1. How wi benifit wen wi taak bowt how wi kom eena “di chroot”?

 “HOW yoo mi kom eena di chroot?” Yoo praabli ansa da kweschan wahn lata taimz aredi. Dat da wan a di fers kweschan weh wan a wi brada er sista mait aks wi wen wi di geh fi noa wan anada. Wi lov fi hyaa how wi bradaz ahn sistaz mi geh fi noa ahn lov Jehoava, ahn wi hapi fi tel dehn humoch wee lov di chroot. (Roam. 1:11) Dehndeh kanvasayshan rimain wi wai wi lov di chroot. Ahn dehn help wi fi waahn chrai eevn haada fi kantinyu “liv akaadn tu di chroot.” Dat meenz dat wi wahn liv eena wahn way weh pleez Jehoava.—3 Jan 4.

2. Weh wi wahn diskos eena dis aatikl?

² Eena dis aatikl, wi wahn luk pahn sohn reezn wai wi lov di chroot. Den wi wahn kansida how wi ku kantinyu shoa dat wi lov dis preshos gif. Fi shoar dis aatikl wahn mek wi bee moa tankful fi weh Jehoava du fi jraa wi tu di chroot. (Jan 6:44) Ih wahn aalso help wi fi ga wahn schranga dizaiya fi teech Baibl chroot tu adaz.

3. Wat da di moas impoatant reezn wai wi lov di chroot?

³ Dehn ga wahn lata reezn wai wi lov di chroot. Di moas impoatant reezn da wi lov fi Jehoava, bikaaz di  chroot kohn fahn Hihn. Tanks tu ih Werd, di Baibl, wi noh onli geh fi noa ahn az di Kriyayta a hevn an ert bot az wahn lovin Pa weh kay fi wi wahn lat. (1 Peet. 5:7) Wi noa dat wi Gaad da wahn Gaad weh “mersiful ahn weh ga kompashan, wahn Gaad weh noh eezi fi geh beks, ahn weh ful op a laayal lov ahn chroot.” (Ex. 34:6) Jehoava lov jostis. (Isa. 61:8) Ih hert hihn fi si wi di sofa, an ih eega fi geh rid a aala wi sofarin. (Jer. 29:11) Dat wandaful, noh chroo? Dat da wan a di reezn wai wi lov Jehoava soh moch!

4-5. Wai di apasl Paal mi kompyaa wi hoap tu wahn anka?

⁴ Wat da wahn nada reezn wai wi lov di chroot? Wi benifit wahn lat fahn di chroot. How? Di chroot weh deh eena di Baibl gi wi hoap fi di fyoocha. Fi help wi andastan di valyu a da hoap, di apasl Paal mi rait: “Ahn dis hoap da laik wahn anka eena wi laif, ih schrang an ih kyaahn fayl.” (Heeb. 6:19) Jos laik how wahn anka help wahn boat fi stay wan spat eevn if di see rof, di hoap weh deh eena di Baibl help wi fi stay kaam wen wi di fays chalenjiz eena wi laif.

⁵ Rait ya soh, Paal mi-di taak bowt di preshos hoap weh anointid Kristyanz gat. Bot fi hihn werdz aalso aplai tu Kristyanz weh ga di hoap fi liv fareva eena Paradais pahn ert. (Jan 3:16) Now dat wi laan bowt di hoap fi liv fareva, wi laif ga reel meenin.

6-7. How Yvonne mi benifit wen shee mi laan di chroot bowt di fyoocha?

⁶ Kansida di ekspeeryens a wahn sista weh naym Yvonne. Shee neva groa op eena di chroot, ahn wen shee mi smaal ih mi frayd fi ded. Shee memba di reed wahn lee sayin weh seh: “Wan day dehn noh wahn ga no tumaaro.” Shee seh: “Dehndeh werdz mi mek Ah stay op da nait di tink bowt di fyoocha. Ah wuda wanda, ‘Wai wi onli liv fi wahn lee wail?ʼ Ah neva yoostu andastan wai wi deh ya. Bot Ah noa dat Ah neva waahn ded!”

⁷ Laytaraan, wen Yvonne da-mi wahn teenayja, shee meet sohn Witnisiz. Shee seh: “Ah mi staat tu bileev dat Ah kuda mi ga di hoap fi liv fareva eena Paradais pahn ert.” How wi sista mi benifit wen shee laan di chroot? Shee seh: “Now Ah noh stay op da nait di wori bowt di fyoocha er di tink bowt det.” Ih klyaa fi si dat di chroot preshos tu Yvonne, ahn shee reeli injai di teech adaz bowt fi shee hoap fi di fyoocha.—1 Tim. 4:16.

8-9. (a) Weh wahn man mi du eena wan a Jeezas iloschrayshan fi shoa dat ih valyu di chrezha weh ih fain? (b) Humoch di chroot meen tu yoo?

⁸ Di chroot eena di Baibl aalso inklood di gud nyooz bowt Gaad Kingdom. Jeezas mi kompyaa di chroot bowt da Kingdom tu wahn chrezha weh deh beri eena wahn feel. Da Machyu 13:44 Jeezas mi seh: “Di Kingdom a hevn da laik wahn chrezha, weh mi deh beri eena di feel. Wahn man fain di chrezha ahn haid it; ahn bikaaz ih mi soh hapi, ih gaan ahn sel evriting weh ih mi gat ahn bai da feel.” Noatis dat di man neva mi-di luk fi di chrezha. Bot wen hihn mi fain it, ih giv op wahn lata tingz fi get it. In fak, hihn mi sel evriting weh ih mi gat. Wai? Bikaaz hihn mi noa di valyu a da chrezha. Ih mi wert moa dan eniting weh hihn mi giv op.

⁹ Dat da how yoo feel bowt di chroot?  Af koars! Notn wert moa eena dis werl dan di jai weh wi geh di serv Jehoava rait now wid di hoap wi ga fi liv fareva anda Gaad Kingdom. Aalso, di privilij wi ga fi injai wahn kloas ahn persnal rilayshanship wid Jehoava wert moa da eni sakrifais wi mek. Wi hapinis da fi ‘prayz hihn.ʼ—Kol. 1:10.

10-11. Weh mi moov Michael fi mek chaynjiz eena ih laif?

¹⁰ Wahn lata wi don mek lata chaynjiz eena wi laif soh dat wi ku mek Jehoava hapi. Som a wi lef wahn fansi kareeya. Adaz mi stap chrai geh rich. An adaz mi kompleetli chaynj di way how dehn liv dehn laif wen dehn mi laan bowt Jehoava. Dat da weh Michael mi du. Hihn neva groa op eena di chroot. Wen hihn mi yong, ih mi geh chrayn eena karaate. Hihn seh: “Fi mee, ih mi reeli impoatant fi mek Ah luk bof. Sohntaim Ah yoostu feel laik nobadi ku mes wid mi.” Bot wen Michael mi staat stodi di Baibl, ih mi laan how Jehoava mi feel bowt vailens. (Ps. 11:5) Dis da weh Michael seh bowt di kopl weh mi stodi wid ahn: “Dehn neva did tel mi dat Ah mi haftu stap du karaate, dehn mi jos kantinyu teech mi di chroot fahn di Baibl.”

¹¹ Di moa Michael mi laan bowt Jehoava, di moa ih lov fi Hihn mi groa. Weh hihn mi laik di moas da-mi Jehoava kompashan fi Ih peepl. Az taim paas, Michael mi riyalaiz dat ih mi need fi mek wahn disizhan weh mi wahn chaynj ih laif. Hihn seh: “Ai mi noa dat ih mi wahn bee haad fi stap du karaate. Bot Ah mi aalso noa dat ih mi wahn mek Jehoava hapi, an Ai mi kanvins dat fi serv hihn mi wert eni sakrifais.” Michael mi noa dat di chroot weh hihn mi fain reeli preshos, ahn dat mi moov hihn fi mek big chaynjiz eena ih laif.—Jay. 1:25.

12-13. How Baibl chroot mi help Mayli?

¹² Fi shoa wi di valyu a di chroot, di Baibl kompyaa it tu wahn lamp weh di shain eena di daak. (Ps. 119:105; Ifee. 5:8) Mayli, fahn Azerbaijan, reeli apreeshiayt di help weh ih geh fahn di Baibl. Fi shee payrents mi ga difrent rilijan. Fi shee pa da-mi Muslim, ahn fi shee ma da-mi Jewish. Shee seh: “Eevn doa Ah neva dowt dat Gaad egzis, Ah mi stil ga wahn lata kweschanz. Ah yoostu wanda, ‘Wai Gaad mek hyoomanz, ahn wai sohnbadi wuda sofa ih hoal laif ahn den goh da hel aftawodz?ʼ Sins wahn lata peepl mi seh dat evriting hapm bikaaz a Gaad, Ah yoostu wanda, ‘Aal weh Gaad du da kanchroal peepl jos fi si dehn sofa?ʼ”

¹³ Mayli mi kantinyu saach fi di ansaz tu di kweschan dehn weh ih mi gat. Az taim mi paas, shee mi aksep wahn Baibl stodi an ih kom eena di chroot. Shee seh: “Di ansaz fahn di Baibl mi kanvins mi ahn help mi fi bee wahn beta persn. Weh di Baibl seh mek sens, an ih help mi fi ga lata pees.” Jos laik Mayli, aala wi prayz Jehoava, “di Wan weh kaal [wi] fahn owta di daaknis ahn bring [wi] intu ih wandaful lait.”—1 Peet. 2:9.

14. How wi ku mek wi lov fi di chroot geh schranga? (Si di baks “ Ada Tingz Wi Ku Kompyaa Baibl Chroot Wid.”)

¹⁴ Dehnya da jos sohn egzampl weh shoa wi di valyu a di chroot. Fi shoar yu ku tink bowt lata ada egzampl. Fi yu neks persnal stodi proajek, chrai mek it wahn goal fi fain ada reezn wai wi shuda  lov di chroot. Di moa wi geh fi lov di chroot, di moa wayz wi wahn fain fi shoa dat wi lov it.

15. Wat da wan way wi ku shoa dat wi lov di chroot?

¹⁵ Wi ku shoa dat wi lov di chroot wen wi stodi di Baibl ahn di poblikayshan dehn regyula. Noh mata how lang wi deh eena di chroot, wi aalwayz ga moa fi laan. Di fers ishu a dis magazeen mi seh: “Chroot da laik wahn lee flowaz eena dis wildanes a laif. Dehn ga soh moch lai eena dis werl dat ih ku bee haad fi noa wat da di chroot. Fi mek yu fain di chroot, yu need fi kip pahn di lukowt. . . . Yu haftu werk haad fi get it ahn noh bee kantentid wid jos wan chroot. . . . Aalwayz chrai fi fain moa Baibl chroot.” Da haad werk fi stodi, bot wen wi du it wi geh lata blesinz.

16. Weh help yoo wen yu stodi di Baibl? (Proverbs 2:4-6)

¹⁶ Som a wi noh laik fi reed ahn stodi. Bot Jehoava invait aala wi fi “kip aan di luk” ahn fi “kip aan di saach” fi andastan di chroot beta. (Reed Proverbs  2:4-6.) * Wen wi du dat, wi wahn aalwayz benifit. Corey seh dat wen ih di du ih persnal Baibl reedin, ih foakos pahn wan vers at a taim. Hihn seh: “Ah reed aala di futnoat, Ah luk op aala di skripcha dehn weh kanek wid it, an Ah du ekschra risaach. . . . Dis help mi fi geh di bes owta mi reedin!” Weda da dis way er sohn ada way, wi shoa dat wi tankful fi di chroot wen wi tek di taim ahn du wi bes fi stodi it.—Ps. 1:1-3.

17. Weh ih meen fi liv akaadn tu di chroot? (Jaymz 1:25)

¹⁷ Fi mek wi benifit, wi kyaahn jos stodi di chroot, wi need fi liv akaadn tu di chroot. Dis meenz dat wateva wi laan wi wahn yooz it eena wi laif. Onli if wi du dat wi wahn ku bee reeli hapi. (Reed Jaymz 1:25.) How wi ku mek shoar dat wi di liv akaadn tu di chroot? Wan brada mi seh mek wi tek wahn luk pahn wi laif fi si if wi di liv akaadn tu weh wi di laan, ahn fi luk fi ada wayz how wi ku du beta. Di apasl Paal mi seh: “Wateva proagres wi don mek, mek wi kantinyu eena di saym way a laif.”—Fil. 3:16.

18. Wai wi werk haad fi “liv akaadn tu di chroot”?

¹⁸ Jos tink bowt aala di wayz how wi benifit wen wi du wi bes fi “liv akaadn tu di chroot”! Wi noh onli ga wahn beta laif, bot wi aalso mek Jehoava ahn wi bradaz ahn sistaz hapi. (Prov. 27:11; 3 Jan 4) Dehnya da di bes reezn fi lov di chroot ahn liv akaadn tu di chroot!