh Jehoava pramis. In fak, wen di prafit Habakok mi seh humoch hihn mi waahn mek Jehoava en wikidnis da Jooda, Jehoava mi tel ahn fi “kip di lukowt” fi di en. (Hab. 2:3) Bot wen tingz weh wi ekspek fi hapm noh hapm wen wi ekspek, wi ku looz wi  zeel. Wi ku eevn geh diskorij. (Prov. 13:12) Dis mi hapm tu som a wi bradaz rong di yaa1914. Rong da taim, lata anointid bradaz mi ekspek fi goh da hevn. Bot, wen dat neva hapm, how di faytful bradaz mi deel wid dehn disapointment?

10. Weh wahn kopl mi du wen weh dehn mi-di hoap fa neva hapm wen dehn mi ekspek it fi hapm?

¹⁰ Kansida di egzampl a too laayal Kristyanz weh mi get oava da chalenj. Brada Royal Spatz mi geh baptaiz eena 1908 wen ih mi 20 yaaz oal. Hihn mi shoar dat hihn mi wahn soon goh da hevn. In fak, wen hihn mi propoaz eena 1911, hihn mi tel ih fyoocha waif, Pearl: “Yoo noa weh wahn hapm eena 1914, noh chroo? If wi wahn geh marid, wi beta noh ways taim!” Yu tink dis Kristyan kopl mi giv op eena di rays fi laif wen dehn neva gaahn da hevn eena 1914? No, bikaaz fi dehn mayn goal da-mi fi du di wil a Gaad, noh fi goh da hevn. Dehn mi mek op dehn main fi ron di rays ahn noh giv op. Royal ahn Pearl mi stay aktiv ahn faytful til dehn ded meni yaaz layta. Fi shoar yoo di luk faawod tu di taim wen Jehoava wahn klayr ih naym ahn proov dat fi hihn roolaship rait, ahn wen hihn wahn fulfil aala ih pramis dehn. Yu ku bee shoar dat Jehoava wahn mek dehnya tingz hapm rait pahn taim. Til da taim kohn, mek wi kip bizi di serv wi Gaad, ahn noh alow tingz weh noh hapm wen wi ekspek fi sloa wi dong er diskorij wi.

11-12. Wai wi ku kantinyu eena wi faytful servis tu Jehoava eevn if wi noh az schrang az bifoa? Yooz di egzampl eena di paragraaf.

¹¹ Wen wi geh weeka az wi geh oalda. Wahn rona need lata enerji wen ih di ron eena wahn rays, bot fi groa spirichwali schrang, yu noh need fi bee schrang fizikali. In fak, lata bradaz ahn sistaz weh noh fizikali schrang nohmoh, stil waahn gi Jehoava dehn bes. (2 Kor. 4:16) Fi egzampl, wen Brada Arthur Secord * mi 88 yaaz oal, hihn mi don serv da Betel fi 55 yaaz. Bai den, ih mi aredi week an ih helt mi-di geh wos. Wahn ners gaahn kloas tu ih bed, shee mi luk pan ahn an seh: “Brada Secord, yu don du wahn lat fi Jehoava.” Bot Brada Secord neva mi-di foakos pahn weh ih mi don du. Hihn mi luk pahn shee ahn smail an ih ansa ahn: “Yes, da chroo dat. Bot da noh weh wi don du weh impoatant. Weh konk da weh wi di du now.”

¹² Maybi yu don serv Jehoava fi lata yaaz ahn now yu si dat yu helt noh di alow yu fi du az moch az yu yoostu. If dat da yu kays, noh geh diskorij. Yu ku bee shoar  dat Jehoava memba ahn cherish aal weh yu mi du far ahn eena di paas. (Heeb. 6:10) Ahn fi now, memba dat da noh humoch wi du fi Jehoava weh shoa humoch wi lov ahn. Raada, wi shoa humoch wi lov Jehoava wen wi kip wi jai ahn wen wi du aal wi kud. (Kol. 3:23) Jehoava noa weh wi ku du an weh wi kyaahn du, an ih noh ekspek wi fi du moa dan wi kud.—Maak 12:43, 44.

13. Weh hapm tu Anatoly ahn Lidiya ahn how dat inkorij wee fi kantinyu serv Jehoava, eevn if wi fays wahn lata chraiyalz aredi?

¹³ Wen wi fays prablemz weh noh goh weh. Som a Jehoava servants gaahn chroo chraiyalz ahn persikyooshan fi meni yaaz. Fi egzampl, Anatoly Melnik * mi jos 12 yaaz oal wen di ataritiz mi ares ih pa, put ahn eena jayl, ahn sen ahn da Siberia weh deh moa dan 4,000 mailz (7,000 km) fan ih famili da Moldova. Wan yaa layta, Anatoly, ih ma, an ih granpayrents mi aalso geh sen da Siberia. Laytaraan, dehn mi aybl fi goh da meetinz da wahn nada vilij, bot dehn mi haftu waak 20 mailz (30 km) eena di snoa, eena koal koal weda. Layta, Brada Melnik mi spen chree yaaz eena jayl, faar fahn ih waif, Lidiya, ahn dehn wan-yaa-oal daata. Eevn doa dehn mi haftu goh chroo soh moch, Anatoly an ih famili mi stay faytful tu Jehoava. Anatoly now 82 yaaz oal, an ih di serv az wahn memba a di Branch Komiti da Central Asia. Mek wi kapi Anatoly ahn Lidiya egzampl, mek wi du aal wi kud eena Jehoava servis ahn kantinyu fi bayr op jos laik wi mi du eena di paas.—Gal. 6:9.

14. Weh Paal mi riyalaiz hihn mi haftu du fi reech ih goal?

¹⁴ Paal mi shoar dat hihn mi wahn finish di rays ahn reech ih goal. Az wahn anointid Kristyan, hihn mi luk faawod fi di praiz weh “da di laif weh wahn neva en.” Bot, fi reech da goal, hihn mi riyalaiz dat hihn mi haftu kip “di push fi reech di finishin lain.” (Fil. 3:14) Paal mi yooz wahn inchrestin iloschrayshan fi help di Kristyanz da Filipai fi kip foakos pahn dehn goal.

15. How Paal mi yooz di sobjek a sitiznship fi inkorij di Kristyanz da Filipai fi kip “di push fi reech di finishin lain”?

¹⁵ Paal mi rimain di Kristyanz da Filipai dat dehn mi wahn bee wahn sitizn  a hevn. (Fil. 3:20) Wai dehn mi need fi memba dat? Wel, eena dehn dayz, peepl mi reeli waahn bee wahn Roaman sitizn bikaaz dehn wuda mi geh lata benifits. * Bot, anointid Kristyanz da-mi sitiznz a wahn faar beta govament, wahn govament weh wuda gi dehn way moa benifits. Now, wen yu kompyaa dehnya too sitiznship, fi bee wahn Roaman sitizn wudn ga az moch valyu az fi bee wahn sitizn a hevn! Sayka dis, Paal mi inkorij di Kristyanz da Filipai fi “ak eena wahn kaina way [er, “az wahn sitizn,” ftn. NW] weh wahn shoa dat [dehn] bileev eena di Gud Nyooz bowt Jeezas Krais.” (Fil. 1:27) Anointid Kristyanz tudeh set wahn gud egzampl az dehn kip di push fi reech dehn goal fi liv fareva da hevn.

16. Akaadn tu Filipiyanz 4:6, 7, weh wi fi kantinyu fi du weda wi hoap da fi liv da hevn er pahn ert?

¹⁶ Weda wi di hoap fi liv fareva da hevn er pahn ert, wi fi kantinyu push faawod tuwaadz da goal. Noh mata weh aal wi haftu goh chroo, wi noh fi tink bowt di tingz weh wi don lef bihain; wi noh fi mek eniting stap wi fahn serv Jehoava. (Fil. 3:16) Wi mait di wayt fi wahn lang taim fi si Jehoava pramis dehn kohn chroo, ahn wi mait noh yong ahn schrang nohmoh. Wi mait don gaahn chroo wahn lat, maybi eevn chroo persikyooshan fi lata yaaz. Bot noh mata wat da di kays, wi “noh fi wori bowt notn.” Insteda dat, pray an aks Gaad fi evriting, ahn hihn wahn gi yu wahn kaina pees weh beta dan eniting yu ku imajin.—Reed Filipiyanz 4:6, 7.

17. Weh wi wahn kansida eena di neks aatikl?

¹⁷ Jos laik sombadi weh di ron eena wahn rays ahn weh di foakos pahn di finishin lain, wee shuda aalso stay foakos pahn di goal fi reech di finishin lain. Mek wi win di rays fi laif. Mek wi foakos pahn di wandaful pramis dehn fi di fyoocha az wi di geh kloasa tu di en a wi rays. Wi waahn du dis now az moch az wi kud. Weh ku help wi fi noh giv op? Di neks aatikl wahn help wi fi noa weh fi put fers eena wi laif ahn how wi ku “mek shoar a di moa impoatant tingz.”—Fil. 1:9, 10, NW.