1. Weh Jehoava ku du fi mek fi hihn perpos kohn chroo?

JEHOAVA ku bee wateva hihn need fi fulfil fi hihn perpos. Fi egzampl, Jehoava chooz fi bee wahn Teecha, wahn Ivanjelaiza, ahn wahn Faada weh gi komfert. Dehnya da jos som a di tingz weh Hihn mi chooz fi bee. (Isa. 48:17; 2 Kor. 7:6; Gal. 3:8) Stil, hihn aafn yooz hyoomanz fi fulfil fi hihn perpos. (Mach. 24:14; 28:19, 20; 2 Kor. 1:3, 4) Jehoava ku aalso gi eni wan a wi di wizdom ahn di schrent wi need fi bee wateva hihn need wi fi bee fi mek fi hihn perpos kohn chroo. Laik weh wahn lata Baibl teecha sojes, aala dis da paat a di meenin a Jehoava naym.

2. (a) Wai sohntaimz wi mait dowt dat Jehoava di yooz wi? (b) Weh wi wahn diskos eena dis aatikl?

² Aala wi waahn bee yoosful tu Jehoava, bot som a wi mait dowt dat Jehoava di yooz wi. Wai? Bikaaz wi feel laik wi kyaahn du az moch az wi waahn du bikaaz a oal ayj, bikaaz a wi sichuwayshan eena laif, er bikaaz a wi abilitiz. Pahn di ada han, adaz mait feel laik dehn di du inof ahn dat dehn noh need fi du moa. Eena dis aatikl, wi wahn diskos how Jehoava ku gi eni wan a wi weh wi need fi mek fi hihn perpos kohn chroo. Den, wi wahn luk pahn sohn egzampl eena di Baibl a how Jehoava mi gi ih servants—man ahn uman—di dizaiya ahn di powa fi du fi hihn wil. Ahn fainali, wi wahn diskos how wi ku alow Jehoava fi yooz wi fi du fi hihn wil.

3. Akaadn tu Filipiyanz 2:13, how Jehoava mait gi wi di dizaiya fi du sohnting?

³ Reed Filipiyanz 2:13, NW. *  * Jehoava ku gi wi di dizaiya fi du sohnting. How hihn mait du dis? Maybi wi fain owt dat dehn ga wahn spesifik need eena di kangrigayshan. Er di eldaz reed wahn leta fahn di branch tu di kangrigayshan weh seh dat dehn ga wahn need fi moa help sohnweh els. Dis mait mek wi aks wiself, ‘Weh Ai ku du fi help?ʼ Er maybi wi mi geh wahn chalenjin asainment fi du ahn wi noh tink wi ku du it gud inof. Er afta wi mi reed sohn vers eena di Baibl, wi mait aks wiself, ‘How Ai ku yooz weh Ah jos reed fi help adaz?ʼ Jehoava noh wahn foas wi fi du eniting. Bot wen hihn si dat wi di tink bowt weh wi ku du, Jehoava ku gi wi di dizaiya fi waahn du weh wi mi tink bowt.

4. How Jehoava ku gi wi di powa fi du sohnting?

⁴ Jehoava ku aalso gi wi di powa fi du sohnting. (Isa. 40:29) How hihn ku du dat? Hihn ku gi wi fi hihn hoali spirit fi du beta wid di skilz weh wi don ga. (Ex. 35:30-35) Jehoava ku yooz ih aaganaizayshan fi teech wi how fi du sertn tingz. If yu geh wahn asainment weh yu noh shoar how fi du, noh frayd fi aks fi help. Aalso, feel free fi aks yu jenaros Faada, Jehoava, fi ih “grayt powa” fi help yu du da asainment. (2 Kor. 4:7; Look 11:13) Di Baibl gat een wahn lata egzampl wehpaat Jehoava mi gi difrent man ahn uman weh mi serv hihn di dizaiya ahn di powa fi du sohnting. Az wi luk pahn dehnya difrent egzampl, chrai fi tink a sohn wayz how Jehoava ku yooz yoo eena wahn simila way.

5. Weh wi laan fahn how ahn wen Jehoava mi yooz Moaziz fi sayv di Izrelait dehn?

⁵ Jehoava mi mek Moaziz bee wahn sayvya fi di Izrelait dehn. Bot da wen Jehoava mi yooz hihn? Yu tink da-mi afta ‘di Eejipshan dehn mi teech Moaziz evriting weh dehn mi noaʼ ahn Moaziz mi tink seh hihn mi redi? (Aks 7:22-25) No, Jehoava neva yooz Moaziz til afta Hihn mi help ahn fi bee hombl ahn fi ga wahn jentl haat. (Aks 7:30, 34-36) Jehoava mi gi Moaziz di korij fi stan op fronta di moas powaful roola a Eejip. (Ex. 9:13-19) Weh wi laan fahn how ahn wen Jehoava mi yooz Moaziz? Jehoava yooz dehn wan weh chrai fi kapi fi Hihn kwalitiz ahn hoo pen pahn Hihn fi schrent.​—Fil. 4:13.

6. Weh wi laan fahn di way Jehoava mi yooz Barzilai fi help King Dayvid?

⁶ Honjridz a yaaz agoa, Jehoava mi yooz Barzilai fi help King Dayvid. Wail Dayvid ahn di peepl mi-di ron fahn Dayvid son, Absalom, dehn mi “hongri ahn taiyad ahn tersti.” Rong dis taim, Barzilai mi don oal, bot hihn an adaz mi put dehn laif eena daynja fi help Dayvid ahn di peepl weh mi deh wid ahn. Barzilai neva tink dat hihn mi tu oal fi mek Jehoava yooz ahn. Raada, Barzilai mi jenaros an ih mi yooz weh ih mi ga fi help Gaad servants weh mi need it. (2 Sam. 17:27-29) Wat da di lesn fi wee? Noh mata how oal wee, Jehoava ku yooz wi fi help wi bradaz ahn sistaz weh liv kloas bai er weh deh eena wahn neks konchri. (Prov. 3:27, 28; 19:17) Wi noh mait aybl fi help  dehn wiself, bot wi ku kanchribyoot tu di werlwaid werk soh dat moni avaylabl fi help wi bradaz ahn sistaz weh need help.​—2 Kor. 8:14, 15; 9:11.

7. How Jehoava mi yooz Simiyan, ahn wai dat inkorijin?

⁷ Jehoava mi pramis wahn laayal man da Jeroosalem, weh naym Simiyan, dat ih noh mi wahn ded bifoa ih mi si di Mesaiya. Sins Simiyan mi-di wayt fi yaaz fi di Mesaiya kohn, da pramis mosi mi reeli inkorij hihn. Jehoava mi riwaad Simiyan fi ih fayt an indyoarans. Wan day, wen Simiyan mi deh anda di powa a di ‘spirit,ʼ hihn mi gaan eena di templ, ahn da dehsoh ih mi si baybi Jeezas. Jehoava mi yooz Simiyan fi diliva wahn prafesi bowt dis baybi hoo mi wahn groa op fi bee di Krais. (Look 2:25-35) Aldoa Simiyan neva liv fi si Jeezas fulfil ih minischri pahn ert, Simiyan mi tankful fi di privilij weh Jehoava mi gi ahn. An ih wahn ga lat moa gud tingz fi bee tankful fa eena di fyoocha! Eena di nyoo werl, Simiyan wahn geh fi si how evribadi pahn di ert wahn bee bles bikaaz a Jeezas roolaship. (Gen. 22:18) Wee ku aalso bee tankful fi eni privilij weh Jehoava gi wi.

8. How Jehoava mait yooz wi laik how ih mi yooz Baanabas?

⁸ Eena di taim a di apasl dehn, wahn jenaros man weh mi naym Joazef mi wilin fi mek Jehoava yooz ahn. (Aks 4:36, 37) Di apasl dehn mi kaal ahn Baanabas, weh meen “Son a Komfert, NW” praabli bikaaz hihn mi noa how fi komfert adaz reeli gud. Fi egzampl, eevn doa Saal mi kohn fi bee wahn Kristyan, di bradaz mi stil frayd fi goh tu hihn sins hihn doz persikyoot di Kristyanz eena di paas. Bot Baanabas mi komfert ahn help Saal, ahn Saal mosi mi reeli tankful fi dis. (Aks 9:21, 26-28) Laytaraan, di eldaz da Jeroosalem mi need fi inkorij di bradaz weh mi-di liv da Antiyak. Hoo dehn mi sen? Dehn mi mek wahn waiz chois fi sen Baanabas! Eena di buk a Aks ih menshan dat Baanabas mi staat tu “inkorij di bileeva dehn fi stay kloas tu di Laad noh mata weh ih kaas dehn.” (Aks 11:22-24) Sayhn way soh, tudeh, Jehoava ku help wee fi bee wahn “son a komfert” tu wi bradaz ahn sistaz. Fi egzampl, hihn mait yooz wi fi gi komfert tu wi bradaz ahn sistaz weh looz sombadi weh dehn lov eena det. Er ih mait moov wi fi vizit er kaal sombadi weh sik er weh feel dong soh dat wi ku bil dehn op. Yoo wahn alow Jehoava fi yooz yoo laik how ih mi yooz Baanabas?​—1 Tes. 5:14.

9. Weh wi laan fahn di way Jehoava mi help Brada Vasily fi bee wahn gud elda?

⁹ Jehoava mi help wahn brada weh naym Vasily fi bee wahn gud elda. Vasily mi geh apointid fi serv az wahn elda wen ih mi 26 yaaz oal. Hihn mi tink dat ih neva ga inof ekspeeryens fi help di bradaz ahn sistaz, espeshali dehn wan weh mi-di goh chroo haad taimz. Bot ih mi geh gud chraynin fahn sohn ekspeeryens eldaz ahn fahn di Kingdom Minischri Skool. Vasily mi werk haad fi du beta. Fi egzampl, hihn mi mek wahn lis a smaal goalz weh ih mi waahn reech. An az ih mi werk pahn ih goalz, ih mi feel moa ahn moa kanfident. Now ih seh: “Di tingz weh yoostu mek Ah feel frayd, noh mek Ah feel frayd nohmoh, now dehn mek Ah feel hapi. Ah feel reeli satisfai wen Jehoava help mi fi fain di rait skripcha fi komfert wahn brada er sista.” Bradaz, if yu kapi Brada Vasily egzampl ahn bee wilin  fi mek Jehoava yooz yu, Jehoava ku gi yoo di abiliti fi tek kyaa a eevn grayta rispansabiliti eena di kangrigayshan.

10. Weh Abigayl mi du, ahn weh lesn wi laan fahn fi shee egzampl?

¹⁰ King Saal mi-di chrai fi kil Dayvid, soh Dayvid an ih soalja dehn mi haftu ron weh. Wen dehn mi eena di wildanes, dehn mi kohn kraas di flak a wahn rich man hoo mi naym Naybal. Dayvid an ih soalja dehn mi protek Naybal flak eena di wildanes. Soh wen Dayvid an ih soalja dehn mi need help, dehn mi sen aks Naybal fi sohn food. Bot Naybal mi meen an ih mi rifyooz fi help dehn. Dayvid mi geh reeli beks an ih mi mek op ih main fi kil Naybal an evri singl man weh mi werk fi Naybal. (1 Sam. 25:3-13, 22) Bot Naybal byootiful waif, Abigayl, mi reeli waiz. Shee mi shoa wahn lata korij. Shee mi jrap dong pahn ih nee ahn bayg Dayvid fi noh tek rivenj er els hihn mi wahn di sin gens Jehoava. Eena wahn gud ahn kain way shee mi bayg Dayvid fi lef tingz eena Jehoava han. Abigayl hombl werdz ahn waiz akshan mi toch Dayvid haat. Hihn mi riyalaiz dat da Jehoava hoo mi sen shee. (1 Sam. 25:23-28, 32-34) Abigayl mi ga kwalitiz weh mi mek shee yoosful tu Jehoava. Jos laik dat, Kristyan sistaz ku help dehn famili an adaz eena di kangrigayshan if dehn hombl, if dehn ga wizdom, an if dehn shoa andastandin.—Prov. 24:3; Taitos 2:3-5.

11. Weh Shalum daata dehn mi du, ahn hoo di kapi dehn tudeh?

¹¹ Honjridz a yaaz agoa, Shalum daata dehn mi deh monks di peepl dehn weh Jehoava mi yooz fi bil op bak di waal a Jeroosalem. (Neh. 2:20; 3:12) Eevn doa Shalum da-mi wahn prins, fi hihn daata dehn mi wilin fi du haad ahn daynjaros werk. (Neh. 4:15-18) Dehn da neva laik di impoatant man dehn fahn Tekoawa, hoo mi tink seh dehn tu impoatant fi shayr eena di werk! (Neh. 3:5) Jos imajin how hapi Shalum daata dehn mosi mi feel wen di proajek fi bil op bak di waal mi finish eena jos 52 dayz! (Neh. 6:15) Eena fi wee day, sistaz wilin ahn hapi fi help du wahn speshal kaina servis tu Gaad, weh da kanschrokshan ahn mantaynans a di bildin dehn weh dedikaytid tu Jehoava. Fi dehn skil, eeganis, ahn laayalti impoatant fi mek dis werk ga sokses.

12. How Jehoava ku yooz wi laik how ih mi yooz Tabita?

¹² Jehoava mi moov Tabita fi spen ‘ih taim di help peepl ahn di du gud,ʼ espeshali tu di wido dehn. (Aks 9:36) Bikaaz shee mi jenaros ahn kain, wahn lata peepl mi moarn wen shee mi ded. Bot dehn mi moa dan hapi wen di apasl Peeta mi rezorek ahn. (Aks 9:39-41) Weh wi laan fahn Tabita? Weda wi yong er oal, man er uman, aala wi ku du praktikal tingz fi help wi bradaz ahn sistaz.​—Heeb. 13:16.

13. How Jehoava mi yooz wahn shai sista weh naym Root, ahn weh shee mi seh?

¹³ Wahn shai sista weh naym Root mi waahn bee wahn mishineri. Wen shee mi yong, shee doz goh fahn hows tu hows az faas az ih kud fi gi peepl chrak. Shee mi seh: “Ai mi reeli injai di du dis werk.” Bot stil, fi akchwali taak tu peepl da di doa ahn tel dehn bowt Gaad Kingdom da-mi wahn chalenj fi shee. Eevn doa Root mi shai, shee mi staat tu regyula painyaa wen ih mi 18 yaaz oal. Eena 1946, shee mi  gaahn da Gilyad Skool, ahn layta, shee mi serv da Hawaii ahn Japan. Jehoava mi yooz shee wahn lat fi spred di gud nyooz eena dehndeh konchri. Afta nayli 80 yaaz a preechin, Root mi seh: “Jehoava aalwayz gi mi di schrent weh Ah need. Hihn mi help mi fi noh bee shai agen. Ai kanvins dat Jehoava ku yooz enibadi hoo put dehn chros eena hihn.”

14. Akaadn tu Koloashanz 1:29, weh wi need fi du if wi waahn Jehoava yooz wi?

¹⁴ Aal chroo hischri, Jehoava mi yooz ih servants eena lata difrent wayz. How hihn wahn yooz yoo? Wahn lat dipen pahn how haad yoo wilin fi werk. (Reed Koloashanz 1:29.) If yu wilin fi mek Jehoava yooz yu, hihn ku mek yu bee sombadi weh eega fi preech an ih ku mek yu bee wahn gud teecha. Hihn ku aalso mek yu bee wahn persn weh ga lata skilz, wahn laayal fren, ahn sombadi weh ku komfert adaz. Er hihn ku mek yu bee wateva els hihn need yu fi bee fi mek fi hihn wil kohn chroo.

15. Akaadn tu 1 Timoti 4:12, 15, weh yong bradaz tudeh shuda bayg Jehoava fi help dehn du?

¹⁵ How bowt unu yong bradaz weh wahn soon bee wahn adolt? Di kangrigayshan ga wahn big need fi unu. Sins unu ga wahn lata enerji unu ku tek aan moa rispansabiliti eena di kangrigayshan az ministeeryal servants. Eena wahn lata kangrigayshanz, dehn ga moa eldaz dan ministeeryal servants. Unu tink som a unu yong bradaz ku bee wilin fi du moa eena di kangrigayshan? Sohntaim sohn bradaz seh: “Ai hapi di serv jos az wahn poblisha.” If dat da di way yoo feel, bayg Jehoava fi gi yu di dizaiya fi waahn bee wahn ministeeryal servant ahn fi gi yu di powa fi du aal weh yu kud fi serv hihn. (Eccl. 12:1) Wi need unu help!​—Reed 1 Timoti 4:12, 15.

16. Weh wi shuda aks Jehoava fa, ahn wai?

¹⁶ Jehoava ku mek yu bee wateva hihn need yu fi bee fi mek fi hihn wil kohn chroo. Soh bayg Jehoava fi gi yu di dizaiya fi du ih werk, ahn den bayg ahn fi gi yu di powa weh yu need. Weda yu yong er yu oal, yooz yu taim, yu enerji, an ada tingz weh yu gat fi aana Jehoava now. (Eccl. 9:10) Wen yu geh di apachooniti fi du moa eena Jehoava servis, noh bee kwik fi seh no bikaaz yu tink yu kyaahn du it. Da reeli wahn privilij fi du wateva wi kud fi bring wi lovin faada di aana weh ih dizerv!