1-2. Weh wi wahn diskos eena dis aatikl?

IMAJIN dat yu di ekspek wan a yu frenz fi bring sohnting fi yu weh yu reeli need. How yu wuda feel if hihn noh reech wen yu mi-di ekspek ahn? Yu tink yu wuda feel disapointid? Proverbs 13:12 seh: “Wen tingz weh wi di ekspek fi hapm noh hapm, wi ku geh diskorij.” Bot den yu fain owt dat yu fren ga wahn gud reezn wai ih neva reech pahn taim. Now yu noh main wayt far ahn, ahn ga payshens, noh chroo?

² Eena dis aatikl, wi wahn luk pahn sohn Baibl prinsiplz weh wahn help wi fi “wayt payshent-wan.” (Mic. 7:7) Wi wahn aalso diskos too difrent sichuwayshan weh wi need fi ga payshens ahn wayt pahn Jehoava. Den, wi wahn kansida sohn blesinz weh Jehoava pramis tu dehn wan weh wilin fi wayt pahn hihn.

3. Weh wi ku laan fahn di prinsipl da Proverbs 13:11?

³ Proverbs 13:11 teech wi wai wi need fi bee payshent. Ih seh: “Sombadi weh geh rich faas looz ih richiz faas tu, bot sombadi weh werk haad, lee bit bai lee bit ih gyada ih richiz.” Weh wi laan fahn dis vers? Wahn waiz persn ga sokses bikaaz ih kyaaful how ih du tingz an ih payshent.

4. Weh wi ku laan fahn di prinsipl da Proverbs 4:18?

⁴ Proverbs 4:18 tel wi dat “di way a di raichos wan da laik di lait erli da maanin weh geh braita ahn braita til ful daylait.” Weh di Baibl seh rait ya help wi fi si dat lee bit bai lee bit Jehoava di help ih peepl andastan wat da fi hihn perpos.  Pan di ada han, dis vers ku aalso help wi andastan how wahn Kristyan wuda mek chaynjiz eena ih laif ahn jraa kloasa tu Jehoava. Ih tek taim fi mek aala dis hapm. Bot if wi tek di taim fi stodi ahn fala di kongsl weh wi geh fahn di Baibl ahn fahn Jehoava aaganaizayshan, lee bit bai lee bit wi wahn geh fi bee moa laik Jeezas. Wi wahn aalso geh fi noa Jehoava beta. Mek wi si how Jeezas help wi andastan dis point.

5. Weh iloschrayshan Jeezas mi yooz fi help wi andastan dat ih tek taim fi mek sombadi mek chaynjiz?

⁵ Jeezas mi yooz wahn iloschrayshan fi eksplayn how di Kingdom mesij weh wi preech da laik wahn smaal lee seed weh groa lee bit bai lee bit eena di haat a dehn wan wid di rait haat kandishan. Ih mi seh: “Di seed dehn sprowt op ahn groa taal. Ahn yet, hihn [di wan weh plaant it] noh eevn noa how ih mi hapm. Lee bit bai lee bit, di grayn groa fahn di grong pan ih oan. Fers, ih sprowt, den di shoot kom owt, den di grayn geh raip.” (Maak 4:27, 28) Weh Jeezas mi meen wid dis iloschrayshan? Hihn mi-di help di peepl andastan dat jos laik how ih tek taim fi mek wahn plaant groa, sayhn way soh ih tek taim fi mek sombadi weh bileev eena di Kingdom mesij mek chaynjiz eena ih laif. Fi egzampl, az wi Baibl styoodent dehn staat jraa kloasa tu Jehoava, wi wahn staat tu noatis di gud chaynjiz weh dehn di mek eena dehn laif. (Ifee. 4:22-24) Bot wi need fi aalwayz memba dat Jehoava da di Wan weh mek da lee seed groa.—1 Kor. 3:7.

6-7. Weh wi laan fahn di way Jehoava mi kriyayt di ert?

⁶ Eena evriting weh Jehoava du, ih tek di taim weh ih need fi finish ih werk. Hihn du dis soh dat ih ku bring prayz tu ih naym ahn fi help adaz. Mek wi kansida how Jehoava mi tek ih taim fi pripyaa di ert fi hyoomanz.

 ⁷ Wen di Baibl diskraib how Jehoava mi kriyayt di ert, ih seh dat hihn mi set “ih mezhament dehn,” sink “di kolom dehn” fi di ert, ahn set “di fongdayshan.” (Job 38:5, 6) Hihn mi eevn tek di taim fi tink bowt ahn luk pahn aal di werk weh ih mi du. (Gen. 1:10, 12) Imajin how di aynjel dehn mosi mi feel wen dehn mi si how Jehoava mi-di kriyayt evriting. Dis mosi mi veri eksaitin fi dehn! Akchwali, di aynjel dehn mi staat tu “klap kaaz dehn hapi” fi si di wandaful kriyayshan. (Job 38:7) Weh wi ku laan fahn aala dis? Wel, ih mi tek towznz a yaaz fi mek Jehoava finish kriyayt evriting. Bot wen hihn mi luk pahn aal weh ih mi kriyayt, hihn mi seh dat evriting mi “veri gud.”—Gen. 1:31.

8. Weh wi wahn diskos?

⁸ Laik weh wi si eena di egzampl dehn weh wi jos diskos, wi ku fain wahn lata Baibl prinsiplz weh help wi fi andastan dat wi need fi ga payshens. Now wi wahn diskos too difrent sichuwayshan weh wi need fi bee wilin fi wayt pahn Jehoava ahn ga payshens.

9. Wen wi wuda need fi wayt pahn Jehoava?

⁹ Wi wuda need fi wayt pahn Jehoava fi ansa wi pryaaz. Wen wi pray tu Jehoava fi help wi deel wid wahn prablem er fi help wi deel wid sohnting weh wi di schrogl wid, wi mait feel laik Jehoava di tek lang fi ansa wi pryaaz. Wai Jehoava noh ansa wi pryaaz rait away?

10. Wai wi need fi bee payshent ahn wayt fi mek Jehoava ansa wi pryaaz?

¹⁰ Jehoava reeli lisn tu wi pryaaz. (Ps. 65:2) Wen wi pray tu Jehoava, wi shoa dat wi ga fayt eena hihn. (Heeb. 11:6) Aalso, wen wi pray an aks Jehoava fi help wi du tingz weh pleez ahn, hihn waahn si dat wi di du wi bes fi du weh hihn waahn. (1 Jan 3:22) Soh wen wi aks Jehoava fi help wi stap du sohnting weh hihn noh laik, wi need fi bee payshent ahn du aal weh wi kud fi mek di chaynjiz weh wi need fi mek. Jeezas help wi fi andastan dat Jehoava mait noh ansa aala wi pryaaz rait away. Hihn mi seh: “Kip aan di aks, an unu wahn geh weh unu di aks fa; kip aan di saach, an unu wahn fain weh unu di saach fa; kip aan di nak, ahn di doa wahn oapm fi unu; bikaaz evribadi weh aks wahn get, an evribadi weh saach wahn fain, an evribadi weh nak pahn di doa, ih wahn oapm fi dehn.” (Mach. 7:7, 8) Wen wi fala dis advais ahn “pray aal di taim ahn noh giv op,” wi ku bee shoar dat Jehoava wahn hyaa an ansa wi pryaaz.—Kol. 4:2.

11. How Heebrooz 4:16 ku help wi wen wi noh geh di ansa tu wi pryaaz rait away?

¹¹ Eevn doa wi noh geh di ansa tu wi pryaaz rait away, Jehoava pramis wi dat hihn wahn ansa wi pryaaz “da di rait taim.” (Reed Heebrooz 4:16.) Soh wi shuda neva tink dat Jehoava mek wahn mistayk bikaaz hihn neva ansa wi pryaaz wen wee mi waahn hihn ansa it. Fi egzampl, fi wahn lata yaaz now peepl di pray fi mek Gaad Kingdom bring wahn en tu dis wikid werl. Eevn Jeezas mi seh dat wi shuda pray far it. (Mach. 6:10) Bot ih wuda bee wahn foolish ting if wi mek wi fayt eena Gaad geh week jos bikaaz di en neva kohn wen wee mi ekspek it fi kohn! (Hab. 2:3; Mach. 24:44) Di bes ting fi du da fi kantinyu wayt pahn Jehoava ahn ga fayt dat hihn wahn ansa wi pryaaz. Di en wahn kohn pahn di rait taim, bikaaz Jehoava  don pik di “day ahn di owa” fi mek dat hapm. Wen da day kohn, ih wahn bee di bes taim fi evribadi weh lov Jehoava.—Mach. 24:36; 2 Peet. 3:15.

12. Eena weh sichuwayshan ih mait bee haad fi mek wi bee payshent?

¹² Wi mait need fi bee payshent ahn bayr op anda injostis. Peepl aal oava di werl di fays injostis bikaaz a weh dehn kohn fram, dehn kolcha, dehn rays, er bikaaz dehn da man er uman. Adaz geh chreet eena wahn bad way sayka dehn fizikal er mental helt. Som a Jehoava servants don gaahn chroo injostis bikaaz a weh dehn bileev eena. Wen dehn chreet wi dis way, wi need fi memba Jeezas werdz. Hihn mi seh: “Bot di wan weh stay faytful tu di en a dis sistem a tingz wahn geh sayv.” (Mach. 24:13) Bot wat yu shuda du if yu noa bowt sohnbadi eena di kangrigayshan weh komit wahn seeryos sin? Afta di eldaz fain owt bowt it, yu wahn bee payshent ahn chros dat Jehoava wahn tek kayr a it? Weh di eldaz mait need fi du wen sohnbadi eena di kangrigayshan komit wahn seeryos sin?

13. Weh Jehoava waahn mek di eldaz du wen sohnbadi komit wahn seeryos sin?

¹³ Wen di eldaz fain owt dat sohnbadi eena di kangrigayshan komit wahn seeryos sin, dehn pray an aks Jehoava fi “wizdom weh kohn fahn hevn” soh dat dehn ku andastan di sichuwayshan di way how hihn andastan it. (Jay. 3:17) Fi dehn goal da fi help di persn “ton bak fan ih sin.” (Jay. 5:19, 20) Dehn aalso waahn du evriting weh dehn kud soh dat dehn ku protek di kangrigayshan ahn komfert dehn wan weh geh hert. (2 Kor. 1:3, 4) Wen di eldaz di handl di mata, fers dehn need fi fain owt weh mi reeli hapm, ahn dat mait tek sohn taim. Den, dehn pray ahn gi kongsl weh bays pahn di Skripchaz tu di persn weh komit di sin. (Jer. 30:11) Di eldaz dehn noh hori fi mek wahn disizhan, bot dehn noh tek lang needa. Wen di eldaz handl mataz Jehoava way, di hoal kangrigayshan benifit. Bot eevn if di eldaz du tingz Jehoava way, di persn weh inosent mait stil feel hert. If dis da how yoo feel, weh ku help yu fi deel wid di payn?

14. Wich egzampl fahn di Baibl ku help yu if sohnbadi eena di kangrigayshan hert yu?

 ¹⁴ Sohnbadi eena di kangrigayshan eva du sohnting weh hert yoo? Eena di Baibl wi ku fain sohn gud egzampl weh teech wi wai wi need fi wayt pahn Jehoava fi set mataz schrayt. Fi egzampl, eevn doa Joazef breda dehn mi chreet ahn bad, hihn neva alow weh dehn mi-du fi afek hihn. Insted, Joazef mi ga payshens an ih mi du ih bes fi serv Jehoava, bikaaz a dat Jehoava bles ahn. (Gen. 39:21) Laytaraan, Joazef mi fergiv dehn wan weh mi hert ahn an ih mi si how Jehoava mi bles ahn. (Gen. 45:5) Jos laik Joazef, wi geh komfert wen wi jraa kloasa tu Jehoava ahn lef mataz eena fi hihn han.—Ps. 7:17; 73:28.

15. Weh mi help wahn sista fi bayr op anda injostis?

¹⁵ Noh aala di injostis weh wi goh chroo tudeh az seeryos az weh Joazef mi gaahn chroo, bot wi stil feel hert wen sohnbadi chreet wi bad. Wen wi ga wahn prablem wid sohnbadi, eevn if da wid sohnbadi weh noh wership Jehoava, wi wahn benifit wahn lat if wi fala Baibl prinsiplz. (Fil. 2:3, 4) Kansida dis ekspeeryens. Wahn sista mi feel hert wen shee mi fain owt dat wan a ih werkmayt mi-di spred roomaz bowt shee weh da neva chroo. Insteda du sohnting bowt it rait away, shee stap ahn tink bowt Jeezas egzampl. Wen adaz mi insolt Jeezas, hihn neva insolt dehn bak. (1 Peet. 2:21, 23) Afta shee mi tink bowt Jeezas egzampl, shee mi disaid dat ih neva mi wahn wori bowt weh mi hapm. Laytaraan, shee geh fi fain owt dat ih werkmayt mi-di deel wid wahn seeryos helt prablem an ih mi deh anda lata schres. Soh shee figa dat di persn praabli neva meen weh ih mi seh. Di sista mi hapi dat shee mi ga payshens eevn wen ih mi-di deel wid di sichuwayshan, ahn bikaaz a dat shee mi ga pees.

16. Weh ku komfert yu if yu di deel wid injostis? (1 Peeta 3:12)

¹⁶ If yoo di sofa bikaaz a injostis er fi sohn ada reezn, memba dat Jehoava kloas tu dehn wan weh “sad eena dehn haat.” (Ps. 34:18) Hihn lov yu bikaaz yu  ga payshens ahn bikaaz yu di chroa yu woriz pahn hihn. (Ps. 55:22) Jehoava da di Joj a di hoal ert. Ahn hihn si evriting weh di hapm. (Reed 1 Peeta 3:12.) Soh wen yu di deel wid wahn seeryos prablem er injostis ahn yu kyaahn fiks it, memba dat ih impoatant fi mek yu wayt pahn Jehoava.

17. Da Isaiah 30:18, weh Jehoava pramis fi du?

¹⁷ Soon wi wahn injai lata blesinz anda Gaad Kingdom. Isaiah 30:18 seh: “Jehoava di bee payshent an ih di wayt fi bles yu, ahn hihn redi fi shoa yu mersi. Jehoava da wahn Gaad a jostis. Di wan dehn weh di wayt pahn hihn hapi.” Dehn wan weh di wayt pahn Jehoava wahn injai lata blesinz now an eena di fyoocha.

18. Weh blesinz wi wahn injai eena di fyoocha?

¹⁸ Wen wi deh eena di nyoo werl, wi noh wahn haftu wori bowt di prablemz weh wi di deel wid tudeh. Injostis noh wahn deh nohmoh, ahn wi noh wahn ekspeeryens payn nohmoh. (Rev. 21:4) Jehoava pramis wi dat wi noh wahn haftu wori bowt weh wi need bikaaz dehn wahn ga inof fi evribadi. (Ps. 72:16; Isa. 54:13) Dis wahn bee wahn wandaful taim!

19. Weh Jehoava di pripyaa wi fa rait now?

¹⁹ Jehoava di pripyaa wi fi liv anda fi hihn roolaship, soh ih di help wi fi geh rid a eni bad habit an ih di help wi fi ga kwalitiz weh pleez hihn. Soh noh mek notn diskorij yu ahn kaaz yu fi stap serv Jehoava. Wahn beta laif deh heda wi! Mek wi bee hapi ahn shoa payshens wail wi di wayt pahn Jehoava fi du weh hihn pramis!