Paat a di Treaty of Versailles da-mi dat dehn mi wahn set op wahn nyoo aaganaizayshan weh dehn mi kaal di League of Nations. Di goal a dis aaganaizayshan da-mi “fi inkorij aala di nayshanz fi get lang wid eech ada ahn fi ga pees ahn sikyoariti aal oava di werl.” Wahn lata di rilijan dehn weh da paat a Babilan di Grayt mi sopoat di League of Nations. The Federal Council of the Churches of Christ in America mi seh dat da aaganaizayshan “da wahn politikal aaganaizayshan weh reprizent Gaad Kingdom pahn ert.” Dis kongsl mi shoa dehn sopoat fi di League of Nations wen dehn sen peepl fi reprizent dehn da di Paris Peace Conference. Wan a dehndeh persn weh dehn mi sen fi reprizent dehn mi seh dat di Paris Peace Conference da-mi di biginin a wahn nyoo taim peeryad eena werl hischri.

Wahn nyoo taim peeryad mi staat fi chroo, bot di man dehn weh mi involv eena di Paris Peace Conference neva ga notn fi du wid it. Eena 1919, wahn nyoo taim peeryad fi di preechin werk mi staat wen Jehoava mi gi ih peepl di schrent fi preech moa dan dehn mi eva du eena di paas. Bot bifoa dis kuda mi hapm, di Baibl Styoodents mi need fi mek wahn big chaynj.

Pahn Satideh, Janiweri 4, 1919, dehn mi skejul di anwal ilekshan fi disaid hoo wahn bee di dairektaz a di Watch Tower Bible and Tract Society. Rong dis taim, Joseph F. Rutherford, hoo da-mi di persn weh mi-di tek di leed monks Jehoava peepl, mi deh da prizn da Atlanta, Georgia, U.S.A., lang wid sevn ada bradaz. Eevn doa dehnya bradaz neva dehdeh fi di ilekshan, di res a bradaz mi haftu disaid weda er nat dehn mi wahn voat fi di saym dairektaz weh mi eena prizn, er if dehn wuda mi voat fi nyoo dairektaz. Dehn mi haftu disaid hoo mi wahn tek di leed eena di aaganaizayshan.

Wail Brada Rutherford mi deh eena prizn, hihn mi-di wori bowt weh mi wahn hapm tu di aaganaizayshan. Hihn mi noa dat som a di bradaz mi feel laik di bes ting fi du da-mi fi voat fi wahn  nyoo prezident. Dat da wai hihn mi rait wahn leta tu di bradaz ahn rekomen Evander J. Coward fi bee di nyoo prezident. Brada Rutherford mi diskraib Brada Coward az sombadi weh “kaam,” “waiz,” ahn “laayal tu di Laad.” Bot wahn lata di bradaz mi kom op wid wahn difrent solooshan. Dehn mi prifaa fi hoal aaf di ilekshan fi siks monts. Di laayaz weh mi-di difen di bradaz weh mi deh eena prizn mi agree fi chaynj di dayt a di ilekshan. Wen dehn mi-di diskos weh fi du, som a di bradaz mi geh beks.

Den, akaadn tu Richard H. Barber, sohnting mi hapm weh mi kaam tingz dong. Wan a di bradaz weh mi dehdeh fi di ilekshan taak op ahn seh: “Ai da noh wahn laaya, bot Ai noa weh ih meenz fi bee laayal. Gaad koman wi fi bee laayal. Di bes way wee ku shoa dat wi laayal tu Gaad da fi ga di ilekshan ahn voat fi Brada Rutherford az prezident agen.”—Ps. 18:25.

Brada A. H. Macmillan, weh mi aalso deh eena prizn, mi memba dat di neks day Brada Rutherford mi nak pan ih sel waal ahn tel ahn: “Push owt yu han.” Den Brada Rutherford mi put wahn leta wid wahn shaat mesij eena ih han. Wen Brada Macmillan mi si di shaat mesij, rait away hihn mi noa weh ih mi meen. Di mesij mi reed: “RUTHERFORD WISE VAN BARBER ANDERSON BULLY AHN SPILL PREZIDENT FOS CHREE AAFISAZ LOV TU AAL.” Dis mi meen dat di bradaz mi voat fi aala di dairektaz agen, an dat Joseph Rutherford ahn William Van Amburgh mi wahn kantinyu fi serv az aafisaz. Soh, Brada Rutherford mi wahn kantinyu fi serv az prezident.

Wail di ayt bradaz mi eena prizn, di Baibl Styoodents mi aks peepl fi sain wahn petishan fi aks di govament fi rilees di bradaz. Dehnya brayv bradaz ahn sistaz mi kalek moa dan 700,000 signicha. Pahn Wenzdeh, Maach 26, 1919, bifoa di bradaz kuda mi eevn sen een di petishan, Brada Rutherford ahn di ada bradaz mi geh rilees.

Eena wahn speech weh Brada Rutherford mi gi tu di bradaz weh mi welkom ahn hoam, ih mi seh: “Ai kanvins dat dis ekspeeryens weh aala wi gaahn chroo da fi pripyaa wi fi moa tof taimz. . . . Unu fait da neva fi jos get unu bradaz owta prizn. Dat da neva di reel perpos a aala dis werk. . . . Di fait weh unu mi fait da-mi fi bring gloari tu Jehoava, an aala unu weh mi fait geh wahn wandaful blesin.”

Di difrent tingz weh mi hapm wid di chraiyal a wi bradaz da-mi proof dat Jehoava mi-di dairek mataz. Pahn May 14, 1919, di koat a apeel mi seh dat di bradaz eena dis kays neva geh di fyaa chraiyal weh dehn mi dizerv, ahn bikaaz a dat di koat mi jrap aal chaajiz. Dis mi werk owt gud fi di bradaz. Wai wi seh dat? Wel, bikaaz di bradaz mi geh chaaj fi sohn seeryos kraim. If di koat mi jos lesn dehn sentens er sen dehn aaf wid wahn waanin, dehnya chaaj kuda mi stay pahn dehn rekad. Bot sins dehn mi jrap di chaajiz ahn dehn neva chaaj dehn fi eniting els, dehn rekad mi stay kleen. Bikaaz a dat, Joj Rutherford mi kantinyu fi  bee wahn laaya an ih mi aybl fi kantinyu difen Jehoava peepl eena di Sopreem Koat a di United States. Dis da sohnting weh hihn mi du wahn lat afta ih mi geh rilees fahn prizn.

Brada Macmillan mi seh dat dehn neva wahn sidong rong di du notn ahn wayt fi di Laad kehr dehn da hevn. Dehn mi noa dat dehn mi need fi du sohnting fi fain owt wat da-mi di Laad wil.

Bot di bradaz da di hedkwaataz mi kyaahn jos kantinyu fi du di werk weh dehn mi-di du fi yaaz. Wai nat? Bikaaz wen dehn mi deh da prizn, aala di printin playt dehn weh dehn doz yooz fi print lichricha mi geh dischrai. Dis mi haad, ahn som a di bradaz mi wanda if di preechin werk mi don.

Yu tink enibadi mi stil inchrestid eena di Kingdom mesij weh di Baibl Styoodents mi-di preech? Wel, fi fain owt, Brada Rutherford mi disaid fi giv wahn taak. Ahn dehn mi invait di poblik. Brada Macmillan mi seh dat if nobadi mi kohn da da meetin, den dehn mi wahn noa dat di preechin werk mi don.

Soh pahn Sondeh, May 4, 1919, eevn doa Brada Rutherford mi sik reeli bad, hihn mi gi di taak “The Hope for Distressed Humanity” da Los Angeles, California. Bowt 3,500 peepl mi kohn hyaa di taak, ahn dehn mi haftu ton weh honjridz moa bikaaz dehn neva ga nof spays. Di neks day, 1,500 peepl mi aten. Dis mi ansa di kweschan weh di bradaz mi ga—peepl mi stil inchrestid eena di mesij weh dehn mi-di preech!

Weh di bradaz mi du afta dat afek di way Jehoava Witnisiz du dehn preechin werk dong tu tudeh.

Di Aagas 1, 1919 Watch Tower, mi anonks dat eena di erli paat a Septemba, dehn mi wahn ga wahn kanvenshan da Cedar Point, Ohio. Clarence B. Beaty, wahn yong Baibl Styoodent fahn  Missouri, mi seh: “Evribadi mi feel laik dehn haftu dehdeh.” Moa dan 6,000 bradaz ahn sistaz mi gaahn; dat da faar moa dan weh dehn mi ekspek. Sohnting weh mi mek da kanvenshan eevn moa eksaitin da-mi di amonk a peepl weh mi geh baptaiz. Oava 200 peepl mi geh baptaiz eena Lake Erie.

Pahn Septemba 5, 1919, di fif day a di kanvenshan, eena Brada Rutherford taak weh mi naym, “Address to Co-laborers,” ih mi anonks di rilees a wahn nyoo magazeen weh naym The Golden Age. * Hihn mi seh dat di magazeen wahn diskos som a di impoatant tingz weh afek peepl aal rong di werl, ahn dat ih mi wahn yooz di Skripchaz fi eksplayn wai dehnya tingz mi-di hapm.

Di bradaz mi inkorij aala di Baibl Styoodents fi yooz dis nyoo poblikayshan fi preech. Wahn leta weh mi eksplayn how di werk mi fi geh aaganaiz mi seh: “Eech baptaiz poblisha shuda memba dat da wahn grayt privilij fi serv Jehoava Gaad. Soh hoal ahn tait tu di apachooniti now, ahn du az moch az pasabl fi preech tu di werl.” Wahn lata peepl mi aksep dis invitayshan fi preech! Bai Disemba, di bradaz mi geh moa dan 50,000 rikwes fi di nyoo magazeen.

Bai di en a 1919, Jehoava peepl mi prapali aaganaiz agen, ahn dehn mi redi fi preech. Pahn tap a dat, wahn lata impoatant prafesi bowt di laas dayz mi geh fulfil. Laik weh Malachi 3:1-4 taak bowt, Gaad peepl mi geh tes ahn dehn mi paas chroo di faiya ahn kom owt kleen. Dehn mi geh rilees fahn di simbolik chaynz a ‘Babilan di Grayt,ʼ ahn Jeezas mi apoint “di faytful ahn diskreet slayv.” * (Rev. 18:2, 4; Mach. 24:45, NW) Now di Baibl Styoodents mi redi fi di werk weh Jehoava mi ga fi mek dehn du.