1. Bays pahn Heebrooz 12:1, weh wi need fi du fi win di rays fi laif?

 DI BAIBL seh dat wahn Kristyan da laik wahn persn weh di ron wahn rays. Di praiz weh dehn wahn geh fi finish di rays da evalastin laif. (2 Tim. 4:7, 8) Wi need fi du aal weh wi kud fi kantinyu ron dis rays, bikaaz di en deh reeli kloas. Di apasl Paal mi win di rays fi laif an ih tel wi how wee ku win it tu. Ih seh: “Geh rid a evri berdn . . . , ahn mek wi bayr op ahn ron di rays weh deh heda wi.”—Reed Heebrooz 12:1.

2. Weh Paal mi meen wen ih seh “geh rid a evri berdn”?

² Wen Paal mi seh: “Geh rid a evri berdn,” yu tink dis meen dat wi noh fi kehr no kaina load? No, dat da neva weh hihn mi-di chrai seh. Hihn mi-di seh dat wi need fi geh rid a di hevi tingz weh wi noh need. If wee di ron wid tingz weh wi noh need, dat ku sloa wi dong ahn mek wi geh taiyad. Soh fi finish di rays, wi need fi si if wi ga eniting weh di sloa wi dong ahn hori geh rid a it. Bot wi aalso haftu mek shoar dat wi noh geh rid a tingz weh wi need, bikaaz if wi du dat wi wahn kyaahn stay eena di rays. (2 Tim. 2:5) Weh wi need fi kehr if wi waahn stay eena di rays?

3. (a) Bays pahn Galayshanz 6:5, weh wi need fi kehr? (b) Weh wi wahn diskos eena dis aatikl, ahn wai?

³ Reed Galayshanz 6:5. Paal mi menshan sohnting weh wi need fi du. Hihn mi seh: “Eech persn wahn bak ih oan load.” Paal mi-di taak bowt tingz weh Gaad ekspek eech wan a wi fi du, ahn nobadi els kyaahn du it fi wi. Eena dis aatikl, wi wahn taak bowt weh ih meen fi kehr wi “oan load” ahn how wi ku du dat. Ahn wi wahn taak  bowt how fi geh rid a tingz weh wi noh need. If wi bak wi oan load ahn geh rid a evri berdn weh wi noh need, dat wahn help wi fi finish di rays fi laif.

4. Wai di pramis weh wi mek tu Jehoava noh haad fi kip? (Koment pahn di picha.)

⁴ Di pramis weh wi mek fi serv Jehoava fareva. Wen wi dedikayt wi laif tu Jehoava, wi di pramis ahn dat wi wahn wership ahn fi di res a wi laif. Wi haftu kip da pramis. Dat da wahn big rispansabiliti, bot da noh wahn berdn. Jehoava mek wi fi du weh hihn waahn. (Rev. 4:11) Jehoava mek wi fi bee laik hihn an ih gi wi di dizaiya fi geh fi noa ahn an wership ahn. Sayka dat, wee ku geh kloas tu hihn ahn bee hapi fi du weh ih waahn. (Ps. 40:8) Pahn tap a dat, wen wi du weh Jehoava waahn ahn fala ih Son egzampl, wi wahn “fain res fi [wi] soal.”—Mach. 11:28-30.

5. Weh ku help yu kip yu pramis tu Jehoava? (1 Jan 5:3)

⁵ Weh ku help yu fi bak dis load? Wi ga too sojeshan weh ku help yu. Wan,  kantinyu bil op yu lov fi Jehoava. Yu du dis wen yu tink bowt aal di gud tingz weh Jehoava don du fi yu ahn di tingz weh ih wahn du fi yu eena di fyoocha. Di moa yu lov fi Jehoava groa, di eeziya ih wahn bee fi obay ahn. (Reed 1 Jan 5:3.) Sekant, kapi Jeezas egzampl. Jeezas mi aalwayz du weh Jehoava waahn bikaaz hihn mi pray an aks Jehoava fi help. Hihn mi aalso foakos pahn di blesinz weh ih mi wahn get. (Heeb. 5:7; 12:2) Jos laik Jeezas, wi waahn aks Jehoava fi gi wi di schrent weh wi need ahn fi help wi foakos pahn di blesinz weh wi wahn get eena di fyoocha. If yu kapi Jeezas egzampl ahn mek yu lov fi Jehoava groa, yu wahn ku liv op tu yu pramis.

6. Wai eech persn eena di famili need fi tek kayr a dehn rispansabiliti? (Koment pahn di picha.)

⁶ Wi rispansabiliti eena di famili. Eena di rays fi laif, wi haftu lov Jehoava ahn Jeezas moa dan wi lov wi famili. (Mach. 10:37) Bot dis noh meenz dat wi ku ignoar wi famili rispansabiliti. Fi serv Jehoava ahn Jeezas di rait way, wi haftu tek kayr a wi rispansabiliti eena di famili. (1 Tim. 5:4, 8) Wen wi du dat, wi wahn bee hapi. Jehoava noa dat wahn famili ku bee hapi wen di hozban ahn waif chreet eech ada wid lov ahn rispek, wen payrents lov ahn chrayn dehn chiljren, ahn wen di chiljren obay dehn payrents.—Ifee. 5:33; 6:1, 4.

7. Weh ku help yu liv op tu yu rispansabiliti eena di famili?

⁷ Weh ku help yu fi bak dis load? Noh mata if yu da wahn hozban, waif, payrent, er pikni, eech wan a wi need fi chros di wizdom weh deh eena di Baibl. Noh mek disizhanz weh onli bays pahn weh yoo feel rait, er bikaaz dat da weh peepl eena yu kolcha du, er weh ekspert mait advaiz yu fi du. (Prov. 24:3, 4) Insted, yooz di poblikayshan dehn weh bays pahn di Baibl. Een deh yu wahn fain gud advais pahn how wi ku yooz Baibl prinsiplz eena wi laif. Fi egzampl, yu ku fain sohn gud aatikl pahn wi jw.org websait weh ku help koplz, payrents, ahn teenayjaz wid chalenjiz weh dehn mait di fays tudeh. b Werk haad fi du weh di Baibl seh, eevn if adaz eena di famili noh waahn du it. Wen yu du dis, yu famili wahn benifit ahn yu wahn injai Jehoava blesin.—1 Peet. 3:1, 2.

8. How di disizhan dehn weh wi mek ku afek wi?

⁸ Aksep rispansabiliti fi di disizhan dehn weh wi mek. Jehoava gi wi di freedom fi mek wi oan disizhanz. Hihn waahn wi feel hapi wid di gud disizhanz weh wi mek. Bot if wi mek wahn bad disizhan, hihn noh wahn protek wi fahn di kansikwens. (Gal. 6:7, 8) Soh wen wi mek di rang chois er wi seh er du sohnting rang, wi need fi tek rispansabiliti far it. Sohntaim di bad disizhanz weh wi mek ku lef wi wid wahn gilti kanshans. Bot wen wi noa dat wi need fi tek rispansabiliti fi wi akshan, dat moov wi fi kanfes wi sin, karek wi mistayk, ahn chrai noh du it agen. Onli if wi du dehnya tingz wi wahn ku stay eena di rays fi laif.

9. Weh yoo ku du wen yu di deel wid wahn bad disizhan? (Koment pahn di picha.)

 ⁹ Weh ku help yu fi bak dis load? If yu mi mek wahn bad disizhan weh yu kyaahn chaynj, weh yoo ku du bowt it? Yu haftu aksep di nyoo sichuwayshan an andastan dat yu kyaahn chaynj weh yu mi du eena di paas. Noh ways yu taim an enerji di chrai proov wai yu mi rait er di chrai blaym ada peepl fi di bad disizhan dehn weh yu mek. Aksep yu mistayk ahn chrai du di bes weh yu kud eena yu sichuwayshan now. If yu feel gilti bowt wahn bad disizhan weh yu mek, bee hombl ahn pray tu Jehoava, admit yu mistayk, an aks ahn fi fergiv yu. (Ps. 25:11; 51:3, 4) If yu mi hert enibadi, tel dehn dat yu sari. An if yu stil need help, aks di eldaz fi help yu. (Jay. 5:14, 15) Laan fahn yu mistayk ahn chrai noh du it agen. Wen yu du dat, yu ku bee shoar dat Jehoava wahn fergiv yu ahn gi yu di help weh yu need.—Ps. 103:8-13.

10. Weh wahn hapm if wi chrai du moa dan wi kud? (Galayshanz 6:4)

¹⁰ Noh chrai du moa dan yu kud. Wi ku schres owt wi oanself wen wi kompyaa wiself wid adaz. (Reed Galayshanz 6:4.) Wi ku staat feel jelos ahn waahn kompeet wid dehn. (Gal. 5:26) Fi mek wi chrai du az moch az adaz, wi mait push wiself fi du tingz weh wi kyaahn du. If wi ku geh diskorij “wen tingz weh wi ekspek fi hapm noh hapm,” den imajin humoch wers ih ku bee if wi chrai du tingz weh wi kyaahn eevn du. (Prov. 13:12) If wi chrai du moa dan wi kud, wi wahn geh taiyad ahn dat wahn sloa wi dong eena di rays fi laif.—Prov. 24:10.

11. Weh ku help yu fi noh chrai du tingz weh yu noa yu kyaahn du?

¹¹ How yu ku geh rid a dis berdn? Noh ekspek moa fahn yuself dan weh Jehoava di aks yu fi du. Jehoava wuda neva ekspek yu fi giv ahn moa dan weh yu ku giv. (2 Kor. 8:12) Rimemba dat Jehoava noh kompyaa yu wid adaz. (Mach. 25:20-23) Jehoava apreeshiayt di tingz weh yoo du wid yu hoal haat, an hihn lov yu bikaaz yoo faytful ahn yoo kip di indyoar. Bee reeznabl wid yuself an aksep dat yu ayj, helt, ahn serkomstans eena laif mait noh alow yu fi du sertn tingz. Bee laik Barzilai ahn noh aksep wahn asainment if yu noa dat yu wahn kyaahn du it bikaaz a yu ayj er yu helt. (2 Sam. 19:35, 36) Bee laik Moaziz an aksep help; an aks adaz fi help yu tu. (Eks. 18:21, 22) If yu reeznabl, yu noh wahn chrai du tingz weh yu noa yu kyaahn du ahn weh ku mek yu sloa dong eena di rays fi laif.

12. Wee fi blaym wiself fi di bad disizhanz weh ada peepl mek? Pleez eksplayn yu ansa.

¹² Noh blaym yuself fi ada peepl bad disizhanz. Wi kyaahn mek disizhanz fi ada peepl, ahn wi kyaahn sayv dehn fahn di kansikwens weh dehn haftu fays wen dehn mek wahn bad disizhan needa. Fi egzampl, wahn son er daata mait disaid fi stap serv Jehoava, ahn dat ku hert dehn payrents wahn lat. If wahn payrent blaym dehnself fi di bad disizhan weh dehn pikni mek, da laik if dehn di bak wahn hevi berdn. Dat da wahn load weh Jehoava noh ekspek dehn fi bak.—Roam. 14:12.

13. Weh ku help wahn payrent fi noh blaym dehnself fi wahn bad disizhan weh dehn pikni mek?

¹³ How yu ku geh rid a dis berdn? Ih impoatant fi andastan dat Jehoava giv  evribadi free wil. Soh eech persn ga di rait fi mek dehn oan disizhan. Eech persn haftu disaid if dehn waahn serv Jehoava. Jehoava noa dat no payrent perfek, soh ih onli waahn mek dehn du dehn bes fi rayz dehn pikni. Yoo noh rispansabl fi di disizhan weh yu pikni mek. Dat da fi dehn rispansabiliti. (Prov. 20:11) Bot sohntaim yu mait stil fain yuself di wori bowt di mistayk dehn weh yu mi mek az wahn payrent. If yu feel soh, tel Jehoava how yu feel an aks ahn fi fergiv yu. Hihn noa dat yu kyaahn goh bak ahn chaynj di tingz weh yu du eena di paas. Bot Jehoava noh ekspek yu fi chrai protek yu pikni fahn di kansikwens a dehn oan bad disizhan. If yu pikni mek di efoat fi kohn bak tu Jehoava, hihn wahn hapi fi welkom dehn bak.—Look 15:18-20.

14. Wai Jehoava noh waahn mek wi feel gilti aal di taim?

¹⁴ Noh feel tu gilti bowt di mistayk dehn weh yu mek eena di paas. Ih naamal fi mek wi feel gilti wen wi sin. Bot Jehoava noh waahn mek wi feel gilti aal di taim. Dat da wahn load weh hihn waahn mek wi chroa weh. If wi don kanfes wi sin dehn, tel Jehoava dat wi reeli sari fi weh wi du, ahn noh di mek di saym mistayk agen, den wi ku chros dat Jehoava fergiv wi. (Aks 3:19) Afta wi don du aala dat, Jehoava waahn mek wi stap feel gilti. Hihn noa dat if wi kantinyu feel gilti, dat wahn hert wi. (Ps. 31:10) An if wi feel tu sad, dat ku mek wi waahn giv op pahn di rays fi laif.—2 Kor. 2:7.

15. Weh ku help yu fi stap wori tu moch bowt eni bad disizhanz weh yu mi mek eena di paas? (1 Jan 3:19, 20) (Koment pahn di picha.)

¹⁵ How yu ku geh rid a dis berdn? If yu kyaahn stap feel gilti bowt sohnting weh yu mi du eena di paas, foakos pahn di fak dat Jehoava “fergiv peepl fi chroo.” (Ps. 130:4) Dis da weh Jehoava pramis enibadi  weh reeli sari fi weh dehn du. Hihn seh: “Ai noh wahn memba dehn sin nohmoh.” (Jer. 31:34) Dis meenz dat Jehoava wahn neva bring op yu mistayk dehn agen. Soh jos bikaaz yu mait deh eena wahn tof sichuwayshan sayka wahn sin weh yu du eena di paas, dat noh meenz dat Jehoava noh fergiv yu far it. Noh beet op yuself if yu kyaahn du sertn tingz eena Jehoava servis bikaaz a wahn bad disizhan weh yu mi mek eena di paas. Jehoava noh kip di tink bowt aala yu sin dehn, soh yoo shudn du dat needa.—Reed 1 Jan 3:19, 20.

16. Wen wi di ron di rays fi laif, weh wi need fi andastan?

¹⁶ Wi need fi “ron eena soch a way dat [wi] win” di rays fi laif. (1 Kor. 9:24) Fi win di rays fi laif, Kristyanz need fi andastan dat dehn ga sohn load weh dehn need fi kehr ahn som weh dehn need fi geh rid a. Eena dis aatikl, wi mi taak bowt sohn egzampl a weh fi kehr ahn weh fi chroa weh. Bot dehn ga sohn load weh wi neva taak bowt. Jeezas mi seh dat wi ku berdn wiself “di oava eet, di jrink tu moch, ahn di wori bowt tingz weh [wi] noh need.” (Look 21:34) Dehnya skripchaz an adaz ku help wi fi fain tingz weh wi need fi werk pan soh dat wi ku win di rays fi laif.

17. Wai wi ku bee shoar dat wi wahn win di rays fi laif?

¹⁷ Wi ku bee shoar dat wi wahn win di rays fi laif bikaaz Jehoava wahn gi wi di schrent weh wi need. (Isa. 40:29-31) Soh noh mek notn sloa yu dong! Kapi di apasl Paal egzampl. Hihn mi du ih bes fi win di praiz da di en a di rays fi laif. (Fil. 3:13, 14) Nobadi kyaahn ron di rays fi yu, bot Jehoava wahn help yu win. Hihn wahn help yu kehr di load weh yu need fi kehr, ahn geh rid a eni load weh di sloa yu dong. (Ps. 68:19) Wid Jehoava pahn yu said, yu ku bayr op ahn win di rays fi laif!