1-2. How Psalm 34:8 help wi fi si how gud Jehoava gud?

IMAJIN sohnbadi gi yu wahn kaina food weh yu neva eva tays bifoa. Yu ku laan sohnting bowt di food wen yu luk pan it, smel it, aks weh ih gat een, er if yu aks adaz if dehn laik it. Di onli way yu wahn noa if yu laik di food, doh, da if yu tays it.

² Wi ku laan how gud Jehoava gud wen wi reed wi Baibl ahn wi poblikayshan dehn ahn wen adaz taak tu wi bowt how Jehoava bles dehn eena dehn laif. Bot if wi waahn ga wahn gud andastandin a how gud Jehoava gud, wi hafu “tays” it fi wiself. (Reed Psalm 34:8.) * Mek wi luk pahn wahn egzampl fi si how wi ku du dat. Lesgoh seh dat yu waahn serv az wahn painyaa, bot fi reech da goal yu need fi liv wahn simpl laif. Maybi yu memba di reed bowt Jeezas pramis dat if yu put di Kingdom fers eena yu laif, Jehoava wahn gi yu evriting weh yu need. Bot maybi yu noh geh di chaans fi si Jehoava du dat fi yu yet. (Mach. 6:33) Bikaaz wi ga fayt eena Jeezas pramis, wi chrai spen les moni, wi werk les owaz, ahn wi du az moch az wi kud eena di preechin werk. Wen wi du dat, wi wahn si fi wiself dat Jehoava gi wi weh wi need. Den wi wahn geh fi “tays” how gud Jehoava gud.

3. Wen wi luk pahn Psalm 16:1, 2, da hoo Jehoava gi gud tingz tu?

³ Jehoava “gud tu evribadi,” eevn tu dehn wan weh noh noa hihn. (Ps. 145:9; Mach. 5:45) Bot Jehoava gi wahn lata blesinz espeshali tu dehn wan weh serv ahn wid aala  dehn haat. (Reed Psalm 16:1, 2.) * Mek wi diskos bowt som a di gud tingz Jehoava don bles wi wid.

4. How Jehoava shoa dat ih gud tu dehn wan weh staat tu jraa kloas tu ahn?

⁴ Evri taim wi yooz weh wi laan bowt Jehoava, wi ku si how ih help wi fi mek wi laif beta. Fi egzampl, di moa wi mi laan bowt Jehoava ahn di moa wi mi get fi lov ahn, ih help wi fi stap tink eena wahn way weh hihn noh laik ahn fi stap du tingz weh hihn hayt. (Kol. 1:21) Ahn wen wi mi dedikayt wi laif tu Jehoava ahn geh baptaiz, wi mi geh fi si di gud tingz hihn du fi wi bikaaz ih gi wi wahn kleen kanshans ahn wi ga wahn kloasa rilayshanship wid ahn.—1 Peet. 3:21.

5. How wi si dat Jehoava gud wen wi preech?

⁵ Wen wi preech wi kantinyu si dat Jehoava gud. Yoo da sohnbadi weh shai? Wahn lata peepl weh serv Jehoava shai tu. Maybi bifoa yu mi staat serv Jehoava yu wuda mi neva si yuself di nak pahn sohnbadi doa di shayr wahn mesij fahn di Baibl. Now, luk pahn yu tudeh, yu di chrai yu bes fi preech regyula. Pahn tap a dat, Jehoava help yu fi injai di preechin werk! Ahn hihn help yu eena lata difrent wayz. Hihn help yu fi kip kaam wen peepl mi chreet yu bad eena di minischri. Wen yu mi deh owt eena servis ahn yu meet sohnbadi weh waahn lisn tu yu, hihn help yu fi memba di karek skripcha fi help di persn. Ahn hihn help yu fi bee schrang soh dat yu ku kantinyu preech eevn wen peepl eena di teritori noh waahn lisn tu yu.—Jer. 20:7-9.

6. How di chraynin wi geh fahn Jehoava proov tu wi dat hihn gud?

⁶ Di chraynin weh wi geh fahn Jehoava fi preech proov tu wi dat hihn gud. (Jan 6:45) Joorin wi midweek meetin, wi geh di sampl kanvasayshan dehn weh gi wi sohn gud aidyaa a weh wi ku seh wen wi deh eena di minischri. At fers, wi mait hoal bak bikaaz wi nervos fi chrai sohnting nyoo, bot wen wi yooz it, wi geh fi si dat ih werk reeli gud eena wi teritori. Da wi meetin ahn kanvenshan dehn, dehn inkorij wi fi chrai difrent wayz fi preech. Dis mait meen dat wi wuda preech eena wayz weh wi mi neva yet preech bifoa. Wi mait feel nervos aal oava agen, bot wen wi du dis, wi di gi Jehoava sohnting fi bles. Mek wi luk pahn som a di blesinz wi geh fahn Jehoava wen wi chros eena hihn ahn chrai nyoo wayz fi giv hihn wi bes, noh mata wat da wi sichuwayshan. Den wi wahn diskos how wi ku reech wi goalz.

7. Weh blesinz wi geh wen wi werk haad fi du moa fi Jehoava?

⁷ Wi jraa kloasa tu Jehoava. Kansida di egzampl a wahn elda weh naym Samuel, * hihn an ih waif di serv da Colombia. Dehn mi injai di painyaa eena di kangrigayshan weh dehn mi groa op eena, bot dehn mi waahn du moa. Dehn mi waahn goh da wahn kangrigayshan weh mi need help. Fi reech da goal, dehn mi haftu giv op wahn lata tingz. Samuel seh: “Wi mi fala weh Machyu 6:33 seh ahn wi mi stap bai tingz weh wi neva need. Bot di haadis ting weh wi mi haftu du  da-mi fi lef wi hows. Ih mi dizain jos how wee mi waahnt it, ahn wi neva oa di bank.” Wen dehn mi moov tu dehn nyoo kangrigayshan, dehn mi geh fi si dat dehn kuda mi liv pahn les moni. Samuel seh: “Wi mi geh fi si how Jehoava mi-di gaid wi ahn wi si how ih ansa wi pryaaz. Wi kuda mi feel dat Jehoava hapi wid wi ahn wi si ih lov eena wayz weh wi neva ekspeeryens bifoa.” Yoo ku du moa eena yu servis tu Jehoava? If yu du dat, yu ku bee shoar dat yu wahn geh kloasa tu Jehoava ahn hihn wahn gi yu evriting weh yu need.—Ps. 18:25.

8. Weh wi ku laan fahn weh Ivan ahn Viktoria mi seh?

⁸ Wi servis tu Jehoava gi wi jai. Noatis di ekspeeryens a Ivan ahn Viktoria, wahn kopl weh di serv az painyaaz da Kyrgyzstan. Dehn mi kip dehn laif simpl soh dat dehn ku valantyaa fi eni asainment, dis mi inklood sohn kanschrokshan proajek tu. Ivan seh: “Wi mi werk haad eena eech proajek. Wen di day mi don, wi mi taiyad bad bot wi mi ga lata pees ahn wi mi hapi bikaaz wi noa dat wi mi yooz aala wi taim an enerji di du Jehoava werk. Wi mi feel hapi tu bikaaz wi mi mek nyoo frenz ahn wi mi injai sohn gud ekspeeryens.”—Maak 10:29, 30.

9. Weh wahn sista du fi du moa fi Jehoava eevn doa shee ga lata chalenjiz, ahn wat da di rizolt?

⁹ Wi ku fain jai di serv Jehoava eevn wen wi di fays wahn chalenj. Fi egzampl, Mirreh, wahn oalda sista weh liv da West Africa, yoostu werk az wahn dakta bot now ih ritaiya. Shee staat tu painyaa bot ih ga bad aachraitis, ahn sayka dat ih ku onli spen bowt wan owa di preech fahn hows tu hows. Bot ih ku spen moa taim di du poblik witnisin. Shee ga wahn lata ritern vizit ahn Baibl stodiz, som a dehn ih du oava di foan. Wai Mirreh waahn du moa fi Jehoava? Shee seh: “Mi haat ful op a lov fi Jehoava ahn Jeezas Krais. Ai aalwayz pray tu Jehoava fi help mi soh dat Ah ku du mi bes fi serv ahn.”—Mach. 22:36, 37.

10. Akaadn tu 1 Peeta 5:10, how Jehoava bles dehn wan weh du moa fi hihn?

¹⁰ Jehoava gi wi moa chraynin. Kenny, wahn brada weh di serv az wahn painyaa da Mauritius, seh dat Jehoava mi chrayn hihn. Wen hihn mi laan di chroot, hihn mi stap yooniversiti, geh baptaiz, ahn staat tu serv Jehoava ful-taim. Hihn seh: “Ah chrai fi liv akaadn tu weh di prafit Aizaiya mi seh: ‘Si mi ya! Sen mee!ʼ” (Isa. 6:8) Kenny mi help pahn difrent kanschrokshan proajek an ih mi aalso help chranslayt wi difrent poblikayshanz eena di langwij weh hihn taak. Kenny seh: “Ah mi geh chraynin weh help mi du mi asainment dehn.” Bot hihn mi laan moa dan dat. Hihn seh: “Ah mi aalso laan bowt tingz weh mi haad fi mek Ah du an Ah mi laan bowt kwalitiz weh Ah mi need fi ga soh dat Ah ku serv Jehoava ahn mi bradaz beta.” (Reed 1 Peeta 5:10.) If ih pasabl, mek sohn chaynjiz soh dat yoo ku geh moa chraynin fahn Jehoava tu.

11. Weh sohn sistaz da Korea mi du soh dat dehn kuda mi preech moa, ahn how ih mi werk owt fi dehn? (Koment pahn di picha pahn di kova.)

¹¹ Eevn bradaz ahn sistaz weh deh eena di chroot fi wahn lang taim need chraynin fi preech eena nyoo wayz. Joorin di COVID-19 pandemik, sohn eldaz eena wahn kangrigayshan da Korea mi rait: “Sohn poblishaz weh kudn goh owt goh preech az moch az dehn mi waahn, maybi bikaaz a helt prablemz, di preech moa  now bikaaz wi du it oava di Intanet. Chree sistaz weh deh eena dehn 80ʼs laan fi yooz kompyoota soh dehn ku spen moa taim eena feel servis.” (Ps. 92:14, 15) Yoo wuda waahn du moa ahn si how gud Jehoava gud? Mek wi si weh yoo ku du fi reech dis goal.

12. Weh Jehoava pramis dehn wan weh pen pan ahn?

¹² Laan fi pen pahn Jehoava. Hihn pramis fi bles wi wen wi giv ahn wi bes. (Mal. 3:10) Fabiola, wahn sista weh liv da Colombia, mi si fi ihself how Jehoava kip ih pramis. Shee mi waahn serv az wahn regyula painyaa rait afta shee mi geh baptaiz. Bot, shee mi haftu werk fi help sopoat ih hozban ahn dehn chree chiljren. Soh wen di taim kohn dat shee kuda mi ritaiya, shee mi pray wahn lat tu Jehoava fi help ahn. Shee seh: “Ih naamali tek wahn lang taim fi mek yu get yu penshan, bot Ai mi staat tu geh mai wan jos wan mont afta Ah mi aplai far it. Ai jos kudn bileev it!” Too monts afta dat, shee staat tu painyaa. Now shee deh eena ih 70ʼs ahn shee di painyaa fi oava 20 yaaz. Joorin da taim, shee help ayt peepl fi geh baptaiz. Shee seh: “Sohn dayz Ah feel week, bot evri day Jehoava gi mi di schrent fi kantinyu painyaa.”

13-14. Wat da sohn egzampl weh ku help wi chros Jehoava ahn du moa far ahn?

¹³ Laan fahn dehn wan weh mi pen pahn Jehoava. Di Baibl gat een lata egzampl  a dehn wan weh mi werk haad fi du dehn bes fi Jehoava. Yu wahn noatis dat Jehoava mi bles dehn onli afta dehn mi put dehn chros eena Hihn. Fi egzampl, da mi onli afta Aybraham lef ih hows dat Jehoava mi bles ahn; “hihn neva eevn noa wehpaat ih mi gwehn.” (Heeb. 11:8) Da mi onli afta Jaykop fait wid di aynjel dat Jehoava mi bles ahn. (Gen. 32:24-30) Wen di nayshan a Izrel mi-di luk fi goh eena di Pramis Lan, da mi onli afta di prees dehn mi step eena di Jaadn Riva dat di peepl kuda mi kraas oava.—Josh. 3:14-16.

¹⁴ Yoo ku aalso laan fahn di egzampl a wi bradaz ahn sistaz weh pen pahn Jehoava ahn du moa far ahn. Tek fi egzampl, Brada Payton an ih waif, Diana. Dehn mi injai fi reed bowt bradaz ahn sistaz weh du moa eena dehn servis tu Jehoava. * Payton seh: “Wen wi mi reed dehnya ekspeeryens, ih mek wi feel laik wi mi-di wach sohnbadi eet wahn nais playt a rais ahn beenz. Di moa wi wach, di moa wi mi waahn ‘tays ahn si how gud Jehoava gud.ʼ” Afta sohn taim, Payton ahn Diana mi gaahn serv da wahn nada ayrya weh mi need moa help. Yu don reed dehnya aatikl? Ahn yu don geh fi wach dehnya veedyo, Witnessing in Isolated Territory—Australia ahn Witnessing in Isolated Territory—Ireland weh dehn eena jw.org? If yu reed dehnya seeriz ahn wach dehnya veedyo, ih wahn help yu fain wayz fi du moa fi Jehoava.

15. Wai ih impoatant fi spen taim wid bradaz ahn sistaz weh put Jehoava fers eena dehn laif?

¹⁵ Spen taim wid bradaz ahn sistaz weh put Jehoava fers eena dehn laif. Wi wuda chrai eet sohnting weh wi neva eet bifoa if wi deh rong adaz weh injai di eet it, noh chroo? Sayhn way soh, if wi spen taim wid bradaz ahn sistaz weh put Jehoava fers eena dehn laif, wee tu wahn staat tu luk fi wayz fi du moa fi Jehoava. Dis mi hapm tu wahn kopl weh naym Kent ahn Veronica. Kent seh: “Fi wee frenz ahn faamli mi inkorij wi fi chrai nyoo wayz fi du moa fi Jehoava. Ahn wi mi riyalaiz dat wen wi mi spen taim wid bradaz ahn sistaz weh put Jehoava fers, wi geh di kanfidens fi chrai sohnting nyoo.” Now Kent ahn Veronica di serv az speshal painyaaz da Serbia.

16. How Jeezas iloschrayshan da Look 12:16-21 help wi fi si dat wi fi bee wilin fi mek sakrifais?

¹⁶ Bee wilin fi mek sakrifais fi Jehoava. If wi waahn mek Jehoava hapi, ih noh meenz dat wi need fi giv op evriting wi injai. (Eccl. 5:19, 20) Soh if wi hoal bak fahn mek sakrifais fi Jehoava jos bikaaz wi noh waahn giv op tingz wi laik, wi ku en op di mek di sayhn mistayk laik di man eena Jeezas iloschrayshan weh mi liv wahn gud laif bot neva ga taim fi Gaad. (Reed Look 12:16-21.) Wahn brada weh naym Christian, weh liv da France, seh: “Ah neva mi-di gi mi bes tu Jehoava ahn mi faamli; Ah feel laik Ah neva mi-di gi dehn inof a mi taim an enerji.” Hihn an ih waif mi disaid fi staat tu painyaa. Bot fi reech da goal, dehn mi haftu kwit dehn jab. Dehn mi staat wahn lee kleenin bizniz soh dat dehn kuda ga weh dehn need, ahn dehn mi laan fi bee hapi di liv wid les moni. Yu tink dehn hapi dat dehn giv op sohn tingz soh dat dehn ku painyaa? Christian seh, “Wee injai wi minischri moa ahn wi injai fi si wi  Baibl stodiz ahn wi ritern vizit dehn laan moa bowt Jehoava.”

17. Weh ku hoal wi bak fahn chrai nyoo wayz fi preech?

¹⁷ Bee wilin fi chrai nyoo wayz fi preech. (Aks 17:16, 17; 20:20, 21) Shirley, wahn painyaa sista da di United States, mi mek sohn chaynjiz tu ih preechin joorin di COVID-19 pandemik. At fers, shee mi nervos fi du foan witnisin. Bot wen di serkit oavaseeya mi vizit ih kangrigayshan, shee mi geh sohn chraynin ahn dat mi help ahn fi chrai foan witnisin. Shee seh: “Eena di biginin, Ah mi frayd bad, bot now Ah di injai it wahn lat. Wee di taak tu lat moa peepl now dan bifoa wen wi mi-di preech fahn hows tu hows!”

18. If wi di fain it haad fi du moa eena di preechin werk, weh ku help wi?

¹⁸ Set wahn goal ahn chrai yu bes fi reech it. Wen wi di goh chroo wahn prablem, wi need fi pray tu Jehoava soh dat wi ku tink gud bowt weh wi wahn du. (Prov. 3:21) Sonia, wahn regyula painyaa eena di Romany-langwij groop da Europe, seh: “Ai laik rait dong mi goal dehn ahn put it pahn wahn spat weh eezi fi mek Ah ku see it. Pahn mi taybl Ah ga wahn jraain a too road weh di goh opozit dairekshan. Wen Ah haftu mek wahn disizhan, Ah luk pahn di too road an Ah tink if weda er nat mi disizhan wahn help mi reech mi goal.” Sonia chrai ga wahn pazitiv atichood wen ih di deel wid prablemz. Shee seh: “Evri taim wahn nyoo prablem kom op, da mee fi disaid if Ah wahn luk pan it laik wahn waal weh wahn stap mi fahn reech mi goal er laik wahn brij weh wahn help mi reech it.”

19. How wi ku shoa dat wi graytful fi aal di gud tingz weh Jehoava don gi wi?

¹⁹ Jehoava bles wi eena lata wayz. Mek wi shoa dat wi graytful fi di gud tingz weh hihn gi wi ahn mek wi du wi bes fi prayz ahn. (Heeb. 13:15) Dehn ga lata wayz fi mek wi du moa eena wi servis tu Jehoava. Wen wi du dis, wi wahn geh lata blesin fahn Jehoava. Eech day, mek wi luk fi wayz fi “ tays ahn si how gud Jehoava gud.” Den wi wahn bee laik Jeezas, weh mi seh: “Mai food da fi du di wil a di Wan weh sen mi, ahn fi finish di werk weh hihn gi mi fi du.”—Jan 4:34.