1-2. (a) Wat da sin, ahn how wi ku fait gens it ahn win? (Koment pahn di futnoat.) (b) Weh wi wahn taak bowt eena dis aatikl an eena di ada aatikl dehn eena dis magazeen? (Koment pahn di “Noat fi di Reeda” eena dis magazeen.)

 YU WUDA waahn noa humoch Jehoava lov yoo? Wahn gud way fi fain owt da fi stodi bowt aal weh hihn du fi sayv yu fahn sin ahn det. Sin a da wahn terabl enimi; wi kyaahn win di fait gens sin pahn wi oan. Wi sin evri singl day, ahn sayka dat wi ded. (Roam. 5:12) Bot wi ga hoap. Wee ku bee shoar dat Jehoava wahn sayv wi fahn sin ahn det!

² Jehoava di help peepl fait gens sin fi bowt 6,000 yaaz. Wai hihn du dat? Bikaaz ih lov wi. Hihn lov hyoomanz fahn di taim wen ih mek dehn. Soh hihn goh owta ih way fi help wi win dis fait. Gaad noa dat sin da di reezn wai wi ded, ahn hihn noh waahn mek wi ded. Ih waahn wi liv fareva. (Roam. 6:23) Ih waahn mek yoo liv fareva. Eena dis aatikl, wi wahn ansa chree kweschan: (1) Weh hoap Jehoava giv tu sinaz? (2) How sinful hyoomanz eena Baibl taimz mi aybl fi pleez Jehoava? (3) Weh Jeezas mi du fi sayv wi fahn sin ahn det?

WEH HOAP JEHOAVA GIV TU SINAZ?

3. Weh mi hapm eena di gyaadn da Eedn?

³ Wen Jehoava mi mek di fers man ahn wuman, hihn mi waahn dehn bee hapi. Ih mi gi dehn wahn byootiful plays  fi liv, ih marid dehn tu eech ada, an ih gi dehn wahn eksaitin asainment. Dehn mi fi ful op di hoal ert wid dehn pikni ahn mek di hoal planet bee wahn paradais laik di gyaadn da Eedn. Onli wan ting hihn tel dehn noh fi du, an ih waan dehn dat if dehn neva obay da koman, dehn mi wahn ded. Ahn wee noa weh hapm afta dat. Wahn wikid aynjel, Saytan, mi temp Adam ahn Eev fi brok da koman. Da wikid aynjel neva ga no lov fi Gaad ner fi dehn. Bot Adam ahn Eev mi du weh Saytan mi waahn, ahn dehn en op di sin bikaaz dehn neva chros dehn hevnli Faada weh mi lov dehn soh moch. Wi noa dat evriting weh Jehoava tel dehn mi hapm. Bikaaz dehn neva obay, dehn mi sofa fi di res a dehn laif. Dehn mi geh oal ahn den dehn mi ded.—Jen. 1:​28, 29; 2:​8, 9, 16-18; 3:​1-6, 17-19, 24; 5:5.

4. Wai Jehoava hayt sin ahn help wi fi fait gens it? (Roamanz 8:​20, 21)

⁴ Eevn doa weh hapm eena di gyaadn da Eedn da wahn sad stoari, Jehoava put it eena di Baibl soh dat wi ku laan sohnting impoatant fan it. Ih help wi fi andastan wai hihn hayt sin soh moch. Sin damij wi rilayshanship wid Jehoava, ahn sin da di reezn wai wi ded. (Isa. 59:2) Saytan hayt Jehoava, an ih hayt wee tu. Dat da wai hihn mi ster op chrobl eena di biginin, an eevn tudeh hihn stil di chrai ih bes fi mek wi sin. Wen Saytan mek Adam ahn Eev sin, hihn mi praabli tink ih mes op Jehoava plan fi wee. Hihn mosi mi feel da way bikaaz ih neva andastan humoch Jehoava lov wi. Bot Jehoava mi stil waahn mek peepl liv fareva pahn ert. Jehoava lov wi soh moch dat az soon az Adam ahn Eev sin, hihn hori kom op wid wahn way fi sayv wi fahn sin ahn det, ahn dat gi wi hoap fi di fyoocha. (Reed Roamanz 8:​20, 21.) Jehoava mi noa dat som a Adam ahn Eev pikni wuda chooz fi lov an obay hihn. Ahn sins hihn da wi Pa ahn di wan weh mek wi, hihn kom op wid wahn way fi mek wi ku bee ih fren ahn fi set wi free fahn sin ahn det. How Jehoava mi wahn mek aala dat pasabl?

5. Wen da-mi di fers taim Jehoava gi sinaz hoap? Pleez eksplayn yu ansa. (Jenisiz 3:15)

⁵ Reed Jenisiz 3:15. Di fers taim Jehoava mi gi wi hoap da-mi eena da prafesi wen ih mi kandem Saytan. Gaad tel wi bowt wahn “disendant” weh mi wahn sayv peepl fahn sin ahn det. Akaadn tu da prafesi, Saytan mi wahn mek da disendant sofa ahn ded. Dat mi wahn hert Jehoava wahn lat. Bot den di prafesi tel wi dat da disendant wahn dischrai Saytan ahn fiks aala di prablemz weh hihn mi kaaz eena di gyaadn da Eedn. (1 Jan 3:8) Eevn doa Jehoava mi wahn sofa an ih mi wahn alow di disendant fi sofa, Jehoava mi stil wilin fi goh chroo aala dat fi sayv peepl fahn sin ahn det!

HOW SINFUL HYOOMANZ EENA BAIBL TAIMZ MI AYBL FI PLEEZ JEHOAVA?

6. How Aybl, Noawa, an ada faytful peepl mi geh fi bee Jehoava fren?

⁶ Jehoava mi help peepl lee bit bai lee bit fi noa how dehn ku geh kloas tu hihn eevn doa dehn noh perfek. Adam ahn Eev sekant son, Aybl, da-mi di fers persn fi put fayt eena Jehoava afta weh mi hapm da di gyaadn da Eedn. Aybl mi aafa op wahn sakrifais tu Jehoava bikaaz ih mi lov ahn wahn lat, ih mi waahn mek hihn hapi, an ih mi waahn jraa kloas tu  ahn. Aybl da-mi wahn shepad, soh hihn mi gyada sohn yong sheep, kil dehn, an aafa dehn op tu Jehoava az wahn sakrifais. How Jehoava mi feel bowt dat? “Jehoava mi hapi wid Aybl, an ih mi aksep fi hihn sakrifais.” (Jen. 4:4) Jehoava feel di saym way bowt peepl weh lov ahn chros hihn, an ih aksep fi dehn sakrifais. Fi egzampl, hihn mi aksep Noawa sakrifais tu. (Jen. 8:​20, 21) Di fak dat Jehoava aksep dehndeh sakrifais shoa wi dat wi kud pleez Jehoava ahn bee ih fren. b

7. Weh wi laan fahn weh Aybraham mi wilin fi du?

⁷ Aybraham mi reeli ga schrang fayt. Jehoava mi aks ahn fi aafa op ih wan an onli son az wahn sakrifais tu hihn. Dis da-mi praabli di haadis ting fi mek Aybraham du. Yoo ku imajin how ih wuda hat ih haat fi du sohnting laik dat? Bot stilyet, hihn mi redi fi du weh Gaad aks ahn fi du. Rait wen Aybraham mi wahn kil ih son, Jehoava stap ahn. Aybraham egzampl teech wi sohnting impoatant bowt weh Jehoava mi wahn du eena di fyoocha. Jehoava mi wahn wilin fi aafa op ih wan an onli Son az wahn sakrifais. Jehoava lov peepl wahn lat fi chroo!—Jen. 22:​1-18.

8. Weh wi laan fahn di sakrifais dehn weh di Laa mi koman di Izrelaits fi du? (Levitikos 4:​27-29; 17:11)

⁸ Wen Jehoava mi gi di Izrelait dehn di Laa, hihn mi tel dehn dat dehn fi sakrifais animalz fi geh fergivnis fi dehn sinz. (Reed Levitikos 4:​27-29; 17:11.) Dehndeh sakrifais mi shoa dat hihn mi wahn giv wahn beta sakrifais laytaraan, wan weh wuda sayv peepl fahn sin. Gaad mi tel ih prafit dehn fi eksplayn moa deetaylz bowt di disendant weh hihn mi pramis. Dehn mi seh dat wahn speshal Son a Gaad mi wahn haftu sofa ahn ded. Peepl mi wahn kil ahn jos laik how di Izrelait dehn yoostu kil sheep weh dehn sakrifais. (Isa. 53:​1-12) Soh Jehoava mi pramis fi aafa op ih oan Son az wahn sakrifais fi sayv peepl fahn sin ahn det. How yoo feel fi noa dat Jehoava mi du dat fi yoo?

WEH JEEZAS MI DU FI SAYV WI?

9. Weh Jan di Baptis seh bowt Jeezas? (Heebrooz 9:22; 10:​1-4, 12)

⁹ Eena di yaa 29 C.E., Jan di Baptis mi si Jeezas ahn seh: “Luk, hihn da di Lam a Gaad weh wahn tek weh di sin a di werl!” (Jan 1:29) Dat tel wi dat Jeezas da di disendant weh Gaad mi prafesai bowt. Jeezas wuda bee di wan fi sakrifais ih laif. Fainali, da disendant mi kohn fi sayv peepl fahn sin fareva an eva.—Reed Heebrooz 9:22; 10:​1-4, 12.

10. How Jeezas mi shoa dat hihn “kohn fi sayv sinaz”?

¹⁰ Jeezas mi noa dat sin da di reel kaaz a aala wi prablemz, soh ih mi spen moas a ih taim di chrai help peepl weh mi-di sofa sayka sin, an ih mi invait dehn fi bee ih falowaz. Hihn mi yooz wahn iloschrayshan fi eksplayn wai. Hihn seh: “Peepl weh helti noh goh si wahn dakta, da onli peepl weh sik goh.” Den ih seh: “Ai kohn fi sayv sinaz, noh raichos peepl.” (Mach. 9:​12, 13) Fi egzampl, wen wahn laydi mi wash Jeezas fut wid tyaaz, hihn mi taak tu ahn eena wahn kain way an ih mi fergiv ih sinz. (Look 7:​37-50) An eevn doa Jeezas mi noa dat di Samaritan laydi bai  di wel mi-di liv wid wahn man weh da neva ih hozban, hihn mi stil teech ahn di chroot. (Jan 4:​7, 17-19, 25, 26) Di wers ting weh sin kaaz da det, bot Gaad mi eevn gi Jeezas di powa fi bring man, laydi, ahn pikni bak tu laif.—Mach. 11:5.

11. Wai sinaz mi feel komfatabl rong Jeezas?

¹¹ Wi ku andastan wai peepl weh du bad tingz mi feel komfatabl rong Jeezas. Hihn mi kain tu dehn an ih mi andastan how dehn feel, soh dehn neva frayd far ahn. (Look 15:​1, 2) Jeezas mi bles dehn ahn komen dehn fi dehn fayt. (Look 19:​1-10) Hihn mi shoa mersi jos laik how ih Pa shoa mersi. (Jan 14:9) Soh wen wi luk pahn Jeezas egzampl, wi ku si dat Jehoava lov peepl wahn lat ahn hihn waahn help aala wi fi win di fait gens sin. Di way how Jeezas chreet peepl mi mek dehn waahn chaynj dehn wayz ahn fala hihn.—Look 5:​27, 28.

12. Weh Jeezas mi tel ih falowaz bowt di way how ih mi wahn ded?

¹² Jeezas mi noa weh mi wahn hapm tu ahn. Moa dan wan taim, hihn mi tel ih falowaz dat sohnbadi mi wahn bichray ahn, an dat ih mi wahn ded pahn wahn stayk. (Mach. 17:22; 20:​18, 19) Hihn mi noa dat fi hihn sakrifais wuda tek weh di sin a di werl, laik weh Jan mi seh ahn laik weh di prafit dehn mi seh. Ahn Jeezas mi teech dat afta ih giv op ih laif, ih wuda “jraa aal kaina peepl”  tu ihself. (Jan 12:32) Soh if peepl aksep Jeezas az dehn Laad ahn fala fi hihn egzampl, dehn ku pleez Jehoava, ahn den dehn wuda fainali geh “set free fahn sin.” (Roam. 6:​14, 18, 22; Jan 8:32) Soh Jeezas mi wilin fi sakrifais ih laif eena da terabl way, an ih mi ga di korij fi du it tu.—Jan 10:​17, 18.

13. Weh aal Jeezas gaahn chroo bifoa ih ded, ahn weh dat teech wi bowt Jehoava? (Koment pahn di picha.)

¹³ Wan a Jeezas kloas fren mi bichray ahn. Den di Roaman soaljaz mi ares ahn, insolt ahn op, akyooz ahn fi sohnting weh ih neva du, beet ahn op, ahn nayl ahn pahn wahn stayk. Hihn mi stay faytful wail hihn mi-di goh chroo aal da payn. Bot Jehoava mi feel eevn moa payn wen ih mi si humoch ih Son mi-di sofa. Jehoava mi ga di powa fi stap weh mi-di hapm tu Jeezas. Jehoava lov ih Son soh moch, soh wai hihn mi alow ahn fi sofa ahn ded? Da bikaaz Jehoava lov wi. Jeezas mi seh: “Gaad lov di werl soh moch dat ih giv ih onli Son, soh dat evribadi weh shoa fayt eena ahn noh wahn geh dischrai bot wahn liv fareva.”—Jan 3:16.

14. Weh Jeezas sakrifais teech yu?

¹⁴ Wen Jeezas sakrifais ih laif fi wi, dat proov humoch Jehoava lov peepl. Ih proov humoch hihn lov yoo. Hihn mi giv op di bes weh ih gat ahn hihn mi wilin fi gaahn chroo wan a di moas paynful ekspeeryens weh enibadi kuda eva gaahn chroo fi sayv yu fahn sin ahn det. (1 Jan 4:​9, 10) Jehoava waahn help eech wan a wi fi bee ih fren eevn doa wee da sinaz, ahn hihn waahn geh rid a sin ahn det fareva.

15. Weh wi need fi du if wi waahn bee Jehoava fren ahn mek hihn fergiv wi sin dehn?

¹⁵ Jeezas sakrifais da wahn gif fahn Jehoava bikaaz da sakrifais mek it pasabl fi mek Jehoava fergiv wi sin dehn. Bot if yu waahn Gaad fergiv yu sin dehn, weh yoo need fi du? Jan di Baptis mi seh: “Ripent, kaaz di Kingdom a hevn deh ya,” ahn Jeezas mi seh sohnting simila. (Mach. 3:​1, 2; 4:17) Soh wi haftu ripent fahn wi sin dehn fi mek wi ku bee Jehoava fren ahn geh fergivnis fi wi sinz. Bot weh ih meenz fi ripent, ahn how dat wahn help wi fi ga wahn gud rilayshanship wid Jehoava eevn doa wi da sinaz? Di neks aatikl wahn ansa da kweschan.