STEEVEN mi-di fays wahn groop a man weh mi-di persikyoot ahn. Di 71 a dehn da-mi joj eena di haiyis koat da Izrel, di Jooish Kongsl, soh dehn da-mi som a di moas powaful man eena Izrel. Hai Prees Kaiyafas mi bring dehn tugeda fi joj Steeven. Hihn da di sayhn wan weh mi tek di leed eena di koat weh mi sentens Jeezas tu det jos wahn fyoo monts bifoa. (Mach. 26:57, 59; Aks 6:8-12) Dehn mi bring owt aal kaina peepl fi tel lai pahn Steeven, bot den sohnting mi hapm weh mi shak dehn. Wen dehn mi-di wach pahn Steeven, “ih fays mi-di shain laik wahn aynjel.”—Aks 6:13-15.

How Steeven kuda mi stan op deh soh kool ahn kantentid eena da fraitnin sichuwayshan? Bifoa dehn mi jreg ahn fronta di Kongsl, hihn mi bizi eena ih asainment wid di help a Gaad hoali spirit. (Aks 6:3-7) Wen ih mi deh pahn chraiyal, da sayhn hoali spirit mi komfert ahn help ahn soh dat ih kuda memba di Skripchaz. (Jan 14:16) Eena Aks chapta 7, Steeven mi difen ihself wid korij, ahn di hoali spirit mi help ahn fi memba bowt 20 er moa pasij fahn di Heebroo Skripchaz. (Jan 14:26) Bot Steeven fayt mi geh eevn schranga wen ih mi si wahn vizhan a Jeezas di stan op pahn di rait han said a Gaad.—Aks 7:54-56, 59, 60.

Wan day wee mait fain wiself di fays peepl hoo chretn ahn persikyoot wi tu. (Jan 15:20) Wen wi stodi Gaad Werd regyula ahn stay bizi eena di minischri, wi alow Gaad spirit fi werk eena wi laif. Den wi wahn ku fain di schrent fi stan op tu persikyooshan ahn stilyet kip wi pees a main.—1 Peet. 4:12-14.