1. Weh Jehoava alow eech wan a ih faytful servant dehn fi gat?

JEHOAVA alow eech wan a ih faytful servant dehn fi ga wahn roal eena ih kangrigayshan. Eevn doa aala wi ga wahn difrent roal, eech wan a wi preshos tu Jehoava an aala wi need wan anada. Di apasl Paal help wi fi andastan dis impoatant lesn. How?

2. Akaadn tu Ifeezhanz 4:16, wai wi need fi lov wan anada ahn werk tugeda?

² Eena di teem skripcha fi dis aatikl, Paal mek it klyaa dat non a wi kyaahn luk pahn wahn nada servant a Jehoava ahn seh “Ai noh need yoo.” (1 Kor. 12:21) If wi waahn di kangrigayshan ga pees, wi haftu lov wan anada ahn werk tugeda. (Reed Ifeezhanz 4:16.) Wen wi werk tugeda, di kangrigayshan wahn groa schranga an evribadi wahn lov wan anada moa ahn moa.

3. Weh wi wahn diskos eena dis aatikl?

³ How wi ku shoa rispek fi ada Kristyanz eena di kangrigayshan? Eena dis aatikl wi wahn diskos how eldaz ku shoa rispek fi di ada eldaz eena di kangrigayshan. Den, wi wahn diskos how aala wi ku shoa rispek fi bradaz ahn sistaz weh noh marid. Ahn den, wi wahn laan how wi ku shoa rispek fi bradaz ahn sistaz weh noh taak wi langwij gud.

4. Akaadn tu Roamanz 12:10, how eldaz fi chreet wan anada?

⁴ Chroo ih hoali spirit, Jehoava apoint aala di elda dehn eena di kangrigayshan. Bot eech elda ga difrent spirichwal gif ahn skilz. (1 Kor. 12:17, 18) Som a dehn mait jos staat serv az elda ahn dehn noh ga lata ekspeeryens. Adaz mait kyaahn du moch bikaaz a dehn ayj ahn dehn mait ga helt prablemz. Bot no elda shuda luk pahn wahn nada elda ahn tink dat dehn noh yoosful eena di kangrigayshan. Insteda dat, eech elda shuda fala di kongsl weh Paal gi da Roamanz 12:10.—Reed.

5. How eldaz shoa dat dehn rispek wan anada, ahn wai ih impoatant dat dehn du dat?

⁵ Eldaz shoa dat dehn ga rispek fi di ada eldaz eena di kangrigayshan wen dehn lisn gud tu dehn. Dis veri impoatant, espeshali wen dehn haftu diskos seeryos mataz joorin wahn eldaz meetin. Wai? Dis da weh The Watchtower fi Aktoaba 1, 1988, seh: “Eldaz wahn aksep dat Jeezas ku yooz di hoali spirit fi help eni elda fi kom op wid wahn Baibl prinsipl weh wahn help di badi a eldaz fi noa weh fi du eena eni sichuwayshan er fi mek eni impoatant disizhan. (Aks 15:6-15) Hoali spirit help aala di eldaz eena di kangrigayshan, noh jos wan a dehn.”

6. Weh help di elda dehn fi werk tugeda eena yooniti, ahn how di kangrigayshan benifit wen dehn du dat?

⁶ Wahn elda weh rispek di ada elda dehn eena di kangrigayshan noh wahn aalwayz waahn bee di fers wan fi taak joorin di eldaz meetin dehn. Ih noh wahn chrai tek oava di diskoshan, an ih noh wahn feel laik fi hihn opinyan aalwayz rait. Insteda dat, ih giv ih aidyaaz eena wahn hombl way. An ih lisn gud tu weh di ada elda dehn ga fi seh. Moa impoatant dan dat, ih eega fi diskos Baibl prinsiplz ahn fala di dairekshan a “di faytful ahn waiz slayv.” (Mach. 24:45-47, NW) Wen di elda dehn shoa lov ahn rispek fi wan anada wail dehn diskos mataz,  Gaad hoali spirit wahn deh wid dehn, an ih wahn gaid dehn fi mek disizhanz weh wahn schrentn di kangrigayshan.—Jay. 3:17, 18.

7. Weh Jeezas mi tink bowt peepl weh noh marid?

⁷ Di kangrigayshan dehn ga lata marid kopl ahn famili. Bot dehn aalso ga lata bradaz ahn sistaz weh noh marid. Weh wi shuda tink bowt bradaz ahn sistaz weh singl? Wi shuda tink di saym way Jeezas tink bowt dehn. Wen Jeezas mi deh ya pahn di ert, hihn neva geh marid. Hihn mi stay singl an ih mi foakos pan ih asainment. Jeezas neva teech dat wahn Kristyan haftu geh marid er dat ih haftu stay singl. Bot, hihn mi did seh dat som Kristyanz wuda chooz noh fi marid. (Mach. 19:11, 12) Jeezas mi shoa rispek fi peepl weh singl. Hihn neva tink dat peepl weh marid beta dan peepl weh singl. Ahn hihn neva tink dat sohnting mi misn owta sombadi laif jos bikaaz dehn neva marid.

8. Akaadn tu 1 Korintyanz 7:7-9, weh Paal mi inkorij Kristyanz fi tink bowt?

⁸ Jos laik Jeezas, di apasl Paal mi stay singl joorin ih minischri. Paal neva teech dat ih rang if wahn Kristyan geh marid. Hihn mi andastan dat dis da wahn persnal chois. Stilyet, doh, Paal mi inkorij Kristyanz fi tink bowt weda er nat dehn ku stay singl az dehn serv Jehoava. (Reed 1 Korintyanz 7:7-9.) Fi shoar Paal neva luk dong pahn Kristyanz weh singl. Az a mata a fak, hihn mi chooz Timoti, wahn singl brada, fi tek kayr a sohn impoatant asainment eena Jehoava servis. * (Fil. 2:19-22) Soh ih wuda bee rang fi tink dat wahn brada kwalifai er noh kwalifai fi wahn asainment jos bikaaz ih marid er singl.—1 Kor. 7:32-35, 38.

9. Weh Jehoava tink bowt peepl weh marid ahn peepl weh singl?

⁹ Needa Jeezas ner Paal mi teech dat wahn Kristyan haftu geh marid er haftu stay singl. Weh Jehoava tink bowt peepl weh marid ahn peepl weh singl? The Watchtower fi Aktoaba 1, 2012, gi wi wahn gud ansa tu dis kweschan. Ih seh: “Reeli, sombadi ku chooz fi geh marid er stay singl; eeda wan da wahn gif fahn Gaad. . . . Jehoava noh tink dat singl peepl shuda  feel shaym er feel sad bikaaz dehn noh marid.” Soh, wi haftu rispek di singl bradaz ahn sistaz eena di kangrigayshan.

10. How wi ku shoa rispek fi wi bradaz ahn sistaz weh singl?

¹⁰ How wi ku shoa rispek fi di feelinz a wi bradaz ahn sistaz weh singl? Wi haftu memba dat som Kristyanz chooz fi stay singl. Ada Kristyanz wuda waahn geh marid, bot dehn jos noh fain di rait persn fi marid. Maybi som a dehn singl bikaaz dehn hozban er dehn waif ded. Wateva di reezn, ih wudn bee rait if bradaz ahn sistaz eena di kangrigayshan aks singl Kristyanz wai dehn noh marid er aafa fi help dehn fain wahn hozban er waif. Af koars, som singl Kristyanz mait aks fi da kaina help. Bot if dehn noh aks, how dehn mait feel if sombadi aafa fi help dehn fain wahn hozban er waif? (1 Tes. 4:11; 1 Tim. 5:13) Mek wi diskos weh sohn faytful singl bradaz ahn sistaz ga fi seh pahn dis tapik.

11-12. How wee mait diskorij wi bradaz ahn sistaz weh singl?

¹¹ Wan serkit oavaseeya weh singl ahn weh du gud eena ih asainment feel laik lata benifits deh wen yu stay singl. Bot hihn seh dat ih feel diskorij wen bradaz ahn sistaz, weh feel laik dehn di help ahn, aks ahn: “Wai yoo noh marid?” Wahn brada weh singl ahn weh di serv da wahn branch aafis seh: “Sohntaim Ai noatis dat bradaz ahn sistaz eena di kangrigayshan tink dat dehn shuda feel sari fi bradaz ahn sistaz weh singl. Dis ku mek ih luk laik fi bee singl da wahn prablem, noh wahn gif.”

¹² Wahn sista weh singl ahn weh serv da Betel seh: “Som bradaz ahn sistaz feel laik evribadi weh singl di luk fi geh marid er dat evribadi weh singl tink dat evri taim dehn deh da wahn get-tugeda da wahn chaans fi fain wahn hozban er waif. Wan taim Ah mi chravl tu wahn nada paat a di konchri fi wahn asainment an Ah mi reech pahn wahn meetin nait. Di sista weh Ah mi-di stay wid tel mi dat too bradaz rong mai ayj deh eena di kangrigayshan. Shee tel mi dat ih noh di chrai set mi op. Bot az soon az wi reech eensaida di Kingdom Haal, shee haal mi wan said fi mek Ah meet di too bradaz. Dat da-mi wahn veri akwod sichuwayshan fi di chree a wi.”

13. Fi hoo egzampl inkorij wan sista weh singl?

¹³ Wahn nada sista weh singl ahn weh serv da Betel seh: “Ai noa sohn oalda singl painyaaz hoo da sensabl peepl, hoo set gud goalz fi dehnself, hoo wilin fi help adaz, ahn hoo hapi eena dehn servis tu Jehoava. Dehn help di kangrigayshan wahn lat. Dehn noh ga wahn bad atichood jos bikaaz dehn noh marid. Dehn noh tink dehn beta dan adaz bikaaz dehn stay singl. Ahn dehn noh tink dat dehn kyaahn bee hapi bikaaz dehn noh marid ahn ga pikni.” Dats wai ih soh nais fi deh eena wahn kangrigayshan weh evribadi lov ahn rispek wan anada. Yu noh wahn feel laik yu bradaz ahn sistaz feel sari fi yu, groj yu, er ignoar yu, ahn yu noh wahn feel laik dehn tink yoo beta dan dehn. Yu jos noa dat dehn lov yu.

14. How wi ku shoa dat wi rispek wi bradaz ahn sistaz weh singl?

¹⁴ Wi bradaz ahn sistaz weh singl wahn feel gud if wi lov dehn fi dehn gud kwalitiz ahn noh feel sari fi dehn bikaaz dehn singl. Insteda feel sari fi dehn, wi shuda lov dehn bikaaz dehn stay faytful tu Jehoava. If wi du dat, wi bradaz ahn sistaz  weh singl wahn neva feel laik wi di tel dehn: “Ai noh need yoo.” (1 Kor. 12:21) Insteda dat, dehn wahn noa dat wi rispek dehn ahn dat dehn impoatant tu di kangrigayshan.

15. Weh chaynjiz som poblishaz mek soh dat dehn ku du moa eena di preechin werk?

¹⁵ Moa ahn moa poblishaz di set wahn goal fi dehnself fi laan wahn nada langwij soh dat dehn ku du moa eena di preechin werk. Fi du dat, dehn haftu mek chaynjiz eena dehn laif. Dehnya bradaz ahn sistaz lef wahn kangrigayshan weh taak fi dehn langwij soh dat dehn ku serv eena wahn kangrigayshan weh taak wahn nada langwij ahn weh need moa poblishaz. (Aks 16:9) Dis da wahn chois weh dehn mek fi dehnself soh dat dehn ku du moa eena di preechin werk. Eevn doa ih mait tek yaaz fi mek dehn laan di nyoo langwij gud, dehn du wahn lat fi help di kangrigayshan. Dehn gud kwalitiz an ekspeeryens help schrentn di bradaz ahn sistaz eena di kangrigayshan. Dehnya singl bradaz ahn sistaz weh wilin fi help adaz eena di kangrigayshan reeli preshos tu wi!

16. How di elda dehn disaid if wahn brada kwalifai fi bee wahn elda er wahn ministeeryal servant?

¹⁶ Di elda dehn noh fi disaid dat wahn brada kyaahn bee wahn elda er wahn ministeeryal servant jos bikaaz ih noh taak di langwij a di kangrigayshan gud. Di elda dehn wahn chek if wahn brada kwalifai fi bee wahn elda er ministeeryal servant bays pahn di kwalifikayshanz eena di Skripchaz ahn noh bays pahn how gud ih taak di langwij a di kangrigayshan.—1 Tim. 3:1-10, 12, 13; Tai. 1:5-9.

17. Weh payrents haftu disaid wen dehn famili moov tu wahn nada konchri?

¹⁷ Sohn Kristyan famili moov tu wahn nada konchri fi get weh fahn haad taimz eena dehn oan konchri er fi fain werk. Wen dat hapm, dehn chiljren mait haftu goh da skool eena di mayn langwij a dehn nyoo konchri. Di payrents mait haftu laan di mayn langwij a dis konchri fi mek dehn ku fain werk. Bot wat if dehn ga wahn loakal kangrigayshan er groop eena fi dehn langwij? Wich kangrigayshan dehn shuda goh tu? Dehn shuda goh da di kangrigayshan eena di mayn langwij a di konchri er di kangrigayshan eena fi dehn oan langwij?

18. Akaadn tu Galayshanz 6:5, how wi ku shoa rispek fi di disizhan weh di famili hed mek?

¹⁸ Wahn famili hed fi disaid wich kangrigayshan ih famili wahn aten. Bikaaz dis wahn afek fi dehn famili, dehn haftu tink bowt weh wahn bee bes fi dehn. (Reed Galayshanz 6:5.) Wi haftu rispek di disizhan weh di famili hed mek. Wateva di famili hed disaid, mek wi aksep ih  disizhan ahn welkom di famili eena wi kangrigayshan ahn shoa dehn lata lov.—Roam. 15:7.

19. Weh wahn famili hed haftu pray ahn tink bowt?

¹⁹ Sohntaim sohn famili mait deh eena wahn kangrigayshan weh taak di langwij a di payrents, bot di chiljren mait noh taak da langwij gud. If da kangrigayshan deh eena wahn ayrya wehpaat peepl taak di mayn langwij a di konchri, ih mait bee haad fi di chiljren andastan di meetin dehn. Sayka weh dehn noh andastan, dehn mait noh jraa kloas tu Jehoava. Wai? Bikaaz di chiljren mait goh da skool eena di mayn langwij a di konchri ahn noh eena di langwij a dehn payrents. Wen dis hapm, di famili hed wahn haftu tink gud bowt di sichuwayshan ahn pray fi wizdom. Dat wahn help ahn fi disaid weh ih need fi du fi help ih chiljren jraa kloas tu Jehoava ahn di kangrigayshan. Eeda di payrents wahn need fi teech dehn chiljren how fi taak fi dehn langwij gud, er dehn wahn haftu moov tu wahn kangrigayshan weh taak wahn langwij weh dehn chiljren andastan gud. Wateva di famili hed disaid, di kangrigayshan weh ih disaid fi goh shuda chreet di famili wid lov ahn rispek.

20. How wi ku shoa dat wi rispek wi bradaz ahn sistaz weh di laan wahn nyoo langwij?

²⁰ Fi aala di reezn dehn weh wi diskos, bradaz ahn sistaz eena lata kangrigayshan wahn di chrai haad fi laan wahn nyoo langwij. Ih mait haad fi dehn ekspres dehnself. Bot if wi luk paas di way dehn taak di nyoo langwij, wi wahn si dat dehn lov Jehoava ahn dehn reeli waahn serv ahn. If wi si dehnya byootiful kwalitiz, wi wahn lov ahn rispek dehnya bradaz ahn sistaz wahn lat. Wi noh wahn tel dehn “Ai noh need yoo” jos bikaaz dehn noh taak wi langwij gud.

21-22. Weh wandaful privilij wi gat?

²¹ Wi reeli tankful tu Jehoava bikaaz ih gi wi di wandaful privilij fi ga wahn roal eena ih kangrigayshan. Weda wi da man er uman, wi singl er marid, wi yong er oal, er wi taak wahn sertn langwij gud er nat, aala wi preshos tu Jehoava ahn tu wan anada.—Roam. 12:4, 5; Kol. 3:10, 11.

²² Mek aala wi kantinyu fi yooz weh wi laan fahn Paal iloschrayshan a di hyooman badi. Dis wahn help wi fi aalwayz noa weh wi ku du fi inkorij wi bradaz ahn sistaz. Ih wahn aalso help wi fi shoa dehn lov ahn rispek.