1. Wat da sohn gud tingz weh wahn lata yong peepl don du?

 TOWZNZ a yong peepl di geh baptaiz evri yaa. Yoo da wan a dehn? If yes, yu bradaz ahn sistaz hapi fi yu, ahn Jehoava hapi tu! (Prov. 27:11) Tink bowt aala di gud tingz weh yu don du. Yu don di ga wahn deep stodi a di Baibl, maybi fi sohn yaaz now. Ahn yu Baibl stodi kanvins yu dat di Baibl da Gaad Werd. Bot moa impoatant dan dat, yu geh fi noa ahn lov Jehoava, di Wan weh gi wi di Baibl. Yu lov fi Jehoava mi geh soh schrang dat yu dedikayt yu laif tu hihn ahn geh baptaiz. Yu mi mek di bes disizhan!

2. Weh wi wahn laan eena dis aatikl?

 ² Bifoa yu mi geh baptaiz, yu mi gaahn chroo wahn lata prablemz weh mek it haad fi mek yu stay faytful tu Jehoava. Bot az yu geh oalda, sohn nyoo chalenjiz wahn kom op. Saytan wahn chrai mek yu stap lov ahn serv Jehoava. (Ifee. 4:14) Bot yu kyaahn mek dat hapm. Weh ku help yu fi stay faytful tu Jehoava ahn kantinyu liv op tu yu pramis fi serv ahn? Yu haftu kantinyu “werk haad” fi bee wahn machoar Kristyan. (Heeb. 6:1) Bot how yu ku du dat?

3. Weh eech Kristyan shuda du afta dehn geh baptaiz?

³ Afta wi geh baptaiz, eech wan a wi need fi fala di advais weh di apasl Paal mi gi di Kristyanz da Efisos. Hihn mi inkorij dehn fi “bee machoar” Kristyanz. (Ifee. 4:13)  Dat meenz dat dehn mi haftu kantinyu werk haad. Wi ku andastan weh Paal mi meen wen ih mi kompyaa di spirichwal proagres weh Kristyanz mek tu di way wahn pikni groa op. Wen wahn baybi baan, di payrents prowd a di baybi ahn lov ahn. Bot da baybi kyaahn stay wahn baybi fareva. Az ih geh oalda, ih wahn haftu stap “goh aan laik pikni.” (1 Kor. 13:11) Az Kristyanz, wee haftu groa op jos laik how da baybi wahn haftu groa op. Afta wi geh baptaiz, wi haftu kantinyu werk haad fi mek proagres. Mek wi kansida sohn wayz how wi ku du dat.

4. Wich kwaliti ku help yu fi bee wahn machoar Kristyan? Pleez eksplayn yu ansa. (Filipiyanz 1:9)

⁴ Mek yu lov fi Jehoava groa moa ahn moa. Bai now yu don lov Jehoava wahn lat. Bot yu lov fi hihn ku groa eevn moa. How? Di apasl Paal tel wi wan way how wi ku du dat da Filipiyanz 1:9. (Reed.) Paal mi pray fi di Filipiyan bradaz ahn sistaz fi mek dehn “lov groa moa ahn moa.” Soh wi lov fi Jehoava kud groa moa, ahn wi ku du dat wen wi geh “ful nalij a di chroot an andastandin a Gaad wil.” Wen wi laan moa bowt Jehoava, wi wahn geh fi lov an apreeshiayt hoo hihn ahn di way ih du tingz. Wi dizaiya fi mek hihn hapi wahn geh schranga an ih mek wi noh waahn du eniting weh ku mek hihn sad. Wi du wi bes fi andastan weh hihn waahn wi du an aalso how wi ku du it.

5-6. How wi lov fi Jehoava ku groa? Pleez eksplayn yu ansa.

⁵ Wi ku mek wi lov fi Jehoava groa if wi geh fi noa ih Son, Jeezas, beta. Hihn mi kapi Jehoava persnaliti eena wahn perfek way. (Heeb. 1:3) Di bes way fi geh fi noa Jeezas da fi reed ahn stodi di foa Gaspl dehn. If yu noh di reed yu Baibl evri day yet, yu ku staat now ahn reed dehnya buk bowt Jeezas. Az yu reed, foakos pan ih kwaliti dehn. Peepl mi laik spen taim wid ahn an taak tu ahn. Hihn mi chreet chiljren eena wahn lovin way an ih wuda hog dehn op. (Maak 10:13-16) Jeezas mi frenli ahn kain, an ih disaipl dehn neva frayd fi tel ahn how dehn feel. (Mach. 16:22) Wi noa dat Jeezas da-mi laik ih Pa, soh dis teech wi dat wi ku feel di saym way bowt Jehoava. Wi ku pray tu ahn, an tel ahn eniting weh wi di tink er feel. Wi ku bee shoar dat hihn noh wahn joj wi. Hihn lov wi ahn kay bowt wi.—1 Peet. 5:7.

⁶ Jeezas mi feel kompashan fi peepl. Di apasl Machyu mi seh: “Wen ih si di krowd a peepl, ih haat gaan owt tu dehn, kaaz dehn da-mi laik sheep weh dehn oana chreet bad ahn dash wan said. Dehn da-mi laik sheep widowt wahn shepad.” (Mach. 9:36) Ahn how Jehoava mi feel? Jeezas seh: “Mai Faada da hevn noh waahn non a dehnya lee wan fi geh laas.” (Mach. 18:14) Dis mek wi feel hapi bikaaz ih shoa dat Jehoava lov wi wahn lat. Soh az wi geh fi noa Jeezas beta, wi lov fi Jehoava wahn groa schranga.

7. If yu spen taim wid machoar Kristyanz, how dat wahn help yu?

⁷ Yu ku aalso laan fi shoa moa lov ahn bee wahn machoar Kristyan wen yu spen taim ahn geh fi noa machoar bradaz ahn sistaz eena di kangrigayshan. Noatis how hapi dehn hapi. Dehn noh ga no rigret bowt dehn disizhan fi serv Jehoava. Aks dehn fi tel yu bowt som a di tingz weh dehn ekspeeryens eena dehn servis tu Jehoava. Wen yu ga wahn impoatant disizhan fi mek, aks dehn  fi advais. Memba dat “wen wahn lata peepl gi yu advais yu wahn ga sokses.”—Prov. 11:14.

8. Weh yu ku du if yu noh shoar bowt weh di Baibl seh?

⁸ Geh rid a dowt. Laik weh  paragraaf 2 menshan, Saytan wahn chrai mek yu fayt geh week ahn jraa yu weh fahn Jehoava. Wan way how hihn mait du dat da fi mek yu dowt dat di tingz weh yu di laan fahn di Baibl da chroo. Fi egzampl, som peepl mait waahn kanvins yu dat Gaad neva kriyayt wi ahn dat wee egzis bikaaz a evolooshan. Wen yu mi smaal, yu praabli neva tink bowt dat, bot now dat da weh dehn mait di teech yu da skool. Weh yu teecha dehn seh bowt evolooshan mait song laik ih mek sens tu yoo. Dehn praabli nat eevn tek di taim fi stodi ahn fain evidens dat Gaad egzis. Memba di Baibl prinsipl weh deh da Proverbs 18:17 weh seh: “Di fers persn weh prizent ih kays song karek, til di neks persn kweschan ahn.” Ih gud fi mek yu stodi weh Gaad Werd seh, insteda bileev evriting weh yu laan da skool. Du risaach eena wi poblikayshan dehn. Taak tu bradaz ahn sistaz weh yoostu bileev eena evolooshan. Aks dehn weh mi kanvins dehn dat dehn ga wahn Kriyayta weh lov wi. Kanvasayshanz laik dehnya wahn help yu fain evidens dat wahn Kriyayta egzis.

9. Weh yu ku laan fahn Melissa ekspeeryens?

⁹ Wahn sista weh naym Melissa mi laan wahn lat wen ih mi du risaach pahn di tapik a kriyayshan. * Shee seh: “Di way how dehn mi teech evolooshan da skool mi mek ih song laik da chroo. At fers, Ah neva waahn du risaach bikaaz Ah mi frayd dat weh Ah wuda mi fain wuda shoa dat evolooshan da chroo. Bot Ah riyalaiz dat Jehoava waahn mek Ah ga proof fi weh Ah bileev. Soh Ah du mi risaach. Ah mi reed di buk Is There a Creator Who Cares About You? ahn di broashoar Was Life Created? ahn The Origin of Life—Five Questions Worth Asking. Dis da-mi egzakli weh Ah mi need. Ah wish dat Ah mi du it soona.”

10-11. Weh ku help yu fi noh giv een tu temtayshan? (1 Tesaloanyanz 4:3, 4)

 ¹⁰ Rijek temtayshan. Wen yu da wahn teenayja, yu mait ga wahn schrang dizaiya fi ga seks, ahn sohntaim adaz mait presha yu fi komit sekshwal imoraliti. Saytan waahn mek yu giv een tu dehndeh temtayshan. Bot weh ku help yu fi noh giv een? (Reed 1 Tesaloanyanz 4:3, 4.) Wen yu pray tu Jehoava, tel ahn weh yu di goh chroo. Tel ahn egzakli how yu feel, an aks ahn fi gi yu di schrent weh yu need. (Mach. 6:13) Memba dat Jehoava waahn help yu, ih noh waahn ponish yu. (Ps. 103:13, 14) Di Baibl ku help yoo tu. Melissa, weh wi mi menshan erliya, seh dat shee mi-di schrogl fi rijek rang tinkin. Shee seh: “Wen Ah reed di Baibl evri day ih help mi fi noh giv op. Ih rimain mi dat Ah bilang tu Jehoava ahn dat Ai waahn hihn eena mai laif.”—Ps. 119:9.

¹¹ Noh chrai solv yu prablemz bai yuself. Taak tu yu payrents bowt weh yu di goh chroo. Af koars, ih noh eezi fi taak bowt persnal mataz laik dehnya, bot ih impoatant fi mek yu du dat. Melissa seh: “Ah mi pray fi korij ahn den Ah mi taak tu mi pa bowt mi prablem. Afta dat, Ah mi feel moch beta. Ah mi noa dat Jehoava prowd a mi.”

12. Weh ku help yu fi mek gud disizhanz?

¹² Mek Baibl prinsiplz gaid yu. Az yu geh oalda, yu wahn aybl fi mek yu oan disizhanz. Bot dis noh meen dat yu noa evriting. Weh ku help yu fi noh mek wahn mistayk weh ku damij yu rilayshanship wid Jehoava? (Prov. 22:3) Wahn sista weh naym Kari taak bowt weh mi help shee fi mek gud disizhanz. Shee riyalaiz dat wahn machoar Kristyan noh need wahn rool fi evri sichuwayshan. Shee seh: “Ah mi need fi andastan Baibl prinsiplz insteda jos fala wahn rool.” Wen yu reed di Baibl, aks yuself: ‘Weh dis pasij teech mi bowt how Jehoava tink? Ih ga eni prinsipl weh ku help mi du weh rait? If yes, how Ah wahn benifit if Ah du weh di Baibl seh?ʼ (Ps. 19:7; Isa. 48:17, 18) Wen yu reed di Baibl ahn meditayt pahn weh yu laan, ih wahn eeziya fi mek disizhanz weh pleez Jehoava. Az yu kantinyu mek proagres, yu noh wahn need wahn rool fi evri sichuwayshan bikaaz yu wahn noa an andastan how Jehoava si tingz.

13. How gud frenz ku help yu? (Proverbs 13:20)

¹³ Mek frenz wid peepl weh lov Jehoava. Laik weh wi mi menshan erliya, di frenz weh yu chooz ku help yu fi bee wahn machoar Kristyan. (Reed Proverbs 13:20.) * Wahn sista weh naym Sara mi-di looz ih jai. Den sohnting mi hapm weh mi help shee fi chaynj how ih feel. Sara seh: “Gud frenz mi kom eena mi laif da di rait taim. Mee ahn wahn yong sista mi get tugeda eech week fi stodi Di Wachtowa, ahn wahn neks sista mi help mi fi staat koment da meetin. Bikaaz Ah mi ga frenz weh help mi, Ah mi staat tek persnal stodi ahn pryaa moa seeryos. Ah mi staat ga wahn schranga rilayshanship wid Jehoava, an Ah mi staat tu feel hapi agen.”

14. Weh mi help Julien fi mek gud frenz?

¹⁴ How yu ku mek frenz wid peepl weh wahn help yu fi proagres? Julien, wahn  brada weh di serv az wahn elda, seh: “Wen Ai mi yonga, Ah mi mek gud frenz wen Ah mi deh owt pahn feel servis. Dehnya frenz mi eega fi preech, ahn dehn mi help mi fi si how Ah ku injai di minischri. Soh Ah mi set di goal fi painyaa. Ah aalso riyalaiz dat di reezn wai Ah neva ga lata gud frenz da-mi bikaaz Ah mi onli luk fi frenz rong mai ayj. Laytaraan, Ah mi aalso mek gud frenz da Betel. Ahn fi dehn egzampl mi help mi fi chooz gud entataynment, ahn dis mi mek Ah geh kloasa tu Jehoava.”

15. Weh Paal mi waan Timoti bowt? (2 Timoti 2:20-22)

¹⁵ Wat if yu riyalaiz dat sohnbadi eena di kangrigayshan da noh gud kompni? Paal mi noa dat sohn bradaz eena di fers-senchri kangrigayshan neva ak er tink laik Kristyanz, soh hihn mi waan Timoti fi stay weh fahn dehn. (Reed 2 Timoti 2:20-22.) Wi frenship wid Jehoava preshos tu wi. Bikaaz wi werk soh haad fi ga wahn gud ahn schrang rilayshanship wid Jehoava, wi shudn alow enibadi er eniting fi damij it.—Ps. 26:4.

16. Weh kaina goalz yu shuda set?

¹⁶ Set gud goalz. Chooz goalz weh wahn schrentn yu fayt ahn help yu fi bee wahn beta persn. (Ifee. 3:16) Fi egzampl, yu mait waahn du persnal stodi ahn Baibl reedin moa regyula. (Ps. 1:2, 3) Er yu mait waahn pray moa aafn ahn fahn yu haat. Maybi yu need fi ga moa self-kanchroal wen yu di chooz entataynment ahn di way how yu yooz yu taim. (Ifee. 5:15, 16) Wen Jehoava si dat yu di werk haad fi mek proagres, hihn wahn bee hapi.

17. How yu benifit wen yu help adaz?

¹⁷ Wen yu help ada peepl, ih wahn help yoo fi groa az wahn Kristyan. Jeezas mi seh: “Wi feel moa hapinis wen wi giv tu adaz dan wen wi get tingz fahn ada peepl.” (Aks 20:35) Yu wahn feel hapi wen yu yooz yu taim an enerji fi help adaz. Fi egzampl, yu ku mek it yu goal fi help di oalda wanz ahn dehn wan weh sik eena yu kangrigayshan. Maybi yu ku goh da shap fi dehn er help dehn yooz dehn  ilekchranik divais. If yu da wahn brada, set di goal fi bee wahn ministeeryal servant soh dat yu ku help yu bradaz ahn sistaz. (Fil. 2:4) Yu aalso shoa lov tu dehn wan weh da noh paat a di kangrigayshan wen yu preech di gud nyooz a di Kingdom tu dehn. (Mach. 9:36, 37) If ih pasabl, mek it wahn goal fi serv Jehoava ful taim.

18. How ful-taim servis ku help yu groa spirichwali?

¹⁸ Wen yu serv eena di ful-taim minischri, ih ku help yu mek spirichwal proagres. If yu serv az wahn painyaa, ih mait oapm di doa fi mek yu goh da di Skool fi Kingdom Ivanjelaizaz. Yu mait bee aybl fi serv da Betel er pahn wahn kanschrokshan proajek. Wahn yong sista weh naym Kaitlyn seh: “Afta Ai mi geh baptaiz, Ah mi spen wahn lata taim eena servis wid machoar bradaz ahn sistaz, ahn dat da wan a di mayn ting weh mi help mi fi groa spirichwali. Fi dehn egzampl mi inkorij mi fi waahn stodi di Baibl moa ahn fi bee wahn beta teecha.”

19. Weh blesinz yu wahn get az yu kantinyu fi mek spirichwal proagres?

¹⁹ Yu wahn injai wahn lata blesinz wen yu kantinyu werk haad fi mek spirichwal proagres. Yu noh wahn di ways yu taim di du tingz weh noh gud fi notn. (1 Jan 2:17) Yu wahn sayv yuself fahn bad disizhanz weh ku mek yu sofa. Ahn yu wahn fain chroo hapinis ahn sokses. (Prov. 16:3) Yu gud egzampl wahn inkorij di bradaz ahn sistaz, weda dehn yong er oal. (1 Tim. 4:12) Ahn moa impoatant, yu wahn injai pees ahn yu wahn bee satisfai bikaaz yu di pleez Jehoava ahn bikaaz yu ga wahn kloas frenship wid ahn.—Prov. 23:15, 16.