1. Weh ku hapm afta sohnbadi komit wahn seeryos sin?

 EENA di laas aatikl, wi mi taak bowt weh di apasl Paal seh fi du wen wahn man eena di kangrigayshan da Korint mi komit wahn seeryos sin. Da man neva ripent, soh dehn mi haftu tek ahn owt fahn di kangrigayshan. Bot laik weh wi teem skripcha seh, Gaad ku stil help sohnbadi fi ripent. (Roam. 2:4) How Jehoava yooz di eldaz fi help sohnbadi fi ripent?

2-3. Weh wi fi du if wi fain owt dat wahn brada er sista komit wahn seeryos sin, ahn wai wi fi du dat?

² If sohnbadi eena di kangrigayshan komit wahn seeryos sin ahn dehn noh aksep help fahn di eldaz, dehn ku geh tek owt fahn di kangrigayshan. Bot di onli way di eldaz ku help dehn da if dehn noa bowt di sin. Soh weh wee shuda du if wi noa dat sohnbadi eena di kangrigayshan komit wahn seeryos sin? Wi fi inkorij di persn fi goh geh help fahn di eldaz.—Isa. 1:18; Aks 20:28; 1 Peet. 5:2.

³ Bot sopoaz di persn weh komit di sin rifyooz fi goh taak tu di eldaz? Den wee need fi goh taak tu di eldaz wiself. Wai? Bikaaz wi noa dat di persn need help. Wi waahn dehn geh di help bikaaz wi lov dehn ahn wi noh waahn looz wi brada er wi sista. Wi noa dat if dehn kantinyu du weh rang, dehn ku damij dehn rilayshanship wid Jehoava. Dehn mait eevn gi di kangrigayshan wahn bad naym. Soh eevn doa ih noh eezi fi goh taak tu di eldaz bowt sohnting laik dat, wi stil du it bikaaz wi lov Jehoava ahn wi lov wi brada er sista.—Saa. 27:14.

 HOW DI ELDAZ CHRAI HELP SOHNBADI WEH KOMIT WAHN SEERYOS SIN?

4. Weh di eldaz wahn chrai du wen dehn meet wid sombadi weh komit wahn seeryos sin?

⁴ Wen sohnbadi eena di kangrigayshan komit wahn seeryos sin, di badi a eldaz wahn pik chree eldaz fi faam wahn komiti a fi meet wid di persn. Dehndeh bradaz need fi bee hombl. Dehn wahn chrai help di persn fi ripent, bot dehn need fi andastan dat dehn kyaahn foas sombadi fi chaynj. (Deut. 30:19) Di eldaz need fi andastan dat noh evribadi da laik King Dayvid; noh aala dehn wahn rispan eena wahn pazitiv way. (2 Sam. 12:13) Som a dehn mait noh waahn Jehoava help ataal. (Jen. 4:​6-8) Stilyet, di eldaz wahn chrai evriting weh dehn kud fi help di persn ripent. Soh weh di eldaz wahn need fi memba wen dehn meet wid di persn weh komit wahn seeryos sin?

5. Weh shuda bee di eldaz atichood wen dehn meet wid sohnbadi weh komit wahn seeryos sin? (2 Timoti 2:​24-26) (Koment pahn di picha.)

⁵ Di eldaz andastan dat wen sohnbadi komit wahn seeryos sin, dehn da laik wahn preshos sheep weh geh laas. (Look 15:​4, 6) Soh wen di eldaz meet wid di persn weh sin, dehn haftu tink bowt how dehn wahn taak tu ahn, how dehn wahn chreet ahn, an wat da dehn atichood tuwaadz di persn, kaaz dehn noh waahn chreet ahn eena wahn rof way. Dehn noh fi tink bowt di meetin laik if da jos wahn nada jab an aal dehn haftu du da goh chroo wahn cheklis. Rada, dehn waahn du laik weh 2 Timoti 2:​24-26 seh ahn bee jentl wid di persn ahn chreet ahn kain az dehn chrai fi reech ih haat ahn help ahn chaynj.—Reed.

6. How di eldaz pripyaa bifoa dehn meet wid sohnbadi weh komit wahn seeryos sin? (Roamanz 2:4)

⁶ Eldaz pripyaa heda taim. Dehn chrai kapi Jehoava egzampl eena evriting weh dehn du fi help di sina, kaaz Paal seh: “Owta kainis Gaad di chrai help yu fi ripent.” (Reed Roamanz 2:4.) Di eldaz da shepadz, bot dehn haftu fala Krais dairekshan ahn fala fi hihn egzampl eena di way dehn tek kayr a di kangrigayshan. (Isa. 11:​3, 4; Mach. 18:​18-20) Bifoa di eldaz meet wid sohnbadi weh komit wahn seeryos sin, dehn pray an aks Jehoava fi help dehn fi help di sina fi ripent. Dehn aks Jehoava fi gi dehn wizdom an andastandin wail dehn di du risaach eena di Baibl an eena wi  poblikayshan dehn. Ahn dehn tek taim fi tink bowt di persn, kaaz dehn waahn andastan wai ahn how ih en op di komit wahn sin.—Prav. 20:5.

7-8. How di eldaz ku bee payshent laik Jehoava wen dehn meet wid sohnbadi weh komit wahn seeryos sin?

⁷ Eldaz chrai fi bee payshent laik Jehoava. Dehn tink bowt how Jehoava mi deel wid sinaz eena di paas. Fi egzampl, Jehoava mi payshent wid Kayn. Ih neva jos waan ahn bowt weh mi wahn hapm if ih sin. Ih mi aalso tel ahn dat tingz wuda goh gud far ahn if ih chaynj ih wayz. (Jen. 4:​6, 7) Ahn Jehoava mi sen di prafit Naytan fi kongsl Dayvid. Naytan mi yooz wahn iloschrayshan weh mi toch Dayvid haat. (2 Sam. 12:​1-7) Ahn wen di Izrelait dehn neva mi-di obay Jehoava, hihn mi sen ih prafit dehn fi help dehn oava ahn oava agen. (Jer. 7:​24, 25) Hihn neva wayt til wen ih peepl dehn ripent fi help dehn. Insted, eevn wen dehn stil mi-di sin, hihn mi chrai help dehn fi ripent.

⁸ Eldaz kapi Jehoava egzampl wen dehn di chrai help enibadi weh komit wahn seeryos sin. Laik weh 2 Timoti 4:2 seh, dehn chrai help dehn “eena wahn payshent way.” Soh wahn elda haftu aalwayz stay kaam ahn bee payshent wen ih di chrai help sohnbadi fi waahn du weh rait. If di elda wuda geh beks er foschraytid, di persn mait noh waahn lisn tu ih advais an ih mait eevn rifyooz fi ripent.

9-10. How di eldaz ku help di persn andastan dat weh ih du mek ih rilayshanship wid Jehoava geh week?

⁹ Eldaz chrai fain owt weh mek di persn en op di sin. Fi egzampl, maybi di Kristyan geh weeka bikaaz ih noh di du ih persnal stodi er ih noh di goh owt eena di minischri. Maybi ih noh di pray tu Jehoava az moch az ih yoostu, er maybi ih noh di pray fahn ih haat. Maybi ih stap fait gens rang tinkin ahn dizaiyaz. Maybi ih di heng rong di rang kaina frenz, er ih di entatayn ihself wid tingz weh wahn Kristyan noh fi reed, wach, er lisn tu. Di eldaz need fi andastan how aala dehndeh tingz ku afek di persn haat. Dehn waahn chrai help ahn fi andastan how Jehoava feel bowt di chois dehn weh ih mek ahn di ting dehn weh ih du.

¹⁰ Di eldaz ku aks di persn kweschanz fi help ahn tink bowt di tingz weh mi mek ih rilayshanship wid Jehoava geh week ahn weh mek ih sin. Dehn du dis eena wahn kain way ahn dehn chrai noh bee intafayrin. (Prav. 20:5) Dehn mait du laik weh Naytan du wid Dayvid ahn yooz wahn iloschrayshan fi help di persn tink bowt weh ih du ahn help ahn andastan dat weh ih du mi rang. Maybi di fers taim dehn meet wid di persn, ih feel sari fi weh ih du ahn ripent.

11. How Jeezas mi chreet sinaz?

¹¹ Eldaz chrai dehn bes fi kapi Jeezas egzampl. Wen Jeezas mi-di chrai help Saal, ih aks ahn: “Saal, Saal, wai yu di persikyoot mi?” Dat da-mi wahn gud kweschan bikaaz ih help Paal riyalaiz dat weh ih mi-di du mi rang. (Aks 9:​3-6) Ahn wen Jeezas mi taak bowt di “uman weh naym Jezibel,” hihn mi seh: “Ah mi giv ahn taim fi ripent.”—Rev. 2:​20, 21.

12-13. How di eldaz mait gi wahn sina taim fi ripent? (Koment pahn di picha.)

¹² Di eldaz kapi Jeezas ahn dehn noh hori fi tink dat di persn noh wahn ripent. Da chroo, som peepl mait ripent di fers  taim dehn meet wid di komiti, bot som need moa taim. Soh di eldaz wahn araynj fi meet wid dehn agen. Wai? Maybi afta di fers meetin, di persn reeli tink bowt weh ih du ahn bowt weh di eldaz tel ahn. Ih mait hombl ihself an aks Jehoava fi fergivnis. (Saa. 32:5; 38:18) Soh den, wen dehn meet wid ahn agen, ih mait ga wahn difrent atichood.

¹³ Fi help di sina ripent, di eldaz shoa kainis ahn chrai andastan how ih feel. Dehn pray tu Jehoava fi bles evriting weh dehn du fi help di persn. Ahn dehn hoap dat dehn brada er sista andastan dat weh ih du mi rang, an ih ripent.—2 Tim. 2:​25, 26.

14. Hoo da di wan weh reeli help wahn sina fi ripent, ahn wai wi seh dat?

¹⁴ Wen wahn sina ripent, wi feel veri hapi! (Look 15:​7, 10) Eevn doa di eldaz werk haad fi help wahn sina fi ripent, da hoo reeli help ahn fi chaynj? Memba weh Paal mi seh? Ih seh: “Maybi Gaad wahn alow dehn fi ripent.” (2 Tim. 2:25) Soh Jehoava da di wan weh help dehn fi chaynj dehn tinkin an atichood. Wat da som a di gud tingz weh hapm afta sombadi ripent? Paal tel wi dat dehn wahn geh di karek andastandin a di chroot an eskayp di Devl chrap dehn.—2Tim. 2:26.

15. How di eldaz ku kantinyu help di sina afta ih ripent?

¹⁵ Wen sohnbadi ripent, di eldaz wahn kantinyu vizit ahn fi help schrentn ih fayt, fi help ahn kantinyu fait Saytan temtayshan dehn, ahn fi help ahn du weh rait. (Heeb. 12:​12, 13) Af koars, di eldaz noh tel adaz bowt weh di persn mi du. Bot weh di kangrigayshan mait need fi noa?

“KAREK DEHN FRONTA EVRIBADI”

16. Weh Paal mi meen wen ih seh “fronta evribadi” eena 1 Timoti 5:20?

¹⁶ Reed 1 Timoti 5:20. Paal mi tel Timoti dat if enibadi “kip aan di praktis  sin,” ih fi “karek dehn fronta evribadi.” Wen Paal mi seh “evribadi,” hihn neva mi-di taak bowt di hoal kangrigayshan; ih mi-di taak bowt evribadi weh noa bowt di sin. Ih ku bee peepl weh si weh hapm er maybi di sina tel dehn weh ih du. Soh di eldaz wuda onli tel dehndeh bradaz er sistaz dat dehn don kongsl di brada fi karek ahn.

17. Weh anonksment di eldaz mait haftu mek, ahn wai?

¹⁷ Sohntaim, lata peepl eena di kangrigayshan noa dat wahn persn komit wahn sin, er if dehn noh noa yet dehn wahn praabli fain owt soon. If dat da di kays, den di “evribadi” weh Paal mi-di taak bowt ku bee di hoal kangrigayshan. Soh wahn elda wuda anonks dat di eldaz kongsl di brada er sista fi karek ahn. Wai dehn wuda anonks it? Paal seh dat wuda “serv az wahn waanin fi evribadi els,” soh dat nobadi els eena di kangrigayshan noh komit wahn sin.

18. Weh di eldaz fi du if wahn baptaiz persn weh noh 18 yet komit wahn sin? (Koment pahn di picha.)

¹⁸ Weh di eldaz fi du if wahn baptaiz persn weh noh 18 yet komit wahn seeryos sin? Di badi a eldaz wuda araynj fi mek too eldaz meet wid di yong persn an ih Kristyan payrents. b Soh di eldaz wahn aks di payrents weh dehn don di du fi chrai help dehn pikni fi chaynj ih wayz ahn ripent. If di yong persn lisn tu ih  payrents ahn mek chaynjiz, den di eldaz mait disaid fi lef it tu di payrents fi kantinyu help dehn pikni. Aftaraal, Gaad gi di payrents di rispansabiliti fi chrayn dehn chiljren eena wahn lovin way. (Deut. 6:​6, 7; Prav. 6:20; 22:6; Ifee. 6:​2-4) Di eldaz wahn chek wid di payrents fahn taim tu taim fi mek shoar dat di yong persn di geh di help weh ih need. Bot weh di eldaz shuda du if di yong persn rifyooz fi chaynj? Den, wahn komiti a eldaz wahn meet wid di yong persn an ih Kristyan payrents.

“JEHOAVA FUL A MERSI AHN KOMPASHAN”

19. How di eldaz chrai fi bee laik Jehoava wen dehn meet wid sohnbadi weh komit wahn seeryos sin?

¹⁹ Jehoava waahn di eldaz protek di kangrigayshan fahn enibadi weh rifyooz fi obay ahn. (1 Kor. 5:7) Bot di eldaz aalso chrai dehn bes fi help di persn ripent. Ahn wen dehn di help di persn, dehn kip di hoap dat di persn chaynj. Wai? Bikaaz dehn waahn bee laik Jehoava, weh “ful a mersi ahn kompashan.” (Jay. 5:11) Noatis how di apasl Jan chreet ih bradaz ahn sistaz wid lov tu. Hihn mi seh: “Mi dyaa chiljren, Ah di rait dehnya ting tu unu soh dat unu noh sin. Bot, if wan a unu sin, wi ga wahn helpa wid di Faada. Da di wan weh du weh rait eena Gaad sait, Jeezas Krais.”—1 Jan 2:1.

20. Weh wi wahn diskos eena di neks aatikl?

²⁰ Sohntaim, wahn Kristyan rifyooz fi ripent. Dat sad, bikaaz den di eldaz wahn haftu disaid fi tek ahn owt fahn di kangrigayshan. Eena di neks aatikl, wi wahn si weh di eldaz du eena wahn sichuwayshan laik dat.