1. Weh temtayshan Joazef mi hafu deel wid, bot weh hihn mi du?

 WAN taim, Jaykop son Joazef mi fays wahn big temtayshan. Wahn laydi mi tel ahn,“Kohn sleep wid mi.” Da laydi da-mi Potifa waif, ahn Potifa da-mi fi hihn baas. Bot Joazef mi rijek fi shee aafa. Sohn peepl mait wanda, ‘Wai Joazef neva giv een tu dis temtayshan?ʼ Ih baas neva deh hoam, ahn Joazef da-mi jos wahn slayv. Pahn tap a dat, shee kuda mi mek ih laif mizarabl if hihn mi kip aan di rijek ahn. Bot eevn soh, evritaim shee mi chrai get ahn fi sleep wid ahn, hihn rijek ahn. Wai hihn mi du dat? Hihn mi seh: “Soh how Ai kuda du sohnting soh bad an akchwali sin gens Gaad?”—Gen. 39:7-12.

2. How Joazef mi noa dat adolchri da wahn sin gens Gaad?

² Di komanment weh seh dat “yu noh fi cheet pahn yu hozban er yu waif” da-mi paat a di Laa weh Gaad gi Moaziz fi di Izrelait dehn, bot Hihn neva gi dehn da Laa til bowt too honjrid yaaz layta. (Ex. 20:14) Soh how Joazef mi noa dat fi hihn Gaad mi si adolchri az sohnting weh “soh bad”? Wel, Joazef mi noa Jehoava gud inof fi andastan how Hihn feel bowt adolchri. Fi egzampl, Joazef mi noa dat marij fi bee bitween wan man ahn wan uman, di way Gaad mek it. Ahn fi shoar hihn mi hyaa bowt di taim dehn wen Jehoava mi protek ih grayt-graama, Saara, fahn too king soh dat shee kuda mi stay faytful tu ih hozban. Ahn Gaad mi du di saym ting fi protek Ribeka, hoo da-mi Aizak waif. (Gen. 2:24; 12:14-20; 20:2-7; 26:6-11) Az Joazef  mi tek di taim fi tink bowt aala dat, hihn mi geh fi andastan weh Jehoava vyoo az rait ahn rang. Ahn bikaaz hihn mi lov Jehoava, hihn mi aalso lov Ih standadz. Hihn mi mek op ih main fi rispek dehndeh standadz.

3. Weh wi wahn taak bowt eena dis aatikl?

³ Yoo lov fi du weh rait? Af koars yes! Bot non a wi perfek, an ih ku bee eezi fi mek weh di werl kansida fi bee rait afek wi, soh wi haftu bee kyaaful. (Isa. 5:20; Roam. 12:2) Eena dis aatikl, wi wahn taak bowt wat da raichosnis ahn how wee benifit wen wi lov weh rait. Den wi wahn taak bowt chree tingz wi ku du fi ga schrang lov fi Jehoava standadz.

4. Weh wahn lata peepl tink ih meen fi bee raichos?

⁴ Wen peepl tink bowt sombadi weh raichos, dehn yoozhwali tink bowt sohnbadi weh prowd, weh laik joj adaz, ahn weh tink dat ih beta dan adaz. Bot Gaad noh laik peepl weh stan soh. Ahn wen Jeezas mi deh ya pahn ert, hihn mi kritisaiz di rilijos leedaz weh mi mek op dehn oan roolz bowt weh rait. (Eccl. 7:16; Look 16:15) Bot reeli, wahn raichos persn du weh Gaad seh rait an ih noh tink dat ih beta dan adaz.

5. Akaadn tu di Baibl, wat da raichosnis? Gi sohn egzampl.

⁵ Tu Jehoava, da wahn byootiful ting wen sohnbadi raichos, ih meen dehn du weh rait akaadn tu fi Hihn standadz. An eena di Baibl, di werdz ih yooz fi “raichosnis” help wi andastan dat wi fi liv bai di haiyis standadz weh egzis, Jehoava standadz. Fi egzampl, Jehoava mi tel di biznizman dehn fi yooz sohn “aanis wayt.” (Deut. 25:15) Di orijinal Heebroo werd weh geh chranslayt az “aanis” ku aalso geh chranslayt az “raichos.” Dat da wai if wahn Kristyan waahn Jehoava si ahn az raichos, ih haftu bee aanis wen ih du bizniz. Wahn raichos persn aalso lov jostis. Ih hayt fi si wen peepl noh geh chreet eena wahn fyaa way. Soh if sohnbadi waahn “bring prayz” tu Jehoava ahn bee raichos, dehn need fi tink bowt how Jehoava wahn luk pahn di disizhanz dehn mek.—Kol. 1:10.

6. Wai wi ku chros eena Jehoava standadz a weh rait ahn rang? (Isaiah 55:8, 9)

⁶ Di Baibl mek wi noa dat raichosnis kohn fahn Jehoava. Ahn dat da wai di Baibl kaal Hihn “di plays a raichosnis.” (Jer. 50:7) Hihn da di Kriyayta, onli hihn ga di rait fi seh weh rait ahn weh rang. Ahn bikaaz wi noh perfek ahn wi da sinaz, wi kyaahn aalwayz andastan weh rait ahn weh rang. Bot Jehoava perfek, hihn noa egzakli weh rait ahn rang. (Prov. 14:12; reed Isaiah 55:8, 9.) * Ahn bikaaz Gaad mek wee eena fi hihn imij, wee ku du weh rait akaadn tu fi hihn standadz. (Gen. 1:27) Ahn wi lov fi du dat. Di lov weh wi ga fi wi Faada moov wi fi chrai bee laik hihn az bes az wi kud.—Ifee. 5:1.

7. Wai wi need gud standadz? Yooz di egzampl eena di paragraaf.

⁷ Wi benifit wen wi liv bai weh Jehoava seh rait ahn rang. Mek wi si wai. Fi egzampl, weh wuda hapm if eech bank mi disaid wat da di valyu a moni, er weh wuda hapm if eech kanschrokshan kompani mi kom  op wid dehn oan sistem fi mezha tingz? Dis wuda kaaz lata prablemz, noh chroo? Er, wat if eech dakta er ners wuda tek kayr a dehn payshens akaadn tu dehn oan standadz? Som a dehn mait ded, noh chroo? Dis teech wi dat wen peepl fala wan set a roolz er standadz, ih serv az wahn protekshan. Saym way soh, wen wi liv akaadn tu weh Gaad seh rait ahn rang, da fi wi oan gud; ih protek wi.

8. Weh blesinz dehn wan weh du weh rait wahn get?

⁸ Jehoava bles peepl weh chrai liv bai fi hihn standadz. Hihn gi wi dis pramis: “Di raichos wan dehn wahn inherit di ert, ahn dehn wahn liv fareva pan it.” (Ps. 37:29) Yoo ku imajin how tingz wahn bee wen evribadi fala Jehoava standadz? Peepl wahn hapi ahn dehn wahn injai yooniti ahn pees. Jehoava waahn yoo injai da kaina laif. Fi shoar, eech wan a wi ga gud reezn fi lov raichosnis! Bot how wi ku lov raichosnis eevn moa? Mek wi diskos chree tingz weh wi ku du.

9. Weh ku help wi fi lov raichosnis?

⁹ Step 1: Lov di Persn weh set di standadz. If wi waahn lov raichosnis, wi need fi lov Jehoava eevn moa bikaaz hihn set di standadz a weh rait ahn rang. Di moa wi lov Jehoava, di moa wi wahn waahn fala fi hihn raichos standadz. Mek wi tink bowt Adam ahn Eev egzampl. If dehn mi lov Jehoava, dehn wuda mi obay fi hihn koman.—Gen. 3:1-6, 16-19.

10. How Aybraham mi geh fi andastan Jehoava beta?

¹⁰ Non a wi waahn mek di saym mistayk laik Adam ahn Eev, noh chroo? Fi mek wi noh en op di du di saym ting, wi need fi kip aan di laan bowt Jehoava, apreeshiayt fi hihn kwalitiz, an andastan di way how hihn tink. Wen wi du dat, fi shoar wi lov fi Jehoava wahn groa. Tink bowt Aybraham egzampl. Hihn mi reeli lov Jehoava. An eevn wen hihn neva andastan Jehoava disizhan dehn, ih neva gaahn gens dehn. Insteda dat, ih mi chrai geh fi noa Jehoava beta. Fi egzampl, wen Aybraham mi fain owt dat Jehoava, hoo da “di Joj oava aal di ert,” mi wahn dischrai Sadam ahn Gomora, hihn mi wori dat Jehoava mi wahn dischrai raichos peepl lang wid wikid peepl. Dat neva mek sens tu Aybraham, soh eena wahn hombl way hihn mi aks Jehoava lata kweschanz. Ahn Jehoava mi payshent wid ahn, an ih ansa aala ih kweschan dehn. Aftawodz, Aybraham mi geh fi andastan dat Jehoava egzamin eech persn haat ahn dat Hihn neva ponish di raichos wid di wikid.—Gen. 18:20-32.

11. How Aybraham mi shoa dat ih lov ahn chros Jehoava?

¹¹ Di kanvasayshan weh Aybraham mi ga wid Jehoava bowt Sadam ahn Gomora mi toch ih haat. Wi ku bee shoar dat hihn mi geh fi lov ahn rispek ih Faada eevn moa. Yaaz layta, Jehoava mi aks Aybraham fi du sohnting weh mi wahn shoa humoch ih chros ahn. Jehoava mi aks fi sakrifais Aizak, ih son weh ih mi onli lov. Bot bai den, Aybraham mi don geh fi noa Gaad beta, soh ih neva ga eniting fi aks Ahn. Aybraham jos du weh Jehoava aks ahn fi du. Ahn wi ku onli imajin humoch payn Aybraham mi feel wail ih mi-di geh redi fi du dat! Aybraham mosi mi tink wahn lat bowt weh ih mi laan bowt Jehoava. Hihn mi noa dat Jehoava wuda neva du sohnting weh noh rait er weh noh shoa lov. An  akaadn tu di apasl Paal, Aybraham mi bileev dat Jehoava kuda rezorek fi hihn son Aizak. (Heeb. 11:17-19) Hihn memba dat Jehoava mi pramis dat Aizak wuda mi ga lata pikni, bot rong dehn taim, Aizak neva ga no pikni yet. Aybraham mi lov Jehoava, soh hihn mi shoar dat Jehoava wuda du weh rait. Da sichuwayshan neva eezi fi Aybraham, bot bikaaz hihn mi ga fayt, ih mi obay.—Gen. 22:1-12.

12. How wi ku bee laik Aybraham? (Psalm 73:28)

¹² How wi ku bee laik Aybraham? Jos laik Aybraham, wi need fi kantinyu laan bowt Jehoava. Wen wi du dis, wi wahn jraa kloasa tu Jehoava ahn wi wahn lov ahn eevn moa. (Reed Psalm 73:28.) * Wi wahn di chrayn wi kanshans fi tink moa ahn moa laik Gaad. (Heeb. 5:14) Soh wen sohnbadi chrai temp wi fi du sohnting weh rang, wi wahn rijek it. Wi wahn hayt eniting weh ku mek wi hert wi Faada ahn weh ku damij wi rilayshanship wid ahn. Bot, wat els yu tink wi ku du fi shoa dat wi lov raichosnis?

13. Weh ku help wi fi du weh rait? (Proverbs 15:9)

¹³ Step 2: Werk haad evri day fi lov tingz weh rait. Jos laik how wi need fi werk haad evri day fi schrentn wahn mosl, wi need fi werk haad fi schrentn wi lov fi tingz weh Jehoava seh rait. Dis da sohnting wi need fi du evri day. Jehoava andastan wi, ahn hihn noh ekspek wi fi du moa dan weh wi ku du. (Ps. 103:14) Fi hihn Werd tel wi dat “hihn lov enibadi weh chrai haad fi du weh rait.” (Reed Proverbs 15:9.) * If wi di chrai reech wahn spesifik goal eena wi servis tu Jehoava, dat meenz wi need fi kantinyu werk haad fi reech it, noh chroo? Da di saym ting wen wi di chrai du weh rait. Ahn Jehoava wahn help wi fi kantinyu mek proagres,  eevn doa ih mait tek sohn taim.—Ps. 84:5, 7.

14. How wi ku wayr raichosnis laik wahn ves, ahn wai wi need fi du dat?

¹⁴ Eena wahn lovin way, Jehoava tel wi dat ih noh haad fi du weh rait. (1 Jan 5:3) Rada, da wahn protekshan, ahn da sohnting weh wi need evri day. Wi need fi memba di spirichwal soot weh Gaad gi wi weh Paal mi taak bowt. (Ifee. 6:14-18) Yoo memba wich paat a di soot mi protek di soalja haat? Da mi di “raichosnis pahn [dehn] ches,” weh stan fi Jehoava raichos standadz. Jos laik how di aiyan ves protek di soalja haat, da rait soh Jehoava raichos standadz ku protek fi wee haat, di kaina persn hoo wee pahn di eensaid. Soh den, wi need fi mek shoar dat wi kantinyu wayr raichosnis laik wahn ves!—Prov. 4:23.

15. How yoo ku wayr raichosnis?

¹⁵ How yoo ku wayr raichosnis? Yu ku du dis wen yu memba Gaad standadz wen yu di mek disizhanz evri day. Fi egzampl, wen wi di disaid weh wi wahn taak bowt, weh myoozik wi wahn lisn tu, weh wi wahn wach, er weh buks wi wahn reed, wi need fi aks wiself: ‘Weh Ai di put eena mi haat? Jehoava wuda pleez wid dis? Er dis ku mek Ah du tingz weh Jehoava noh si az raichos, laik fi bee imoaral, vailent, greedi, er fi onli tink bowt miself?ʼ (Fil. 4:8) If di disizhanz weh yu mek goh lang wid weh Jehoava seh rait, yu wahn di alow Jehoava raichos standadz fi protek yu haat.

16-17. How Isaiah 48:18 help wi fi bee shoar dat wi ku liv akaadn tu Jehoava standadz fareva?

¹⁶ Yu eva wanda if yu ku kantinyu liv akaadn tu Jehoava standadz day afta day ahn yaa afta yaa? Tink bowt di egzampl weh Jehoava mi yooz da Isaiah 48:18. (Reed.) * Jehoava pramis wi dat wi raichosnis ku bee “laik di wayv dehn eena di see.” Imajin yu di stan op bai seesaid, ahn yu di wach di wayv dehn di kom een wan afta di ada widowt stap. Ih soh peesful, bot yu tink dat wan day dehndeh wayv wuda stap? Af koars nat! Kaaz yoo noa dat dehndeh wayv di lash gens di seesaid fi towznz a yaaz, ahn dehn wahn kip aan di du dat.

¹⁷ Yu raichosnis ku bee jos laik di wayv dehn eena di see! How? Wen yu need fi mek wahn disizhan, tink bowt weh Jehoava wuda waahn yu du. Den du it. Noh mata how haad di disizhan mait bee, yu ku bee shoar dat evri day a yu laif yu lovin Faada wahn dehdeh fi help yu du weh rait akaadn tu fi hihn raichos standadz.—Isa. 40:29-31.

18. Wai wi noh fi joj adaz bai fi wee oan standadz?

¹⁸ Step 3: Mek Jehoava bee di joj. Aala wi chrai haad fi liv akaadn tu Jehoava raichos standadz, soh wi haftu du wi bes fi noh joj adaz an ak laik wi moa raichos dan dehn. Soh wi noh waahn luk dong pahn adaz ahn joj dehn bays pahn weh wee tink rait. Rada, wi memba dat Jehoava da “di Joj oava aal di ert.” (Gen. 18:25) Jehoava neva gi wee di atariti fi joj. In fak, Jeezas mi seh: “Stap joj adaz, ahn Gaad noh wahn joj unu.”—Mach. 7:1. *

19. How Joazef mi shoa dat hihn mi chros Jehoava fi bee di joj?

 ¹⁹ Tink bowt Joazef egzampl. Hihn da-mi wahn raichos man. Ih neva joj adaz, eevn dehn wan weh mi chreet ahn bad. Fi hihn oan breda dehn mi chreet ahn reeli bad, dehn mi sel ahn az wahn slayv, ahn dehn mi mek dehn pa bileev dat Joazef mi ded. Bot da neva til yaaz afta dat Joazef mi geh fi si ih famili agen. Ahn bai da taim hihn da-mi wahn powaful roola, soh ih kuda mi joj dehn eena wahn rof way ahn mek dehn pay fi weh dehn du ahn. Dat da egzakli weh Joazef breda dehn mi frayd fa, eevn doa dehn mi reeli sari fi weh dehn du. Bot Joazef mi tel dehn: “Noh frayd. Ai da noh Gaad, Ai kyaahn joj unu.” (Gen. 37:18-20, 27, 28, 31-35; 50:15-21) Joazef mi hombl ahn hihn mi noa dat da onli Jehoava ga di rait fi joj.

20-21. Weh ku help wi fi noh tink dat wee moa raichos dan adaz?

²⁰ Jos laik Joazef, wi need fi mek Jehoava bee di joj. Fi egzampl, wi noh fi chrai figa owt di reezn wai wi bradaz ahn sistaz mi du sohnting. Wee kyaahn reed ada peepl haat; onli “Jehoava egzamin wai wi du tingz.” (Prov. 16:2) Jehoava lov evribadi, noh mata weh bakgrong er kolcha dehn kohn fram. Ahn Jehoava inkorij wi fi “oapm op [wi] haat” tu evribadi. (2 Kor. 6:13) Wi waahn lov aala wi bradaz ahn sistaz ahn noh joj dehn.

²¹ Dis aalso meen dat wi noh fi joj peepl weh da noh paat a wi kangrigayshan. (1 Tim. 2:3, 4) Yu wuda eva joj wan a yu famili memba weh da noh wan a Jehoava Witnisiz ahn seh, “Da man wahn neva kom eena di chroot”? No, yu wudn seh dat, er els yu wuda di tink dat yu moa raichos dan adaz. Jehoava stil di giv “evribadi” wahn apachooniti fi ripent. (Aks 17:30) Aalwayz memba dat tu Jehoava, enibadi weh tink dat dehn moa raichos dan adaz akchwali noh raichos ataal.

22. Wai yoo mek op yu main fi lov raichosnis?

²² Wi lov fi Jehoava raichos standadz mek wi hapi an ih help adaz fi jraa kloasa tu wee ahn wi Gaad. Mek wi neva stap “bee hongri ahn tersti fi raichosnis.” (Mach. 5:6) Yu ku bee shoar dat Jehoava noatis how haad yu di werk fi du weh rait ahn hihn hapi wid weh yu di du. An az peepl eena di werl kantinyu fi du moa ahn moa tingz weh noh raichos, wee ku feel gud bikaaz “Jehoava lov enibadi weh raichos.”—Ps. 146:8.