• “Ah mi feel laik mi hozban di cheet pahn mi oava ahn oava agen.”

• “Ah mi feel shaym ahn laik Ah noh wert notn.”

• “Ah mi kyaahn taak tu nobadi bowt it, ahn da mee wan mi-di sofa pahn mi oan.”

• “Ah mi feel laik Jehoava neva kay bowt mi.”

Dehnya koment shoa humoch wahn waif sofa wen ih hozban wach poarnografi. a If wahn hozban di wach poarnografi fi monts er yaaz eena seekrit, ih waif mait feel laik shee kyaahn chros ahn nohmoh. Dis da weh wahn waif seh: “Ah mi wanda, ‘Da hoo dis man bisaid mi? Dehn ga eniting els weh hihn di haid fahn mi?’”

If yu marij paadna wach poarnografi, den dis aatikl ku help yoo. b Ih gat een sohn Baibl prinsipl weh ku komfert yu ahn rimain yu dat Jehoava lov yu ahn dat ih wahn help yu. Ih wahn aalso rimain yu dat Jehoava wahn help yu fi ga pees ahn fi stay kloas tu Ahn. c

Yu kyaahn kanchroal evriting weh yu hozban du, bot dehn ga sohn tingz weh yoo ku du fi ga moa pees. Dehnya da som a di tingz weh yu ku du.

Noh blaym yuself. Wahn waif ku feel laik ih hozban wach poarnografi bikaaz shee mi du sohnting rang. Danielle d seh, “Ah mi si miself az sohnbadi weh beks aal di taim an Ah mi feel laik sayka dat wi marij mi-di brok op.” Alice mi feel laik shee neva luk priti inof fi ih hozban. Shee doz seh tu ihself, ‘Wai mai hozban laik luk pahn ada laydi insteda mee?ʼ

 If yoo feel laik how dehn feel, memba dat Jehoava noh wahn blaym yu fi di tingz weh yu hozban du. Jaymz 1:14 seh: “Weh deh eena wahn persn oan haat da weh temp ahn an put ahn anda tes.” (Roam. 14:12; Fil. 2:12) Soh noh blaym yuself; Jehoava lov yu bikaaz yu laayal tu ahn.—2 Chron. 16:9.

Wahn waif mait feel laik ih hozban wach poarnografi bikaaz shee noh gud inof. Bot dat da noh chroo. Sohn ekspert weh du risaach pahn dis tapik eksplayn dat poarnografi mek wahn persn ga schrang sekshwal dizaiyaz weh nobadi ku satisfai.

Chrai noh wori tu moch. Catherine seh dat sohnting weh aalwayz deh pahn fi shee main da dat ih hozban laik wach poarnografi. Natalie seh: “Weneva Ah noh noa weh mi hozban deh, Ah wuda staat tu wori ahn schres owt aal day.” Sohn ada sistaz seh dat dehn feel shaym wen dehn deh wid bradaz ahn sistaz weh mait noa bowt dehn hozban prablem wid poarnografi. Den, dehn ga adaz weh feel loanli bikaaz dehn mait tink dat nobadi ku andastan dehn sichuwayshan.

Ih naamal fi feel laik how dehndeh sistaz feel. Bot if yu spen wahn lata taim di tink bowt dehndeh tingz, yoo wahn feel eevn moa schres owt. Chrai foakos pahn yu rilayshanship wid Jehoava. Dat wahn help yu fi bayr op.—Ps. 62:2; Ifee. 6:10.

Eena Baibl taimz, dehn mi ga sohn laydi weh gaahn chroo sohn tof sichuwayshan. Soh dehn mi pray tu Jehoava, ahn dat mi komfert dehn. If yu reed ahn meditayt pan fi dehn egzampl, dat ku help yu. Jehoava neva aalwayz geh rid a dehn prablemz, bot ih mi help dehn fi ga pees. Fi egzampl, Hana mi “reeli sad” kaaz a weh shee mi-di goh chroo. Bot afta shee mi “pray fi wahn gud wail fronta Jehoava,” shee mi ga pees eevn doa ih neva noa how tingz mi wahn ton owt.—1 Sam. 1:10, 12, 18; 2 Kor. 1:3, 4.

Aks di eldaz eena yu kangrigayshan fi help. Dehn da “laik wahn shelta fahn di haad breez, laik wahn plays fi shelta fahn di raynstaam.” (Isa. 32:2) Dehn mait eevn help yu fi fain wahn sista weh yu ku chros ahn taak tu, ahn weh ku komfert yu.—Prov. 17:17.

Yu tink yu ku help yu hozban stap wach poarnografi? Maybi yu kud. Di Baibl seh dat wen yu di chrai fiks wahn prablem er fait gens wahn schrang enimi, “too beta dan wan.” (Eccl. 4:9-12) Sohn risaach infamayshan shoa dat wen wahn kopl werk tugeda, lata taimz di hozban brok di habit fi wach poarnografi an ih waif ku laan fi chros ahn agen.

Bot, dis onli wahn pasabl if di hozban waahn stap wach poarnografi an if ih wilin fi werk haad fi geh rid a ih bad habit. Hihn don bayg Jehoava fi di schrent fi stap wach poarnografi? Ih don aks di eldaz fi help? (2 Kor. 4:7; Jay. 5:14, 15) Hihn ga wahn plan weh wahn help ahn stap wach poarnografi? Fi egzampl, hihn set wahn limit pahn humoch taim ih spen pan ih ilekchranik divais, er ih avoid sertn sichuwayshan weh ku temp ahn? (Prov. 27:12) Hihn aksep yu help ahn hihn aanis wid yu? If dat da di kays, maybi yu ku help ahn.

How yoo ku help ahn? Mek wi luk pahn wahn egzampl. Felicia mi marid Ethan ahn hihn mi adiktid tu poarnografi fahn wen ih mi yong. Felicia mek it eezi fi mek Ethan taak tu ahn wen hihn feel laik ih waahn wach poarnografi. Ethan seh: “Ai aanis wid mi waif. Shee help mi fi stay weh fahn tingz weh wuda temp mi fi wach poarnografi ahn shee wuda aalwayz chek op pahn mi ahn si how Ah di du. An ih help mi fi set wahn limit pahn humoch taim Ah deh pahn di Intanet.” Af koars, Felicia feel hert bikaaz Ethan laik wach poarnografi. Bot shee seh: “Di payn an anga weh Ah feel noh help hihn fi geh rid a da bad habit. Afta wi finish taak bowt weh hihn di goh chroo, den hihn redi fi help mi deel wid mai payn.”

Wen wahn kopl spen taim di taak bowt tingz laik dat, ih ku help di hozban fi noh wach poarnografi ahn di waif ku laan fi chros ahn agen. Wen wahn hozban aanis ahn tel ih waif bowt fi hihn weeknis, wehpaat ih gwehn, ahn weh ih di du, ih wahn eeziya fi mek ih waif chros ahn agen bikaaz ih noh di haid notn fan ahn nohmoh.

Yoo tink yu ku help yu hozban laik dat? If yu waahn help yu hozban, den chrai reed ahn diskos dis aatikl tugeda. Fi hihn goal wahn bee fi stap wach poarnografi ahn fi gi yu gud reezn fi chros ahn agen. Hihn noh fi feel beks dat yu waahn taak bowt ih prablem. Bot insted, ih shuda chrai andastan how di prablem mek yoo feel. Fi yoo goal da fi help ahn sopoat hihn fi stap ih bad habit ahn giv ahn wahn chaans fi mek ih shoa yu dat yu ku chros ahn agen. Too a unu wahn need fi laan wai peepl laik wach poarnografi ahn how unu ku fiks da prablem. e

 If yu feel laik unu kanvasayshan wahn ton intu wahn aagyument, den maybi unu ku aks wahn elda weh unu komfatabl wid fi jain unu wen unu taak bowt di sichuwayshan. Memba dat eevn if yu marij paadna get oava ih adikshan, ih mait tek taim fi mek yu chros ahn agen. Bot noh giv op. Chrai noatis eevn di lee tingz weh geh beta eena unu rilayshanship. Yu ku bee shoar dat wid taim ahn payshens, yu marij kud geh schrang agen.—Eccl. 7:8; 1 Kor. 13:4.

Wat if yu hozban staat wach poarnografi agen eevn afta ih mi don stap? Yu tink dat meen ih noh sari er dat ih kyaahn get oava it? Noh reeli. If hihn mi adiktid tu it, den da sohnting weh ih wahn haftu schrogl wid fi di res a ih laif. Ih pasabl dat hihn ku staat wach poarnografi agen eevn if ih mi don stap fi som yaaz. Fi mek dat noh hapm, ih need fi set roolz fi protek ihself. An eevn if ih luk laik ih stap di bad habit, ih need fi bee eevn moa schrik wid ihself fi noh faal bak agen. (Prov. 28:14; Mach. 5:29; 1 Kor. 10:12) Hihn wahn need fi werk haad fi ga wahn “nyoo way a tinkin” ahn fi laan fi “hayt weh bad.” Dat inklood poarnografi an eni ada habit weh noh kleen, laik fi maastabayt. (Ifee. 4:23; Ps. 97:10; Roam. 12:9) If yu hozban waahn mek dehnya chaynjiz, ih mait ku stap ih bad habit ahn get oava ih adikshan. f

Wat if yu marij paadna jos noh waahn stap wach poarnografi? Wahn lata taimz yu mait feel diskorij, beks, ahn laik yu kyaahn chros ahn. Yu ku fain pees wen yu chroa yu woriz pahn Jehoava. (1 Peet. 5:7) Yu ku kantinyu jraa kloasa tu Jehoava wen yu stodi, pray, ahn meditayt. Wen yu du dat, yu ku bee shoar dat Jehoava wahn jraa kloasa tu yoo. Laik weh Isaiah 57:15 seh, Jehoava liv wid dehn wan weh “feel dong ahn hoaples” an ih waahn help dehn fi bee hapi agen. Chrai bee wahn gud Kristyan. Noh bee shaym fi aks di eldaz fi help. Ahn noh giv op hoap dat wan day yu hozban mait stap ih bad habit.—Roam. 2:4; 2 Peet. 3:9.