DI WEDAMAN noatis dat wahn daynjaros staam di divelop. Hihn si dat di staam di hed tuwaadz wahn ayrya wehpaat lata peepl liv. Bikaaz hihn kay bowt di peepl dehn sayfti, hihn du evriting weh hihn kud fi waan dehn bifoa ih tu layt.

Sayhn way, tudeh, Jehoava di waan evribadi weh liv pahn ert bowt wahn “staam” weh moa daynjaros dan eniting dehn mait eva hyaa bowt eena wahn weda ripoat. How hihn di du dis? Ahn how wi noa dat hihn di giv peepl nof taim fi rispan tu di waanin? Fi mek wi ansa dehnya kweschanz, mek wi luk pahn som a di waanin dehn weh Jehoava mi giv peepl eena di paas.

Eena Baibl taimz, Jehoava mi waan peepl bowt lata difrent “staam,” er jojment, weh hihn mi wahn bring gens peepl weh noh obay ahn. (Prov. 10:25; Jer. 30:23) Hihn mi aalwayz waan di peepl way heda taim ahn tel dehn weh dehn wuda need fi du fi obay hihn ahn geh sayv. (2 Ki. 17:12-15; Neh. 9:29, 30) Fi help peepl mek di prapa chaynjiz, hihn mi aafn yooz ih laayal servants pahn ert fi giv waanin bowt ih jojment dehn ahn fi help dehn andastan dat dehn need fi mek chaynjiz rait away.—Amos 3:7.

Noawa da-mi wan a dehn servant weh mi laayal tu Jehoava. Fi yaaz, Noawa neva frayd fi waan imoaral ahn vailent peepl weh mi liv rong fi hihn taim bowt wahn Flod weh mi wahn kohn pahn di hoal ert. (Gen. 6:9-13, 17) Di Baibl seh dat Noawa mi aalso “preech tu dehn dat dehn fi liv rait eena Gaad sait.”—2 Peet. 2:5.

Eevn doa Noawa mi-di waan di peepl, dehn mi stil ignoar di mesij fahn Gaad. Dehn neva ga no kaina fayt. Ahn sayka dat, aala dehn mi ded wen di Flod mi “kohn ahn wash aala dehn weh.” (Mach. 24:39; Heeb. 11:7) Wen di Flod mi kohn, dehn kudn klaym seh dat Gaad neva waan dehn.

Dehn ga ada taimz wen Jehoava mi waan di peepl jos wahn lee bit bifoa di “staam” a fi hihn jojment mi staat. Stilyet, hihn mi mek shoar dat di peepl geh nof taim fi chaynj dehn wayz. Fi egzampl, joorin di Ten Playg weh Jehoava mi bring pahn Eejip, hihn mi aalwayz waan dehn heda taim. Wan egzampl da-mi wen Jehoava mi sen Moaziz an Ayron fi waan Fayro ahn fi hihn servants bowt di sevent playg, weh da-mi wahn reeli bad haylstaam. Sins di haylstaam mi wahn staat di neks day, yu tink Gaad mi gi dehn nof taim fi fain shelta an eskayp fahn di staam? Di Baibl tel wi: “Aala Fayro servants weh mi lisn tu Jehoava werd mi kwik fi bring dehn servants ahn dehn animalz eena di hows, bot aal hoo neva bileev Jehoava werd mi lef dehn servants ahn dehn animalz owt eena di feel.” (Ex. 9:18-21) Soh ih klyaa fi si dat Jehoava mi gi dehn inof taim. Ahn aala dehn wan weh mi obay di waanin neva sofa az moch az di res.

Jos bifoa di tent playg, Jehoava mi waan Fayro ahn fi hihn servant dehn tu. Bot, sayka weh dehn mi fool fool, dehn neva aksep di waanin weh Jehoava mi gi dehn. (Ex. 4:22, 23) Soh bikaaz a dat, aala dehn fosbaan son mi ded. Dat mi reeli sad! (Ex. 11:4-10; 12:29) Yu tink dehn kuda mi lisn an obay di waanin bifoa ih mi tu layt? Yes, af koars! Bifoa di tent playg mi kohn pahn Eejip, Moaziz mi waan di Izrelaits an ih mi tel dehn weh fi du soh dat dehn kuda mi sayv dehn famili. (Ex. 12:21-28) Bikaaz dehn mi obay di waanin, bowt chree  milyan peepl er moa mi lef Eejip. Dat inklood Izrelaits ahn “wahn miks kompani” a peepl weh da neva Izrelait ahn sohn Eejipshan tu.​—Ex. 12:38; ftn.

Dehnya egzampl shoa wi dat Jehoava aalwayz mi mek shoar dat peepl ga nof taim fi obay fi hihn waanin dehn. (Deut. 32:4) Wai Gaad aalwayz giv inof taim? Di apasl Peeta mi eksplayn dat Jehoava ‘noh waahn non a wi geh dischrai, bot ih waahn aala wi ton fahn wi sin dehn.ʼ (2 Peet. 3:9) Yes, Gaad mi kay bowt di peepl. Hihn mi waahn dehn ton weh fahn dehn sinz an mek di chaynjiz weh dehn mi need fi mek bifoa hihn bring ih jojment pahn dehn.​—Isa. 48:17, 18; Roam. 2:4.

Sayhn way tudeh, evribadi need fi obay wahn impoatant waanin weh di geh anonks aal oava di ert. Wen Jeezas mi deh pahn ert, hihn mi waan peepl dat dis sistem a tingz wahn geh dischrai joorin di grayt chribyulayshan. (Mach. 24:21) Wen Jeezas mi prafesai bowt da jojment weh wahn hapm eena di fyoocha, hihn mi eksplayn klayr-wan bowt weh fi hihn falowaz kuda ekspek fi si an ekspeeryens az di taim geh kloasa ahn kloasa. Wi don di si som a di impoatant ivent dehn weh Jeezas mi seh mi wahn hapm.​—Mach. 24:3-12; Look 21:10-13.

In lain wid da prafesi deh, Jehoava di inkorij evribadi fi chooz fi obay an serv hihn. Hihn waahn mek evribadi hoo lisn tu hihn liv wahn beta laif now an injai di fyoocha blesinz weh wahn kom eena ih raichos nyoo werl. (2 Peet. 3:13) Jehoava waahn help peepl fi ga fayt eena fi hihn pramis dehn, soh hihn giv dehn wahn mesij weh wahn sayv dehn laif. Dis mesij da di ‘gud nyooz bowt di Kingdom,ʼ weh Jeezas mi seh “wahn geh preech oava di hoal werl soh dat aala di nayshan dehn ku yehr di chroot.” (Mach. 24:14) Gaad don aaganaiz fi mek fi hihn chroo servants tel di peepl bowt di “chroot,” er fi preech di mesij weh kohn fahn hihn. Dehn di du dis eena bowt 240 lan. Jehoava waahn az moch peepl az pasabl fi obay di waanin weh hihn di giv soh dat dehn ku eskayp di “staam” a fi hihn raichos jojment.​—Zeph. 1:14, 15; 2:2, 3.

Di impoatant kweschan da noh if Jehoava giv peepl nof taim fi rispan tu ih waanin. Di faks shoa dat hihn aalwayz giv inof taim. Soh, di moas impoatant kweschan da dis: Peepl wahn obay di waanin weh Gaad di gi dehn wail dehn stil ga taim? Wee, weh di kehr Gaad mesij tu peepl, fi kantinyu help az moch peepl az pasabl fi servaiv di en a dis sistem a tingz.