1, 2. (a) Wat da-mi di moas impoatant werk eena Jeezas laif, ahn wai? (b) Weh wi haftu du fi mek wi ga sokses az Gaad “paadna”?

JEEZAS KRAIS da-mi wahn kyaapenta ahn wahn teecha. (Maak 6:3; Jan 13:13) Hihn mi maasta dehn too chrayd. Az wahn kyaapenta, ih mi laan how fi yooz ih toolz fi mek gud tingz owta wud. Az wahn teecha, ih mi yooz ih nalij a di Skripchaz fi help aadineri peepl andastan di chroot fahn Gaad Werd. (Mach. 7:28; Look 24:32, 45) Wen Jeezas mi 30 yaaz oal, ih mi put ih kyaapenta toolz wan said bikaaz hihn mi noa dat ih mi moa impoatant fi bee wahn teecha. Hihn mi seh dat di werk fi preech di gud nyooz a di Kingdom a Gaad da-mi wan a di reezn wai Gaad mi sen ahn tu di ert. (Mach. 20:28; Look 3:23; 4:43) Jeezas laif mi foakos pan ih minischri, an ih mi waahn mek ada peepl jain ahn eena da werk tu.—Mach. 9:35-38.

² Wee noh mait bee no kyaapenta, bot fi shoar aala wi da ministaz weh teech di gud nyooz tu adaz. Dis werk soh impoatant dat eevn Gaad involv eena it. Az a mata a fak, di Baibl seh dat wee da “paadna” di werk tugeda wid Gaad. (1 Kor. 3:9; 2 Kor. 6:4) Wee agree wid weh di saamis mi seh: “Evriting eena [Jehoava] werd da di chroot.” (Ps. 119:159, 160) Dat da wai wi waahn mek shoar dat eena wi minischri wi “teech peepl di  chroo Werd a Gaad, eena di rait way.” (Reed 2 Timoti 2:15.) Soh wi aalwayz di chrai wi bes fi laan how fi yooz di Baibl beta. Dis da wi mayn tool fi teech peepl bowt Jehoava, Jeezas, ahn di Kingdom. Fi mek wi ga sokses eena wi minischri, Jehoava aaganaizayshan gi wi sohn moa toolz weh wi ku yooz, ahn wi haftu noa how fi yooz dehn gud tu. Dehnya toolz deh eena wi Teechin Toolbaks.

3. Weh shuda bee di foakos a wi minischri, ahn how Aks 13:48 help wi fi du dat?

³ Yu mait wanda wai wi kaal it wahn Teechin Toolbaks ahn noh wahn Preechin Toolbaks. Fi “preech” meenz fi spred wahn mesij. Bot fi “teech” goh wahn step ferda. Ih meenz fi eksplayn da mesij eena wahn way weh toch wahn persn main ahn haat soh dat ih aplai weh ih laan eena ih laif. Joorin di taim weh wi ga lef fi preech, mek wi foakos pahn staat Baibl stodiz ahn teech peepl di chroot. Dat meenz wi haftu werk haad fi fain peepl weh ga “di rait haat kandishan fi evalastin laif” ahn help dehn fi staat serv Jehoava.—Reed Aks 13:44-47, 48 fahn di futnoat. *

4. How wi ku noa hoo ga “di rait haat kandishan fi evalastin laif,” ahn how wi ku fain dehn?

⁴ How wi ku noa hoo ga “di rait haat kandishan fi evalastin laif”? Jos laik eena di fos senchri, di onli way fi fain dehn da fi goh owt goh preech. Soh wi haftu du weh Jeezas tel wi fi du: “Wen unu goh eena wahn tong er wahn vilij, luk fi wahn gud persn weh wahn welkom unu.” (Mach. 10:11) Wi noh ekspek peepl weh noh hombl, weh noh kay bowt spirichwal tingz, er weh noh ga wahn reel inchres fi rispan tu di gud nyooz eena wahn pazitiv way. Wi di luk fi aanis ahn hombl peepl, weh hongri fi di chroot. Wi ku kompyaa dis saach tu weh Jeezas praabli mi du az wahn kyaapenta wen ih mi-di luk fi di rait pees a wud fi mek wahn pees a fernicha, wahn doa, wahn yoak, er eniting els. Wans ih mi fain di rait pees a wud, ih wuda mi tek owt ih toolz ahn yooz ih skilz fi mek wateva ih mi-di plan fi werk pan. Wee haftu du di sayhn ting. Wi haftu saach fi peepl ahn den yooz wi toolz ahn skilz fi teech dehn fi bee wan a Krais disaipl.—Mach. 28:19, 20.

5. Weh wi need fi noa bowt di toolz eena wi Teechin Toolbaks? Yooz di egzampl eena di paragraaf. (Koment pahn di picha dehn da di biginin a dis aatikl.)

⁵ Eena eni toolbaks, eech tool ga wahn spesifik perpos. Fi egzampl, kansida di toolz weh Jeezas praabli mi yooz az wahn kyaapenta. * Hihn wuda mi need toolz fi kot, fi jril, fi kaav, ahn fi jain di pees dehn tugeda. Jos laik dat, eech tool eena wi Teechin Toolbaks ga wahn spesifik perpos. Soh mek wi luk eena wi toolbaks ahn laan how wi ku yooz dehnya impoatant toolz weh wi gat.

6, 7. (a) How yoo yooz di kantak kyaad? (b) Wai wi yooz di meetin invitayshan dehn?

⁶ Kantak Kyaad. Dehnya kyaad smaal, bot dehn stil werk gud fi tel peepl da hoo wee ahn fi dairek dehn tu wi websait. Wen dehn goh da wi websait dehn ku laan moa bowt wi ahn eevn rikwes wahn Baibl stodi. Soh faar, moa dan 400,000 peepl don rikwes wahn Baibl stodi pahn jw.org, ahn honjridz moa rikwes kom een evri day! Yu ku kip wahn fyoo a di kantak  kyaad dehn wid yu an yooz dehn wen yu meet peepl az yu goh bowt yu day.

⁷ Invitayshan. Di front a di invitayshan tu wi meetin seh: “Wi invait yu fi stodi di Baibl wid Jehoava Witnisiz.” Den pahn di bak a di invitayshan ih seh yu ku du dat “da wi poblik meetin dehn” “er wid yu oan persnal Baibl stodi.” Soh dis invitayshan tel peepl da hoo wee an ih invait evribadi hoo ‘noa seh dehn need Gaadʼ fi stodi di Baibl wid wi. (Mach. 5:3) Af koars, peepl welkom fi kohn da wi meetin dehn weda dehn aksep wahn Baibl stodi er nat. Bot if dehn kohn, dehn wahn si humoch dehn ku laan fahn di Baibl.

8. Wai ih impoatant fi mek peepl kohn tu at lees wan a wi meetin dehn? Yooz di egzampl eena di paragraaf.

⁸ Ih veri impoatant dat wi kip di invait peepl fi kohn tu at lees wan a wi meetin dehn. Wai? Dehn wahn si dat Jehoava Witnisiz teech di chroot fahn di Baibl ahn help peepl fi geh fi noa Gaad. Dehn wahn si wahn big difrens bitween wee ahn di faals rilijan dehn. (Isa. 65:13) Ray ahn Linda, wahn marid kopl fahn di U.S., mi laan dis yaaz agoa. Dehn mi disaid fi staat goh da cherch. Dehn mi bileev eena Gaad ahn dehn mi waahn geh fi noa hihn beta. Soh dehn mi staat tu goh da aala di cherch dehn rong weh dehn mi liv wan bai wan. Bot lata cherch ahn rilijan mi deh eena da ayrya. Fahn di staat, di kopl mi disaid dat dehn mi wahn haftu fain too tingz eena eni cherch weh dehn wuda jain. Fos, dehn wuda haftu laan sohnting joorin di cherch servis. Sekant, di membaz a di cherch wuda haftu jres laik peepl hoo klaym fi serv Gaad. Sohn yaaz paas ahn evri cherch dehn mi aten mi disapoint dehn. Dehn neva laan notn, ahn di peepl dehn neva shoa no kaina rispek tu Gaad eena di way dehn jres. Afta dehn mi waak owta di laas cherch pahn dehn lis, Linda mi gaahn da werk ahn Ray mi gaahn hoam. Pan ih way hoam hihn mi jraiv paas wahn Kingdom Haal an ih mi seh tu ihself, ‘Wai Ah noh goh een ahn si weh aal hapm deh?ʼ Af koars, dat da-mi di bes ekspeeryens owta aala dehn! Evribadi da di Kingdom Haal mi frenli ahn kain ahn dehn mi jres op nais. Ray mi sidong da di front roa an ih mi lov weh ih mi laan! Dis rimain wi a how di apasl Paal mi diskraib wahn persn weh kohn da wan a wi Kristyan meetin fi di fos taim ahn seh: “Gaad deh wid unu fi chroo!” (1 Kor. 14:23-25) Afta dat, Ray mi aten evri Sondeh meetin. Den ih staat goh da evri meetin joorin di week tu. Linda mi staat goh da meetin tu, an eevn doa dehn mi don eena dehn 70ʼs, dehn mi aksep wahn Baibl stodi ahn geh baptaiz.

9, 10. (a) Wai di chrak dehn soh eezi fi yooz? (b) Eksplayn how fi yooz di chrak Weh Da di Kingdom a Gaad?

⁹ Chrak. Wi gat ayt chrak eena wi toolbaks weh mek it eezi fi staat op wahn kanvasayshan. Di fos chrak mi geh rilees eena 2013. Sins den, bowt faiv bilyan a dehn don geh print! Aala dehnya chrak set op di sayhn way. Soh wans yu laan how fi yooz wan, yu ku yooz aala dehn! How yu ku yooz wahn chrak fi staat wahn kanvasayshan?

¹⁰ Sopoaz yu waahn aafa di chrak Weh Da di Kingdom a Gaad? Shoa di persn di kweschan pahn di front an aks ahn: “Yoo eva wanda wat da Gaad Kingdom? Yu wuda seh . . . ?” Den aks ahn wich wan a di chree ansa pahn di front ih wuda pik. Yu noh haftu tel ahn if ih ansa rait er  rang, jos oapm di chrak tu di sekshan “Di Baibl Ansa Seh:” ahn reed di skripcha dehn da Daniel 2:44 an Isaiah 9:6. If ih pasabl, kantinyu di kanvasayshan. Den finish op wid di sekshan “Tink Bowt Dis” ahn aks ahn di kweschan “Weh laif wahn bee laik wen di Kingdom a Gaad di rool?” Yu ku ansa da kweschan di neks taim. Wen yu goh bak agen, yu ku yooz lesn 7 a di broashoar Gud Nyooz Fahn Gaad! Dat da wan a di toolz weh wi yooz fi staat Baibl stodiz.

11. Weh wi magazeen dehn dizain fi du, ahn weh wi shuda noa bowt dehn?

¹¹ Magazeen. Di Wachtowa an Awake! geh poblish ahn chranslayt moa dan eni ada magazeen eena di hoal werl! Lata peepl fahn aal difrent konchri reed dehn. Soh di sobjek pahn di kova a di magazeen dehn dizain fi inchres peepl aal oava di werl. Wi shuda yooz dehnya magazeen fi help peepl foakos pahn weh reeli impoatant eena laif tudeh. Bot fi mek gud yoos a dehnya magazeen, wi haftu noa hoo dehn dizain fa.

12. (a) Hoo di Awake! dizain fa, ahn wat da ih perpos? (b) Shayr eni gud ekspeeryens yoo mi ga wid dis tool laytli.

¹² Di Awake! dizain fi peepl hoo noh noa wahn lat bowt di Baibl. Dehn noh mait noa notn bowt Kristyan teechinz, chros rilijan, er eevn feel laik di Baibl ku help dehn eena dehn persnal laif. Wan a di mayn perpos a di Awake! magazeen da fi proov tu di reeda dat Gaad egzis. (Roam. 1:20; Heeb. 11:6) Ih aalso help di reeda fi ga fayt dat di Baibl “da Gaad mesij” fi chroo. (1 Tes. 2:13) Di chree kova sobjek fi 2018 da: “The Way of Happiness,” “12 Secrets of Successful Families,” ahn “Help for Those Who Grieve.”

13. (a) Hoo di poblik kapi a Di Wachtowa dizain fa? (b) Shayr eni gud ekspeeryens yoo mi ga wid dis tool laytli.

¹³ Di poblik kapi a Di Wachtowa dizain fi eksplayn Baibl teechinz tu peepl hoo rispek Gaad ahn di Baibl. Eevn doa dehn don ga sohn nalij a di Baibl, dehn noh mait andastan weh ih reeli teech. (Roam. 10:2; 1 Tim. 2:3, 4) Di chree kova sobjek fi 2018 ansa dehnya kweschan: “Is the Bible Still Relevant Today?,” “What Does the Future Hold?,” ahn “Does God Care About You?”

14. (a) Wat da di perpos a di foa veedyo eena wi Teechin Toolbaks? (b) Shayr eni gud ekspeeryens yoo mi ga di shoa dehnya veedyo.

¹⁴ Veedyo. Eena Jeezas taim, wahn kyaapenta mi onli ga han toolz. Bot nowadayz di kyaapenta dehn ga powa toolz tu weh dehn ku yooz fi kot, jril, nayl, ahn soh. Jos laik dat, nowadayz wi noh jos ga di poblikayshan dehn weh wi print. Wi ga sohn byootiful veedyo fi shoa peepl, ahn foa a dehn deh eena wi Teechin Toolbaks: Wai Stodi di Baibl?, Weh Aal Hapm Pahn Wahn Baibl Stodi?, Weh Aal Hapm da Wahn Kingdom Haal?, ahn Jehoava Witnisiz—Da Hoo Wee? Som a di veedyo dehn ron les dan too minits, soh dehn werk gud fi di fos kaal. Di langa wan dehn ku werk gud fi yooz pahn wi ritern vizit dehn er wid peepl hoo ga moa taim. Dehnya wandaful toolz ku moov peepl fi stodi di Baibl ahn kohn da wi meetin dehn.

15. How wi veedyo dehn moov peepl wen dehn wach dehn eena dehn oan langwij? Yooz di egzampl dehn fahn di paragraaf.

¹⁵ Fi egzampl, wen wahn sista mi meet wahn uman fahn Micronesia hoo mi taak Yapeez, wi sista mi shoa ahn di veedyo  Wai Stodi di Baibl? eena fi shee langwij. Wen di veedyo mi staat, di uman mi seh: “Dis da mai langwij. Ah kyaahn bileev it! Ai ku tel fahn fi hihn aksent dat hihn kohn fahn di sayhn ailan laik mee. Hihn taak mai langwij!” Afta dat, shee mi seh ih mi wahn reed ahn wach evriting weh avaylabl eena fi shee langwij pahn jw.org. (Kompyaa Aks 2:8, 11.) Kansida wahn nada ekspeeryens. Wahn sista fahn di United States ga wahn nevyoo weh liv eena wahn nada paat a di werl. Shee mi sen ahn wahn link fi di sayhn veedyo eena fi hihn langwij. Afta hihn mi wach it, ih mi e-mayl ahn bak ahn seh: “Di paat weh seh wahn eevl powa di kanchroal di werl mi kech mi atenshan. Ah sain op fi wahn Baibl stodi.” Jos imajin, hihn liv eena wahn konchri weh wi werk deh anda ban!

16. Eksplayn di spesifik perpos a eech broashoar: (a) Lisn tu Gaad ahn Liv Fareva. (b) Gud Nyooz Fahn Gaad! (c) Hoo Di Du di Wil a Jehoava Tudeh?

¹⁶ Broashoar. How yu ku teech di chroot tu sohnbadi if ih kyaahn reed gud er ih noh ga non a wi lichricha eena ih langwij? Wi ku yooz di broashoar Lisn tu Gaad ahn Liv Fareva. * Wahn gud tool fi staat wahn Baibl stodi da di broashoar Gud Nyooz Fahn Gaad! Yu ku shoa sohnbadi di 14 lesn weh lis aaf da bak a di broashoar ahn mek ih tel yu wich wan ih fain di moas inchrestin. Den yu ku staat wahn stodi fahn di lesn weh ih pik. Di terd broashoar eena wi toolbaks da Hoo Di Du di Wil a Jehoava Tudeh? Yu ku yooz dis broashoar fi teech yu Baibl styoodent dehn bowt wi aaganaizayshan. Yoo eva chrai dat? Fi laan moa bowt how yu ku yooz dis broashoar pahn eech Baibl stodi, si di Maach 2017 ishu a Wi Kristyan Laif ahn Minischri Meetin Werkbuk.

17. (a) Wat da di spesifik perpos a eech stodi buk? (b) Weh enibadi weh geh baptaiz haftu du, ahn wai?

¹⁷ Buk. Wans yu staat wahn stodi eena wan a di broashoar dehn, yu ku swich tu di buk Weh di Baibl Ku Teech Wi? enitaim. Dis tool wahn help peepl fi laan moa bowt baysik Baibl teechinz. Wen di styoodent finish dis buk, if ih di mek gud spirichwal proagres, kantinyu di stodi eena di buk How fi Stay Eena di Lov a Gaad. Dis tool wahn teech di Baibl styoodent how fi aplai Baibl prinsipl eena evriday laif. Bot yu haftu memba, eevn afta dehn geh baptaiz, evribadi fi kantinyu dehn stodi til dehn finish di too a dehnya buk. Dis wahn help mek di chroot bee di fongdayshan a dehn laif.—Reed Koloashanz 2:6, 7.

18. (a) Weh 1 Timoti 4:16 inkorij wi fi du az teechaz a di chroot, ahn wat wahn bee di rizolt? (b) Wat da wi goal wen wi yooz wi Teechin Toolbaks?

¹⁸ Az Jehoava Witnisiz, wi ga di rispansabiliti fi teech peepl “di chroo mesij” weh ku leed dehn tu evalastin laif. (Kol. 1:5; reed 1 Timoti 4:16.) Fi help wi du dat, wi ga wahn Teechin Toolbaks weh ful a aala di toolz weh wi need. (Si di “ Teechin Toolbaks.”) Mek wi yooz dehnya toolz di bes way wi kud. Ih op tu eech poblisha fi disaid wich tool ih wahn yooz ahn wen ih wahn yooz it. Bot memba dat wi goal da noh jos fi plays lichricha, er fi lef lichricha wid peepl hoo noh inchrestid eena wi mesij. Wi goal da fi fain peepl weh aanis, hombl, ahn weh reeli waahn noa Gaad. Wen wi fain peepl hoo ga “di rait haat kandishan fi evalastin laif,” wi waahn teech dehn fi bee Krais disaipl.—Aks 13:48; Mach. 28:19, 20.