1. Wat da sohn sakrifais weh wahn lata wi bradaz ahn sistaz mek, ahn wai dehn mek dehndeh sakrifais?

TUDEH, milyanz a Gaad servant dehn mek wahn lata sakrifais. Wahn lata bradaz ahn sistaz disaid noh fi geh marid. Wail adaz weh marid chooz fi noh ga chiljren now. Sohn famili satisfai wid les moni er mateeryal tingz. Aala dehn mek dehnya disizhan fi wan impoatant reezn. Da bikaaz dehn waahn du az moch az dehn kud fi serv Jehoava. Dehn feel kantentid ahn dehn chros dat Jehoava wahn provaid aal di tingz weh dehn reeli need. Yu tink dehn wahn geh disapointid? Non ataal! Wai wi ku bee shoar a dat? Bikaaz eena di paas, Jehoava mi provaid ih servants wid evriting weh dehn mi need. Fi egzampl, hihn mi bles Aybraham, “di faada fi aal di peepl dehn weh chros eena Gaad.”—Roam. 4:11.

2. (a) Akaadn tu Heebrooz 11:8-10, 16, wai Aybraham mi wilin fi lef di siti a Er? (b) Weh wi wahn diskos eena dis aatikl?

² Aybraham mi wilin fi lef di komfatabl way a laif weh ih mi ga da di siti a Er. Wai? Bikaaz hihn mi-di wayt fi di “siti weh mi bil pahn wahn fongdayshan weh wahn laas fareva.” (Reed Heebrooz 11:8-10, 16.) Wat da da “siti”? Weh chalenjiz Aybraham  mi fays wail ih mi-di wayt fi da siti geh bil? Ahn how wee ku bee laik Aybraham ahn dehn faytful bradaz ahn sistaz eena fi wee day weh fala fi hihn egzampl?

3. Wat da di siti weh Aybraham mi-di wayt fa?

³ Di siti weh Aybraham mi-di wayt fa da Gaad Kingdom. Da Kingdom mek op a Jeezas Krais ahn 144,000 anointid Kristyanz. Paal mi kaal di Kingdom “di siti a di livin Gaad.” (Heeb. 12:22; Rev. 5:8-10; 14:1) Jeezas mi teech ih disaipl dehn fi pray fi mek dis Kingdom kohn soh dat evribadi pahn ert ku obay Gaad jos laik how evribadi obay ahn da hevn.—Mach. 6:10.

4. Akaadn tu Genesis 17:1, 2, 6, wat aal Aybraham mi noa bowt di siti, er Kingdom, weh Gaad mi pramis?

⁴ Yu tink Aybraham mi noa how Gaad Kingdom mi wahn geh aaganaiz? No. Fi honjridz a yaaz, da infamayshan da-mi wahn hoali “seekrit.” (Ifee. 1:8-10; Kol. 1:26, 27) Bot Aybraham mi noa dat som a ih disendant dehn mi wahn geh fi bee king bikaaz Jehoava mi pramis dat tu ahn. (Reed Genesis 17:1, 2, 6.) * Aybraham fayt eena Gaad pramis dehn mi soh schrang dat da mi laik hihn kuda mi si di Anointid Wan, er di Mesaiya, hoo mi wahn bee di King a Gaad Kingdom. Dat da wai Jeezas mi tel di Jooz eena fi hihn taim: “Fi unu ansesta Aybraham mi oanli glad wen ih si dat di taim mi kohn fi mek Ai kohn.” (Jan 8:56) Ih klyaa fi si dat Aybraham mi noa dat fi hihn disendant dehn wuda bee paat a wahn Kingdom weh Jehoava mi wahn set op. Ahn hihn mi wilin fi wayt fi Jehoava mek da pramis kohn chroo.

5. How wi noa dat Aybraham mi-di wayt fi di siti weh Gaad kriyayt?

⁵ How Aybraham mi shoa dat hihn mi-di wayt fi di siti, er Kingdom, weh Gaad kriyayt? Aybraham neva chrai fi bee wahn sitizn a eni govament pahn ert. Hihn mi chravl fahn wan plays tu di neks, ih neva setl dong eena eni a dehndeh plays, an ih neva  sopoat wahn hyooman king. Aalso, Aybraham neva chrai bil ih oan kingdom. Insteda dat, hihn mi kantinyu fi obay Jehoava, an ih mi wayt fi mek Jehoava pramis kohn chroo. Wen Aybraham mi du dis, hihn mi shoa dat hihn mi ga lata fayt eena Jehoava. Mek wi luk pahn som a di prablem weh hihn mi fays ahn si weh wee ku laan fahn fi hihn egzampl.

6. How di siti a Er mi stan?

⁶ Aybraham mi lef di siti a Er, weh mi sayf ahn komfatabl. Di peepl fahn deh mi ejukaytid ahn ga lata mateeryal tingz. Wahn big waal mi protek di siti, ahn wahn deep waata kinel mi sorong it. Di peepl eena di siti a Er mi ga gud skilz eena mats ahn raitin. An ih luk laik wahn lata peepl mi du bizniz eena da siti bikaaz peepl weh stodi kolcha, di rooinz, ahn ting laik dehndeh, mi dig eena da siti ahn fain wahn lata dakyument weh bizniz peepl yoostu yooz. Peepl hows mi mek owta blaks ahn dehn mi plaasta dehn ahn paynt dehn wait. Som a dehnya hows mi ga 13 er 14 room weh sorong wahn koatyaad weh ga stoan floa.

7. Wai Aybraham mi haftu chros dat Jehoava wuda protek hihn an ih famili?

⁷ Aybraham mi haftu chros dat Jehoava wuda protek hihn an ih famili. Wai? Memba dat Aybraham ahn Saara mi lef dehn sayf ahn komfatabl hows eena di siti a Er fi mek dehn mi liv eena di konchrisaid a Kaynan. No big waal er deep waata kinel neva deh fi protek Aybraham an ih famili agen. Now ih mi wahn eeziya fi mek dehn enimi atak dehn.

8. Weh Aybraham mi haftu deel wid wan taim?

⁸ Aybraham mi du Gaad wil, bot wan taim ih neva ga inof food fi feed ih famili. Wahn reeli bad famin mi afek di lan weh Jehoava mi tel ahn fi goh ahn hihn mi haftu deel wid dat. Da famin mi soh bad dat Aybraham mi disaid fi moov wid ih famili da Eejip fi wahn lee wail. Bot wail hihn mi deh da Eejip, Fayro, hoo da-mi di roola a Eejip, mi tek Aybraham waif fan ahn. Aybraham mosi mi-di wori rait op tu di taim wen Jehoava mi kanvins Fayro fi giv bak Saara tu Aybraham.—Gen. 12:10-19.

9. Weh chalenjiz Aybraham mi gat eena ih famili?

⁹ Aybraham mi aalso ga sohn seeryos chalenjiz eena ih famili. Ih waif, weh ih mi lov soh moch, mi kyaahn ga pikni. Fi yaaz dehn mi sad bikaaz a dat. Afta wahn wail, Saara mi giv ih servant, Haygar, tu Aybraham soh dat shee kuda mi ga pikni fi dehn. Bot wen Haygar fain owt dat ih mi pregnant wid Ishmayel, shee mi staat tu persikyoot Saara. Di sichuwayshan mi geh soh bad dat Saara mi jraiv Haygar fahn owta di hows.—Gen. 16:1-6.

10. Weh mi hapm bitween Ishmayel an Aizak weh kuda mi mek it haad fi Aybraham chros eena Jehoava?

¹⁰ Fainali, doh, Saara mi geh pregnant ahn Aybraham mi naym dehn son Aizak. Aybraham mi lov di too a ih son dehn, Ishmayel an Aizak. Bot bikaaz Ishmayel mi chreet Aizak bad, Jehoava mi tel Aybraham fi sen weh Ishmayel ahn Haygar. (Gen. 21:9-14) Sohn yaaz layta, Jehoava mi aks Aybraham fi aafa op ih son Aizak az wahn sakrifais. (Gen. 22:1, 2; Heeb. 11:17-19) Eena eech sichuwayshan, Aybraham mi haftu shoa dat ih chros dat Jehoava wuda mi fulfil ih pramis weh ih mi mek bowt Aybraham son dehn.

11. Wai Aybraham mi haftu ga payshens ahn wayt pahn Jehoava?

¹¹ Joorin dis taim, Aybraham mi haftu ga payshens ahn wayt pahn Jehoava. Moa dan laikli, hihn mi oava 70 yaaz oal wen hihn an ih famili lef di siti a Er. (Gen. 11:31–12:4) Ahn fi bowt wan honjrid yaaz, hihn mi liv eena tent ahn chravl chroo di lan a Kaynan.  Aybraham mi 175 yaaz oal wen ih mi ded. (Gen. 25:7) Bot Aybraham neva liv fi si wen Jehoava mi gi di pramis lan tu ih disendant dehn. An ih neva liv lang inof fi si di siti, weh da Jehoava Kingdom, geh set op. Di Baibl seh dat Aybraham mi ded “oal ahn satisfai.” (Gen. 25:8) Eevn doa Aybraham mi haftu bayr op anda lata chraiyalz, ih fayt mi stay schrang an ih mi hapi fi wayt pahn Jehoava. How hihn kuda mi du dat? Bikaaz aal chroo Aybraham laif Jehoava mi protek ahn, an chreet ahn laik ih fren.—Gen. 15:1; Isa. 41:8; Jay. 2:22, 23.

12. Weh wee di wayt fa, ahn weh wi wahn diskos?

¹² Jos laik Aybraham, wee di luk faawod fi liv eena wahn siti weh bil pahn wahn fongdayshan weh wahn laas fareva. Bot, wee noh di wayt fi mek Gaad bil da siti. Gaad Kingdom mi geh set op eena 1914, an ih don ga kompleet kanchroal a hevn. (Rev. 12:7-10) Bot wee di wayt fi mek Gaad Kingdom tek kompleet kanchroal oava di ert tu. Wail wi di wayt fi mek dat hapm, wee mait haftu bayr op anda wahn lata chraiyalz jos laik weh Aybraham ahn Saara mi haftu goh chroo. Jehoava servant dehn tudeh di fala Aybraham ahn Saara egzampl. Di laif stoari dehn weh geh poblish eena Di Wachtowa shoa dat wahn lata wi faytful bradaz ahn sistaz tudeh day shoa dat dehn ga fayt ahn payshens jos laik Aybraham. Mek wi diskos som a dehn ekspeeryens ahn si weh wi ku laan.

13. Weh yu laan fahn Brada Walden ekspeeryens?

¹³ Bee wilin fi mek sakrifais. If wi waahn di Kingdom bee di moas impoatant ting eena wi laif, wi haftu bee laik Aybraham, weh mi wilin fi mek sakrifais fi Jehoava. (Mach. 6:33; Maak 10:28-30) Mek wi luk pahn Brada Bill Walden egzampl. * Bill mi staat stodi wid Jehoava Witnisiz eena 1942. Dis da-mi rait bifoa hihn mi grajuayt fahn wahn yooniversiti da di U.S. wehpaat hihn mi-di stodi fi bee wahn aakitek. Wan a Bill profesa mi araynj fi mek ih geh wahn jab afta ih grajuayt, bot Bill neva aksep. Hihn mi disaid fi foakos ih laif pahn serv Gaad insteda aksep wahn jab weh pay lata moni. Lee bit afta dat,  di govament mi aada Bill fi jain di aami. Hihn neva aksep, ahn sayka dat dehn mi chaaj ahn $10,000 an ih mi geh sentens tu faiv yaaz eena prizn. Afta chree yaaz, dehn mi rilees ahn fahn prizn. Afta dat, di aaganaizayshan mi invait ahn fi goh da Gilyad Skool ahn fi serv az wahn mishineri da South Africa. Bill mi marid Eva, ahn dehn mi serv tugeda da Africa. Dehn mi haftu mek wahn lata sakrifais fi du dat. Afta sevral yaaz, dehn mi gaahn bak tu di United States fi tek kayr a Bill ma. Dis da weh Bill mi seh bowt ih hoal laif: “Ah feel veri hapi ahn tankful wen Ah tink bowt di privilij weh Ah ga fi serv Jehoava fi moa dan 70 yaaz. Ah kip aan di tank Jehoava fi help mi yooz mi laif eena fi hihn servis.” Yoo tink yu ku mek di ful-taim minischri bee fi yoo goal?

14-15. Weh yu laan fahn Brada ahn Sista Apostolidis ekspeeryens?

¹⁴ Noh ekspek dat yu noh wahn ga prablemz eena laif. Fahn Aybraham egzampl wi laan dat eevn Kristyanz weh serv Jehoava dehn hoal laif stil noh free fahn prablemz. (Jay. 1:2; 1 Peet. 5:9) Mek wi kansida how dis da-mi chroo eena Aristotelis Apostolidis ekspeeryens. * Hihn mi geh baptaiz eena 1946 da Greece, an eena 1952, ih mi geh ingayj tu wahn sista weh naym Eleni. Di too a dehn mi waahn gi dehn bes tu Jehoava. Bot Eleni mi geh sik, ahn dehn mi fain owt dat ih mi ga brayn kyansa. Di dakta dehn mi kot owt di kyansa, an afta dat Eleni an Aristotelis mi geh marid. Bot sohn yaaz layta, di kyansa mi groa bak. Di dakta dehn mi du wahn neks aparayshan, bot paat a Eleni badi mi lef paralaiz an ih kudn taak gud aftawodz. Bot shee mi kantinyu fi lov di minischri eevn doa shee mi sik an eevn doa di govament mi persikyoot dehn sohntaim.

¹⁵ Aristotelis mi tek kayr a ih waif fi 30 yaaz. Joorin aal dis taim, hihn mi serv az wahn elda, ih mi werk pahn kanvenshan komiti, an ih mi help bil wahn Asembli Haal. Den, eena 1987, Eleni mi get eena wahn aksident wail ih mi-di preech an ih mi geh hert. Shee mi deh eena wahn koama fi chree yaaz ahn den ih ded. Aristotelis mi eksplayn how aala dehn tingz mi afek ahn. Da di en a ih laif stoari, ih seh: “Oava di yaaz, Ah mi ga lata  chalenjiz ahn som a dehn Ah neva ekspek. Ah mi haftu mek op mi main fi noh giv op ahn fi noh mek notn diskorij mi. Bot stilyet, Jehoava aalwayz gi mi di schrent weh Ah mi need fi fays dehn prablemz.” (Ps. 94:18, 19) Jehoava reeli lov ih servant dehn hoo du aal weh dehn kud fi serv ahn, eevn if dehn ga prablemz!

16. Weh gud advais Brada Knorr mi giv ih waif?

¹⁶ Foakos pahn di fyoocha. Aybraham mi foakos pahn di fyoocha riwaad weh Jehoava mi wahn giv ahn, an dis mi help ahn fi bayr op anda chraiyalz. Sista Audrey Hyde mi kantinyu fi tink bowt fi shee hoap fi di fyoocha eevn doa ih fers hozban, Nathan H. Knorr, mi ded fahn kyansa, an ih sekant hozban, Glenn Hyde, mi geh Alzheimer dizeez. * Shee seh dat sohnting weh ih fers hozban mi tel ahn sohn weeks bifoa ih mi ded da weh help ahn fi bayr op wid jai. Shee seh: “Nathan mi rimain mi: ‘Wen yu ded yu ga wahn shoar hoap, ahn wi wahn neva haftu sofa payn agen.ʼ Den ih tel mi: ‘Foakos pahn di fyoocha, da deh yu riwaad wahn deh. Kip yuself bizi, chrai yooz yu laif di du tingz fi adaz. Dis wahn help yu stay hapi.ʼ” Dat da gud advais fi mek wi stay bizi di du gud fi adaz ahn fi “rijais” eena di hoap!—Roam. 12:12.

17. (a) Wai wi ga gud reezn fi foakos pahn di fyoocha? (b) If wi fala di egzampl da Micah 7:7, how dat wahn help wi fi injai fyoocha blesinz?

¹⁷ Nowadayz, wi ga moa reezn dan eva fi foakos pahn di fyoocha. Di ting dehn weh di hapm eena di werl tudeh shoa wi dat wi di liv eena di en a di laas dayz. Soon wi noh wahn haftu wayt nohmoh fi di siti, weh da Gaad Kingdom, fi rool oava di hoal ert. Wi wahn geh wahn lata blesinz, bot weh wahn mek wi reeli hapi da wen wi frenz ahn famili weh ded geh rezorek. Da taim deh, Jehoava wahn giv Aybraham ih riwaad fi ih fayt ahn payshens, an ih wahn rayz op bak hihn an ih famili fi liv pahn di ert. Yoo wahn dehdeh fi welkom dehn? Yoo wahn ku dehdeh fi welkom dehn if yu fala Aybraham egzampl ahn bee wilin fi mek sakrifais fi Gaad Kingdom. Yu aalso haftu kip yu fayt schrang eevn wen yu fays prablemz, ahn ga payshens ahn wayt pahn Jehoava.—Reed Micah 7:7. *