Eena da aatikl, wi laan dat Jehoava naym need fi bee hoali ahn geh di aana weh ih dizerv. Dis veri impoatant an ih afek aal hyoomanz an aynjelz. Too kweschan weh kom op wen wi taak bowt Jehoava hoali naym da weda er nat Jehoava ga di rait fi rool ahn weda er nat hyoomanz wahn stay laayal tu Jehoava.

Soh now, wai wi seh dat di moas impoatant ting da fi mek Jehoava naym hoali? Mek wi luk pahn chree reezn.

Fers, Saytan mi taak bad bowt Jehoava eena di gyaadn da Eedn. Wen Saytan mi kweschan Eev bowt Jehoava, hihn mi-di chrai mek Eev bileev dat Jehoava neva jenaros ahn dat weh Hihn mi tel dehn fi du neva fyaa. Den Saytan mi seh di opozit a weh Jehoava mi seh; da laik hihn mi-di seh dat Jehoava laiyad. Soh hihn mi gi Jehoava bad naym, wahn bad repyutayshan. Dat da wai wi kaal Saytan “di Devl,” bikaaz di werd “devl” meenz “wahn persn weh tel lai fi dischrai sohnbadi repyutayshan.” (Jan 8:44) Eev mi lisn tu Saytan lai dehn, soh shee mi disobay Jehoava. Shee mi ton gens Jehoava, di Wan weh ga di rait fi rool. (Jen. 3:1-6) Op tu dis day, Saytan stil di tel lai bowt Jehoava ahn di chrai dischrai ih repyutayshan. Peepl weh bileev dehndeh lai dehn ku en op di disobay Jehoava. Soh Jehoava naym noh geh di aana weh ih dizerv, ahn tu peepl weh laayal tu Jehoava, dat da di wers ting weh kuda eva hapm. Da aalso di mayn reezn wai soh moch sofarin ahn wikidnis deh eena di werl.

Sekant, Jehoava wahn mek shoar ih klayr ih naym. Dat da di moas impoatant ting tu Jehoava, ahn hyoomanz an aynjelz wahn benifit fahn dat tu. Dats wai Jehoava seh: “Ah wahn mek shoar peepl noa how hoali mai grayt naym hoali.” (Ezek. 36:23) Jeezas mek aala Jehoava servants noa weh shuda bee di moas impoatant ting eena dehn pryaaz wen ih seh: “Wi waahn yu naym bee hoali.” (Mach. 6:9) Di Baibl tel wi oava ahn oava dat ih impoatant fi aana Jehoava naym. Mek wi luk pahn sohn egzampl: “Giv Jehoava naym di aana weh ih dizerv.” (1 Chron. 16:29; Ps. 96:8) “Sing prayz tu fi hihn wandaful naym.” (Ps. 66:2) “Ah wahn aana yu naym fareva.” (Ps. 86:12) Wahn taim, Jeezas mi deh da di templ da Jeroosalem an ih mi tel ih Pa: “Faada, aana yu naym.” Jehoava mi ansa Jeezas fahn hevn ahn seh: “Ai don aana it an Ai wahn aana it agen.”—Jan 12:28. a

Terd, Jehoava perpos da fi mek evribadi kantinyu prayz ih naym fareva. Tink bowt weh wahn hapm afta di fainal tes wen Jeezas don rool fi wahn towzn yaaz. How yoo  tink hyoomanz an aynjelz wahn feel bowt Jehoava naym afta dat? Wen da taim kohn, hyoomanz wahn don proov dat dehn laayal tu Jehoava ahn dehn noh wahn haftu kantinyu fays chalenjiz weh wahn tes dehn laayalti. Bai den, dehn wahn bee perfek ahn dehn wahn liv fareva. Yu tink enibadi da hevn er pahn ert wahn eva kweschan weda er nat Jehoava ga di rait fi rool di yoonivers? No! Da taim deh, evribadi da hevn ahn pahn ert wahn bee yoonaitid ahn wahn aksep Jehoava az dehn roola. Yu tink Jehoava naym wahn stil bee di moas impoatant ting tu ih peepl eena da taim deh?

Bai da taim, evribadi wahn noa di chroot bowt Jehoava ahn nobadi wahn seh er bileev eniting bad bowt ahn. Bot Jehoava naym wahn stil bee di moas impoatant ting tu aala fi hihn servants da hevn ahn pahn ert. Wai? Bikaaz dehn wahn si dat Jehoava di kantinyu du sohn amayzin tingz. Wen Jeezas giv bak Jehoava di roolaship, Jehoava wahn “bee evriting tu evribadi.” (1 Kor. 15:28) Afta dat, hyoomanz wahn injai “di wandaful freedom weh bilangz tu di chiljren a Gaad.” (Roam. 8:21) Jehoava wahn finish mek evriting weh ih seh kohn chroo. Fi hihn pikni da hevn ahn pahn ert wahn bee yoonaitid az wan big hapi famili.—Ifee. 1:10.

Afta aal dehnya tingz hapm, how Jehoava famili pahn ert ahn da hevn wahn feel? Fi shoar, aala wi wahn reeli waahn kantinyu prayz Jehoava an ih wandaful naym. Dayvid mi seh: “Prayz Jehoava . . . Mek dehn prayz fi hihn wandaful naym fareva.” (Ps. 72:18, 19) Wi wahn neva stap fain nyoo an eksaitin reezn fi prayz Jehoava.

Wen wi hyaa Jehoava naym, wi tink bowt evriting weh wi noa bowt ahn. Di mayn ting weh wi tink bowt da di lov weh hihn shoa. (1 Jan 4:8) Wi wahn aalwayz memba dat evriting weh Jehoava du, ih du owta lov. Ih mi shoa lov eena di way ih mek wi. Ih mi giv ih Son az wahn ransom sakrifais fi wi bikaaz ih lov wi. Ahn hihn rool eena wahn lovin ahn raichos way. Jehoava wahn kantinyu shoa humoch ih lov wi fareva. Ahn dat wahn mek wi jraa kloasa tu wi Pa, Jehoava, ahn wi wahn prayz ih wandaful naym fareva.—Ps. 73:28.