Di apasl Paal mi rait di Kristyanz da Tesalonaika ahn tel dehn: “If enibadi noh obay weh wi di seh eena dis leta, den unu fi maak dehn.” (2 Tes. 3:14) Eena di paas, wi yoostu seh dat di eldaz rispansabl fi du dat. If sohnbadi eena di kangrigayshan neva obay weh di Skripchaz seh eevn doa di bradaz kongsl dehn ahn kip di waan dehn bowt it, den di eldaz mi wahn gi wahn taak fi waan di kangrigayshan. Afta da taak, di poblishaz neva fi spen taim wid da persn eksep da meetin an eena di minischri.

Wi need fi ajos wi andastandin a 2 Tesaloanyanz 3:14. Di kongsl fi maak sohnbadi da noh jos fi di eldaz, bot eech Kristyan eena di kangrigayshan ga da rispansabiliti. Soh di eldaz noh need fi gi wahn taak fi waan di kangrigayshan nohmoh. Wai wi disaid fi chaynj how wi andastan da skripcha? Mek wi luk pahn weh Paal mi-di taak bowt wen ih gi da kongsl tu di kangrigayshan.

Paal mi noatis dat som a di bradaz ahn sistaz eena di kangrigayshan neva obeedyant. Wen ih mi vizit dehn eena di paas, ih mi kongsl dehn ahn tel dehn: “If enibadi noh waahn werk, ih noh fi eet needa.” Bot som a dehn stil neva mi-di werk fi sopoat dehnself, eevn doa dehn kud. Ahn som a dehn mi-di intafyaa eena ada peepl bizniz. Soh how di bradaz ahn sistaz mi fi chreet dehn wan weh mi-di bihayv laik dat?—2 Tes. 3:​6, 10-12.

Paal mi seh: “Unu fi maak dehn.” Eena di Greek langwij, dis meenz fi kip wahn aiy owt fi mek shoar di persn noh inkorij yu fi du tingz weh bad. Paal mi-di gi dehnya inschrokshanz tu evribadi eena di kangrigayshan, noh jos di eldaz. (2 Tes. 1:1; 3:6) Soh if enibadi noatis dat wahn brada er sista noh di obay weh di Baibl seh, den dehn wuda disaid fi stap spen taim wid da persn.

Soh if wi maak sombadi, yu tink dis meenz dat wi fi chreet dehn laik sombadi weh geh tek owt fahn di kangrigayshan? No! Paal mi seh fi kantinyu chreet dehn laik bradaz ahn fi gi dehn kongsl. Soh wi kud spen taim wid dehn da meetin er wen wi deh eena di minischri. Bot wahn Kristyan wuda disaid fi noh spen taim wid dehn fi du ada tingz. Paal mi tel dehn di reezn wai wen ih seh: “Soh dat dehn ku feel shaym bowt dehnself.” Wen wi maak di persn ahn stap spen taim wid ahn, dis mait mek di persn feel shaym fi di way ih di bihayv ahn help ahn fi chaynj ih wayz.—2 Tes. 3:​14, 15.

How wahn Kristyan ku noa wen fi maak sohnbadi? Paal mi seh wi fi du dat if dehn noh obeedyant tu kongsl fahn di Baibl. Bot wat if sombadi disaid fi du sohnting difrent fahn weh fi wee kanshans alow wi fi du? Ahn wat if sombadi laik difrent tingz fahn weh wee laik? Ahn how if sombadi hert wi feelinz? Wi fi maak dehn? Paal neva mi-di seh dat. Insted, Paal mi-di seh wi onli fi maak sohnbadi weh chooz fi noh obay kongsl fahn Gaad Werd.

Soh if wi si wahn brada er sista di bee stobant ahn noh waahn lisn tu di kongsl fahn di Baibl, a wi wahn disaid fi stap spen taim wid ahn. Af koars, wi ku stil spen taim wid ahn da meetin er eena di minischri. Sins dis da wahn persnal disizhan, wi onli wahn diskos it wid wi famili weh liv eena di saym hows laik wee ahn weh da Witnisiz. Wen di persn staat lisn ahn chaynj ih wayz, den wi ku staat spen taim wid ahn agen.