1. Wai Jehoava kriyayt laif?

DEHN mi ga wahn taim wen Jehoava mi deh bai ihself, bot dis neva meen dat ih mi feel loanli. Jehoava noh need nobadi fi deh wid ahn fi bee hapi. Bot hihn mi waahn adaz fi liv ahn bee hapi tu. Soh owta lov, hihn mi staat tu kriyayt evriting.—Ps. 36:9; 1 Jan 4:19.

2. How Jeezas ahn di aynjel dehn mi feel bowt aal weh Jehoava mi kriyayt?

² Fers, Jehoava mi mek ih Son, Jeezas. Den, Jehoava lang wid ih Son “mek evriting weh deh eena hevn ahn weh deh pahn ert,” fi egzampl, dehn mek aala di aynjel dehn. (Kol. 1:16) Jeezas mi reeli hapi fi werk lang wid ih Pa. (Prov. 8:30) Ahn di aynjel dehn mi hapi tu. Dehn mi deh rait deh ahn dehn mi si wen Jehoava an ih Maasta Werka, Jeezas, mi-di mek di hevnz ahn di ert. Weh di aynjel dehn mi du fi shoa dat dehn hapi? Di aynjel dehn mi prayz Gaad wen hihn mi kriyayt di ert. Dehn mi kantinyu fi prayz ahn wen dehn mi si evriting els weh hihn mek, espeshali hyoomanz. (Job 38:7; Prov. 8:31, ftn.) Evriting weh Jehoava mek teech wi bowt ih wizdom ahn lov.—Ps. 104:24; Roam. 1:20.

3. Laik weh 1 Korintyanz 15:21, 22 seh, weh wi ku geh sayka Jeezas ransom sakrifais?

³ Jehoava mi waahn mek hyoomanz liv fareva pahn di byootiful ert weh hihn mi kriyayt. Bot Adam ahn Eev mi sin gens dehn lovin Faada, ahn soh dehn kudn liv fareva. Sayka  dat, dehn ahn dehn disendant dehn mi wahn ded. (Roam. 5:12) Weh Jehoava mi du? Rait away, hihn mi seh weh ih mi wahn du fi reskyu hyoomanz. (Gen. 3:15) Jehoava mi wahn giv ih Son, Jeezas, az wahn ransom sakrifais soh dat Adam ahn Eev disendant dehn ku geh free fahn sin ahn det. Den Jehoava wahn giv evalastin laif tu eech persn weh chooz fi serv ahn.—Jan 3:16; Roam. 6:23; reed 1 Korintyanz 15:21, 22.

4. Weh kweschanz wi wahn diskos eena dis aatikl?

⁴ Wi ga lata kweschanz weh wi ku aks bowt Gaad pramis a di rezorekshan. Kweschanz laik: How di rezorekshan wahn hapm? Wi wahn ku rekonaiz wi famili er frenz wen dehn geh rezorek? How di rezorekshan wahn mek wi hapi? Ahn weh di rezorekshan teech wi bowt Jehoava lov, wizdom, ahn payshens? Mek wi fain di ansa tu eech wan a dehn kweschan.

5. Wai wi ku ekspek dat noh evribadi wahn geh rezorek da di saym taim?

⁵ Bikaaz a Jeezas ransom sakrifais, Jehoava wahn rezorek wahn lata lata peepl. Bot praabli noh evribadi wahn geh rezorek da di saym taim. Wai nat? Bikaaz if wahn lata peepl mi geh rezorek saym taim, tingz mi wahn get owta kanchroal. Ahn dat da noh di way how Jehoava du tingz. Evriting weh hihn du, hihn du eena aada. Hihn noa dat evriting need fi deh eena aada soh dat peepl ku liv eena pees. (1 Kor. 14:33) Jehoava mi waiz ahn payshent wen ih mi-di werk lang wid Jeezas fi pripyaa di ert fi mek hyoomanz liv pan it. Saym way soh, Jeezas wahn shoa dehndeh saym kwalitiz joorin ih Towzn-Yaa Rool. Hihn wahn werk lang wid peepl hoo servaiv Armagedon wail dehn bil hows, pripyaa food, an ada tingz weh peepl weh rezorek wahn need.

6. Akaadn tu Aks 24:15, hoo aal Jehoava wahn rezorek?

 ⁶ Di moas impoatant way how di peepl weh servaiv Armagedon wahn help peepl weh geh rezorek, da wen dehn teech dehn bowt Gaad Kingdom ahn weh Jehoava ekspek fahn hyoomanz. Wai? Bikaaz moas a di peepl weh kohn bak tu laif wahn bee “peepl weh neva raichos.” (Reed Aks 24:15, NW.) * Di peepl weh Jehoava rezorek wahn haftu mek wahn lata chaynjiz fi mek dehn ku geh di blesinz a Krais ransom sakrifais ahn liv fareva. Jos tink bowt humoch werk wahn deh fi teech milyanz a peepl weh noh noa notn bowt Jehoava. How dehn wahn laan di chroot bowt Gaad? Yu tink eech persn wahn ga sombadi fi teech dehn saym laik how wi kandok Baibl stodiz tudeh? Weh wahn hapm tu peepl weh laan di chroot joorin dis taim? Yu tink dehn wahn geh asain tu wahn kangrigayshan ahn geh chrayn fi teech peepl weh geh rezorek afta dehn? Wel, wi wahn haftu wayt ahn si. Bot wi doo noa dat di “ert wahn bee ful op a di nalij a Jehoava” bai di en a Krais Towzn-Yaa Rool. (Isa. 11:9) Da taim wahn bee bizi! Wi wahn ku injai di du lata gud werk joorin di towzn yaaz.

7. Wai Gaad peepl wahn shoa dat dehn kay bowt di peepl weh dehn teech?

⁷ Joorin Krais Towzn-Yaa Rool, aala Jehoava peepl wahn haftu kantinyu fi mek chaynjiz eena dehn laif fi pleez hihn. Soh aala dehn wahn reeli shoa dat dehn kay bowt adaz. Dehn wahn help peepl weh geh rezorek fi fait rang tinkin ahn dizaiyaz ahn fi liv bai Jehoava standadz. (1 Peet. 3:8) Fi shoar, evribadi weh geh rezorek wahn si dat Jehoava peepl hombl ahn dat dehn stil di mek chaynjiz eena dehn laif fi pleez hihn, ahn dehn saym peepl weh geh rezorek wahn waahn wership Jehoava lang wid dehn.—Fil. 2:12.

8. Wai wi ku ekspek fi rekonaiz peepl weh geh rezorek?

⁸ Dehn ga wahn lata reezn wai wi ku ekspek fi rekonaiz wi famili er frenz weh geh rezorek. Fi egzampl, bikaaz a di way Jehoava mi rezorek peepl eena di paas, wi ku ekspek dat Jehoava wahn bring dehn bak egzakli how dehn mi stan lee wail bifoa dehn ded. Dehn wahn luk, tink, ahn taak di saym way laik eena di paas. Memba dat Jeezas mi kompyaa det tu sleep ahn hihn mi seh dat di rezorekshan da laik wen yu di wayk op sombadi weh di sleep. (Mach. 9:18, 24; Jan 11:11-13) Wen sombadi wayk op, dehn luk ahn song di saym way how dehn mi luk ahn song bifoa dehn gaahn sleep. Ahn dehn ga di saym memriz. Mek wi luk pahn Lazaros egzampl. Hihn mi don ded fi foa dayz, soh ih badi mi don staat tu ratn. Bot, wen Jeezas mi bring Lazaros bak tu laif, ih sista dehn mi rekonaiz ahn az dehn si ahn, an Lazaros mi memba dehn.—Jan 11:38-44; 12:1, 2.

9. Wai peepl weh geh rezorek noh wahn kom bak wid wahn perfek main ahn badi?

⁹ Mek wi kansida di sekant reezn. Jehoava pramis dat eena Paradais nobadi wahn seh: “Ah sik.” (Isa. 33:24; Roam. 6:7) Soh, di peepl weh geh rayz op bak fahn di ded wahn bee helti. Bot dehn noh wahn bee perfek rait away. Adawaiz, dehn famili ahn frenz mait noh rekonaiz dehn. Ih luk laik hyoomanz wahn geh perfek lee bit bai lee bit joorin Krais Towzn-Yaa Rool. Da onli afta di towzn yaaz finish, Jeezas wahn han oava bak di Kingdom tu ih Pa. Da den di  Kingdom wahn don du evriting weh Jehoava mi waahn ih du. Bai den, aal hyoomanz wahn bee perfek.—1 Kor. 15:24-28; Rev. 20:1-3.

10. How di rezorekshan wahn mek yoo feel?

¹⁰ Jos imajin how yoo wahn feel wen yu meet yu famili ahn frenz weh geh rezorek. Weh yu tink? Di jai weh yu wahn feel wahn mek yu krai er laaf? Yu wahn bee soh hapi dat yu wahn prayz Jehoava wid sang? Wi ku bee shoar dat wi wahn lov wi Faada an ih Son wahn lat bikaaz dehn lov wi ahn kay fi wi soh moch dat dehn mek di rezorekshan hapm.

11. Akaadn tu weh Jeezas seh da Jan 5:28, 29, weh wahn hapm tu di peepl weh obay Gaad raichos standadz?

¹¹ Imajin how hapi di peepl weh geh rezorek wahn feel az dehn mek chaynjiz soh dat dehn ku obay Gaad raichos standadz. If dehn mek dehnya chaynjiz, dehn wahn geh di apachooniti fi liv fareva eena Paradais. Pahn di ada han, Jehoava noh wahn alow dehn wan weh noh obeedyant ahn weh disterb di pees fi kantinyu liv eena Paradais.—Isa. 65:20; reed Jan 5:28, 29.

12. How Jehoava wahn bles evribadi pahn ert?

¹² Evribadi weh liv anda Gaad Kingdom wahn si dat weh Proverbs 10:22 seh da chroo. Ih seh: “Blesinz fahn Jehoava da weh mek wahn persn rich, ahn Hihn noh ad aan no payn wid it.” Wid di help a Jehoava hoali spirit, Gaad peepl wahn staat tu bee moa ahn moa laik Krais. An az taim paas, dehn wahn geh perfek. (Jan 13:15-17; Ifee. 4:23, 24) Aalso, evri day dehn wahn geh schranga ahn heltiya; dehn wahn bee beta peepl. Dat wahn bee wahn hapi taim fi chroo! (Job 33:25) If wi meditayt pahn di rezorekshan, how dat wahn help wi tudeh?

13. Weh Psalm 139:1-4 tel wi bowt how gud Jehoava noa wi, ahn how di rezorekshan wahn proov dis?

¹³ Laik weh wi mi diskos erliya, wen Jehoava rezorek peepl, hihn wahn mek dehn ga di saym memriz ahn dehn wahn bee di saym persn laik eena di paas. Jos tink bowt weh dat meen. Jehoava lov yoo wahn lat ahn dats wai ih noatis ahn memba evriting weh yu tink, feel, seh, ahn du. Soh if Jehoava wuda haftu rezorek yoo, ih wahn eezi fi mek hihn gi yu aala di kwalitiz ahn memriz weh yu mi ga eena di paas. King Dayvid mi noa dat Jehoava noa eech wan a wi gud. (Reed Psalm 139:1-4.) * How wi feel wen wi andastan how gud Jehoava noa wi?

14. How wi sopoas tu feel wen wi tink bowt how gud Jehoava noa wi?

¹⁴ Wi noh haftu wori wen wi tink bowt how gud Jehoava noa wi. Wai? Memba dat Jehoava lov wi wahn lat. Eech wan a wi speshal tu Jehoava. Jehoava noa evriting weh mek wi bee hoo wee tudeh. Hihn pay atenshan tu evriting weh hapm tu wi eena wi laif. Dis veri komfertin! Wi shuda neva feel laik wi deh bai wiself. Jehoava aalwayz deh rait bai wi said, an ih waahn help wi.—2 Chron. 16:9.

15. How di rezorekshan proov dat Jehoava waiz?

¹⁵ If sombadi frayd fi ded, dehn enimi ku yooz dat gens dehn ahn chretn fi kil dehn. Di peepl weh deh anda Saytan kanchroal  fraitn peepl fi mek dehn du sohnting weh dehn noa noh rait. Bot dehn kyaahn foas wee fi du dat. Wi noa dat if wi enimi dehn kil wi, Jehoava wahn rezorek wi. (Rev. 2:10) Wi noa dat notn weh dehn du ku mek wi stap serv Jehoava. (Roam. 8:35-39) Di rezorekshan hoap shoa wi Jehoava wizdom. Bikaaz a dat, wi noh frayd fi wi enimi dehn weh chretn fi kil wi if wi noh du weh dehn seh. Aalso, dis hoap gi wi korij an ih mek wi waahn stay laayal tu Jehoava.

16. Weh kweschanz yu need fi aks yuself, ahn how di ansa wahn help yoo fi noa humoch yu chros Jehoava?

¹⁶ If Jehoava enimi dehn chretn fi kil yu, yoo wilin fi chros dat Jehoava wahn rezorek yu? How yu ku noa if yoo ku chros Jehoava wen dat hapm? Wan way da if yu aks yuself, ‘Di smaal disizhan dehn weh Ah mek eena mi laif proov dat Ai chros eena Jehoava?ʼ (Look 16:10) Wan nada kweschan ku bee, ‘Di way how Ai spen mi taim ahn moni proov dat Ai chros eena Jehoava pramis fi tek kayr a mi mateeryal needz if Ai mek di Kingdom kohn fers eena mi laif?ʼ (Mach. 6:31-33) If yu ansa da yes, den yu proov dat yu chros eena Jehoava. Ahn wen chraiyalz kohn yu way eena di fyoocha, yu wahn noa dat Jehoava wahn help yu.—Prov. 3:5, 6.

17. (a) How di rezorekshan shoa dat Jehoava ga payshens? (b) How wee ku shoa Jehoava dat wi apreeshiayt ih payshens?

¹⁷ Jehoava don disaid wen hihn wahn dischrai dis wikid sistem. (Mach. 24:36) Hihn noh wahn ron owta payshens ahn dischrai dis sistem bifoa di taim weh ih set. Jehoava reeli waahn rezorek peepl weh ded, bot hihn payshent. (Job 14:14, 15) Hihn di wayt fi di rait taim fi bring peepl bak tu laif. (Jan 5:28) Bikaaz Jehoava payshent wid wi, wi ga wahn lata reezn fi bee graytful. Jos tink: Bikaaz Jehoava payshent, wahn lata peepl, inkloodin wee, ga taim fi ‘ton fahn wi sin dehn.ʼ (2 Peet. 3:9) Jehoava waahn evribadi ga di apachooniti fi liv fareva. Soh mek wi shoa Jehoava dat wi graytful fi ih payshens. How wi ku du dat? Wi ku du dat wen wi du wi bes fi chrai fain peepl weh “ga di rait haat kandishan fi get evalastin laif” ahn help dehn fi kohn fi lov ahn serv Jehoava. (Aks 13:48) Den, jos laik wee, dehn wahn ku benifit fahn Jehoava payshens.

18. Wai wi shuda bee payshent wid adaz?

¹⁸ Jehoava wahn bee payshent ahn wayt til di en a Krais Towzn-Yaa Rool bifoa ih ekspek wi fi bee perfek. Til den, Jehoava  wilin fi fergiv wi sin dehn. Soh wi ga reezn fi bee payshent wid adaz ahn luk fi di gud eena dehn. Kansida di egzampl a wan sista hozban weh mi wori soh moch dat ih mi staat ga panik atak. Hihn mi eevn stap goh da meetin. Ih waif seh: “Dis neva eezi fi deel wid. Jos laik dat, wi laif mi chaynj ahn wi kudn du di tingz weh wi mi plan fi du agen.” Bot aal chroo dat, dis waif mi chreet ih hozban wid lov ahn payshens. Shee mi pen pahn Jehoava ahn neva giv op. Laik Jehoava, shee neva foakos pahn di bad bot pahn di gud tingz bowt ih hozban. Shee seh, “Mai hozban ga lata gud kwalitiz an ih di du ih bes fi get oava ih woriz, lee bit bai lee bit.” Ih veri impoatant fi mek wi ga payshens wen wi di deel wid wi famili membaz ahn wi bradaz ahn sistaz eena di kangrigayshan weh di chrai fi deel wid dehn difrent chraiyalz!

19. Weh wi shuda mek op wi main fi du?

¹⁹ Wen Jehoava mi mek di ert, Jeezas ahn di aynjelz mi reeli hapi. Bot imajin how hapi dehn wahn bee wen dehn si peepl weh lov Jehoava di ful op di ert. Imajin how hapi anointid Kristyanz weh gwehn da hevn wahn feel wen dehn si peepl pahn di ert di benifit fahn dehn werk. (Rev. 4:4, 9-11; 5:9, 10) An imajin wen peepl wahn krai bikaaz dehn hapi insteda krai bikaaz a payn. Dehn noh wahn sofa, feel payn, ner ded nohmoh, bikaaz aala dat wahn gaahn fareva. (Rev. 21:4) Til da taim kohn, mek wi mek op wi main fi fala di egzampl a wi lovin, waiz, ahn payshent Faada. If yu du dat, yu wahn kantinyu fi bee hapi eevn wen yu di goh chroo chraiyalz. (Jay. 1:2-4) Wi soh tankful dat Jehoava pramis dat wan day ih “wahn rayz op bak” peepl fahn di ded!—Aks 24:15, NW.