1. Weh Dayvid mi seh bowt how hombl Jehoava hombl?

WEE ku seh dat Jehoava hombl? Yes, wi kud. Dayvid mi seh: “Yu gi mi yu sheel fi protek mi, ahn sayka weh yoo soh hombl, yoo mek Ai bee grayt.” (2 Sam. 22:36; Ps. 18:35) Maybi Dayvid mi-di tink bowt di day wen Samwel mi gaahn da Dayvid pa hows fi anoint di neks king a Izrel. Eevn doa Dayvid da-mi Jesi yongis son, hihn da-mi di wan weh Jehoava mi pik fi bee di neks king afta King Saal.—1 Sam. 16:1, 10-13.

2. Weh wi wahn laan eena dis aatikl?

² Fi shoar Dayvid wuda mi agree wid weh Psalm 113 seh bowt Jehoava: “Hihn stup dong fi luk pahn hevn an ert, ahn fi rayz poa peepl fahn di dos. Hihn lif op di poa peepl . . . fi mek dehn sidong wid impoatant peepl.” (Ps. 113:6-8) Eena dis aatikl, wi wahn luk pahn how Jehoava shoa dat ih hombl, ahn wi wahn si sohn lesn weh wi ku laan fahn fi hihn egzampl. Wi wahn aalso laan moa bowt weh ih meenz fi bee hombl fahn di egzampl a King Saal, di prafit Danyel, ahn Jeezas.

3. How Jehoava deel wid wi, ahn weh dat shoa wi?

³ Jehoava shoa wi dat ih hombl bai di way how hihn deel wid hyoomanz weh noh perfek. Hihn noh onli aksep  wi wership, bot hihn aalso tek wi az ih fren. (Ps. 25:14) Jehoava mi tek di fers step wen ih mi gi wi ih Son az wahn sakrifais fi wi sinz soh dat wi ku bee fi hihn fren. Jehoava ga lata mersi ahn kompashan fi chroo!

4. Weh Jehoava gi wi, ahn wai?

⁴ Tink bowt wahn nada way how Jehoava shoa dat ih hombl. Az di Kriyayta, Jehoava kuda mi mek wi widowt di freedom fi chooz weh wi wahn du wid wi laif. Bot hihn neva du dat. Ih mek wi wid kwalitiz laik hihn an ih gi wi di freedom fi chooz fi wiself weh wi wahn du. Eevn doa wi smaal ahn week wen wi kompyaa wiself tu Jehoava, di chois dehn weh wi mek stil impoatant tu hihn. Hihn waahn wi chooz fi serv ahn fahn wi haat bikaaz wi lov ahn, an wi si how wi benifit wen wi obay ahn. (Deut. 10:12; Isa. 48:17, 18) Wi reeli graytful dat Jehoava soh hombl!

5. How Jehoava teech wi fi bee hombl? (Koment pahn di picha pahn di kova.)

⁵ Wi ku laan how fi bee hombl fahn di way how Jehoava deel wid wi. Jehoava moa waiz dan enibadi els eena di hoal yoonivers. Eevn doa hihn noh haftu aks nobadi fi advais, hihn wilin fi aksep sojeshanz fahn ada peepl. Fi egzampl, Jehoava mi alow ih Son fi help ahn kriyayt evriting. (Prov. 8:27-30; Kol. 1:15, 16) An eevn doa Jehoava da di Almaiti, hihn aalso gi adaz sohn rispansabiliti. Fi egzampl, hihn mi apoint Jeezas fi bee King a di Kingdom, an Ih wahn giv atariti tu di 144,000 hyoomanz weh wahn rool lang wid Jeezas. (Look 12:32) Af koars, Jehoava da di Wan weh mi chrayn Jeezas fi bee King ahn Hai Prees. (Heeb. 5:8, 9) Hihn aalso chrayn di peepl weh wahn rool lang wid Jeezas fi mek dehn ku du di werk weh hihn gi dehn fi du. Bot  hihn noh chrai kanchroal how dehn du di werk. Insteda dat, hihn chros dehn fi du weh hihn waahn dehn du.—Rev. 5:10.

6-7. Weh wi ku laan fahn wi hevnli Faada bowt how fi gi rispansabiliti tu adaz?

⁶ Wi hevnli Faada noh need help fahn nobadi, bot hihn stil gi rispansabiliti tu adaz. How bowt wee? Wee haftu du di saym ting! Fi egzampl, yoo da di hed a yu famili er wahn elda eena di kangrigayshan? Fala Jehoava egzampl ahn gi rispansabiliti tu adaz, ahn noh chrai kanchroal how dehn du di werk. Wen yu fala Jehoava egzampl, yu noh onli wahn finish di werk bot yu wahn aalso chrayn adaz ahn help dehn fi bee moa shoar a dehnself. (Isa. 41:10) Wat els peepl weh ga atariti ku laan fahn Jehoava?

⁷ Di Baibl shoa dat Jehoava waahn noa weh fi hihn aynjel dehn tink. (1 Ki. 22:19-22) If yoo ga chiljren, how yu ku fala Jehoava egzampl? If di sichuwayshan alow it, aks yu chiljren how dehn tink unu shuda du sohnting. An if pasabl, tek dehn sojeshanz.

8. How Jehoava mi shoa dat ih ga payshens wen ih mi-di deel wid Aybraham ahn Saara?

⁸ Wahn nada way how Jehoava shoa dat ih hombl da wen ih shoa payshens. Fi egzampl, wen ih servant dehn aks ahn kweschanz bowt ih disizhanz Jehoava shoa payshens. Hihn mi lisn tu Aybraham wen Aybraham mi tel ahn dat ih tink ih neva rait fi dischrai Sadam ahn Gomora. (Gen. 18:22-33) Memba how Jehoava mi deel wid Aybraham waif, Saara, wen shee mi laaf kaaz Hihn mi pramis dat shee mi wahn geh pregnant eena ih oal ayj? (Gen. 18:10-14) Hihn neva geh ofendid wen shee mi du dat. Insteda dat, hihn mi chreet ahn wid rispek.

9. Weh payrents an eldaz ku laan fahn Jehoava egzampl?

⁹ If yoo da wahn payrent er wahn elda, weh yoo ku laan fahn Jehoava egzampl? Weh yoo du wen yu chiljren er sombadi eena di kangrigayshan noh gree wid yu disizhanz? Yoo kwik fi difen yuself ahn tel dehn dat dehn rang? Er yoo chrai fi andastan weh dehn di chrai eksplayn tu yu? Wen sombadi weh ga atariti fala Jehoava egzampl, di famili ahn di kangrigayshan benifit. Soh faar, wi don diskos weh wi ku laan bowt hyoomiliti fahn Jehoava egzampl. Now mek wi si weh wi ku laan fahn sohn ada egzampl eena di Baibl bowt how wi ku shoa dat wi hombl.

10. How Jehoava yooz ada peepl egzampl fi teech wi?

¹⁰ Az wi “Gran Inschrokta,” Jehoava provaid egzamplz eena fi hihn Werd di Baibl fi teech wi. (Isa. 30:20, 21) Wen wi tink bowt egzamplz a peepl eena di Baibl weh shoa gaadli kwalitiz, wi laan weh wi ga di rait fi du ahn weh wi noh ga di rait fi du. Wi aalso laan fahn di egzampl a dehn wan weh neva ga dehndeh byootiful kwalitiz.—Ps. 37:37; 1 Kor. 10:11.

11. Weh wi ku laan fahn di bad egzampl weh King Saal mi set?

¹¹ Tink bowt weh mi hapm tu King Saal. Fers, hihn da-mi wahn hombl yong man. Hihn mi noa weh hihn kuda du ahn weh hihn kudn du, ahn hihn mi eevn hezitayt bifoa ih aksep moa rispansabiliti. (1 Sam. 9:21; 10:20-22) Bot stil, Saal mi geh prowd an ih mi du sohn tingz weh ih neva ga no rait fi du. Hihn mi staat tu ak dis way lee bit afta ih mi ton king.  Wan taim, ih mi looz ih payshens wail ih mi-di wayt fi di prafit Samwel. Insteda chros dat Jehoava mi wahn protek ih peepl, Saal gaahn hed an aafa op wahn sakrifais pahn di alta eevn doa hihn neva ga no rait fi du dat. Sayka dat, Jehoava neva pleez wid Saal an Ih mi rijek ahn az king. (1 Sam. 13:8-14) Wi shoa dat wi waiz if wi laan fahn dis bad egzampl ahn noh du tingz weh wi noh ga di rait fi du.

12. Wai Danyel da wahn gud egzampl fi wee?

¹² Sins wi don kansida Saal bad egzampl, mek wi kansida di prafit Danyel gud egzampl. Aal chroo Danyel laif, hihn mi stay hombl an ih mi aalwayz aks Jehoava fi gaid ahn. Fi egzampl, wen Jehoava mi yooz ahn fi eksplayn Nebyukadneza jreem, Danyel neva seh dat da hihn wan mi gi di eksplanayshan. Insted, ih mi hombl ahn giv aal di aana tu Jehoava. (Dan. 2:26-28) Wat da di lesn fi wee? If bradaz ahn sistaz tel wi dat dehn laik wi taak dehn er wi ga sohn gud ekspeeryens eena di minischri, wi shuda giv aal di prayz an aana tu Jehoava. Wi shuda riyalaiz dat wi kyaahn du dehnya tingz widowt Jehoava help. (Fil. 4:13) Wen wi du dat, wi aalso di fala Jeezas perfek egzampl. How?

13. Weh wi ku laan fahn Jeezas werdz da Jan 5:19, 30?

¹³ Eevn doa Jeezas da-mi Gaad perfek Son, Jeezas mi stil pen pahn Jehoava. (Reed Jan 5:19, 30.) Hihn neva chrai tek atariti fan ih hevnli Faada. Filipiyanz 2:6 seh: “Eevn doa hihn mi aalwayz ga Gaad egzak naycha, ahn ih mi deh pahn di sayhn levl wid Gaad, ih neva tink haad fi let goh aala dat.” Az wahn obeedyant son, Jeezas mi andastan weh hihn kuda du ahn weh hihn kudn du, an ih mi rispek ih Pa atariti.

14. Wen adaz mi aks Jeezas fi du sohnting weh hihn neva ga di rait fi du, how hihn mi rispan?

¹⁴ Noatis weh Jeezas mi du wen Jaymz, Jan, ahn dehn ma aks ahn fi du sohnting weh hihn neva ga di rait fi du. Rait away, Jeezas tel dehn dat onli Jehoava ga di rait fi disaid hoo wahn sidong da Jeezas rait han said ahn lef han said da hevn. (Mach. 20:20-23) Jeezas mi shoa dat ih noa ih plays. Hihn mi hombl. Ih neva du  notn weh Jehoava neva giv ahn di atariti fi du. (Jan 12:49) How wee ku fala Jeezas perfek egzampl?

15-16. How wi ku yooz di kongsl da 1 Korintyanz 4:6 eena wi laif?

¹⁵ Wi kapi Jeezas egzampl wen wi fala di kongsl da 1 Korintyanz 4:6. Rait dehsoh ih seh: “Fala di rool dehn weh mi rait dong eena di Skripcha ahn notn els.” Soh wen adaz aks wi fi advais, wi shuda neva chrai foas wi oan aidyaaz pahn dehn er taak widowt tink fers bowt di mata. Rada, wi shuda bays wi ansa dehn fahn di Baibl ahn wi poblikayshan dehn. Wen wi du dis, wi shoa dat wi andastan dat wi noh noa evriting. Dis aalso shoa dat wi hombl ahn wi shoa dat wi noa dat Jehoava advais aalwayz beta dan fi wee wan.—Rev. 15:3, 4.

¹⁶ Fi mek wi aana Jehoava wi haftu bee hombl, bot wi aalso ga ada gud reezn fi bee hombl. Wen wi hombl, how dis ku mek wi hapi ahn help wi get lang wid adaz? Mek wi si.

17. Wai hombl peepl hapi?

¹⁷ If wi hombl, wi wahn moa dan laikli bee hapi. Wai? Bikaaz wen wi aksep dat dehn ga sohn tingz weh wi reeli kyaahn du, wi wahn bee graytful ahn hapi fi di help weh wi geh fahn adaz. Fi egzampl, tink bowt di taim wen Jeezas heel ten man weh mi ga leprosi. Onli wan a dehn gaahn bak tu Jeezas ahn tank ahn fi kyoar ih terabl dizeez. Hihn mi noa dat hihn kudn du dis widowt Jeezas help, soh hihn mi graytful fi di help weh ih get an ih mi prayz Gaad far it.—Look 17:11-19.

18. Bays pahn Roamanz 12:10, how wi ku get lang wid adaz if wi hombl?

¹⁸ Peepl weh hombl yoozhwali get lang  wid adaz gud ahn dehn da gud frenz. Wai? Dehn wilin ahn hapi fi chros adaz bikaaz dehn rekonaiz dat adaz ga gud kwalitiz. Peepl weh hombl hapi fi adaz wen dehn du gud eena wateva asainment dehn get, ahn dehn wilin fi komen dehn.—Reed Roamanz 12:10.

19. Wat da sohn reezn wai wi shudn bee prowd?

¹⁹ Pahn di ada han, peepl weh prowd fain it haad fi komen adaz, dehn prifaa fi geh aal di prayz. Dehn aalwayz waahn kompyaa dehnself tu adaz ahn chrai bee beta dan dehn. Rada dan help chrayn adaz ahn gi dehn sohn atariti, dehn bileev dat dehn haftu du evriting dehnself kaaz, akaadn tu dehn, nobadi els wahn du it karek. Sombadi weh prowd aalwayz waahn bee moa impoatant dan adaz ahn dehn geh jelos wen adaz du beta dan dehn. (Gal. 5:26) Peepl laik dehndeh ku haadli kip frenz fi lang. If wi noatis dat wee di tink an ak laik dat, wi shuda pray tu Jehoava ahn bayg ahn fi help wi ‘chaynj di way wi tinkʼ soh dat wi noh kantinyu fi bee prowd.—Roam. 12:2.

20. Wai ih gud fi bee hombl?

²⁰ Wi veri graytful fi Jehoava gud egzampl! Wi si how hombl Jehoava hombl wen ih deel wid ih servants, ahn wi waahn fala ih egzampl. An aalso, wi waahn fala di egzampl a peepl weh mi hombl ahn weh mi serv Jehoava eena di paas. Mek wi aalwayz gi Jehoava di aana ahn prayz weh ih dizerv. (Rev. 4:11) If wi du dehnya tingz, wi wahn ku bee Jehoava fren fareva bikaaz hihn lov hombl peepl.