1. Weh ku help yu fi injai stodi Baibl prafesi?

 WAHN yong brada weh naym Ben seh, “Ai lov stodi Baibl prafesi.” Yoo feel jos laik dat? Er yoo feel laik Baibl prafesi tu haad fi andastan? Maybi yu feel laik ih boarin fi stodi Baibl prafesi. Wen yu laan wai Jehoava put prafesi eena di Baibl, dat ku chaynj how yu feel.

2. Weh wi wahn laan eena dis aatikl?

² Eena dis aatikl, wi wahn diskos wai wi shuda waahn stodi Baibl prafesi ahn how wi ku du dat. Wi wahn aalso taak bowt too prafesi eena di buk a Daniel, bikaaz wen wi andastan dehn wi wahn si how dehn ku help wee tudeh.

3. Weh wi need fi du if wi waahn andastan Baibl prafesi?

³ If wee noh andastan wahn Baibl prafesi, wi need fi aks fi help. Mek wi luk pahn wahn egzampl. Imajin yoo deh da wahn plays weh yu noh noa. Bot yu ga wahn fren weh noa evriting bowt da plays an ih deh wid yu. Hihn noa wehpaat fi goh er weh road fi tek. Yu hapi dat yu fren mi agree fi kohn wid yu, noh chroo? Jos laik da fren, Jehoava noa di taim weh wi di liv eena ahn hihn noa weh wahn hapm eena di fyoocha. Soh if wi waahn andastan Baibl prafesi, wi need fi aks Jehoava fi help.—Dan. 2:28; 2 Peet. 1:19, 20.

4. Wai Jehoava mi put prafesi eena di Baibl? (Jeremiah 29:11) (Koment pahn di picha.)

⁴ Jos laik wahn lovin pa, Jehoava waahn ih pikni dehn ga wahn hapi fyoocha. (Reed Jeremiah 29:11.) b Bot hihn difrent fahn wahn hyooman pa bikaaz hihn ku tel wi di fyoocha an evriting weh hihn seh da chroo. Ahn fi mek  wee ku noa bowt impoatant ivents bifoa dehn hapm, Jehoava mi pik sohn man fi rait sohn prafesi eena di Baibl. (Isa. 46:10) Di Baibl prafesi dehn da wahn gif fahn wi lovin Pa, Jehoava. Bot how yoo ku bee shoar dat weh di Baibl tel wi wahn reeli kohn chroo?

5. Weh yong peepl ku laan fahn Max ekspeeryens?

⁵ Wen wi pikni dehn deh da skool, dehn yoozhwali deh monks peepl weh ga lee bit a rispek er no rispek fi di Baibl. Di tingz weh dehndeh peepl seh ahn du ku mek fi wee pikni staat tu dowt if weh dehn bileev eena da chroo. Mek wi luk pahn Max ekspeeryens. Hihn seh, “Wen Ai da-mi wahn teenayja, Ai mi staat tu dowt if weh mi payrents mi-di teech da-mi di chroot an if di Baibl da-mi fahn Gaad.” Weh fi hihn payrents mi du? Max seh, “Eevn doa mi payrents mi wori bowt mi, dehn mi stay kaam.” Fi hihn payrents mi yooz di Baibl fi ansa di kweschanz weh ih mi gat. Bot Max mi du sohnting fi help ihself tu. Ih seh, “Ai mi staat stodi Baibl prafesi fi miself an Ah mi staat tel ada yong peepl bowt weh Ah mi-di laan.” Wat da-mi di rizolt? Hihn seh: “Afta Ah mi du dat, Ai mi shoar dat di Baibl da reeli fahn Gaad!”

6. If yoo ga eni dowt, weh yoo need fi du ahn wai?

⁶ Jos laik Max, yu mait staat tu dowt weh di Baibl teech. Yu noh need fi feel shaym bowt dis, bot ih impoatant fi mek yu geh rid a yu dowt dehn az soon az pasabl. Dowt da laik ros. If yu noh geh rid a it, ih ku sloali dischrai sohnting weh preshos. If yu waahn geh rid a eni dowt weh ku dischrai yu fayt, yu ku aks yuself, ‘Ai bileev dat weh di Baibl seh bowt di fyoocha da chroo?ʼ If yu noh shoar, ih impoatant dat yu stodi Baibl prafesi weh don kohn chroo. Mek wi si how yoo ku du dat.

7. Weh egzampl Danyel mi set fi wi wen ih mi stodi Baibl prafesi? (Daniel 12:10) (Koment pahn di picha.)

⁷ Danyel set wahn gud egzampl wen ih mi stodi Baibl prafesi. Hihn mi stodi Baibl prafesi fi di rait reezn. Hihn mi waahn noa di chroot. Danyel da-mi wahn hombl man, ahn hihn mi noa dat Jehoava wahn help ahn andastan Baibl prafesi if hihn mi ga wahn kloas rilayshanship wid ahn, an obay ahn. (Dan. 2:27, 28; reed Daniel 12:10.) c Danyel mi shoa dat ih hombl wen ih mi pen pahn Jehoava fi help ahn. (Dan. 2:18) Danyel mi du lata risaach. Hihn mi luk fi ansaz eena di Skripchaz weh mi avaylabl joorin di taim wen ih mi alaiv. (Jer. 25:11, 12; Dan. 9:2) How wee ku kapi Danyel egzampl?

8. Wai sohn peepl stodi Baibl prafesi, bot wat da di reezn wai wee stodi Baibl prafesi?

⁸ Tink bowt di reezn wai yu di stodi Baibl prafesi. Yoo reeli waahn noa di chroot? If dat da di reezn wai yu stodi Baibl prafesi, den Jehoava wahn help yu. (Jan 4:23, 24; 14:16, 17) Dehn ga sohn peepl weh stodi  Baibl prafesi fi di rang reezn. Dehn mait du it bikaaz dehn waahn proov dat di Baibl da noh fahn Gaad. Dehn feel laik if dehn ku proov dat, den dehn ku disaid fi dehnself weh rait er weh rang. Ih impoatant fi mek wi stodi fi di rait reezn. Wat els wi need fi help wi andastan Baibl prafesi?

9. Weh ku help wi fi andastan Baibl prafesi? Pleez eksplayn yu ansa.

⁹ Bee hombl. Jehoava pramis fi help peepl weh hombl. (Jay. 4:6) Ih impoatant fi mek wi pray an aks Ahn fi help wi andastan Baibl prafesi. If wi hombl, wi wahn aalso aksep di help fahn di faytful ahn waiz slayv weh Jehoava yooz fi gi wi food da di rait taim. (Look 12:42) Jehoava da wahn Gaad weh du tingz eena wahn aadali way. Soh ih mek sens dat ih wuda onli yooz di faytful ahn waiz slayv fi help wi andastan Baibl chroot.—1 Kor. 14:33; Ifee. 4:4-6.

10. Weh wi ku laan fahn Esther egzampl?

¹⁰ Du lata risaach. Staat stodi wahn prafesi weh yu reeli laik. Dat da weh wahn sista weh naym Esther mi du. Shee mi waahn noa bowt di Baibl prafesi dehn weh taak bowt wen di Mesaiya mi wahn kohn. Shee seh: “Wen Ai mi 15 yaaz oal, Ah mi du sohn risaach fi proov tu miself dat dehndeh prafesi mi geh rait dong bifoa Jeezas mi liv pahn ert.” Wan a di tingz weh mi kanvins shee da di infamayshan weh ih reed bowt di Ded See Skroalz. Shee seh: “Som a dehndeh skroal mi geh rait dong bifoa Jeezas mi liv pahn ert, soh di prafesi dehn weh mi deh een deh mi haftu kohn fahn Gaad.” Ih aalso seh: “Ah mi haftu reed som a di infamayshan oava ahn oava fi andastan it.” Bot shee mi hapi dat shee mi du dat. Afta shee mi du wahn lata gud risaach bowt sohn Baibl prafesi, shee mi seh: “Ah kuda mi si fi miself dat weh di Baibl seh da chroo!”

11. How wee benifit wen wi noa dat weh deh eena di Baibl da chroo?

¹¹ Wen wi si how sohn Baibl prafesi don kohn chroo, dis mek wi reeli chros Jehoava ahn di dairekshan weh hihn gi wi. Baibl prafesi tel wi bowt wi hoap fi di fyoocha. Soh wen wi stodi dehndeh prafesi, ih help wi fi kip wahn pazitiv atichood eevn if wi ga prablemz. Mek wi luk pahn too prafesi weh Danyel mi rait weh di kohn chroo eena fi wee taim. If yu andastan dehnya prafesi, den yu wahn ku mek waiz disizhanz eena laif.

12. Akaadn tu Daniel 2:41-43, weh di fut a “aiyan miks wid saaf klay” reprizent?

¹² Reed Daniel 2:41-43. d Eena di jreem weh Danyel mi eksplayn tu King Nebyukadneza,  di fut a di stachu weh di king mi si mi mek owta “aiyan miks wid saaf klay.” Wen wi kompyaa dis prafesi wid ada prafesi eena di buk a Daniel ahn Revilayshan, wi ku seh dat di fut reprizent di United States ahn Britain. Dehnya too konchri werk tugeda ahn dehn da di moas powaful govament eena fi wee taim. Danyel mi taak bowt dehn laik if dehn da-mi wan “kingdom,” an ih mi seh dat “paat wahn bee schrang ahn paat wahn bee week.” Wai paat a da kingdom wahn bee week? Bikaaz di saaf klay eena dis prafesi stan fi di kaman peepl, ahn di aiyan stan fi di govament. Ahn sayka di peepl, di govament dehn kyaahn aalwayz ak schrang laik aiyan ahn du aal weh dehn wuda waahn. e

13. Weh impoatant Baibl teechinz wi laan fahn dis prafesi?

¹³ Wi laan sohn impoatant Baibl teechinz fahn di stachu weh Danyel mi diskraib, espeshali fahn di stachu fut dehn. Fers, di United States ahn Britain shoa dat dehn ga powa. Fi egzampl, di United States ahn Britain mi deh monks di nayshan dehn weh mi win Werl Waar I ahn Werl Waar II. Bot dis werl powa wahn geh weeka ahn weeka bikaaz di peepl eena dehndeh konchri di fait gens eech ada ahn gens di govament. Sekant, di United States ahn Britain wahn bee di laas werl powa fi rool bifoa Gaad Kingdom geh rid a aal hyooman govament. Eevn doa ada nayshanz mait fait gens di United States ahn Britain, non a dehn wahn bee di neks werl powa. Wee noa dat bikaaz “di stoan” weh stan fi Gaad Kingdom wahn dischrai di stachu fut, di paat a di stachu weh reprizent di United States ahn Britain.—Dan. 2:34, 35, 44, 45.

14. Wen wi andastan di prafesi bowt di fut weh miks op wid aiyan ahn klay, how dat help wi mek waiz disizhanz?

¹⁴ How yoo feel bowt Danyel prafesi bowt di fut weh miks wid aiyan ahn klay? If yoo tink dis prafesi da chroo, den dis wahn chaynj how yu liv di res a yu laif. Yu noh wahn chrai mek lata moni er pail op lata mateeryal tingz, bikaaz yu noa dat dis werl wahn soon geh dischrai. (Look 12:16-21; 1 Jan 2:15-17) Wen yu geh fi andastan dis prafesi, ih wahn help yu fi si wai ih impoatant fi kip aan di preech ahn teech. (Mach. 6:33; 28:18-20) Afta yu stodi dis prafesi, ih wuda gud fi aks yuself dis kweschan, ‘Di disizhan dehn weh Ai mek shoa dat Ai kanvins dat Gaad Kingdom wahn soon dischrai aal hyooman govament?ʼ

15. Hoo da “di king a di naat” ahn “di king a di sowt” tudeh? (Daniel 11:40)

¹⁵ Reed Daniel 11:40. f Daniel chapta 11 taak bowt too king er too govament weh di fait wid eech ada fi tek kanchroal a di werl. Wen wi kompyaa dis prafesi wid sohn ada Baibl prafesi, wi ku si dat Russia tugeda wid di konchriz weh sopoat dehn da “di king a di naat,” ahn di United  States ahn Britain tugeda da “di king a di sowt.” g

16. How “di king a di naat” chreet Gaad peepl?

¹⁶ “Di king a di naat” di persikyoot Gaad peepl weh liv anda ih roolaship. Som a wi bradaz ahn sistaz geh beet op ahn geh put eena prizn bikaaz a dehn fayt. Bot dis noh fraitn dehn. Insted, ih mek dehn fayt eena Jehoava ahn di Baibl geh schranga. Wai? Bikaaz wi bradaz ahn sistaz noa dat Danyel mi prafesai dat Gaad peepl gwehn chroo persikyooshan. h (Dan. 11:41) Wen wi noa dis, ih help wi fi stay faytful tu Jehoava ahn chros dat wi hoap wahn reeli kohn chroo.

17. Weh chalenjiz Gaad peepl fays anda di roolaship a “di king a di sowt”?

¹⁷ Eena di paas, “di king a di sowt” mi aalso persikyoot Jehoava peepl. Joorin  Werl Waar I ahn Werl Waar II, wahn lata wi bradaz mi en op da prizn bikaaz dehn mi rifyooz fi goh da waar, ahn sohn pikni mi geh kik owta skool bikaaz dehn neva saloot di flag. Eena di paas fyoo yaaz, di laayalti a Jehoava peepl weh liv anda di roolaship a di king a di sowt mi geh tes eena lata ada wayz. Fi egzampl, joorin wahn ilekshan kampayn, wahn Kristyan mait feel temtid fi sopoat wahn politikal paati er sopoat wahn persn weh di ron fi ilekshan. Eevn if ih noh goh voat, ih mait stil di tek said eena ih haat. Soh ih impoatant fi bee kyaaful wid weh wi tink ahn du, bikaaz wi noh waahn tek said fi notn!—Jan 15:18, 19; 18:36.

18. Weh wee du wen wi si weh di goh aan bitween “di king a di sowt” ahn “di king a di naat”? (Koment pahn di picha.)

¹⁸ Peepl weh noh ga fayt eena Baibl prafesi wahn geh fraitn wen dehn si “di king a di sowt” di “push gens” “di king a di naat.” (Dan. 11:40) Too a dehnya king ga sohn powaful nyooklyaa bom weh ku dischrai aal laif pahn ert, bot Jehoava noh wahn mek dat hapm. (Isa. 45:18) Wee noh fi wori bowt di fyoocha wen wi si weh di hapm bitween “di king a di naat” ahn “di king a di sowt.” Insted, dis shuda schrentn wi fayt dat di en a dis sistem deh kloas.

19. Weh wi need fi memba bowt Baibl prafesi?

¹⁹ Wi noh noa how evri Baibl prafesi wahn kohn chroo. Eevn Danyel neva andastan evriting weh di Baibl prafesi dehn mi meen wen hihn mi rait dehn dong. (Dan. 12:8, 9) Bot jos bikaaz wee noh noa how ahn wen dehnya Baibl prafesi wahn kohn chroo, noh meenz ih noh wahn hapm. Wi ku chros dat Jehoava wahn help wi fi andastan weh wi need fi noa da di rait taim, jos laik weh hihn mi du eena di paas.—Amos 3:7.

20. Wat da sohn eksaitin Baibl prafesi weh wahn soon kohn chroo, ahn weh yoo mek op yu main fi du?

²⁰ Wan day, di nayshan dehn wahn seh dat “wi di liv eena pees ahn wi sayf.” (1 Tes.5:3) Wen dat hapm, aala di hyooman govament dehn wahn ton gens faals rilijan ahn dischrai it. (Rev. 17:16, 17) Den dehn wahn staat atak Gaad peepl. (Ezek. 38:18, 19) Dehnya tingz wahn leed tu di fainal waar a Armagedon. (Rev. 16:14, 16) Wi ku chros dat soon aala dehnya tingz wahn hapm. Soh mek wi mek op wi main fi kantinyu shoa dat wi tankful tu wi lovin Pa. Wi du dis wen wi kantinyu pay atenshan tu Baibl prafesi ahn help adaz fi du di saym.