1. Weh ih meenz fi ripent?

 IH IMPOATANT fi mek wi ripent wen wi du sohnting rang. Akaadn tu di Baibl, wahn persn ripent wen ih feel reeli sari bowt sohnting bad weh ih du, wen ih stap du it, ahn wen ih mek op ih main fi neva du it agen.—Luk op “Ripent” eena Di Glasari.

2. Wai aala wi need fi laan bowt weh ih meenz fi ripent? (Nehimaiya 8:​9-11)

² Wai evri hyooman need fi laan weh ih meenz fi ripent? Aala wi da Adam ahn Eev pikni. Wi inherit sin ahn det fahn dehn, ahn sayka dat wi sin evri day. (Roam. 3:23; 5:12) Non a wi ku get weh fahn dat. Eevn man wid schrang fayt, laik di apasl Paal, mi haftu fait gens rang dizaiyaz. (Roam. 7:​21-24) Dis noh meenz dat wi wahn feel diskorij aal di taim bikaaz wi da sinaz. Jehoava da wahn Gaad a mersi an ih waahn aala wi fi bee hapi. Mek wi luk pahn di egzampl a di Jooz eena Nehimaiya taim. (Reed Nehimaiya 8:​9-11.) Jehoava neva waahn dehn feel sad aal di taim fi di sin weh dehn komit eena di paas, hihn mi waahn dehn feel hapi di wership ahn. Soh dat da wai Jehoava teech wi fi ripent, bikaaz hihn noa dat wen wi ripent ih help wi fi feel hapi. Soh den, if wi ripent, wi ku bee shoar dat Jehoava wahn fergiv wi.

3. Weh wi wahn diskos eena dis aatikl?

³ Eena dis aatikl, wi wahn laan moa bowt weh ih meenz fi ripent. Fers, wi wahn laan weh Jehoava mi teech di Izrelait dehn bowt weh ih meenz fi ripent. Sekant, wi wahn laan how Jehoava help sinaz fi ripent. Ahn terd, wi wahn laan weh Jeezas mi teech ih disaiplz bowt weh ih meenz fi ripent.

 WEH JEHOAVA MI TEECH DI IZRELAIT DEHN BOWT WEH IH MEENZ FI RIPENT?

4. Weh Jehoava mi teech di Izrelait dehn bowt weh ih meenz fi ripent?

⁴ Wen Jehoava mi gi di Izrelait dehn di Laa, dehn mi pramis fi obay dehn. Hihn mi pramis fi protek ahn bles dehn if dehn obay dehndeh laa. Hihn mi seh: “Dis koman weh Ah di gi yu tudeh, noh haad fi mek yu andastan. Da noh notn weh yu kyaahn du.” (Deut. 30:​11, 16) Bot if dehn neva obay er dehn chooz fi wership ada gaadz, ih neva mi wahn protek dehn nohmoh, ahn dehn mi wahn sofa di kansikwens. Bot eevn if dat mi hapm, ih neva meenz dat Jehoava mi kompleetli abandan dehn ahn dat dehn mi wahn kyaahn kohn bak tu Jehoava. Dehn kuda mi stil “goh bak tu Jehoava ahn lisn tu weh ih seh.” (Deut. 30:​1-3, 17-20) Dehn kuda ripent. An if dehn mi du dat, Jehoava mi wahn jraa kloas tu dehn ahn bles dehn agen.

5. How wi noa dat Jehoava neva giv op pahn ih peepl? (2 Kings 17:​13, 14)

⁵ Di Izrelaits mi ribel gens Jehoava oava ahn oava agen. Dehn mi wership aidolz ahn du bad tingz, ahn sayka dat dehn mi sofa di kansikwens. Bot Jehoava neva giv op pahn dehn. Ih mi chrai help dehn. Ih mi sen sohn prafit fi help dehn fi ripent ahn fi serv hihn wid dehn hoal haat.—Reed 2 Kings 17:​13, 14. a

6. How Jehoava yooz ih prafit dehn fi teech ih peepl wai ih impoatant fi ripent? (Koment pahn di picha.)

⁶ Wahn lata taimz Jehoava sen prafits fi waan ih peepl bowt weh wahn hapm if dehn noh stap du weh bad ahn  fi karek dehn. Fi egzampl, Jehoava yooz Jerimaiya fi tel di peepl: “Kohn bak, Oa Izrel. Unu lef mi, bot kohn bak. Ah noh wahn stay beks wid unu, kaaz Ai laayal . . . Ah noh wahn hoal wahn groj gens unu fareva. Jos admit dat unu gilti, bikaaz unu ton gens Jehoava.” (Jer. 3:​12, 13) Jehoava yooz Joawel fi tel di peepl: “Kohn bak tu mee wid aala unu haat.” (Joel 2:​12, 13) Jehoava mi tel Aizaiya fi seh: “Unu mek unuself hoali; geh rid a unu wikidnis fahn fronta mi; stap unu badnis.” (Isa. 1:​16-19) Ahn Jehoava mi tel Izeekyel fi seh: “Yu tink Ah feel hapi wen wahn wikid persn ded? Yu noh tink Ah wuda rada ih stap du weh bad ahn kantinyu liv? . . . Ah noh feel hapi ataal wen enibadi ded. Soh ton bak fahn unu sinz ahn liv.” (Ezek. 18:​23, 32) Jehoava hapi wen peepl ripent fahn dehn sin, bikaaz hihn waahn dehn liv fareva! Soh ih noh wayt fi mek dehn staat mek chaynjiz bifoa ih chrai help dehn. Mek wi luk pahn sohn egzampl.

7. Weh Jehoava mi-di teech ih peepl wen ih mi tel Hoseeya fi tek bak ih waif?

⁷ Jehoava mi yooz Hoseeya an ih waif, Goamer, fi teech ih peepl dat hihn wilin fi help dehn ripent. Afta Goamer mi komit adolchri, shee lef ih hozban fi wahn nada man. Bot Jehoava neva giv op pan ahn. Sins hihn ku reed peepl haat, ih mi tel Hoseeya: “Shoa lov agen tu yu waif weh di komit adolchri, ahn weh wahn nada man lov. Lov ahn jos laik how Ai, Jehoava, lov di Izrelait dehn eevn doa dehn di wership ada gaadz.” (Hos. 3:1; Prav. 16:2) Memba dat Goamer stil mi-di komit wahn seeryos sin, bot Jehoava mi tel Hoseeya fi fergiv ahn, an tek ahn bak az ih waif. b Jehoava mi-di yooz dis egzampl fi teech ih peepl how hihn feel bowt dehn. Hihn mi sen prafits oava ahn oava fi help dehn ripent, eevn doa dehn mi-di du lata bad tingz. Hihn du dis bikaaz ih lov dehn. Dis egzampl teech wi dat Jehoava noa evriting bowt wi, an ih wahn chrai fi help enibadi weh di komit wahn seeryos sin fi ripent. (Prav. 17:3) Mek wi si how Jehoava du dat.

HOW JEHOAVA CHRAI HELP SINAZ FI RIPENT?

8. How Jehoava mi chrai help Kayn fi ripent? (Jenisiz 4:​3-7) (Koment pahn di picha.)

⁸ Kayn da-mi Adam ahn Eev fers son, ahn hihn mi baan az wahn sina. Pahn tap a dat, di Baibl seh dat “evriting weh hihn mi du mi wikid.” (1 Jan 3:12) Dis kuda bee di reezn wai Jehoava neva “hapi wid Kayn an ih neva aksep fi hihn sakrifais.” Insteda chaynj ih atichood, “Kayn mi geh beks bad an ih mi feel sad.” Bot Jehoava mi taak tu Kayn; ih neva giv op pan ahn. (Reed Jenisiz 4:​3-7.) Eena wahn kain way, Jehoava mi tel ahn dat ih mi wahn bles ahn if ih mi du weh gud. Bot Jehoava mi aalso waan Kayn dat if ih mi stay beks, ih kuda en op di du sohnting weh bad. Bot Kayn neva aksep di help weh Jehoava mi giv ahn. Stilyet, dat neva stap Jehoava fahn chrai help ada sinaz fi ripent.

9. How Jehoava mi help Dayvid fi ripent?

⁹ Jehoava mi reeli lov King Dayvid. Hihn mi eevn kaal ahn “wahn man weh  pleez [ih] haat.” (Aks 13:22) Bot Dayvid mi komit wahn seeryos sin; ih komit adolchri ahn merda. Akaadn tu di Laa weh Gaad gi Moaziz, Dayvid mi dizerv fi ded. (Lev. 20:10; Num. 35:31) Bot Jehoava neva giv op pan ahn; hihn mi waahn help Dayvid ripent. c Soh ih sen ih prafit Naytan fi vizit Dayvid, eevn doa Dayvid neva kanfes ih sin an ih neva ripent yet. Naytan mi yooz wahn iloschrayshan weh help Dayvid fi riyalaiz dat ih mi hert Jehoava wahn lat, ahn dat moov ahn fi ripent. (2 Sam. 12:​1-14) Dayvid mi rait wahn saam weh shoa how sari ih mi feel bowt weh ih du. (Saa. 51, hedin) Da saam gi komfert tu lata peepl weh sin, an ih moov dehn fi ripent. Wi soh hapi dat Jehoava mi help Dayvid fi ripent!

10. How ih mek yu feel fi noa dat Jehoava fergiv wi ahn dat ih payshent wid wi?

¹⁰ Jehoava hayt aal kaina sin. (Saa. 5:​4, 5) Bot hihn noa dat aala wi da sinaz, ahn bikaaz ih lov wi, ih waahn help wi fait gens it. Ih komfertin fi noa dat Jehoava noh giv op pahn enibadi, noh mata how bad di sin weh dehn du. Hihn chrai help dehn fi ripent an ih jraa dehn kloas tu ahn. Wen wi meditayt pahn Jehoava payshens ahn fergivnis, wi mek op wi main fi stay faytful tu ahn, an if wi doo sin, wi hori ripent. Now wi wahn laan bowt weh Jeezas mi teech ih disaiplz bowt weh ih meenz fi ripent.

WEH JEEZAS MI TEECH IH DISAIPLZ BOWT WEH IH MEENZ FI RIPENT?

11-12. How Jeezas mi teech wi dat Jehoava eega fi fergiv wi? (Koment pahn di picha.)

¹¹ Wen di taim mi kohn fi mek di Mesaiya kohn pahn ert, Jehoava mi yooz Jan di Baptis fi preech tu peepl ahn fi help dehn fi ripent. Ahn wen Jeezas mi staat ih minischri, ih mi aalso teech peepl dat ih mi impoatant fi ripent.—Mach. 3:​1, 2; 4:17.

¹² Wen Jeezas mi deh pahn ert, hihn  mi teech peepl dat ih Pa eega fi fergiv wi wen wi sin. Jeezas mi yooz wahn iloschrayshan fi teech wi dis impoatant lesn. Hihn mi tel wi bowt wahn yong man weh mi chooz fi lef fahn hoam ahn goh du bad tingz. Bot wen di yong man “riyalaiz how foolish ih mi bihayv,” ih gaahn bak hoam. How di pa mi feel wen ih si ahn di kohn bak hoam? Jeezas seh dat wail di yong man mi “stil deh wahn distans fahn di hows, ih pa kech sait a ahn an ih mi feel sari far ahn; soh ih ron ahn hog ahn tait an ih giv ahn wahn tenda kis.” Di son mi-di plan fi aks ih pa if ih ku kohn bak hoam az wahn werka, bot ih pa mi eega fi fergiv ahn. An insted, ih welkom ahn bak eena ih famili. Soh ih pa seh: “Hihn mi laas bot ih fain ih way bak hoam.” (Look 15:​11-32) Bifoa Jeezas mi kohn pahn ert, fi shoar hihn mi si lata taimz how ih Pa mi shoa kompashan an ih mi redi fi fergiv peepl weh mi ripent. Dis stoari weh Jeezas mi tel wi reeli gi wi komfert an ih shoa how Jehoava da wahn Gaad weh ful a mersi.

13-14. Weh di apasl Peeta mi laan bowt weh ih meenz fi ripent, ahn weh hihn mi teech adaz bowt it? (Koment pahn di picha.)

¹³ Peeta mi laan wahn lat fahn Jeezas. Ih mi laan how Jehoava wilin fi fergiv peepl weh ripent. Wahn lata taimz Peeta mi mek mistayk ahn Jeezas mi wilin fi fergiv ahn. Fi egzampl, afta Peeta disoan Jeezas chree taimz, ih mi feel reeli sad bikaaz ih mi noa ih du sohnting rang. (Mach. 26:​34, 35, 69-75) Bot afta Jeezas mi geh rezorek, ih apyaa tu Peeta wen ih mi deh bai ihself soh dat ih kuda taak tu ahn an giv ahn komfert. (Look 24:​33, 34; 1 Kor. 15:​3-5) Jeezas mi du dis fi shoa Peeta dat ih stil lov ahn, an ih mi don fergiv ahn.—Maak 16:7; luk op di stodi noat “and Peter” eena di Study Bible.

 ¹⁴ Sayka weh Peeta gaahn chroo, hihn mi noa weh ih meenz fi ripent ahn fi geh fergivnis. Soh hihn kuda mi teech adaz bowt it. Soh afta di Festival a Pentikaas, Peeta mi gi wahn taak tu sohn Jooz weh neva bileev eena Jeezas. Hihn mi tel dehn dat dehn saym wan mi kil di Mesaiya. Bot ih neva rof dehn op. Ih inkorij dehn an ih tel dehn: “Unu mos ripent ahn ton tu Gaad soh dat Jehoava ku fergiv unu sin dehn ahn rifresh unu.” (Aks 3:​14, 15, 17, 19) Peeta teech di peepl dat wahn sina weh shoa dat ih ripent wahn stap du weh rang, ih wahn chaynj di way ih tink, an ih wahn staat tink an ak eena wahn way weh pleez Gaad. Peeta mi aalso tel di Jooz weh mi kil Jeezas dat Jehoava wuda fergiv dehn. Ih wuda bee laik if Jehoava mi kompleetli irays dehn sinz. Yaaz layta, Peeta mi tel di Kristyan kangrigayshan: “Jehoava payshent wid unu bikaaz ih noh waahn nobadi geh dischrai . . . bot ih waahn evribadi geh di chaans fi ripent.” (2 Peet. 3:9) Ih komfertin fi noa dat eevn if wi komit wahn seeryos sin, Jehoava wilin fi fergiv wi if wi ripent.

15-16. (a) Weh mi help di apasl Paal fi laan bowt fergivnis? (1 Timoti 1:​12-15) (b) Weh wi wahn laan eena di neks aatikl?

¹⁵ Saal mi du lata bad tingz. Fi egzampl, ih mi persikyoot Krais falowaz an ih mi chreet dehn kruwil. Moas Kristyanz mi tink dat hihn wuda neva chaynj. Bot dat da neva how Jeezas mi feel. Hihn an ih Pa kuda mi si di gud kwalitiz eena Saal. Dis da weh Jeezas mi seh bowt Saal: “Ah don chooz dis man fi bayr witnis eena mai naym.” (Aks 9:15) Jeezas mi eevn yooz wahn mirakl fi help Saal fi ripent. (Aks 7:58–8:3; 9:​1-9, 17-20) Ahn Saal, weh wi noa az di apasl Paal, mi ton wahn Kristyan. Hihn mi aalwayz tel adaz dat ih mi reeli glad dat Jehoava ahn Jeezas mi shoa ahn mersi ahn kainis. (Reed 1 Timoti 1:​12-15.) Ih mi help adaz fi noa dat “owta kainis Gaad di chrai help [dehn] fi ripent.”—Roam. 2:4.

¹⁶ Paal mi hyaa dat sohnting krayzi mi-di hapm eena di kangrigayshan da Korint. Ih mi hyaa dat wahn man weh mi-di komit sekshwal imoraliti da-mi stil paat a di kangrigayshan. Soh how Paal mi handl da sichuwayshan? Di way how ih handl it shoa wi dat Jehoava disiplin peepl eena wahn lovin way ahn dat ih impoatant fi shoa mersi. Wi wahn laan moa bowt dis eena di neks aatikl.