1. Weh Jehoava waahn fi evribadi?

 JEHOAVA gi wi di rait fi mek wi oan disizhanz. Wi mek disizhanz evri day. Di moas impoatant disizhan wi kuda eva mek da fi dedikayt wi laif tu Jehoava ahn wership hihn tugeda wid wi bradaz ahn sistaz. Dis da weh Jehoava waahn fi evribadi. Wai? Bikaaz hihn lov peepl an ih waahn dehn bee hapi. Ih waahn dehn bee ih fren an injai laif fareva.—Deut. 30:​19, 20; Gal. 6:​7, 8.

2. Weh Jehoava waahn fi peepl weh noh ripent fahn dehn sinz yet? (1 Jan 2:1)

² Jehoava noh foas nobadi fi serv ahn. Hihn lef da disizhan op tu wee. Weh di eldaz wuda haftu du if wahn baptaiz Kristyan komit wahn seeryos sin? If ih noh ripent, dehn wuda haftu tek ahn owt fahn di kangrigayshan. (1 Kor. 5:13) Bot eevn if dat wuda hapm, Jehoava reeli waahn di persn ripent ahn ga wahn kloas rilayshanship wid hihn. In fak, wan a di mayn reezn wai hihn gi wi di ransom da fi mek ih ku fergiv sinaz weh ripent. (Reed 1 Jan 2:1.) Gaad soh lovin dat ih inkorij sinaz fi ripent bifoa ih tu layt.—Zech. 1:3; Roam. 2:4; Jay. 4:8.

3. Weh wi wahn diskos eena dis aatikl?

 ³ Jehoava tel wi how hihn feel bowt sin ahn bowt peepl weh komit seeryos sinz. Ahn hihn waahn wi feel di saym way. Dis aatikl wahn help wi du dat. Fers, wi wahn si weh di eldaz da di kangrigayshan da Korint mi du wen wahn brada mi komit wahn seeryos sin. Den, wi wahn taak bowt weh Paal mi tel dehn fi du wen di man mi ripent. Ahn wi wahn si how Jehoava feel bowt wahn Kristyan weh komit wahn seeryos sin.

WEH DI KANGRIGAYSHAN MI DU WEN WAHN BRADA MI KOMIT WAHN SEERYOS SIN?

4. Weh mi hapm da di kangrigayshan da Korint? (1 Korintyanz 5:​1, 2)

⁴ Reed 1 Korintyanz 5:​1, 2. Joorin Paal terd mishineri chrip, hihn fain owt bowt sohnting terabl weh mi-di hapm eena di kangrigayshan da Korint. Eena da nyoo kangrigayshan, wahn brada mi-di sleep wid ih stepma. Dat mi shakin! Eevn peepl weh neva serv Gaad mi noa dat dat mi rang. Di kangrigayshan talarayt ih bihayvya ahn mek ih stay eena di kangrigayshan. Maybi dehn mi eevn feel prowd a dat, kaaz dehn mi feel laik dehn di shoa mersi laik Jehoava. Bot Jehoava noh talarayt da kaina kandok eena di kangrigayshan. Bikaaz a weh di man mi-di du, som peepl weh noh wership Jehoava praabli mi taak bad bowt di kangrigayshan. An if hihn mi stay eena di kangrigayshan, ada Kristyanz kuda staat du di saym kaina ting laik weh hihn mi-di du. Soh weh Paal mi tel di kangrigayshan fi du?

5. Weh Paal mi tel di kangrigayshan fi du, ahn weh ih mi meen? (1 Korintyanz 5:13) (Koment pahn di picha.)

⁵ Reed 1 Korintyanz 5:13. Jehoava mi moov Paal fi rait wahn leta tu di kangrigayshan fi tel dehn dat if di man noh ripent, dehn wuda haftu tek ahn owt fahn di kangrigayshan. How di kangrigayshan mi sopoas tu chreet ahn? Paal mi tel dehn fi “stap spen taim” wid ahn. Weh dat meen? Paal mi seh dat dehn fi noh “eevn eet wid sombadi laik dat.” (1 Kor. 5:11) If yu sidong an eet wid sohnbadi, yu wahn spen taim wid dehn ahn taak tu dehn. Afta dat, yu mait waahn spen moa taim wid dehn. Ahn dat da weh  Paal tel di kangrigayshan noh fi du. Dat wuda protek di kangrigayshan fahn bad kompni. (1 Kor. 5:​5-7) Ahn wahn nada reezn wai Paal mi tel dehn fi stap spen taim wid di man da fi help ahn fi si humoch ih mi hert Jehoava. Den maybi ih mi wahn feel sari fi weh ih du ahn ripent.

6. Weh di kangrigayshan mi du wen dehn reed Paal leta, ahn weh di sina mi du?

⁶ Afta Paal mi sen ih leta tu di Kristyanz da Korint, hihn mi staat tu wanda how di bradaz ahn sistaz mi wahn tek it. Bot Taitos bring ahn gud nyooz. Paal mi hapi dat di kangrigayshan mi du weh ih seh ahn tek di sina owt fahn di kangrigayshan. (2 Kor. 7:​6, 7) Aalso, sohn monts afta Paal mi sen da leta, di man mi ripent. Hihn mi chaynj ih atichood ahn staat tu obay Jehoava agen. (2 Kor. 7:​8-11) Weh Paal mi tel di kangrigayshan fi du neks?

 HOW DI KANGRIGAYSHAN MI FI CHREET DI SINA WEH RIPENT?

7. Weh di man du afta hihn geh put owta di kangrigayshan? (2 Korintyanz 2:​5-8)

⁷ Reed 2 Korintyanz 2:​5-8. Paal mi tel di kangrigayshan: “Di disiplin weh moas a unu mi giv ahn da inof ponishment far ahn.” Dat meenz dat afta di sina mi geh put owta di kangrigayshan, hihn riyalaiz dat hihn mi need fi ripent. Ahn bikaaz hihn mi ripent, di kangrigayshan neva need fi kantinyu disiplin ahn.—Heeb. 12:11.

8. Weh Paal mi tel di kangrigayshan fi du neks?

⁸ Bikaaz di man mi ripent, Paal mi tel di eldaz fi alow ahn bak eena di kangrigayshan. Ih tel dehn: “Fergiv ahn fahn unu haat ahn giv ahn komfert.” Ahn den ih seh: “Pleez mek shoar ih noa dat unu lov ahn.” Paal mi waahn dehn du moa dan jos alow di man bak eena di kangrigayshan. Ih mi waahn dehn tel di brada dat dehn lov ahn fergiv ahn, an shoa it tu. Dis wuda mek di brada feel laik di bradaz hapi dat hihn kohn bak tu di kangrigayshan.

9. Wai ih neva eezi fi som a di bradaz fergiv di brada weh ripent?

⁹ Maybi som a di bradaz ahn sistaz neva hapi fi hyaa dat di brada kohn bak tu di kangrigayshan. How komz? Maybi som a dehn mi feel laik ih kaaz tu moch chrobl fi di kangrigayshan. Maybi som a dehn mi feel shaym fi weh ih du. Ahn maybi som a dehn mi feel laik di sichuwayshan neva fyaa. Aftaraal, dehn mi-di werk soh haad fi stay kleen ahn stay eena di kangrigayshan, ahn now dehn mi haftu welkom bak di man eevn doa hihn mi sin soh bad. (Kompyaa Look 15:​28-30.) Bot wai ih mi impoatant fi mek di kangrigayshan shoa di brada dat dehn reeli lov ahn?

10-11. Weh kuda mi hapm if di eldaz rifyooz fi fergiv di brada weh ripent?

¹⁰ Imajin dat di man mi ripent, bot di eldaz neva alow ahn bak eena di kangrigayshan. Er sopoaz di eldaz alow ahn bak, bot di res a di kangrigayshan rifyooz fi shoa ahn lov. How yu tink di poa brada wuda feel? Maybi hihn wuda geh “soh sad dat ih giv op.” Ih mait feel laik ih kuda neva serv Jehoava agen. Ahn soh ih mait eevn tink dat Jehoava kuda neva fergiv ahn, an mait az wel ih noh eevn chrai chaynj.

¹¹ Bot dat da noh aal. If di bradaz ahn sistaz wuda rifyooz fi fergiv di brada, dehn kuda damij dehn oan rilayshanship wid Jehoava. How soh? Bikaaz if dehn du dat, dehn wuda bee moa laik Saytan ahn noh laik Jehoava. Jehoava fergivin, bot Saytan kruwil ahn noh shoa no kaina mersi. Soh if dehn noh shoa mersi, di Devl ku yooz dehn fi diskorij di brada ahn stap ahn fahn serv Jehoava.—2 Kor. 2:​10, 11; Ifee. 4:27.

12. How di kangrigayshan da Korint kuda mi kapi Jehoava egzampl?

¹² Soh how di kangrigayshan da Korint kuda kapi Jehoava, ahn noh Saytan? Wen dehn chreet wahn sina weh ripent di saym way how Jehoava wuda chreet dehn. Ahn how Jehoava chreet sohnbadi laik dat? Dayvid mi seh: “Yoo, Oa Jehoava, da wahn gud Gaad ahn yu aalwayz redi fi fergiv.” (Saa. 86:5) Maika mi seh: “Dehn noh ga nobadi els laik yoo weh fergiv peepl wen dehn sin ahn wen dehn du bad tingz.” (Mic. 7:18) An  Aizaiya mi seh: “Mek di wikid man lef ih wayz ahn di eevl man ih tinkin; mek ih goh bak tu Jehoava, fi wee Gaad, hoo wahn ga mersi ahn wahn fergiv ahn eena wahn big way.”—Isa. 55:7.

13. Wai di eldaz kuda alow di brada bak eena di kangrigayshan? (Si di baks “ Wen Dehn Mi Alow di Man Bak Eena di Kangrigayshan Da Korint?”)

¹³ Jos laik Jehoava, di kangrigayshan da Korint mi fi bee wilin fi fergiv ahn, an shoa ahn dat dehn reeli lov ahn. Paal mi seh dat if dehn fergiv di brada weh ripent, dehn wuda bee “obeedyant eena evriting.” (2 Kor. 2:9) Da chroo, di man mi kohn bak tu di kangrigayshan jos wahn fyoo monts afta dehn tek ahn owt, bot ih did ripent. Soh di eldaz neva ga no reezn fi mek di brada wayt bifoa dehn alow ahn bak eena di kangrigayshan.

KAPI JEHOAVA JOSTIS AHN MERSI

14-15. Weh aal wi laan fahn weh hapm da Korint? (2 Peeta 3:9) (Koment pahn di picha.)

¹⁴ Jehoava mek shoar dat di Baibl gat een dis egzampl fi “teech wi” how fi handl dehnya kaina sichuwayshan. (Roam. 15:4) Wi laan dat Jehoava noh talarayt seeryos sin eena di kangrigayshan. Som peepl tink dat bikaaz Jehoava mersiful, hihn wuda alow sohnbadi weh noh ripent fi stay eena di kangrigayshan.  Da chroo, Jehoava shoa lata mersi, bot dat noh meenz sohnbadi ku du sohnting weh rang ahn stil stay eena di kangrigayshan. Fi hihn standadz noh chaynj. (Jood 4) In fak, Jehoava wudn di shoa mersi if ih alow sombadi weh noh ripent fi stay eena di kangrigayshan, bikaaz ih wuda put di hoal kangrigayshan eena daynja.—Prav. 13:20; 1 Kor. 15:33.

¹⁵ Eevn doa Jehoava noh talarayt seeryos sin, hihn stil noh waahn nobadi geh dischrai. Hihn waahn sayv az moch peepl az pasabl. Hihn shoa mersi tu hoosoeva chaynj ih wayz ahn wilin fi fiks ih rilayshanship wid ahn. (Ezek. 33:11; reed 2 Peeta 3:9.) Soh wen di man da Korint mi ripent, Jehoava mi tel di kangrigayshan fi fergiv di man ahn welkom ahn bak.

16. How yu feel bowt Jehoava wen yu meditayt pahn weh hapm da Korint?

¹⁶ Wen wi luk pahn how di kangrigayshan mi handl di sichuwayshan da Korint, wi ku si Jehoava lov, raichosnis, ahn jostis. (Saa. 33:5) Wen wi meditayt pahn dat, ih mek wi waahn prayz Jehoava eevn moa, noh chroo? Aftaraal, aala wi da sinaz ahn wi need Jehoava fergivnis. Soh aala wi ga reezn fi bee tankful tu Jehoava fi di ransom, bikaaz widowt dat, wi kyaahn geh fergivnis. Wi noa dat Jehoava reeli lov ih peepl an ih waahn di bes fi dehn. Dat komfertin fi chroo!

17. Weh wi wahn diskos eena di neks too aatikl?

¹⁷ How bowt tudeh? If sohnbadi komit wahn seeryos sin, how di kangrigayshan eldaz ku kapi Jehoava lov ahn help di persn fi ripent? Weh di kangrigayshan fi du wen di eldaz disaid fi tek sohnbadi owt fahn di kangrigayshan er alow dehn bak een? Di neks too aatikl wahn ansa dehndeh kweschan.