1, 2. Wat da sohn chalenj weh Jashwa mi fays afta Moaziz mi ded?

JEHOAVA mi tel Jashwa: “Mi servant Moaziz ded. Now get op ahn kraas di Jaadn Riva, yoo an aala dehnya peepl, ahn unu goh eena di lan weh Ah di gi dehn.” (Josh. 1:1, 2) Dat da-mi wahn big chaynj fi Jashwa, sins hihn da-mi Moaziz atendant fi nayli 40 yaaz!

² Moaziz mi leed di Izrelait dehn fi wahn lang taim. Now dat Jashwa mi wahn tek di leed, ih kuda mi wanda if Gaad peepl mi wahn lisn tu ahn. (Deut. 34:8, 10-12) Wahn Baibl refrens buk mi koment pahn Joshua 1:1, 2, ahn seh dat wan a di haadis ahn moas daynjaros taim fi eni nayshan, eena hischri er eena fi wee taim, da wen dehn chaynj fahn wan leeda tu di neks.

3, 4. How Gaad mi bles Jashwa bikaaz ih mi chros ahn, ahn weh kweschan wi ku aks wiself?

³ Jashwa mi ga gud reezn fi wori. Bot hihn mi chros eena Jehoava ahn fala fi hihn inschrokshanz kwik-wan. (Josh. 1:9-11) Jehoava neva let ahn dong. Di Baibl seh dat Jehoava mi bles Jashwa an ih mi yooz wahn aynjel fi gaid Jashwa ahn di Izrelait dehn. Moa dan laikli, da aynjel da-mi di Werd, Gaad Son.—Ex. 23:20-23; Jan 1:1.

⁴ Wid Jehoava help, di Izrelait dehn mi ajos tu di chaynjiz weh  mi kohn wen Jashwa mi tek oava fahn Moaziz. Tingz di chaynj eena fi wee taim tu. Wi mait wanda: ‘Az Gaad aaganaizayshan kip di moov faawod, wi ga gud reezn fi chros how Jeezas di leed wi tudeh?ʼ (Reed Machyu 23:10, NW.) * Wel, mek wi si how Jehoava mi leed ih peepl eena di paas wen tingz mi chaynj fi dehn.

5. Weh mi hapm tu Jashwa wen ih mi reech kloas tu Jeriko? (Koment pahn di picha da di biginin a dis aatikl.)

⁵ Soon afta Izrel mi kraas di Jaadn Riva, sohnting schraynj mi hapm tu Jashwa. Wen ih mi-di reech kloas tu Jeriko, ih mi meet wahn man weh mi ga wahn soad eena ih han. Hihn neva noa da hoo, soh ih aks ahn: “Yu deh pahn fi wee said er pahn di said a wi enimi dehn?” Jashwa mi sopraiz wen di man mi tel ahn dat hihn da-mi di “cheef a Jehoava aami,” wahn aynjel weh mi redi fi difen Gaad peepl. (Reed Joshua 5:13-15) * Gaad mi yooz dis aynjel fi taak tu Jashwa, eevn doa eena sohn ada vers di Baibl seh dat da Jehoava mi-di taak. Ih luk laik Jehoava mi yooz dis aynjel fi taak tu ih peepl aal alang.—Ex. 3:2-4; Josh. 4:1, 15; 5:2, 9; Aks 7:38; Gal. 3:19.

6-8. (a) Wai Jashwa kuda mi tink dat som a di inschrokshanz fahn di aynjel neva mek sens? (b) How wi noa dat di inschrokshanz mi waiz ahn dat dehn mi kohn da di karek taim? (Koment pahn di futnoat.)

⁶ Di aynjel mi tel Jashwa egzakli weh ih mi haftu du fi kanka di siti a Jeriko. Bot som a di inschrokshan neva song laik wahn gud aidyaa wen ih mi fos hyaa dehn. Fi egzampl, di aynjel mi tel Jashwa fi serkomsaiz aala di soalja dehn. Dat meenz dehn mi wahn kyaahn fait fi wahn fyoo dayz. Jashwa praabli mi tink dat da-mi di rang taim fi serkomsaiz aala dehn man.—Gen. 34:24, 25; Josh. 5:2, 8.

⁷ Di soalja dehn praabli mi wanda how dehn mi wahn protek dehn famili if di enimi soalja dehn mi atak di kyamp. Bot sohnting mi hapm weh dehn neva ekspek! Di peepl fahn Jeriko neva atak di Izrelait dehn bikaaz dehn mi frayd. Di Baibl seh dat Jeriko “mi lak rait dong sayka di Izrelaits.” (Josh. 6:1) Dat mosi mi mek di Izrelait dehn chros Gaad dairekshan eevn moa, noh chroo?

⁸ Pahn tap a dat, di aynjel mi tel Jashwa dat di Izrelait dehn neva mi sopoas tu atak Jeriko. Insteda dat, dehn mi fi maach rong ahn rong di siti wans a day fi siks dayz ahn den sevn taimz pahn di sevent day. Som a di soalja dehn mosi mi seh tu dehnself: ‘Dis da loan ways a taim!ʼ Bot fi dehn Leeda, Jehoava, mi noa egzakli weh ih mi-di du! Wen di Izrelait dehn mi fala dehnya inschrokshanz, dehn neva eevn mi haftu fait di soalja dehn fahn Jeriko. Wen dehn mi si how dehn benifit wen dehn obay, dehn fayt mi geh schranga.—Josh. 6:2-5; Heeb. 11:30. *

9. Wai wi shuda fala eni inschrokshanz weh wi geh fahn Jehoava aaganaizayshan? Yooz di egzampl eena di paragraaf.

⁹ Weh wi ku laan fahn dis akonk? Wi noh mait andastan di reezn bihain aala di  inschrokshan dehn weh wi geh fahn Jehoava aaganaizayshan. Fi egzampl, maybi wi neva tink dat da-mi wahn gud aidyaa fi yooz ilekchranik divais fi persnal stodi, di minischri, er wi meetin dehn. Bot now wi praabli di si how wi benifit wen wi yooz dehn. Wen wi si di pazitiv rizolts weh dehn kaina chaynjiz bring, wi fayt an yooniti geh schranga.

10. Hoo reeli mi gaid di govanin badi wen dehn mi ga wahn impoatant meetin da Jeroosalem?

¹⁰ Bowt 13 yaaz afta Kaaneelyos mi geh baptaiz az wahn Kristyan, som a di Jooish Kristyanz stil mi tink dat ih nesiseri fi geh serkomsaiz. (Aks 15:1, 2) Wen wahn aagyument mi brok owt da Antiyak, di eldaz mi sen Paal fi goh aks di bradaz fahn di govanin badi da Jeroosalem bowt it. Bot hoo mi deh bihain aala dat? Paal seh dat hihn mi gaan op bikaaz a wahn “revilayshan.” Af koars, da Jeezas mi dairek mataz fi mek di govanin badi ku solv di prablem.—Gal. 2:1-3, NW.

11. (a) Weh som a di Jooish Kristyanz mi stil bileev bowt serkomsizhan? (b) How Paal mi shoa dat ih mi wilin fi fala di dairekshan fahn di eldaz da Jeroosalem? (Koment pahn di futnoat.)

¹¹ Chroo di govanin badi, Jeezas mi mek it klyaa dat Kristyanz hoo da neva Joo neva need fi geh serkomsaiz. (Aks 15:19, 20) Bot yaaz layta, lata Kristyanz stilyet mi-di serkomsaiz dehn son dehn. Den di eldaz mi hyaa wahn rooma weh mi-di spred dat Paal neva rispek Moaziz Laa, ahn soh dehn mi aks Paal fi du sohnting weh wuda shoa dat ih rispek di Laa. * (Aks 21:20-26) Dehn tel ahn fi kehr foa man da di templ ahn jain dehn eena dehn “washin serimoni” fi shoa di peepl dat hihn “kip di Laa stil.” Paal kuda mi seh: ‘Dis noh mek no sens! Wai unu aks mee fi du dis? Di wan dehn weh ga wahn prablem da di Jooish Kristyanz weh noh andastan di ishu bowt serkomsizhan.ʼ Bot Paal mi andastan dat di eldaz mi waahn aal Kristyanz bee yoonaitid, soh hihn mi hombl ihself ahn du weh di eldaz mi tel ahn fi du. Wi mait wanda doh, ‘Wai  Jeezas mi alow dis ishu fi kantinyu fi soch a lang taim wen fi hihn det mi bring wahn en tu di Laa weh Gaad mi gi Moaziz?ʼ—Kol. 2:13, 14.

12. Wai ih ku bee dat Krais mi alow taim fi paas bifoa ih mi setl di ishu a serkomsizhan?

¹² Fi som peepl, ih noh eezi fi ajos dehn tinkin wen dehn geh wahn nyoo andastandin. Som a di Jooish Kristyanz mi need sohn taim fi ajos dehn tinkin bowt di mata. (Jan 16:12) Fi wahn lang taim dehn mi tink dat serkomsizhan da-mi wahn sain a wahn speshal rilayshanship wid Gaad. (Gen. 17:9-12) Ahn bikaaz som a dehn mi frayd fi persikyooshan, dehn mi chrai haad fi fit een wid di res a Jooz eena di kamyooniti. (Gal. 6:12) Laytaraan, Jeezas mi giv moa dairekshan chroo di letaz weh Paal mi rait.—Roam. 2:28, 29; Gal. 3:23-25.

13. Weh ku help wi fi shoa wi apreeshiayshan fi Krais leedaship tudeh?

¹³ Krais da stil di Leeda a di kangrigayshan tudeh. Soh if yu noh andastan wahn chaynj weh di aaganaizayshan mek, tink bowt how Krais mi leed Gaad peepl eena di paas. Noh mata if da mi eena Jashwa dayz er eena di fos senchri, Jeezas aalwayz giv waiz dairekshan weh protek Gaad peepl, schrentn dehn fayt, ahn help dehn fi mantayn dehn yooniti.—Heeb. 13:8.

14-16. How di dairekshan wi get fahn di “faytful ahn diskreet slayv” proov dat Krais waahn wi stay spirichwali schrang?

¹⁴ Tudeh, di “faytful ahn diskreet slayv” gi wi di dairekshan weh wi need egzakli wen wi need it. (Mach. 24:45, NW) Dis shoa wi dat Jeezas kay bowt wi. Marc, wahn brada hoo ga foa pikni, seh: “Saytan di atak di famili dehn soh dat di kangrigayshan dehn wahn geh week. Now, wid aala di inkorijment fi kandok famili wership evri week, di mesij klyaa tu di famili hed dehn—protek yu famili!”

¹⁵ Wen wi andastan how Krais di leed wi, wi si dat hihn waahn help wi fi kip wi fayt schrang. Fi egzampl, wahn elda weh naym Patrick seh: “Fos, som a wi bradaz ahn sistaz mi feel diskorij wen wi mi staat meet eena smaal groop fi feel servis pahn di weeken.” Bot den ih mi seh dat dis araynjment shoa wi playn-wan dat Jeezas inchrestid eena eech wan a wi eena di kangrigayshan. Som a di bradaz ahn sistaz shai er noh goh owt pahn feel servis moch. Bot now dehn feel moa yoosful az paat a di groop, an dat if dehn noh dehdeh di groop wahn sofa. Dis inkorij dehn fi bee moa bizi eena di minischri, an ih schrentn dehn fayt.

¹⁶ Krais help wi fi kip wi foakos pahn di preechin werk tu, ahn dat da di moas impoatant werk weh di goh aan pahn di ert tudeh. (Reed Maak 13:10.) André, wahn brada weh laytli geh apointid az wahn elda, aalwayz chrai fala eni nyoo dairekshan weh kohn fahn Jehoava aaganaizayshan. Hihn seh: “Wen di aaganaizayshan kot dong pahn di amonk a peepl hoo di serv da di branch aafis dehn, ih rimain wi dat wi di liv eena wahn taim weh wi sopoas tu foakos pahn di preechin werk moa dan eniting els.”

17, 18. Wai wi fi foakos pahn di wayz wi benifit fahn di nyoo chaynjiz?

¹⁷ Di dairekshan weh wi geh fahn wi King, Jeezas Krais, wahn help wi now an eena di fyoocha. Chrai foakos moa pahn di benifits weh yu geh wen yu ajos tu nyoo chaynjiz. Joorin yu famili wership, yu ku diskos how yu famili benifit fahn di chaynjiz eena di meetin dehn ahn di minischri.

¹⁸ If wi memba dat wi benifit wen wi  fala di inschrokshanz fahn Jehoava aaganaizayshan ahn wi andastan di reezn bihain it, wi wahn fain it eeziya fi fala di dairekshan dehn ahn bee hapi. Fi egzampl, bikaaz wi noh di print az moch lichricha az bifoa, wi di sayv moni. Ahn bikaaz wi di yooz nyoo teknalaji, wi ku reech moa peepl wid di gud nyooz. If wi kud, mek wi chrai yooz di ilekchranik poblikayshanz ahn di aadyo ahn veedyo rikaadn dehn az moch az pasabl. Mek wi yooz di toolz weh di aaganaizayshan provaid eena wahn waiz way. Dis da jos wan way fi shoa dat wi sopoat Krais.

19. Wai wi shuda sopoat Krais dairekshan?

¹⁹ Wen wi sopoat Krais dairekshan, wi help schrentn wi bradaz dehn fayt ahn kanchribyoot tu yooniti. Laytli di saiz a di werlwaid Betel famili mi geh smaala. André taak bowt di bradaz weh yoostu bee Betelaits ahn seh: “Di gud atichood weh dehn shoa eena di way dehn ajos tu nyoo chaynjiz moov mi fi ga deepa chros eena wi Leeda, Krais, ahn fi rispek di bradaz weh fala di dairekshan fahn di aaganaizayshan. Dehn mek shoar dehn fain jai eena eni asainment soh dat dehn ku kip op wid Jehoava chariyat.”

20, 21. (a) Wai wi ku chros eena Krais, wi Leeda? (b) Weh kweschan wi wahn ansa eena di neks aatikl?

²⁰ Soon wi Leeda, Jeezas Krais, wahn “win owt” oava ih enimi dehn an ih wahn “du wandaful tingz.” (Rev. 6:2; Ps. 45:4) Eena di meentaim, ih di pripyaa wi fi laif eena di nyoo werl ahn fi di werk weh wi wahn du fi teech di peepl weh wahn geh rezorek ahn fi mek di ert wahn paradais.

²¹ Wi anointid King wahn leed wi intu di nyoo werl, az lang az wi chros ahn noh mata weh hapm. (Reed Psalm 46:1-3.) * Sohntaim, wi mait fain it haad fi aksep som a di chaynjiz weh wi fays, espeshali if dehn afek wi eena wayz weh wi noh ekspek. Wen dat hapm, how wi ku kip wi pees a main ahn ga ful chros eena Jehoava? Di neks aatikl wahn ansa da kweschan.