1. Weh privilij wi gat?

WI GA di wandaful privilij fi bee paat a Jehoava kangrigayshan! Wi injai pees ahn hapinis az wi wership Jehoava wid wi bradaz ahn sistaz eena di kangrigayshan. Weh roal yoo gat eena di kangrigayshan?

2. Weh iloschrayshan di apasl Paal mi yooz eena wahn lata ih leta dehn weh deh eena di Baibl?

² Wi ku laan wahn lat bowt weh roal wi gat eena di kangrigayshan fahn di iloschrayshan weh di apasl Paal mi yooz eena wahn lata ih leta dehn weh deh eena di Baibl. Eena eech wan a dehnya letaz, Paal mi kompyaa di kangrigayshan tu di hyooman badi. Hihn mi aalso kompyaa eech persn eena di kangrigayshan tu di difrent paats a di badi.—Roam. 12:4-8; 1 Kor. 12:12-27; Ifee. 4:16.

3. Weh chree tingz wi wahn diskos eena dis aatikl?

³ Eena dis aatikl, wi wahn diskos chree impoatant tingz weh wi ku laan fahn Paal iloschrayshan. Fers, wi wahn laan dat eech wan a wi ga wahn roal * eena Jehoava kangrigayshan. Sekant, wi wahn diskos weh wi ku du if wi fain it haad fi andastan wat da wi roal eena di kangrigayshan. Ahn terd, wi wahn diskos wai wi need fi stay bizi di du di  werk weh Jehoava giv eech wan a wi eena fi hihn kangrigayshan.

4. Weh Roamanz 12:4, 5 teech wi?

⁴ Di fers ting weh wi ku laan fahn Paal iloschrayshan da dat eech wan a wi ga wahn impoatant roal eena Jehoava famili. Paal staat aaf ih iloschrayshan di seh: “Evribadi ga wan badi weh ga lata difrent paats, ahn eech a dehn paat ga dehn oan jab weh dehn du, ahn eech paat serv di badi. Sayhn way, eevn doa wi da lata peepl, wi da wan badi, kaa wi da wan wid Krais, ahn aala wi jain aan tu wan anada az difrent paat a wan badi.” (Roam. 12:4, 5) Paal mi meen dat eevn doa eech wan a wi ga wahn difrent roal eena di kangrigayshan, eech wan a wi stil preshos tu Jehoava.

5. Weh “gif” Jehoava gi di kangrigayshan dehn?

⁵ Wen yu tink bowt hoo ga wahn roal eena di kangrigayshan, rait away yu praabli tink bowt di bradaz weh di tek di leed. (1 Tes. 5:12; Heeb. 13:17) Da chroo dat Jehoava gi dehnya bradaz az “gif” tu di kangrigayshan chroo Krais. Dehnya “gif” inklood bradaz weh serv pahn di Govanin Badi, weh help di Govanin Badi, weh serv pahn Branch Komiti, weh serv az serkit oavaseeya, weh teech da di difrent teeyokratik skool dehn, weh serv az kangrigayshan elda, ahn weh serv az ministeeryal servant. Jehoava apoint aala dehnya bradaz wid ih hoali spirit fi tek kayr a ih preshos sheep ahn fi schrentn di kangrigayshan.—1 Peet. 5:2, 3.

6. Akaadn tu 1 Tesaloanyanz 2:6-8, weh di bradaz weh geh apointid bai hoali spirit chrai haad fi du?

⁶ Bradaz geh apointid bai hoali spirit fi tek kayr a difrent rispansabiliti eena di kangrigayshan. Jos laik how difrent paats a di badi, laik di han ahn di fut, werk haad fi help owt di hoal badi, bradaz hoo geh apointid bai hoali spirit aalso werk haad fi help owt di hoal kangrigayshan. Dehn noh chrai geh prayz fahn adaz. Insted, dehn chrai fi bil op ahn schrentn dehn bradaz ahn sistaz. (Reed 1 Tesaloanyanz 2:6-8.) Wi tank Jehoava fi dehnya bradaz weh kwalifai fi tek di leed ahn weh luk owt fi adaz.

7. Weh blesinz wahn lata bradaz ahn sistaz weh eena ful-taim servis geh?

⁷ Sohn bradaz ahn sistaz mait geh apointid fi serv az mishineri, speshal painyaa, er regyula painyaa. Az a mata a fak, bradaz ahn sistaz aal oava di werl preech ful-taim ahn foakos pahn mek disaipl. Sayka dat, dehn help wahn lata peepl kohn fi bee Krais Jeezas disaipl. Eevn doa moas a dehn bradaz ahn sistaz weh serv Jehoava ful-taim noh ga wahn lata mateeryal tingz, Jehoava gi dehn wahn lata blesinz. (Maak 10:29, 30) Wi lov dehnya bradaz ahn sistaz, ahn wee reeli tankful dat dehn da paat a di kangrigayshan!

8. Wai evribadi weh preech di gud nyooz preshos tu Jehoava?

⁸ Yu tink dehn bradaz ahn sistaz weh deh eena di ful-taim minischri da di onli wanz weh ga wahn roal eena di kangrigayshan? Non ataal! Evribadi weh preech di gud nyooz impoatant tu Gaad ahn tu di kangrigayshan. (Roam. 10:15; 1 Kor. 3:6-9) In fak, wan a di moas impoatant goal a di kangrigayshan da fi mek disaiplz a wi Laad Jeezas Krais. (Mach. 28:19, 20; 1 Tim. 2:4) Evribadi weh preech di gud nyooz, weda dehn  baptaiz er nat, chrai fi mek dis werk bee di moas impoatant ting eena dehn laif.—Mach. 24:14.

9. Wai wi Kristyan sistaz preshos tu wee?

⁹ Jehoava shoa dat ih aana sistaz wen ih gi dehn impoatant werk fi du eena di kangrigayshan. Di waif dehn, di ma dehn, di wido dehn, ahn di singl sista dehn weh serv Jehoava reeli preshos tu hihn. Di Baibl tel wi bowt lata uman weh mi pleez Gaad. Dehn da sohn gud egzampl a how fi shoa wizdom, fayt, korij, lov fi di minischri, how fi bee jenaros, ahn how fi du gud werk. (Look 8:2, 3; Aks 16:14, 15; Roam. 16:3, 6; Fil. 4:3; Heeb. 11:11, 31, 35) Wi tank Jehoava fi di Kristyan sistaz eena wi kangrigayshan weh shoa dehndeh saym byootiful kwalitiz!

10. Wai oalda bradaz ahn sistaz preshos tu wi?

¹⁰ Wi hapi dat lata oalda bradaz ahn sistaz deh eena wi kangrigayshan tu. Sohn kangrigayshan ga oalda bradaz ahn sistaz weh laayal tu Jehoava ahn serv ahn fi dehn hoal laif. Er maybi som a di oalda bradaz ahn sistaz eena di kangrigayshan jos di geh fi noa Jehoava. Lata oalda bradaz ahn sistaz mait ga helt prablemz bikaaz a dehn ayj. Sayka dat dehn kyaahn du az moch az dehn waahn eena di minischri an eena di kangrigayshan. Bot dehn stil du weh dehn kud eena di minischri ahn dehn du dehn bes fi inkorij ahn chrayn adaz! Ahn wee benifit fahn fi dehn ekspeeryens. Dehn reeli preshos tu Jehoava ahn tu wee.—Prov. 16:31.

11-12. How di yong bradaz ahn sistaz eena fi yoo kangrigayshan inkorij yu?

¹¹ Tink bowt di yong bradaz ahn sistaz eena fi yoo kangrigayshan. Dehn ga lata prablemz bikaaz dehn di groa op eena dis werl weh Saytan di Devl kanchroal, ahn fi hihn wikid tinkin ku afek dehn. (1 Jan 5:19) Stil, aala wi feel inkorij wen wi si wi yong bradaz ahn sistaz koment da meetin, tek paat eena di minischri, ahn difen dehn bileef wid korij. Wi yong bradaz ahn sistaz play wahn impoatant roal eena di kangrigayshan!—Ps. 8:2.

 ¹² Bot som a wi bradaz ahn sistaz fain it haad fi bileev dat dehn ga wahn impoatant roal eena di kangrigayshan. Weh ku help wi feel laik fi wee roal eena di kangrigayshan impoatant? Mek wi si.

13-14. Wai som a wi bradaz ahn sistaz mait feel dat dehn noh preshos tu di kangrigayshan?

¹³ Mek wi luk pahn wahn nada lesn weh wi ku laan fahn Paal iloschrayshan. Di sekant lesn eena Paal iloschrayshan mek wi tink a wahn prablem weh wahn lata bradaz ahn sistaz ga tudeh. Ih haad fi wahn lata wi bradaz ahn sistaz andastan dat dehn preshos tu di kangrigayshan. Paal mi rait: “If di fut seh, ‘Ai da noh wahn han, soh Ai da noh wahn paat a di badi,ʼ dat noh meen seh di fut da noh stil paat a di badi. Ahn if di ayz seh, ‘Ai da noh wahn aiy, soh Ai da noh paat a di badi,ʼ dat noh meen seh di ayz da noh stil paat a di badi.” (1 Kor. 12:15, 16) Weh Paal mi-di teech wi?

¹⁴ If yu kompyaa yuself tu ada bradaz ahn sistaz eena di kangrigayshan, yu mait staat tu tink dat yoo noh preshos tu di kangrigayshan. Sohn bradaz ahn sistaz eena di kangrigayshan mait bee gud teechaz, er dehn mait ku komfert an inkorij adaz gud. Maybi yu feel laik yu kyaahn du dehndeh tingz az gud az dehn. Dis shoa dat yu hombl. (Fil. 2:3) Bot bee kyaaful. If yu aalwayz di kompyaa yuself wid bradaz ahn sistaz weh ga lata skilz, yu wahn geh diskorij. Laik weh Paal mi seh, yu mait feel laik yu roal eena di kangrigayshan noh impoatant. Weh ku help yu fi noh feel da way?

15. Akaadn tu 1 Korintyanz 12:4-11, weh wi need fi rekonaiz bowt eni spirichwal gif weh wi mait gat?

¹⁵ Jehoava mi gi som a di fers Kristyanz sohn spirichwal gif chroo di hoali spirit, bot noh aala dehn Kristyan mi geh di saym gif. (Reed 1 Korintyanz 12:4-11.) Jehoava mi gi dehn difrent gif ahn skilz, bot eech Kristyan mi preshos tu ahn. Tudeh, wi noh ga dehndeh spirichwal gif.  Bot eevn doa wi noh ga di saym skilz, wi stil preshos tu Jehoava.

16. Weh kongsl fahn di apasl Paal wi haftu fala?

¹⁶ Insteda kompyaa wiself wid ada Kristyanz, wi need fi fala di kongsl weh di apasl Paal mi giv: “Mek aala unu chek unu oanself gud fi si how unu di liv. Den unu wahn ku feel gud bowt unuself, ahn unu noh wahn hafu di luk pahn weh nobadi els di du.”—Gal. 6:4.

17. How wi wahn benifit if wi fala di kongsl weh di apasl Paal mi giv?

¹⁷ If wi fala di kongsl weh di apasl Paal mi giv, wi mait staat tu si dat wi ga wi oan spirichwal gif ahn skilz. Fi egzampl, wahn elda mait noh bee wahn gud speeka, bot ih mait du gud eena di minischri. Er ih noh mait bee az aaganaiz az som a di ada eldaz eena di kangrigayshan, bot ih mait bee wahn veri lovin ahn kain elda weh bradaz ahn sistaz feel komfatabl fi goh tu fi geh advais fahn di Baibl. Er ih mait laik welkom peepl tu ih hows. (Heeb. 13:2, 16) Wen wi si wi oan spirichwal gif dehn, wi wahn ga reezn fi feel gud bowt weh wi ku du fi help owt di kangrigayshan. Ahn wi noh wahn jelos wi bradaz ahn sistaz weh ga difrent gif ahn skilz dan wee.

18. How wi ku bee beta teechaz?

¹⁸ Noh mata wat da wi roal eena di kangrigayshan, aala wi haftu waahn du beta eena wi servis tu Jehoava ahn geh beta pahn wi skilz. Fi help wi du beta, Jehoava gi wi di chraynin weh wi need chroo ih aaganaizayshan. Fi egzampl, da wi midweek meetin wi geh inschrokshanz pahn how wi ku du beta eena wi minischri. Yoo di chrai yooz di chraynin weh yu geh da di meetin dehn?

19. How wi ku reech di goal fi goh da di Skool fi Kingdom Ivanjelaizaz?

¹⁹ Wahn nada wandaful chraynin proagram da di Skool fi Kingdom Ivanjelaizaz. Bradaz ahn sistaz weh deh eena ful-taim servis ahn hoo deh bitween di ayj a 23 ahn 65 ku goh da dis skool. Yu mait tink dat yoo kuda neva reech dis goal. Bot insteda mek ekskyoos wai yu kyaahn goh, mek wahn lis a reezn wai yu waahn goh. Den mek wahn plan weh wahn help yu kwalifai fi goh da di skool. Wid Jehoava help ahn fi yoo haad werk, yu wahn ku reech yu goal.

20. Weh wi ku laan fahn Roamanz 12:6-8?

²⁰ Wi ku fain di terd lesn fahn Paal iloschrayshan da Roamanz 12:6-8. (Reed.) Eena dis iloschrayshan, Paal shoa wi dat dehn wan eena di kangrigayshan ga difrent spirichwal gif. Bot dis taim Paal di inkorij wi fi yooz wateva spirichwal gif weh wi ga fi bil op ahn schrentn di kangrigayshan.

21-22. Weh lesn wi ku laan fahn Robert ahn Felice?

²¹ Kansida di egzampl a wahn brada weh naym Robert. * Hihn mi-di serv da wahn nada konchri, ahn den ih mi geh asain fi serv da Betel eena ih hoam konchri. Eevn doa di bradaz dehn mi tel ahn dat in neva du notn rang, hihn seh: “Fi monts Ah neva hapi bikaaz Ah mi tink dat Ah neva du gud eena mi asainment. Sohntaim Ah mi waahn stap serv da Betel.” How Robert mi get bak ih jai? Wahn neks elda mi rimain ahn dat Jehoava chrayn wi eena wi oal asainment soh dat wi ku du beta eena di asainment  weh wi ga rait now. Robert mi riyalaiz dat hihn mi need fi stap foakos pahn di paas ahn staat foakos pahn weh ih ku du now.

²² Brada Felice Episcopo mi gaahn chroo sohnting simila. Hihn an ih waif mi grajuayt fahn Gilyad eena 1956, ahn den dehn mi serv eena di serkit werk da Bolivia. Eena 1964 dehn mi ga wahn son. Felice seh: “Wi mi fain it haad fi lef wi preshos asainment. An Ah haftu seh Ah mi ways wahn hoal yaa di feel sari fi miself bikaaz Ah mi feel diskorij. Bot wid Jehoava help, Ah mi chaynj mi atichood ahn foakos pahn mi nyoo asainment az wahn payrent.” Yoo ku andastan how Robert ahn Felice mi feel? Yoo geh diskorij bikaaz yu noh ga di saym privilij a servis weh yu mi gat eena di paas? If dat da di kays, yu wahn bee hapiya if yu staat tu foakos pahn weh yoo ku du rait now fi serv Jehoava ahn yu bradaz ahn sistaz. Stay bizi ahn yooz yu spirichwal gif ahn skilz fi help adaz, ahn yu wahn bee hapi az yu help bil op di kangrigayshan.

23. Weh wi shuda tek wi taim fi du, ahn weh wi wahn diskos eena di neks aatikl?

²³ Eech wan a wi preshos tu Jehoava. Hihn waahn wi bee paat a ih famili. If wi tek di taim fi tink bowt weh wi ku du fi bil op wi bradaz ahn sistaz ahn den werk haad fi du wi paat eena di kangrigayshan, den wi noh wahn feel laik wi noh bilangz eena di kangrigayshan! Bot how bowt di way wi tink bowt adaz eena di kangrigayshan? How wi ku shoa dat wi lov ahn rispek dehn? Wi wahn diskos dis impoatant tapik eena wi neks aatikl.