1. Wai Jehoava da di onli wan hoo dizerv wi wership?

JEHOAVA da di onli wan hoo dizerv wi wership bikaaz hihn mek wi ahn gi wi laif. (Rev. 4:11) Bot wi fays wahn chalenj. Wai? Bikaaz eevn if wi lov ahn rispek Jehoava, ada tingz eena wi laif ku staat tu bee soh impoatant dat dehn stap wi fahn lov ahn wership onli Jehoava laik weh wi shuda du. Wi need fi andastan how dat ku hapm. Bot fos, wi wahn diskos weh ih meenz fi wership onli Jehoava.

2. Akaadn tu Exodus 34:14, weh wi wahn du if wi wership onli Jehoava?

² Eena di Baibl, fi wership onli Jehoava meenz fi ga wahn deep lov far ahn. Wi noh wahn alow enibadi er eniting els fi tek fi hihn plays eena wi haat.—Reed Exodus 34:14. *

3. Wai wi ga gud reezn fi wership onli Jehoava?

³ Wi ga gud reezn fi wership onli Jehoava. Wai? Bikaaz ih bays pahn di faks weh wi don laan bowt hihn. Wi staat tu admaiya fi hihn byootiful kwalitiz. Wi noa weh Jehoava lov ahn weh ih hayt, ahn wi feel di saym way how hihn feel. Wi andastan ahn sopoat fi hihn perpos fi hyoomanz. Wi feel aana dat hihn alow wi fi bee fi hihn fren. (Ps. 25:14) Evri singl ting weh wi laan bowt wi Kriyayta mek wi geh kloasa tu hihn.—Jay. 4:8.

4. (a) Weh di Devl yooz fi mek wi lov Jehoava les? (b) Weh wi wahn kansida eena di neks aatikl?

 ⁴ Di Devl di kanchroal dis werl. Hihn di yooz it eena wahn way soh dat di tingz weh wi waahn eena laif bee wi mayn foakos an ih mek wi rang dizaiyaz haada fi kanchroal. (Ifee. 2:1-3; 1 Jan 5:19) Hihn waahn wi lov ada tingz tu soh dat wi noh onli lov Jehoava. Mek wi kansida too wayz how di Devl mait du dis. Fos, ih chrai fi mek wi lov moni, ahn sekant, ih chrai fi mek wi chooz bad entataynment.

5. Wai wi need fi bee kyaaful dat wi noh staat tu lov moni?

⁵ Aala wi waahn ga inof food fi eet, gud kloaz fi wayr, ahn wahn deesent plays fi liv. Bot wi need fi bee kyaaful dat wi noh staat tu lov moni. Wahn lata peepl tudeh, “lov moni” ahn dehn lov di tingz weh moni ku bai. (2 Tim. 3:2) Jeezas mi noa dat ih disaiplz kuda mi geh temtid fi divelop dis sayhn kaina lov. Soh Jeezas mi seh: “Nobadi kyaahn serv too maasta. Eeda yu wahn hayt wan ahn lov di neks, er yu wahn rispek wan ahn kyaahn stan di neks wan. Rait soh, unu kyaahn serv Gaad ahn moni sayhn taim.” (Mach. 6:24) Wahn persn weh di wership Jehoava ahn di spen wahn lata taim an enerji di chrai fi geh rich eena dis werl, da laik sombadi weh di chrai fi serv too maasta. Ih noh wahn di wership onli Jehoava.

6. Weh lesn wi ku laan fahn Jeezas werdz tu di kangrigayshan da Layodiseeya?

⁶ Bifoa di yaa 100 C.E., sohn membaz a di kangrigayshan da Layodiseeya mi-di boas seh: “Ai rich, an Ai ga plenti tingz. Ai ga evriting weh Ai need.”  Bot Jehoava ahn Jeezas mi si dehn az ‘poa ahn pitiful ahn blain ahn naykid.ʼ Jeezas neva kongsl dehn kaaz dehn mi rich, no, Jeezas mi kongsl dehn bikaaz dehn lov fi moni mi-di damij dehn rilayshanship wid Jehoava. (Rev. 3:14-17) If wi noatis dat wi di staat tu lov moni, wi need fi bee kwik fi karek wi tinkin. (1 Tim. 6:7, 8) If wi noh karek wi tinkin, wi wahn staat tu lov ada tingz tu ahn Jehoava noh wahn aksep wi wership. Jehoava “waahn wi wership onli hihn.” (Deut. 4:24) How wee ku mek moni staat tu bee di moas impoatant ting eena wi laif?

7-9. Weh yoo laan fahn di ekspeeryens a wahn elda weh naym Dayvid?

⁷ Mek wi kansida di egzampl a Dayvid, wahn haad-werkin elda fahn di United States. Hihn seh dat hihn mi dedikaytid tu ih jab. Bikaaz hihn mi soh gud at ih jab, di kompani weh ih mi werk wid mi promoat ahn an gi ahn moa moni. Peepl mi si hihn az wan a di bes persn eena da taip a werk eena di hoal konchri. Dayvid mi seh: “Sohntaim Ah doz tink dat dehndeh tingz da-mi proof dat Jehoava mi-di bles mi.” Bot yu tink Dayvid sokses da-mi reeli fahn Jehoava?

⁸ Afta wahn wail, Dayvid mi staat tu si dat ih werk mi-di damij ih rilayshanship wid Jehoava. Hihn seh: “Wen Ah doz deh da meetin an eevn wen Ah doz deh pahn feel servis, Ah wuda fain miself di tink bowt prablemz da werk. Ah mi-di mek wahn lata moni, bot di werk mi-di schres mi owt wahn lat, ahn mee ahn mi waif mi-di staat tu ga prablemz eena wi marij.”

 ⁹ Dayvid mi riyalaiz dat ih mi need fi disaid weh mi moa impoatant tu hihn. Hihn seh: “Ah mi mek op mi main fi fiks mi sichuwayshan.” Dayvid mi waahn chaynj ih werk skejul, soh ih mi taak tu ih baas bowt it. Weh mi hapm? Dayvid mi looz ih Jab! Soh weh Dayvid mi du? Hihn seh: “Di neks day Ah mi sain op fi regyula agzilari painyaa.” Fi sopoat dehnself, Dayvid an ih waif mi staat du kleenin werk. Afta wahn wail, hihn mi staat tu regyula painyaa, ahn laytaraan ih waif mi staat tu painyaa tu. Dis kopl mi chooz fi du werk weh moas peepl luk dong pan, bot di taip a werk weh dehn di du da noh di moas impoatant ting tu dehn. Eevn doa dehn di mek way les moni now, evri mont dehn ga jos inof moni fi pay dehn bilz. Dehn waahn put Jehoava fos eena dehn laif, ahn dehn fain owt fi dehnself dat Jehoava tek kyaa a dehn wan weh put fi hihn Kingdom fos eena dehn laif.—Mach. 6:31-33.

10. How wee ku protek wi haat?

¹⁰ Weda wi rich er poa, wi need fi protek wi haat. Wi onli ku du dat if wi noh divelop wahn lov fi moni. An aalso, if wi noh alow wi werk fi bee moa impoatant tu wi dan wi servis tu Jehoava. Bot how wi ku noa if dat di hapm tu wi? Wel, wi ku aks wiself dehnya kweschanz: ‘Ai yoozhwali di tink bowt werk wen Ai deh da meetin er eena feel servis? Ai aalwayz di wori if Ah wahn ga inof moni eena di fyoocha? Moni ahn mateeryal tingz di kaaz prablemz eena mai marij? Ai wuda wilin fi du werk weh adaz luk dong pan, if ih alow mi fi spen moa taim di serv Jehoava?ʼ (1 Tim. 6:9-12) Wen wi tink bowt dehndeh kweschanz, wi need fi memba dat Jehoava lov wi. Ahn Hihn mi mek di pramis tu wi: “Ah wahn neva lef unu; Ah wahn neva dizert unu.” Dat da wai di apasl Paal mi rait: “Noh di lov moni.”—Heeb. 13:5, 6.

11. Weh ku hapm tu sombadi bikaaz a di entataynment weh dehn chooz?

¹¹ Jehoava waahn wi injai laif, an entataynment ku help wi fi du dat. Az a mata a fak, di Baibl tel wi dat “notn beta dan fi wahn man eet ahn jrink ahn fain jai eena ih haat fi aala ih haad werk.” (Eccl. 2:24) Bot wahn lata di entataynment  eena di werl ku afek wi eena wahn bad way. Ih ku kaaz wahn lata peepl fi staat tu aksep er eevn lov weh Gaad hayt.

12. Akaadn tu 1 Korintyanz 10:21, 22, wai wi shuda bee kyaaful wen wi di chooz wi entataynment?

¹² Wi waahn wership onli Jehoava, soh wi kyaahn di eet fahn ‘di Laad taybl ahn di taybl a deemonz.ʼ (Reed 1 Korintyanz 10:21, 22.) Naamali, wen wi eet wid sombadi da kaaz wi da frenz. If wi chooz entataynment weh promoat vailens, spiritizm, imoraliti, er ada bad dizaiyaz an atichood, da laik wi di eet wid Gaad enimiz ahn laik wi di eet di food weh dehn pripyaa. Bikaaz a dat, wi noh onli haam wiself bot wi aalso damij wi rilayshanship wid Jehoava.

13-14. Bays pahn Jaymz 1:14, 15, wai wi need fi bee kyaaful bowt di kaina entataynment weh wi chooz? Yooz di egzampl eena di paragraaf.

¹³ Eena weh way wi ku kompyaa entataynment tu food? Wen wi eet, wi ku chooz weh fi put eena wi mowt. Bot wans wi swala di food, wi kyaahn chooz how ih wahn afek wi badi. Gud food wahn mek wi helti; bad food wahn mek wi sik. Wi mait kyaahn si how ih afek wi rait away, bot afta sohn taim paas ih wahn playn fi si.

¹⁴ Sayhn way soh, wen wi di chooz entataynment, wi ku chooz weh wi wahn put eena wi main. Bot afta dat, di entataynment weh wi mi chooz wahn afek di way wi feel ahn tink. Gud entataynment ku mek wi feel gud; bad entataynment wahn haam wi. (Reed Jaymz 1:14, 15.) Wi mait kyaahn si how bad entataynment afek wi rait away, bot afta sohn taim paas ih wahn playn fi si. Dat da wai di Baibl waan wi: ‘Noh mek nobadi fool unu: nobadi kyaahn tek Gaad mek papishoh. Eniting weh yu soa, yu wahn reep. If yu di du onli weh fi yoo oan sinful haat waahn, aal weh yu wahn reep fahn dat da det ahn dischrokshan.ʼ (Gal. 6:7, 8) Ih veri impoatant fi mek wi kip weh fahn aal entataynment weh promoat tingz weh Jehoava hayt!—Ps. 97:10.

15. Weh gif Jehoava provaid fi mek wi injai?

¹⁵ Wahn lata Jehoava peepl injai fi wach JW Braadkyaastin. Wahn sista weh naym Marilyn mi seh: “JW Braadkyaastin help mee fi bee wahn hapiya persn, an Ai ku wach evriting pan it kaaz aala it gud fi mi. Wen Ah feel laik Ah deh bai miself er Ah feel laik giv op, Ah fain wahn maanin wership proagram fi wach ahn dat inkorij mi. Ih mek Ah feel kloasa tu Jehoava ahn tu ih aaganaizayshan. JW Braadkyaastin chaynj mi laif kompleetli.” Yoo di yooz dis gif fahn Jehoava? Evri mont pahn JW Braadkyaastin, dehn ga wahn nyoo proagram, ahn dehn aalso ga aadyo ahn veedyo rikaadn, ahn sohn inkorijin sang weh yu ku wach ahn lisn tu weneva yu waahn.

16-17. Wai wi need fi kanchroal di amonk a taim wi spen pahn entataynment, ahn how wi ku du dat?

¹⁶ Wi need fi bee kyaaful bowt weh wi chooz az entataynment, an aalso, bowt humoch taim wi spen pahn entataynment. If wi noh kyaaful, wi ku fain wiself di spen moa taim pahn entataynment dan wi spen di serv Jehoava. Wahn lata bradaz ahn sistaz fain it haad fi kanchroal di amonk a taim dehn spen pahn entataynment. Wahn 18-yaa-oal sista weh naym Abigayl seh: “Wen Ah wach TV da di en a wahn bizi day, ih help mi fi  rilaks. Bot if Ah noh kyaaful, Ah ku spen owaz ahn owaz di wach TV.” Wahn 21-yaa-oal brada weh naym Samwel seh: “Sohntaim Ah wach wahn lata shaat lee veedyo pahn di Intanet. Ah staat owt di wach wan, an Ah nat eevn kanshos wen chree er foa owaz goh bai.”

¹⁷ How yu ku kanchroal di amonk a taim yu spen pahn entataynment? Di fos ting yu need fi du da fain owt humoch taim yu di spen pahn entataynment. Soh, chrai fi kip wahn rekad a it eech week. Rait pahn wahn kalinda humoch taim yu spen di wach TV, di luk pahn tingz pahn di Intanet, ahn di play gaym pahn yu foan er tablet. If yu feel laik yu di spen tu moch taim pahn dehndeh tingz, chrai fi mek wahn skejul. Set taim fi du di moa impoatant tingz fos, ahn den set taim fi spen pahn entataynment. Neks, aks Jehoava fi help yu stik tu yu skejul. If yu du dat, den yu wahn ga moa taim an enerji fi persnal stodi, fi famili wership, fi kangrigayshan meetinz, ahn fi feel servis. Ahn bikaaz yu put Jehoava fos, yu mait injai di taim yu spen pahn entataynment eevn moa.

18-19. How wee ku proov dat wi di wership onli Jehoava?

¹⁸ Afta Peeta mi rait bowt di en a dis werl weh di rool bai Saytan ahn bowt di nyoo werl weh wahn soon kohn, hihn mi seh: “Mi dyaa fren, wail yu di wayt fi da day, du yu bes fi mek di Laad fain yu di liv kleen, soh nobadi kyaahn paint dehn finga pahn yu, ahn yu deh at pees wid Gaad.” (2 Peet. 3:14) Wen wi obay di kongsl fi liv ahn wership Jehoava eena di way how hihn waahn, wi shoa dat wi di wership onli Jehoava.

¹⁹ Saytan ahn dis werl wahn kip di chrai fi mek wi put ada tingz fos eena wi laif insteda Jehoava. (Look 4:13) Bot noh mata weh chalenjiz wi fays, wi noh wahn mek enibadi er eniting tek Jehoava plays eena wi haat. Wee don mek op wi main fi wership onli Jehoava, bikaaz da onli hihn dizerv wi wership!