1. Wai Jeezas mi aks Jehoava fi wach oava ih falowaz?

 DI NAIT bifoa Jeezas ded, ih mi aks ih hevnli Faada fi du sohnting veri impoatant far ahn. Hihn mi aks Jehoava fi wach oava ih falowaz. (Jan 17:15, 20) Jehoava aalwayz wach oava ih peepl, hihn tek kayr a dehn ahn protek dehn. Bot Jeezas mi noa dat Saytan mi wahn chrai mek tingz reeli haad fi dehn. Ahn Jeezas mi noa dat dehn mi wahn need Jehoava help fi bayr op wen di Devl atak dehn wid aala ih wikidnis.

2. Akaadn tu Psalm 33:18-20, wai wi noh need fi frayd wen wi di goh chroo chraiyalz?

² Dis werl weh deh anda Saytan kanchroal kaaz wahn lata chrobl fi Kristyanz tudeh. Wi goh chroo lata chraiyalz weh ku diskorij wi an eevn mek it haad fi stay laayal tu Jehoava. Eena dis aatikl, wi wahn si wai wi noh need fi frayd. Jehoava di wach oava wi. Dat meenz dat hihn si di prablemz weh wi gat, an ih waahn help wi. Mek wi luk pahn too Baibl egzampl weh wahn shoa wi how Jehoava “wach oava dehn wan hoo fyaa hihn.”—Reed Psalm 33:18-20. *

3. Wen wi mait feel laik nobadi dehdeh fi help wi?

³ Eevn doa wi ga wahn big spirichwal famili, sohntaim wi mait stil feel laik nobadi dehdeh fi help wi. Fi egzampl, yong wanz mait feel laik dehn deh pahn dehn oan wen dehn haftu eksplayn weh dehn bileev fronta dehn klaasmayts da skool er wen dehn moov da wahn nyoo kangrigayshan.  Som a wi mait feel sad er dipres ahn wi feel laik wi haftu deel wid dehnya feelinz pahn wi oan. Dis ku mek wi noh waahn taak tu adaz bowt how wi feel bikaaz wi frayd dat dehn noh wahn andastan wi. Ahn sohntaim, wi mait eevn wanda if enibadi reeli kay bowt wi. Noh mata wai wi feel laik nobadi dehdeh fi wi, wi mait en op di feel angshos er laik wi kyaahn du notn bowt it. Bot Jehoava noh waahn wi feel da way. Wai wi seh dat?

4. Wai di prafit Ilaija mi seh: “Ai da di onli wan weh lef”?

⁴ Mek wi kansida Ilaija egzampl. Bikaaz Jezibel mi waahn kil ahn, da faytful man mi-di ron fi ih laif fi 40 dayz. (1 Ki. 19:1-9) Wen ih fainali reech da wahn kayv, ih tel Jehoava: “Ai da di onli [prafit] weh lef.” (1 Ki. 19:10) Bot hihn da neva di onli prafit weh lef. Oabadaiya mi manij fi sayv 100 prafit fahn Jezibel. (1 Ki. 18:7, 13) Soh, wai Ilaija mi feel laik nobadi neva dehdeh fi help ahn? Maybi ih mi tink dat aala di prafit weh Oabadaiya mi sayv mi don ded bai now. Er maybi ih mi feel da way bikaaz nobadi mi jain ahn fi serv Jehoava afta Jehoava mi proov da Mongt Karmel dat Hihn da di chroo Gaad. Maybi hihn mi feel laik nobadi mi noa dat ih enimi dehn mi-di chrai kil ahn, er dat nobadi mi kay bowt ahn. Di Baibl noh tel wi egzakli wai Ilaija mi feel da way, bot wi doo noa dat Jehoava mi andastan wai Ilaija mi feel da way, an Ih mi noa egzakli how Ih mi wahn help ahn.

5. Weh Jehoava mi du fi help Ilaija fi si dat ih neva dehn pan ih oan?

⁵ Jehoava mi help Ilaija eena difrent wayz. Ih mi inkorij ahn fi taak bowt how ih feel. Too taimz ih mi aks ahn: “Weh yu di du ya?” (1 Ki. 19:9, 13) Eech taim ih aks ahn, Jehoava mi lisn tu Ilaija wen ih tel ahn how ih feel. Ahn Jehoava mi ansa Ilaija wen ih mi shoa ahn dat ih dehdeh far ahn, an dat ih reeli powaful. An Jehoava mi tel ahn dat wahn lata Izrelaits stil mi-di wership Ahn. (1 Ki. 19:11, 12, 18) Fi shoar Ilaija mi feel beta afta  ih mi pray tu Jehoava an afta Jehoava ansa ih pryaa. Jehoava mi giv Ilaija sohn impoatant werk fi du. Ih mi aks ahn fi anoint Hazayel fi bee king oava Siriya, Jeehoo fi bee king oava Izrel, an Ilaisha fi bee wahn prafit. (1 Ki. 19:15, 16) Wen Jehoava mi giv Ilaija dehnya asainment, Ih mi-di help ahn fi foakos pahn pazitiv tingz. Ahn Gaad mi giv ahn wahn kloas fren weh da-mi Ilaisha. How yoo ku geh help fahn Jehoava wen yu feel laik nobadi dehdeh fi help yu?

6. Weh yu ku pray bowt wen yu feel laik yu deh pahn yu oan? (Psalm 62:8)

⁶ Jehoava waahn yu pray tu ahn. Hihn si evriting weh yu di goh chroo, an ih waahn yu noa dat ih wahn lisn tu yu weneva yu pray tu ahn. (1 Tes. 5:17) Hihn hapi fi lisn tu peepl weh wership ahn. (Prov. 15:8) Weh yu ku pray bowt wen yu feel laik yu deh pahn yu oan? Oapm op yu haat tu Jehoava ahn tel ahn egzakli how yu feel, jos laik weh Ilaija mi du. (Reed Psalm 62:8.) * Tel ahn weh di wori yu ahn how dat mek yu feel. Aks Jehoava fi help yu noa weh fi du wen yu feel laik yu deh pahn yu oan er wen yu feel sad. Fi egzampl, if yu feel laik yu deh pahn yu oan er if yu frayd wen yu klaasmayt dehn aks yu kweschanz bowt weh yu bileev eena, bayg Jehoava fi gi yu di korij weh yu need fi taak op. Yu ku eevn aks ahn fi wizdom fi eksplayn yu bileef dehn eena wahn rispekful way. (Look 21:14, 15) If yu feel dipres er diskorij, aks Jehoava fi help yu taak wid wahn spirichwali machoar Kristyan bowt how yu feel. Yu ku aks Jehoava fi help di persn weh yu taak tu fi andastan how yu feel. Tel Jehoava egzakli how yu feel, si how ih ansa yu pryaaz, an aksep help fahn ada peepl. If yu du dat, yu noh wahn feel laik yu deh pahn yu oan.

7. Weh yu laan fahn Mauricio egzampl?

⁷ Jehoava giv aala wi impoatant werk fi du. Yu ku bee shoar dat hihn noatis an apreeshiayt aala di werk weh yu du eena di kangrigayshan an eena di minischri. (Ps. 110:3) Stay bizi di du dehnya tingz kaaz dat wahn help yu wen yu feel laik yu deh pahn yu oan. How? Tink bowt di egzampl a wahn brada weh naym Mauricio. * Noh tu lang afta Mauricio geh baptaiz, wan a ih bes fren staat tu jrif weh fahn di chroot. Mauricio seh: “Wen Ah si dat hihn mi-di jrif weh fahn Jehoava, Ah staat tu wanda if Ai kuda mi kip mi pramis tu Jehoava ahn kantinyu bee paat a ih famili. Ah mi feel laik Ah deh pahn mi oan, an Ah mi tink nobadi kyaahn andastan  how Ah feel.” Weh mi help Mauricio? Ih seh: “Ah mi staat du moa eena di minischri. Dat mi help mi fi noh jos tink bowt miself ahn how bad Ah mi feel. Ah mi feel hapiya wen Ah werk wid adaz eena di minischri, an Ah neva feel laik da mee wan.” Ih klyaa fi si dat eevn wen wi kyaahn preech wid wi bradaz ahn sistaz fays-tu-fays, wi fayt geh schranga wen wi du leta raitin er foan witnisin tugeda. Wat els mi help Mauricio? Hihn seh: “Ah mi stay bizi eena di kangrigayshan. Ah mi du mi bes wen Ah pripyaa fi styoodent asainments fi di meetin dehn. Dehnya asainment mi mek Ah feel laik Jehoava ahn mi bradaz ahn sistaz apreeshiayt mi.”

8. How chraiyalz ku afek wi?

⁸ Wi ekspek dat wi wahn fays chraiyalz joorin di laas dayz. (2 Tim. 3:1) Stilyet, wi mait noh ekspek wahn sertn kaina chraiyal er ih mait eevn sopraiz wi wen ih hapm. Maybi wi en op wid moni prablemz sodn-wan, wi dakta tel wi dat wi ga wahn bad siknis, er sohnbadi weh wi lov ded. Wen tingz laik dat hapm, wi mait sofa ahn feel schres owt, espeshali if da wan chraiyal afta di ada er eevn if da lata chraiyalz wan lik. Bot memba dat Jehoava di wach oava wi, ahn wid fi hihn help wi ku bee shoar dat wi ku bayr op anda eni chraiyal.

9. Wat da som a di chraiyalz weh Joab gaahn chroo?

⁹ Mek wi luk pahn how Jehoava mi help di faytful man Joab. Joab mi gaahn chroo sohn seeryos chraiyalz wan afta di ada. Eena jos wan day, hihn fain owt dat sohnbadi eeda teef er kil aala ih animal dehn, ih servant dehn ded an, fi mek mataz wers, aala ih pikni dehn mi ded tu. (Job 1:13-19) Lee bit layta, wail ih mi stil eena payn fi evriting weh ih mi-di goh chroo, Joab mi geh wahn terabl siknis. (Job 2:7) Joab sichuwayshan mi soh bad dat ih mi seh: “Ai hayt mi laif; Ah noh waahn kantinyu liv.”—Job 7:16.

10. How Jehoava mi gi Joab weh ih mi need fi bayr op wen ih mi-di fays chraiyalz? (Koment pahn di picha pahn di kova.)

¹⁰ Jehoava mi-di wach oava Joab, ahn bikaaz ih mi lov ahn, Jehoava mi giv ahn weh ih need fi bayr op ahn stay faytful wen ih mi-di goh chroo chraiyalz. Jehoava mi taak tu Joab an ih rimain ahn dat Hihn waiz ahn lovin, ahn dat Ih aalwayz tek kayr a Ih kriyayshan. Jehoava mi taak bowt lata wandaful animalz. (Job 38:1, 2; 39:9, 13, 19, 27; 40:15; 41:1, 2) Ahn Jehoava mi yooz wahn faytful yong man weh naym Ilaihoo fi schrentn ahn komfert Joab. Ilaihoo mi rimain Joab dat Jehoava aalwayz bles Ih peepl weh di bayr op ahn stay faytful. Bot Jehoava mi yooz Ilaihoo fi gi Joab lovin kongsl tu. Ilaihoo mi help Joab fi stap tink onli bowt ihself ahn fi si dat Jehoava, di Kriyayta a di yoonivers, way moa impoatant dan wee. (Job 37:14) Jehoava mi aalso gi Joab wahn asainment. Joab mi fi pray fi ih chree soa-kaal frenz weh mi sin. (Job 42:8-10) How Jehoava sopoat wee wen wi goh chroo chraiyalz?

11. How di Baibl ku help wi wen wi di goh chroo chraiyalz?

¹¹ Jehoava noh taak tu wi dairek laik weh ih mi du wid Joab, bot ih doo taak tu wi chroo fi Hihn Werd, di Baibl. (Roam. 15:4) Hihn gi wi hoap fi di fyoocha fi komfert wi. Mek wi luk pahn sohn  egzampl weh shoa wi how di Baibl ku komfert wi wen wi di fays chraiyalz. Eena di Baibl, Jehoava pramis wi dat notn, nat eevn wi chraiyalz, “ku stap Gaad fahn lov wi.” (Roam. 8:38, 39) Hihn tel wi dat ih “noh deh faar fahn di wan dehn weh di kaal pahn hihn.” (Ps. 145:18) Jehoava tel wi dat if wi pen pahn hihn, wi ku bayr op anda eni chraiyal ahn bee hapi eevn if wi sofa. (1 Kor. 10:13; Jay. 1:2, 12) Gaad Werd aalso tel wi dat wi chraiyalz onli wahn laas fi wahn lee wail, bot di riwaad weh ih pramis wi wahn laas fareva. (2 Kor. 4:16-18) Jehoava pramis wi dat hihn wahn dischrai evribadi weh kaaz prablemz fi wi, inkloodin Saytan di Devl an enibadi els weh fala fi hihn wikid wayz. (Ps. 37:10) Di Baibl gat een lata vers weh ku gi wi komfert wen wi di goh chroo chraiyalz. Yoo laan eni a dehnya Baibl pasij bai haat soh dat dehn ku help yu eena di fyoocha?

12. Weh Jehoava ekspek wi fi du if wi waahn benifit fahn fi hihn Werd?

¹² Jehoava ekspek wi fi mek taim fi stodi di Baibl regyula ahn fi meditayt bowt weh wi reed. Wen wi yooz weh wi laan, wi fayt wahn geh schranga ahn wi wahn geh kloasa tu wi hevnli Faada. Den wi wahn ga di schrent fi bayr op anda eni chraiyal. Ahn Jehoava giv ih hoali spirit tu enibadi weh pen pahn fi hihn Werd. Da spirit ku gi wi di “powa weh hyoomanz noh naamali gat” fi mek wi bayr op anda eni chraiyal weh wi fays.—2 Kor. 4:7-10.

13. How di spirichwal food weh “di faytful ahn waiz slayv” gi wi ku help wi fi bayr op wen wi goh chroo chraiyalz?

¹³ Wid Jehoava help, “di faytful ahn waiz slayv” gi wi wahn hoal lata aatikl, veedyo, ahn myoozik weh ku help wi bil schrang fayt ahn stay kloas tu Jehoava. (Mach. 24:45) Wi need fi mek gud yoos a evriting weh Jehoava gi wi. Wahn sista fahn di United States laytli seh humoch shee apreeshiayt aala di spirichwal food weh wi get. Ih seh: “Joorin di 40 yaaz weh Ah di serv Jehoava, Ah fays aal kaina sichuwayshan weh tes mi laayalti.” Shee gaahn chroo sohn seeryos chraiyalz—wahn jronk jraiva nak dong fi shee grampa ahn kil ahn, ih payrents ded aafa wahn dedli siknis, ahn shee mi kech kyansa too taim. Weh mi help ahn fi bayr op chroo aala dat? Shee seh: “Jehoava aalwayz tek kayr a mi. Di spirichwal food  weh hihn gi wi chroo di faytful ahn waiz slayv help mi fi noh giv op. Bikaaz a dat, Ah ku seh di saym ting laik weh Joab mi seh: ‘Ah noh wahn giv op mi laayalti, eevn if Ah haftu ded!ʼ”—Job 27:5.

14. How Jehoava yooz wi bradaz ahn sistaz fi sopoat wi wen wi di goh chroo chraiyalz? (1 Tesaloanyanz 4:9)

¹⁴ Jehoava chrayn ih servants fi lov ahn komfert wan anada wen dehn goh chroo haad taimz. (2 Kor. 1:3, 4; reed 1 Tesaloanyanz 4:9.) Wi bradaz ahn sistaz kapi Ilaihoo egzampl wen dehn eega fi help wi stay faytful az wi di goh chroo chraiyalz. (Aks 14:22) Fi egzampl, tink bowt how Diane kangrigayshan mi inkorij ahn an help ahn fi stay kloas tu Jehoava afta ih hozban mi gaahn chroo wahn seeryos helt prablem. Diane seh: “Ih mi haad. Bot wi mi feel Jehoava schrang ahn lovin han dehn joorin dehndeh haad taimz. Wi kangrigayshan mi du wahn lat fi help wi. Aala di vizit, foan kaal, ahn hog dehn weh wi get fahn wi bradaz ahn sistaz mi reeli help wi fi noh giv op. Laik how Ah noh jraiv, di bradaz ahn sistaz mi mek shoar dat Ah mi aybl fi goh da meetin ahn goh owt pahn feel servis wen Ah kud.” Da wahn reel blesin fi bee paat a wi lovin spirichwal famili!

15. Wai wi ku bee shoar dat wi ku bayr op anda eni chraiyal?

¹⁵ Aala wi wahn fays difrent chraiyalz. Bot, laik weh wi don diskos, wi wahn neva haftu fays wahn chraiyal pahn wi oan. Laik wahn lovin pa, Jehoava aalwayz di wach oava wi. Hihn deh kloas tu wi, ih redi fi lisn tu wi wen wi aks fi help, an ih eega fi sopoat wi. (Isa. 43:2) Wi shoar dat wi ku bayr op anda eni chraiyal bikaaz hihn gi wi evriting weh wi need fi noh giv op. Ih gi wi di privilij fi pray tu ahn, ih gi wi di Baibl ahn soh moch spirichwal food, an ih gi wi lovin bradaz ahn sistaz fi help wi wen wi need it.

16. Weh wi ku du soh dat Jehoava kantinyu tek kayr a wi?

¹⁶ Wi soh tankful dat wi ga wahn hevnli Faada weh wach oava wi! Wi feel laik di saamis weh seh: “Wi haat rijais eena ahn.” (Ps. 33:21) Wi ku shoa Jehoava dat wi tankful dat ih lov ahn kay fi wi wen wi mek gud yoos a evriting weh ih gi wi fi help wi. Ahn wee haftu du wi paat soh dat Gaad kantinyu tek kayr a wi. If wee kantinyu du wi bes fi obay Jehoava ahn du weh hihn seh da di rait ting fi du, hihn wahn wach oava wi fareva!—1 Peet. 3:12.