1-2. (a) Weh di werl leedaz wahn soon anonks? (b) Weh kweschanz wi wahn ansa eena dis aatikl?

IMAJIN dat di werl leedaz jos mek di big anonksment dat ‘evriting fain ahn peesful.ʼ Dehn mait boas seh dat dis da di fos taim di werl soh peesful. Dehn wahn waahn wi tink dat dehn ga evriting anda kanchroal. Bot akchwali, dehn noh wahn ga no kanchroal oava weh wahn hapm afta dat! Wai nat? Bikaaz akaadn tu Baibl prafesi, “jos den, wen dehn noh di ekspek it, bad, bad chrobl wahn kohn pahn dehn, . . . ahn nobadi noh wahn get weh.”—1 Tes. 5:3.

² Wi need fi fain di ansaz tu sohn impoatant kweschanz, kweschanz laik: Weh wahn hapm joorin di grayt chribyulayshan? Weh Jehoava wahn ekspek wi fi du joorin da taim? Ahn how wi ku pripyaa wiself fahn now fi stay faytful joorin di grayt chribyulayshan?​—Mach. 24:21.

3. Akaadn tu Revilayshan 17:5, 15-18, how Gaad wahn dischrai ‘Babilan di Graytʼ?

³ Reed Revilayshan 17:5, 15-18. ‘Babilan di Graytʼ wahn geh dischrai! Laik weh wi mi menshan erliya, di werl leedaz noh wahn ga no kanchroal oava weh wahn hapm joorin dis taim. Wai nat? Bikaaz ‘Gaad wahn mek dehn ten king du weh hihn waahn dehn fi du.ʼ Da weh hihn  waahn dehn du? Hihn waahn dehn dischrai aala faals rilijan, inkloodin di rilijan dehn weh klaym seh dehn da Kristyan. Gaad wahn mek “di ten haan” a di “brait red bees” du weh Hihn waahn. Di ten haan stan fi aala di govament dehn weh sopoat “di bees,” weh da di United Nations. (Rev. 17:3, 11-13; 18:8) Wen dehndeh govament atak faals rilijan, dat wahn bee di sain dat di grayt chribyulayshan staat. Dat wahn bee wahn sodn ahn fraitnin ivent weh wahn afek evribadi.

4. (a) Weh reezn di werl leedaz mait gi fi eksplayn wai dehn di atak faals rilijan? (b) Weh peepl weh yoostu bilangz tu di rilijan dehn weh di werl leedaz atak wahn du?

⁴ Wi noh noa weh reezn di werl leedaz wahn gi fi eksplayn wai dehn di atak Babilan di Grayt. Dehn mait seh dat da bikaaz a rilijan di werl kyaahn ga pees ahn dat dehn aalwayz di chrai fi tel di govament dehn weh fi du. Er dehn mait seh dat da bikaaz dehndeh rilijos aaganaizayshan tu rich an oan tu moch tingz. (Rev. 18:3, 7) Wen di werl leedaz atak faals rilijan, dehn praabli noh wahn dischrai aala di membaz weh mi bilangz tu dehndeh rilijan. Raada, ih seemz laik di nayshanz wahn geh rid a di rilijos aaganaizayshan dehn. Wans dehndeh aaganaizayshan geh dischrai, ahn dehn gaan, peepl weh yoostu bee paat a dehn wahn riyalaiz dat dehn rilijos leedaz kyaahn fulfil dehn pramis. Soh dehn wahn seh dat dehn noh ga notn fi du wid dehndeh rilijan nohmoh.

5. Weh Jehoava pramis wi bowt di grayt chribyulayshan, ahn wai?

⁵ Di Baibl noh seh how lang di dischrokshan a Babilan di Grayt wahn tek, bot wi noa dat ih noh wahn tek lang. (Rev. 18:10, 21) Jehoava pramis dat hihn wahn “kot shaat di amonk a dayz” a di chribyulayshan soh dat fi hihn ‘speshal peepl weh hihn pikʼ ahn di chroo rilijan wahn servaiv. (Maak 13:19, 20) Bot weh Jehoava ekspek wi fi du bitween di staatin a di grayt chribyulayshan ahn di waar a Armagedon?

6. Wai ih noh inof fi jos noh bee paat a faals rilijan, ahn wat els wi need fi du?

⁶ Laik weh wi mi diskos eena di laas aatikl, Jehoava ekspek ih servants fi stap bee paat a Babilan di Grayt. Bot dis noh inof. Wi need fi aalso mek op wi main fi serv Jehoava. Mek wi luk pahn too wayz how wi ku du dat.

7. (a) How wi ku kantinyu fi obay Jehoava raichos moaral standadz? (b) Wai Heebrooz 10:24, 25 seh dat wi mos meet tugeda, ahn wai dis reeli impoatant fi mek wi du now?

⁷ Fers, wi need fi kantinyu fi obay Jehoava raichos moaral standadz. Wi kyaahn aksep dis werl loa moaral standadz. Fi egzampl, wi noh aproov a no kaina sekshwal imoraliti, inkloodin marij bitween peepl a di saym seks an dehn imoaral laifstail. (Mach. 19:4, 5; Roam. 1:26, 27) Sekant, wi need fi kantinyu wership wid wi felo bradaz ahn sistaz. Wi du dis noh mata wehpaat wi deh, weda da eena wi Kingdom Haal, wahn brada er sista hows, er eevn eena seekrit. Noh mata weh hapm, wi wahn neva stap goh da wi meetinz. Az a mata a fak, wi need fi meet tugeda ‘eevn moa, now dat wi si dat di Day wen di Laad fi kohn bak di kohn kloasa ahn kloasa.ʼ—Reed Heebrooz 10:24, 25.

8. How wi mesij mait chaynj eena di fyoocha?

⁸ Joorin di grayt chribyulayshan, di mesij weh wi preech mait chaynj. Rait now, wi di preech di gud nyooz a di Kingdom ahn wi di chrai fi mek disaiplz. Bot joorin di grayt chribyulayshan, wi mait di preech wahn mesij weh wahn di lik laik haylstoan. (Rev. 16:21) Wi mait preech dat Saytan werl wahn soon get dischrai kompleetli. Wen di taim kohn, wi wahn fain owt egzakli weh wi mesij wahn bee ahn how wi wahn tel peepl bowt it. Yu tink wi wahn preech di sayhn way how wi di preech fi oava wahn honjrid yaaz, er wi wahn preech eena wahn difrent way? Wi wahn haftu wayt ahn si. Noh mata how wi preech, doh, ih seemz laik wi wahn ga di privilij fi anonks Jehoava jojment mesij wid korij!—Ezek. 2:3-5.

9. How di werl leedaz mait rispan tu wi mesij, bot weh wi ku bee shoar a?

⁹ Moa dan laikli, wi mesij wahn foas di werl leedaz fi chrai ahn stap wi preechin werk fi gud. Jos laik how wi pen pahn Jehoava fi sopoat wi eena wi minischri now, wi wahn need fi pen pahn hihn eena di fyoocha tu. Wi ku bee shoar dat wi Gaad wahn ful wi op wid powa fi du fi hihn wil.—Mic. 3:8.

10. Akaadn tu Look 21:25-28, how moas peepl wahn feel bowt weh wahn hapm joorin di grayt chribyulayshan?

¹⁰ Reed Look 21:25-28. Joorin di grayt chribyulayshan, peepl wahn bee shak wen dehn si evriting weh dehn mi tink wahn laas fareva staat tu fayl. Dehn wahn feel “lata payn,” ahn wori dat dehn mait ded joorin di chribyulayshan, di wers taim eena hyooman hischri. (Zeph. 1:14, 15) Joorin da taim, laif wahn geh haada eevn fi Jehoava peepl. Bikaaz wi kantinyu fi bee no paat a di werl, wi mait goh chroo sohn tof taimz. Wi mait noh ga sertn tingz weh wi need.

11. (a) Wai peepl ahn di werl leedaz wahn foakos pahn Jehoava Witnisiz afta faals rilijan geh dischrai? (b) Wai wi noh need fi bee frayd wen di grayt chribyulayshan staat?

¹¹ Di peepl fahn di rilijan dehn weh  geh dischrai mait hayt di fak dat di rilijan a Jehoava Witnisiz wahn stil egzis. Wi ku onli imajin di rokshan weh dis mait kaaz, eevn pahn di TV, di rayjo, ahn soashal meedya. Di nayshan dehn ahn dehn roola, Saytan, wahn hayt wi bikaaz fi wee rilijan wahn bee di onli wan weh neva geh dischrai. Dehn noh wahn reech dehn goal fi dischrai aala di rilijan dehn fahn aafa di ert. Soh wee wahn bee dehn mayn foakos. Da den di nayshan dehn wahn kohn fi bee Gag a Maygag. * Dehn wahn kohn tugeda wid aala dehn powa fi atak ahn dischrai Gaad peepl. (Ezek. 38:2, 14-16) Da chroo, wi ku staat tu wori bowt weh wahn hapm joorin di grayt chribyulayshan, espeshali sins wi noh noa egzakli how ih wahn hapm. Bot wi ku bee shoar dat wi noh need fi bee frayd wen di grayt chribyulayshan staat. Jehoava wahn gi wi inschrokshanz fi sayv wi laif. (Ps. 34:19) Wee wahn ku ‘stan op, ahn lif op wi hed,ʼ bikaaz wi wahn noa dat ‘di taim deh kloas fi mek Gaad sayv wi.ʼ *

12. How “di faytful ahn diskreet slayv” di pripyaa wi fi weh di kohn eena di fyoocha?

¹² “Di faytful ahn diskreet slayv” di pripyaa wi fi stay faytful joorin di grayt chribyulayshan. (Mach. 24:45, NW) Dehn di du dis eena lata difrent wayz, bot mek wi luk pahn wan egzampl: wi kanvenshan dehn fi 2016-2018. Di taak dehn joorin dehn kanvenshan, mi inkorij wi fi schrentn di kwalitiz weh wi need az wi geh kloasa ahn kloasa tu di day a Jehoava. Mek wi goh oava dehndeh kwalitiz.

13. How wi ku schrentn wi laayalti tu Jehoava, ahn wai wi need fi schrentn it fahn now?

¹³ Laayalti: Di teem a di 2016 kanvenshan da-mi “Stay Laayal tu Jehoava!” Dis proagram mi teech wi dat if wi ga wahn schrang persnal rilayshanship wid Jehoava, wi wahn bee laayal tu ahn. Di proagram mi aalso help wi fi memba dat wi ku geh kloas tu Gaad chroo sinsyaa pryaa ahn wahn deep stodi a di Baibl. If wi du dis, wi wahn bee aybl fi get oava di haadis a prablemz. Az di grayt chribyulayshan geh kloasa ahn kloasa, wee ku ekspek eevn moa tes a wi laayalti tu Gaad an ih Kingdom. Peepl wahn moa dan laikli kantinyu fi mak wi. (2 Peet. 3:3, 4) Wan a di mayn reezn fi dis da bikaaz wi noh sopoat no paat a Saytan sistem. Soh wi need fi schrentn wi laayalti now soh dat wi ku stay laayal joorin di grayt chribyulayshan.

14. (a) Weh chaynj wahn hapm weh ga fi du wid di bradaz weh di tek di leed pahn ert? (b) Wai wee wahn need fi bee laayal joorin da taim?

¹⁴ Joorin da taim, wahn chaynj wahn hapm weh ga fi du wid di bradaz weh di tek di leed pahn ert. At som point joorin di grayt chribyulayshan, Jeezas wahn gyada aal anointid bradaz ahn sistaz weh stil deh pahn ert op da hevn. Hihn wahn gyada dehn fi fait eena di waar a Armagedon. (Mach. 24:31; Rev. 2:26, 27) Dis meenz dat di Govanin Badi noh wahn deh pahn di ert agen. Bot, di big big  krowd wahn kantinyu fi bee aaganaiz. Bradaz weh kwalifai fahn monks da big big krowd wahn tek di leed. Wi wahn need fi sopoat dehnya bradaz weh Gaad apoint ahn fala di dairekshanz weh dehn giv; dis way wi wahn di shoa dat wi laayal tu Jehoava Gaad. If wi waahn servaiv, wi need fi fala fi dehn dairekshan!

15. How wi ku schrentn wi indyoarans, ahn wai ih impoatant fi mek wi schrentn it fahn now?

¹⁵ Indyoarans: Di teem a di 2017 kanvenshan da-mi “Noh Giv Op!” Dis kanvenshan mi help wi fi schrentn wi indyoarans soh wi ku bayr op wen wi di goh chroo chraiyalz. Wi mi laan dat wi indyoarans noh pen pahn weda tingz gud er nat. Wi ku schrentn wi indyoarans wen wi pen pahn Jehoava. (Roam. 12:12) Mek wi neva faget weh Jeezas mi pramis: ‘Enibadi weh stay faytful tu di en wahn geh sayv.ʼ (Mach. 24:13) Dis pramis meenz dat wi need fi stay faytful noh mata weh chalenjiz wi fays. If wi bayr op anda eech chraiyal now, wi fayt ku geh schranga bifoa di grayt chribyulayshan staat.

16. Weh mek wi ga korij, ahn how wee ku schrentn wi korij fahn now?

¹⁶ Korij: Di teem a di 2018 kanvenshan da-mi “Ga Korij!” Di taak dehn da dis kanvenshan mi help wi fi memba dat wi noh ga korij bikaaz a wi oan abiliti dehn. Jos laik how wi need fi pen pahn Jehoava fi indyoarans, wi need fi pen pahn Jehoava fi chroo chroo korij. How wi ku laan fi pen pahn Jehoava eevn moa? Wi ku du dis wen wi reed di Baibl evri day ahn meditayt pahn how Jehoava mi sayv ih peepl eena di paas. (Ps. 68:20; 2 Peet. 2:9) Wen di groop a nayshanz atak wi joorin di grayt chribyulayshan, wi wahn need fi ga korij ahn pen pahn Jehoava laik neva bifoa. (Ps. 112:7, 8; Heeb. 13:6) If wi pen pahn Jehoava now, wi wahn ga di korij weh wi need fi fays Gag wen ih atak wi. *

17. Wai wi noh need fi bee frayd fi Armagedon? (Koment pahn di picha pahn di kova.)

¹⁷ Laik weh wi mi menshan eena di laas aatikl, moas a wi liv wi hoal laif joorin di laas dayz. Bot wi aalso ga di hoap fi servaiv di grayt chribyulayshan. Di waar a Armagedon wahn bee di en a dis sistem a tingz. Bot wi noh ga notn fi wori bowt, bikaaz dis wahn bee Gaad waar. (Prov. 1:33; Ezek. 38:18-20; Zech. 14:3) Wen Jehoava gi di koman, Jeezas Krais wahn leed Gaad aami intu waar. Hihn wahn ga di 144,000 ahn milyanz ahn milyanz a aynjelz wid ahn. Tugeda, dehn wahn fait gens Saytan, ih deemonz, an aala ih aami dehn weh deh pahn di ert.—Dan. 12:1; Rev. 6:2; 17:14.

18. (a) Weh Jehoava pramis wi? (b) Wai Revilayshan 7:9, 13-17 help yoo fi bee kanfident bowt di fyoocha?

¹⁸ Jehoava pramis wi: “No wepan weh dehn bring gens yu wahn ga eni kaina sokses.” (Isa. 54:17) “Wahn big big krowd” a Jehoava faytful servants wahn “kohn fahn owta . . . di grayt chribyulayshan” alaiv! Den dehn wahn kantinyu fi serv hihn. (Reed Revilayshan 7:9, 13-17.) Di Baibl reeli gi wi hoap fi di fyoocha! Wee noa dat “Jehoava protek dehn wan weh faytful.” (Ps. 31:23) Aal hoo lov ahn wership Jehoava wahn hapi fi si wen hihn klayr ih naym a aal lai.—Ezek. 38:23.

19. Weh wi wahn soon ekspeeryens eena di fyoocha?

¹⁹ Tink bowt weh 2 Timoti 3:2-5 mait seh if ih mi-di diskraib peepl eena di nyoo werl, hoo noh waahn bee afektid bai Saytan. (Si di baks “ Di Way How Peepl Wahn Stan Eena di Fyoocha.”) Brada George Gangas, * hoo da-mi wahn memba a di Govanin Badi, mi diskraib it dis way: “Di werl wahn bee wahn wandaful plays wen evribadi di wership Jehoava! Soon yu wahn ga di privilij fi liv eena di nyoo sistem a tingz. Yu wahn liv az lang az Jehoava. Wi wahn liv fareva.” Dat da reeli wahn wandaful hoap!