1-2. (a) How Jehoava feel wen peepl komit wahn seeryos sin ahn noh ripent? (b) Weh Jehoava hoap sinaz wahn du?

 JEHOAVA noh talarayt aal kaina bihayvya; hihn hayt sin. (Saa. 5:​4-6) Jehoava ekspek wi fi obay di komanment dehn weh hihn put fi wi eena ih Werd. Af koars, Jehoava andastan dat wi noh perfek. Soh hihn noh ekspek wi fi obay ahn eena wahn perfek way. (Saa. 130:​3, 4) Bot saym taim, ih noh talarayt peepl weh noh obay hihn ahn weh “tek advantij a Gaad grayt kainis soh dat dehn ku goh aan brayzn.” (Jood 4) Di Baibl eevn seh dat Gaad wahn dischrai peepl weh wikid da Armagedon.—2 Peet. 3:7; Rev. 16:16.

² Bot Jehoava noh waahn nobadi geh dischrai. Laik weh wi taak bowt erliya eena dis magazeen, di Baibl seh dat “ih waahn evribadi geh di chaans fi ripent.” (2 Peet. 3:9) Kristyan eldaz kapi Jehoava egzampl. Dehn shoa payshens wen dehn di chrai help wahn sina fi chaynj ih wayz ahn fi bee Jehoava fren agen. Bot noh aal sinaz wilin fi ripent. (Isa. 6:9) Som a dehn kip di du weh rang noh mata weh di eldaz chrai du fi help dehn ripent. Weh di eldaz fi du eena wahn sichuwayshan laik dat?

“TEK OWT DI WIKID PERSN FAHN MONKS UNU”

3. (a) Weh di Baibl seh fi du wid wahn sina weh noh ripent? (b) Wen wahn sina rifyooz fi ripent, wai wi ku seh da laik if ih chooz fi mek dehn tek ahn owta di kangrigayshan?

³ Wen wahn sina rifyooz fi ripent, aal weh di eldaz ku du  da weh 1 Korintyanz 5:13 seh: “Unu fi tek owt di wikid persn fahn monks unu.” Di sina noa dat if ih noh ripent, dehn wahn haftu tek ahn owt fahn di kangrigayshan. Soh da laik hihn chooz fi mek dehn tek ahn owt fahn di kangrigayshan. Ih di reep weh hihn ihself a plaant. (Gal. 6:7) Wai wi ku seh dat? Bikaaz eevn doa di eldaz chrai oava ahn oava fi help ahn ripent, hihn stil rifyooz fi chaynj. (2 Ki. 17:​12-15) Weh hihn du shoa dat hihn noh waahn obay Jehoava komanment dehn.—Deut. 30:​19, 20.

4. Wai di eldaz mek wahn anonksment wen dehn disaid fi tek owt wahn sina weh noh ripent fahn di kangrigayshan?

⁴ Wen wahn sina noh ripent ahn di eldaz tek ahn owt fahn di kangrigayshan, dehn wahn mek wahn anonksment tu di kangrigayshan fi tel dehn dat di persn da noh wan a Jehoava Witnisiz nohmoh. b Dehn noh mek da anonksment fi shaym di persn; dehn mek it soh dat di kangrigayshan ku du weh di skripcha seh ahn “stap spen taim” wid dehn ahn “noh eevn eet wid sombadi laik dat.” (1 Kor. 5:​9-11) Ih mek sens wai Jehoava tel wi fi du dat? Di apasl Paal seh: “Wahn lee bit a ees mek di hoal bred doa rayz.” (1 Kor. 5:6) If wahn sina noh ripent ahn di eldaz noh tek ahn owt fahn di kangrigayshan, den adaz eena di kangrigayshan mait staat tu tink dat dehn noh haftu obay Jehoava komanment dehn needa.—Prav. 13:20; 1 Kor. 15:33.

5. Wen di eldaz disaid fi tek owt sohnbadi fahn di kangrigayshan, how wi sopoas tu chreet dehn, ahn wai?

⁵ Wen di eldaz disaid fi tek owt sohnbadi fahn di kangrigayshan, how wi sopoas tu chreet dehn? Da chroo wi noh fi kip kompni wid dehn, bot wi stil hoap dat dehn wahn kohn bak. Wi waahn luk pahn dehn laik wahn sheep weh geh laas ahn memba dat eni sheep weh schray weh fahn di flak ku kohn bak. Dehn mi dedikayt dehn laif tu Jehoava, an eevn doa dehn noh di liv op tu da pramis rait now, dehn stil ga taim fi chaynj. Wail dehn deh owt fahn di kangrigayshan, dehn laif deh eena daynja. (Ezek. 18:31) Bot az lang az Jehoava wilin fi shoa mersi, wi hoap dat dehn wahn kohn bak bifoa taim ron owt. Soh how di eldaz ku kantinyu help sohnbadi weh dehn tek owt fahn di kangrigayshan?

HOW DI ELDAZ KIP DI HELP

6. Weh di eldaz wahn du fi help sohnbadi weh dehn tek owt fahn di kangrigayshan?

⁶ Wen di eldaz disaid fi tek sohnbadi owt fahn di kangrigayshan, dehn noh wahn lef ahn fi fain ih way bak tu Jehoava pan ih oan. Afta di komiti tel di persn dat ih kyaahn bee paat a di kangrigayshan nohmoh, dehn wahn eksplayn egzakli weh ih need fi du fi kohn bak tu di kangrigayshan. Ahn dehn wahn du moa dan dat. Wid moas peepl, dehn wahn araynj fi meet wid dehn agen eena wahn fyoo monts fi si if dehn atichood chaynj. Den if di persn wilin fi meet wid di eldaz agen, di eldaz wahn chrai fi inkorij ahn eena wahn lovin way fi mek ih ripent ahn kohn bak. An eevn if dehn fain owt dat di persn atichood noh chaynj, dehn wahn stil kip di chrai meet wid ahn fi help ahn.

7. How di eldaz shoa kompashan laik Jehoava wen dehn di help sohnbadi weh dehn tek owt fahn di kangrigayshan? (Jeremiah 3:12)

 ⁷ Di eldaz chrai haad fi shoa kompashan laik Jehoava wen dehn di help sohnbadi weh dehn tek owt fahn di kangrigayshan. Fi egzampl, wen di Izrelait dehn mi ribel gens Jehoava, hihn neva wayt fi mek dehn tek di fers step fi kohn bak. Insted, hihn mi chrai help dehn eevn bifoa dehn mi shoa eni sain dat dehn ripent. Laik weh wi si eena di sekant aatikl eena dis magazeen, Jehoava mi yooz di prafit Hoseeya an ih waif az wahn egzampl fi shoa fi hihn kompashan fi ih peepl. Eevn wen Goamer stil mi-di sin, Jehoava tel Hoseeya fi tek ahn bak. (Hos. 3:1; Mal. 3:7) Eldaz shuda kapi Jehoava egzampl. Dehn noh fi mek it haad fi sohnbadi kohn bak tu Jehoava. Wai? Bikaaz dehn reeli waahn dehn kohn bak.—Reed Jeremiah 3:12. c

8. How Jeezas iloschrayshan bowt di prodigal son help wi fi andastan how Jehoava feel bowt peepl weh lef ahn? (Look 15:7)

⁸ Memba di stoari weh Jeezas tel bowt di prodigal son? Wen di bwai mi-di kohn bak hoam, ih pa kech sait a ahn, an “ih ron ahn hog ahn tait an ih giv ahn wahn tenda kis.” (Look 15:20) Di pa mi lov ih son soh moch dat ih neva jos stan op deh ahn wayt fi mek ih son kohn beg ahn fi fergivnis. Rada, hihn ron gaahn meet ih son. Dat da how Jehoava feel bowt peepl weh lef ahn. An eldaz chrai haad fi bee laik Jehoava. Dehn waahn mek enibadi weh lef Jehoava kohn bak tu ahn. (Look 15:​22-24, 32) Wen di sina kohn bak, Jehoava, Jeezas, di aynjelz, ahn di hoal kangrigayshan wahn bee hapi hapi!—Reed Look 15:7.

9. Weh Jehoava waahn mek sinaz du?

⁹ Fahn weh wi diskos soh faar, ih klyaa fi si dat Jehoava noh wahn mek nobadi weh noh ripent stay eena di kangrigayshan. Bot hihn stil waahn help dehn fi ripent, kaaz ih waahn mek dehn kohn bak. Noatis how Jehoava feel bowt wahn sina weh ripent. Hosea 14:4 seh: “Ah wahn kyoar dehn, ahn dehn noh wahn lef mi nohmoh. Ah wahn lov dehn bikaaz Ah waahn, kaaz Ah noh wahn beks wid dehn nohmoh.” Bikaaz di eldaz noa how Jehoava feel, ih impoatant fi mek dehn bee redi ahn wilin fi rispan tu eni sain weh shoa dat sohnbadi di staat tu ripent. An ih impoatant fi mek enibadi weh lef Jehoava noa dat hihn stil lov dehn ahn hihn waahn mek dehn kohn bak tu ahn.

10-11. How di eldaz chrai help peepl weh lef Jehoava lang taim?

¹⁰ How bowt peepl weh geh tek owt fahn di kangrigayshan eena di paas? Maybi ih mi hapm lang taim, ahn dehn noh di du di sin nohmoh er dehn kyaahn eevn memba wai dehn mi tek dehn owt fahn di kangrigayshan. How di eldaz ku help peepl laik dehndeh? Dehn wahn chrai fain dehn ahn vizit dehn. Wail dehn di vizit dehn, dehn wahn eevn aafa fi pray wid dehn an inkorij dehn eena wahn lovin way fi kohn bak tu di kangrigayshan. Af koars, if sohnbadi deh owt fahn di kangrigayshan fi wahn lang taim, dehn wahn praabli need fi geh fi noa Jehoava ahn di Baibl aal oava agen. Soh, if dehn shoa dat dehn waahn kohn bak tu di kangrigayshan, di eldaz mait araynj fi mek  sombadi kandok wahn Baibl stodi wid dehn eevn if dehn noh kohn bak eena di kangrigayshan yet. Af koars, da di eldaz wahn pik hoo wahn stodi wid di persn.

¹¹ Di eldaz kapi Jehoava egzampl ahn shoa lov fi peepl. Soh dehn wahn luk fi enibadi weh lef Jehoava an inkorij dehn fi kohn bak tu ahn. Az soon az wahn sina shoa dat ih chaynj ih atichood an ih stap du weh rang, di eldaz ku alow ahn bak eena di kangrigayshan.—2 Kor. 2:​6-8.

12. (a) Eena weh kaina sichuwayshan di eldaz haftu bee ekschra kyaaful? (b) Wai wi shudn tink dat Jehoava noh wahn shoa mersi tu sertn kaina sinaz? (Koment pahn di futnoat)

¹² Eena sertn kaina sichuwayshan, di  eldaz need fi bee ekschra kyaaful bifoa dehn alow sohnbadi fi kohn bak eena di kangrigayshan. Fi egzampl, if di persn mi komit chail abyoos, ton apastayt, er plan fi put wahn en tu ih marij, di eldaz wuda waahn mek shoar dat di persn reeli ripent fahn dehn haat. (Mal. 2:14; 2 Tim. 3:6) Di eldaz haftu protek di kangrigayshan. Saym taim, doh, wi need fi andastan dat Jehoava wilin fi welkom bak eni sina weh reeli ripent ahn stap du weh rang. Soh di eldaz waahn mek shoar dat sohnbadi weh mi kruwil er chriki wid adaz reeli ripent. Stilyet, di eldaz shuda neva tink dat Jehoava noh wahn shoa mersi tu sohnbadi laik dat if dehn doo ripent. d—1 Peet. 2:10.

WEH DI KANGRIGAYSHAN KU DU

13. How wi fi chreet sombadi wen di eldaz kongsl dehn fi karek dehn, ahn how wi fi chreet sombadi wen di eldaz tek dehn owt fahn di kangrigayshan?

¹³ Bays pahn weh di laas aatikl seh, wi noa dat wen di eldaz anonks dat dehn kongsl sohnbadi fi karek dehn, wi ku kantinyu spen taim wid dehn bikaaz dehn chaynj dehn wayz ahn ripent. (1 Tim. 5:20) Dehn wuda stil bee paat a di kangrigayshan ahn dehn need fi spen taim wid wi soh dat wi ku inkorij dehn fi kantinyu du weh gud. (Heeb. 10:​24, 25) Bot if di eldaz haftu disaid fi tek owt sohnbadi fahn di kangrigayshan, wi wuda chreet dehn difrent. Wi “stap spen taim” wid dehn ahn wi “noh eevn eet wid sombadi laik dat.”—1 Kor. 5:11.

14. Weh disizhan wahn Kristyan ku mek wen sohnbadi weh geh tek owt fahn di kangrigayshan kohn da meetin? (Koment pahn di picha.)

¹⁴ Soh if wi du weh 1 Korintyanz 5:11 seh, dat meenz dat wi kyaahn invait sombadi laik dat fi kohn da meetin er hayl dehn wen dehn kohn da meetin? No. If di persn weh dehn tek owt fahn di kangrigayshan da faamli tu wee er if dehn yoostu bee wahn kloas fren, wi mait waahn invait dehn fi kohn da meetin. Wat if dehn kohn? Ih yoostu bee dat wi wudn eevn hayl sohnbadi laik dat. Bot eech  Kristyan need fi yooz Baibl prinsiplz ahn fala dehn kanshans wen dehn di disaid how dehn wahn handl dehndeh kaina sichuwayshan. Som bradaz ahn sistaz mait feel laik ih aarait fi hayl di persn ahn mek dehn feel welkom da di meetin. Bot fi shoar wi wudn spen taim wid dehn di du eniting els. Soh eevn if dehn kohn da meetin, wi noh wahn lang bench wid dehn er spen lata taim wid dehn.

15. Weh kaina sinaz 2 Jan 9-11 di taak bowt? (Koment pahn di baks weh naym “ Jan ahn Paal Neva Mi-Di Taak Bowt di Saym Kaina Sin.”)

¹⁵ Bot di Baibl doo seh dat wi noh sopoas tu hayl sohn sinaz. Wai? Bikaaz if wi hayl dehn wi di tek paat eena di wikid tingz weh dehn du. (Reed 2 Jan 9-11.) Wen wi reed di res a Jan leta, wi si dat di apasl mi-di taak bowt peepl weh ton apastayt er weh di chrai inkorij adaz fi du weh rang. (Rev. 2:20) Ahn soh if sohnbadi di chrai shayr apastayt teechinz er inkorij peepl fi du eniting els weh rang, di eldaz noh wahn vizit dehn. Af koars, wi wahn stil hoap dat dehn wahn chaynj ahn ripent. Bot til dat hapm, wi noh wahn hayl dehn ner invait dehn fi kohn da meetin.

SHOA KOMPASHAN AHN MERSI LAIK JEHOAVA

16-17. (a) Weh Jehoava inkorij sinaz fi du? (Ezekiel 18:32) (b) How eldaz ku werk lang wid Jehoava wen dehn di chrai help sohnbadi weh komit wahn seeryos sin?

¹⁶ Weh wi laan fahn dis magazeen? Jehoava noh waahn nobadi geh dischrai! (Reed Ezekiel 18:32.) e Hihn waahn mek sinaz kohn bak tu ahn, an mek pees wid ahn. (2 Kor. 5:20) Dat da wai Jehoava neva giv op pan ih peepl. Eevn if dehn lef ahn, hihn inkorij dehn fi ripent ahn kohn bak tu ahn. Di kangrigayshan eldaz ga di privilij fi werk lang wid Jehoava fi help enibadi weh komit wahn seeryos sin fi ripent.—Roam. 2:4; 1 Kor. 3:9.

¹⁷ Imajin how hapi Jehoava, Jeezas, ahn di aynjelz feel wen wahn sina ripent! Fi wee Pa da hevn feel soh hapi evri taim wan a ih sheep weh geh laas kohn bak tu di kangrigayshan. Ahn wi lov fi Jehoava wahn groa eevn moa wen wi tink bowt di kompashan, mersi, ahn grayt kainis weh ih shoa.—Look 1:78.