1. How wi noa fi shoar dat wi di liv eena “di laas dayz”?

IF YOO mi baan afta di yaa 1914, dat meenz dat yoo liv yu hoal laif joorin “di laas dayz” a dis sistem a tingz. (2 Tim. 3:1) Aala wi hyaa bowt di tingz weh Jeezas mi seh mi wahn hapm joorin dis taim. Dehnya tingz inklood waar, staavayshan, ertkwayk, dizeez, moa ahn moa wikidnis, ahn di persikyooshan a Jehoava peepl. (Mach. 24:3, 7-9, 12; Look 21:10-12) Wi aalso si peepl di bihayv eena di way di apasl Paal mi taak bowt. (Si di baks “ Di Way How Peepl Stan Tudeh.”) Az servants a Jehoava, wee kanvins dat wi di liv joorin “di laas paat a di dayz.”—Mic. 4:1.

2. Wich kweschanz wi need fi fain ansaz tu?

² Bikaaz soh moch taim don paas sins 1914, moa dan laikli wi di liv eena di fainal paat a “di laas dayz.” Sins di en a dis sistem a tingz deh soh kloas, wi need fi noa di ansaz tu sohn impoatant kweschanz: Weh ivents wahn hapm joorin di fainal paat a “di laas dayz”? Ahn weh Jehoava ekspek wi fi du wail wi di wayt fi dehn tingz hapm?

3. Akaadn tu di prafesi da 1 Tesaloanyanz 5:1-3, weh anonksment di werl leedaz wahn mek?

³ Reed 1 Tesaloanyanz 5:1-3. Paal menshan di taim wen ‘di Laad kohn bak,ʼ er “di day a Jehoava,” (NW). Eena dis skripcha, dis di rifaa tu di taim peeryad weh staat wid di atak pahn ‘Babilan di Grayt,ʼ weh da aala  faals rilijan, an weh wahn en wid Armagedon. (Rev. 16:14, 16; 17:5) Jos bifoa “di day a Jehoava” staat, di werl leedaz wahn anonks dat ‘evriting fain ahn peesful!ʼ (Som chranslayshan seh: “Pees ahn sikyoariti.”) Sohntaim werl leedaz yooz simila werdz wen dehn di taak bowt how fi mantayn wahn gud rilayshanship bitween nayshanz. * Bot di anonksment weh di Baibl taak bowt dat ‘evriting fain ahn peesfulʼ wahn bee difrent. Wai? Wen dis hapm, peepl mait tink seh dat di werl leedaz dehn fainali mek di werl wahn sayfa plays. Bot akchwali, dis wahn bee di staat a di grayt chribyulayshan. Ahn “jos den wen dehn noh di ekspek it, bad bad chrobl wahn kohn pahn dehn.”—Mach. 24:21.

4. (a) Weh wi stil need fi fain owt bowt di anonksment dat ‘evriting wahn fain ahn peesfulʼ? (b) Weh wi don noa bowt da anonksment?

⁴ Wi noa som tingz bowt di anonksment dat ‘evriting fain ahn peesful.ʼ Bot dehn stil ga ada tingz weh wi noh noa. Wi stil noh noa weh wahn kaaz di werl leedaz fi mek da anonksment er how dehn wahn mek it. Ahn wi stil noh noa weda er nat ih wahn bee sevral anonksment er jos wan big wan. Bot wateva hapm, dis da weh wi noa: Hyooman roolaz kyaahn bring pees, soh fi dehn anonksment noh fi fool wi. Raada, dat da di sain er anonksment weh di Baibl tel wi fi luk owt fa. Dat da di sain dat “di day a Jehoava” bowt fi staat!

5. Weh 1 Tesaloanyanz 5:4-6 tel wi fi du soh dat wi redi fi “di day a Jehoava”?

⁵ Reed 1 Tesaloanyanz 5:4-6. Paal tel wi weh wi shuda du fi mek shoar dat wi redi fi “di day a Jehoava.” Wi noh fi ‘di sleep, laik di res weh di sleep.ʼ Bot wi mos “stay op wid wi aiy waid oapm” ahn kip foakos. Fi egzampl, wi need fi bee kyaaful noh fi geh miks op eena palitiks. If wi geh involv eena dehnya tingz, wi wahn “bilangz tu dis werl.” (Jan 17:16) Wee noa dat Gaad Kingdom da di onli ting weh ku bring pees tu di werl.

6. Weh wi waahn help adaz fi du, ahn wai?

⁶ Wi waahn du evriting wi kud fi noh jrap asleep, bot apaat fahn dat, wi aalso waahn help adaz fi stay awayk ahn laan bowt weh di Baibl seh wahn hapm eena di werl. Wi need fi du dis now, bikaaz wen di grayt chribyulayshan staat, ih wahn bee tu layt fi staat tu wership Jehoava. Dat da wai di preechin werk soh impoatant! *

7. Weh Jehoava ekspek wi fi du now?

⁷ Eena di shaat taim weh lef bifoa “di day a Jehoava” kohn, hihn ekspek wi fi kip bizi eena di preechin werk. Wi need fi mek shoar dat wi ‘kip aan di du di Laad werk wid evriting weh wi gat.ʼ (1 Kor. 15:58) Wen Jeezas mi-di taak bowt aala di impoatant tingz weh mi wahn hapm joorin di laas dayz, hihn mi seh weh wi mi wahn du. Hihn mi seh: “Di Gud Nyooz bowt Gaad Kingdom hafu preech tu aala di nayshan dehn bifoa di en a di werl kohn.” (Maak 13:4, 8, 10; Mach. 24:14) Jos imajin: Evri singl taim yu goh eena di minischri, yu di help mek da Baibl prafesi kohn chroo!

8. How wee noa dat di preechin werk di kantinyu fi ga sokses?

⁸ Weh wi ku seh bowt di sokses a di preechin werk? Evri yaa, moa ahn moa peepl di hyaa di gud nyooz a di Kingdom. Fi egzampl, tink bowt how di amonk a poblishaz groa joorin di laas dayz. Eena 1914, dehn mi ga 5,155 poblishaz eena 43 difrent lan. Tudeh, dehn ga bowt 8.5 milyan poblishaz eena 240 difrent lan! Bot stil, wi werk noh finish yet. Wi mos kip di tel adaz dat Gaad Kingdom da di onli solooshan weh ku solv aala wi prablemz.—Ps. 145:11-13.

9. Wai wi need fi kip di preech bowt Gaad Kingdom?

⁹ Wi preechin werk noh wahn don til Jehoava seh ih don. Humoch moa taim lef fi mek peepl kohn fi noa hoo da Jehoava ahn Jeezas Krais? (Jan 17:3) Wi noh noa. Bot wi doo noa dat enibadi weh “ga di rait haat kandishan fi evalastin laif,” ku stil aksep di gud nyooz bifoa di grayt chribyulayshan staat. (Aks 13:48, NW) How wee ku help dehnya peepl bifoa ih tu layt?

10. How Jehoava di help wi fi teech peepl di chroot?

¹⁰ Chroo ih aaganaizayshan, Jehoava di gi wi aal weh wi need fi teech peepl di chroot. Fi egzampl, wi geh chraynin evri week da di midweek meetin. Dis meetin help wi fi noa weh fi seh wen wi meet sombadi fi di fos taim er wen wi goh pahn wahn ritern vizit. An ih aalso teech wi how fi kandok wahn Baibl stodi. Chroo ih aaganaizayshan, Jehoava aalso gi wi di toolz weh wi ga eena wi Teechin Toolbaks. Dehnya toolz help wi fi . . .

• staat kanvasayshanz,

• shayr wi mesij eena wahn inchrestin way,

•   help peepl fi waahn laan moa bowt di Baibl,

• teech di chroot pahn Baibl stodiz, ahn

• invait peepl weh shoa inchres fi vizit wi websait ahn wi Kingdom Haal dehn.

Af koars, ih noh inof fi jos ga dehnya toolz. Wi need fi yooz dehn. * Fi egzampl, if yu ga wahn nais kanvasayshan wid sombadi weh shoa inchres ahn yu lef dehn wahn chrak er wahn magazeen, dehn wahn ku reed moa til yu ku goh vizit dehn agen. Da fi wee persnal rispansabiliti fi kip bizi di preech az moch az wi kud evri mont.

11. Wat da di perpos a di Online Bible Study Lessons?

¹¹ Wahn nada way how Jehoava di help peepl fi laan di chroot da chroo di Online Bible Study Lessons pahn jw.org^®. (Luk anda BIBLE TEACHINGS > ONLINE LESSONS.) Wat da di perpos a dehnya lesn? Evri mont, towznz ahn towznz a peepl rong di werl saach pahn di Intanet fi Baibl lesn. Di lesn dehn weh deh pahn wi websait ku help dehnya peepl fi staat tu laan bowt di chroot fahn Gaad Werd di Baibl. Aalso, som a di peepl weh yu taak tu mait hoal bak fahn aksep wahn Baibl stodi. If dat da di kays, shoa dehn dis sekshan pahn wi websait er sen dehn wahn link tu di lesn dehn. *

12. Weh wahn persn ku laan fahn di Online Bible Study Lessons?

¹² Wi Online Bible Study Lessons diskos dehnya sobjek: “The Bible and Its Author,” “The Bibleʼs Main Characters,” ahn “The Bibleʼs Message of Hope.” Wail sombadi di stodi dehnya lesn, dehn ku laan:

• How di Baibl ku help wahn persn

• Hoo da Jehoava, hoo da Jeezas, ahn hoo da di aynjelz

• Wai Gaad mi kriyayt hyoomanz

• Wai peepl di sofa ahn wai eevl egzis

Di lesn dehn aalso diskos how Jehoava wahn . . .

• geh rid a sofarin ahn det,

• bring di ded bak tu laif, ahn

• dischrai hyooman govaments ahn set op fi Hihn Kingdom.

13. If wahn persn finish di lesn dehn onlain, yu tink ih stil need fi ga wahn Baibl stodi wid wan a Jehoava Witnisiz? Pleez eksplayn yu ansa.

¹³ If wahn persn finish di lesn dehn onlain, ih stil need fi ga wahn Baibl stodi wid wan a Jehoava Witnisiz. Jeezas gi wee di privilij fi mek disaiplz. Di lesn dehn dizain eena wahn way soh dat peepl weh inchrestid ku stodi di lesn dehn, laik weh dehn laan, ahn waahn noa moa. If dehn du dat, maybi dehn wahn aksep wahn Baibl stodi. Da di en a eech lesn, di reeda geh wahn invitayshan fi rikwes wahn Baibl stodi wid wan a Jehoava Witnisiz. Evri day, di aaganaizayshan geh bowt 230 rikwes fi wahn Baibl stodi chroo di websait. Dehnya rikwes kohn fahn peepl aal oava di werl! Wahn akchwal Baibl stodi wid wan a Jehoava Witnisiz veri impoatant!

14. Akaadn tu Jeezas koman da Machyu 28:19, 20, weh wi need fi chrai wi bes fi du, ahn wai?

¹⁴ Reed Machyu 28:19, 20. Wen wi di kandok wahn Baibl stodi, wi haftu chrai wi bes fi mek “disaipl . . . ahn teech dehn fi du evriting weh [Jeezas koman].” Wi need fi help peepl fi si how impoatant ih impoatant fi mek dehn chooz fi serv Jehoava ahn fi sopoat fi hihn Kingdom. Dis meenz  dat wi need fi chrai fi help peepl fi yooz weh dehn laan eena dehn laif, dedikayt dehn laif tu Jehoava, ahn geh baptaiz. Onli soh, dehn wahn ku servaiv di day a Jehoava.​—1 Peet. 3:21.

15. Weh wi noh ga di taim fi du, ahn wai?

¹⁵ Laik weh wi menshan erliya, wi onli ga wahn lee bit a taim lef bifoa dis sistem a tingz geh dischrai. Bikaaz a dis, wi noh ga taim fi kip di stodi wid peepl hoo noh di mek chaynjiz eena dehn laif fi shoa dat dehn waahn bee wan a Jehoava servant. (1 Kor. 9:26) Fi wee werk impoatant! Dehn stil ga wahn lata peepl hoo need fi hyaa di Kingdom mesij bifoa ih tu layt.

16. Akaadn tu Revilayshan 18:2, 4, 5, 8, weh aala wi need fi du? (Koment pahn di futnoat.)

¹⁶ Reed Revilayshan 18:2, 4, 5, 8. Dehnya vers shoa sohnting els weh Jehoava ekspek fahn ih servants. Wahn chroo chroo Kristyan mos mek shoar dat ih noh involv wid faals rilijan eena eni way. Bifoa wahn persn mi laan di chroot, maybi ih da-mi wahn memba a faals rilijan. Maybi hihn doz goh da dehn cherch ahn shyaa eena dehn rilijos servis. Er maybi ih doz gi moni tu da aaganaizayshan. Bifoa wahn persn ku geh aproov fi bee wahn poblisha weh noh baptaiz, ih mos mek shoar dat ih da noh paat a faals rilijan. Ih need fi eeda rait wahn leta er du sohnting els weh mek it klyaa tu di cherch er di aaganaizayshan weh ih doz bilangz tu fi shoa dat ih da noh wahn memba nohmoh. *

17. Weh kaina werk wahn Kristyan need fi avoid, ahn wai?

¹⁷ Wahn chroo Kristyan need fi mek shoar dat ih werk noh ga notn fi du wid faals rilijan eena eni kaina way. (2 Kor. 6:14-17) Fi egzampl, hihn wudn werk fi wahn cherch. Aalso, wahn Kristyan weh werk fi wahn kompani wudn waahn du wahn lata werk da wahn bildin weh peepl yooz fi faals wership. An if wahn Kristyan oan wahn bizniz, ih noh wahn chrai fi get wahn jab er aksep wahn aafa fi du werk fi eni paat a Babilan di Grayt. Wai wee tek dis soh seeryos? Bikaaz, tu Jehoava Gaad, dehndeh tingz noh kleen, ahn soh wee noh waahn ga no paat eena di faals teechinz a faals rilijan.​—Isa. 52:11. *

18. How wahn brada mi obay Baibl prinsiplz eena ih werk?

 ¹⁸ Sohn yaaz agoa, wahn kanchrakta mi aks wahn elda weh da-mi wahn kyaapenta fi du wahn smaal lee jab da wahn cherch eena di tong weh di brada mi liv. Di kanchrakta mi noa dat di brada mi aalwayz seh dat ih noh wahn werk pahn no cherch. Bot dis taim di kanchrakta mi reeli reeli need fi fain sombadi fi du di jab. Bot stil, di brada mi stik tu Baibl prinsiplz an ih mi ton dong di jab. Di neks week, di nyoozpaypa mi gat een di picha a wahn neks kyaapenta di put op wahn kraas pahn di cherch. If wi brada mi chaynj ih main an aksep di jab, ih mi wahn bee fi hihn picha eena di nyoozpaypa. Jos tink how dat wuda mi damij fi hihn repyutayshan monks ih bradaz ahn sistaz! Aalso, tink bowt how Jehoava wuda mi feel.

19-20. (a) Weh wi laan soh faar? (b) Wat els wi stil need fi laan?

¹⁹ Di Baibl seh dat di neks impoatant prafesi weh wahn soon geh fulfil wahn bee wen di werl leedaz anonks dat ‘evriting fain ahn peesful.ʼ Bot tanks tu weh Jehoava teech wi, wi noa dat di nayshanz noh wahn ga reel pees weh wahn laas. Weh wi mos du bifoa di werl leedaz mek da anonksment ahn bad bad chrobl weh dehn noh di ekspek kohn pahn dehn? Jehoava ekspek wi fi kip bizi di preech di Kingdom mesij ahn fi kantinyu di mek moa disaiplz. At di saym taim, wi need fi kip separayt fahn aala faals rilijan. Dat aalso meenz dat wi noh fi bee wahn memba a no aaganaizayshan weh ga fi du wid faals rilijan, ahn noh eevn werk fi faals rilijan.

²⁰ Joorin di fainal paat a di “laas dayz” dehn ga ada ivents weh wahn tek plays. Dehn aalso ga ada tingz weh Jehoava ekspek wi fi du. Weh Jehoava wahn ekspek wi fi du, ahn how wi ku pripyaa wiself fi evriting weh di kohn soon? Wi wahn fain di ansaz tu dehndeh kweschanz eena di neks aatikl.