1. How 2 Korintyanz 3:1-3 help wi fi andastan dat da wahn privilij fi stodi wid sombadi ahn si dehn geh baptaiz? (Koment pahn di picha pahn di kova.)

HOW yoo feel wen yu si wahn Baibl styoodent fahn yu kangrigayshan geh baptaiz? Dat mek yu hapi, noh chroo? (Mach. 28:19) An if yoo da di wan weh stodi wid di persn, ih eevn moa eksaitin fi si ahn geh baptaiz. (1 Tes. 2:19, 20) Nyoo disaiplz da laik “rekomendayshan letaz,” noh onli fi dehn wan weh stodi wid dehn bot fi di hoal kangrigayshan, bikaaz ih shoa dat evribadi kwalifai fi mek disaiplz.—Reed 2 Korintyanz 3:1-3.

2. (a) Weh impoatant kweschanz wi wahn diskos, ahn wai? (b) Wat da wahn Baibl stodi? (Koment pahn di futnoat.)

² Ih veri gud fi si dat fi di paas foa yaaz, wi kandok bowt 10,000,000 Baibl stodiz * evri mont aal oava di werl. Ahn joorin dehn saym yaaz, oava 280,000 peepl geh baptaiz az wan a Jehoava Witnisiz an az Jeezas Krais disaiplz. How wi ku help di res a peepl weh stodi di Baibl fi geh baptaiz? Jehoava stil di gi peepl wahn chaans fi bee Jeezas disaipl, ahn dats wai wi haftu du wi bes fi help dehn fi geh baptaiz az soon az pasabl. Taim noh di wayt fi nobadi!—1 Kor. 7:29a; 1 Peet. 4:7.

3. Weh wi wahn laan eena dis aatikl bowt how fi kandok Baibl stodiz?

 ³ Ih reeli impoatant fi mek disaiplz. Dats wai di Govanin Badi aks di bradaz fahn di difrent branch aafis dehn fi sojeshanz az tu weh wi ku du fi help moa peepl kwalifai fi geh baptaiz. Eena dis aatikl ahn di aatikl afta dis, wi wahn si weh wi ku laan fahn di ekspeeryens a painyaaz, mishineriz, ahn serkit oavaseeyaz. * (Prov. 11:14; 15:22) Dehn eksplayn weh wahn Baibl teecha ku du soh dat di Baibl stodi ku help di Baibl styoodent. Eena dis aatikl, wi wahn diskos faiv tingz weh evri Baibl styoodent need fi du fi mek proagres ahn kwalifai fi geh baptaiz.

4. Weh wi shuda kip in main wen wi kandok shaat Baibl stodiz?

⁴ Lata wi bradaz ahn sistaz di kandok shaat Baibl stodiz wid peepl rait owtsaida dehn hows. Eevn doa dis shoa dat di peepl dehn inchrestid eena di Baibl, dehnya diskoshan noh yoozhwali laas lang ahn dehn noh mait hapm evri week. Fi mek di persn moa inchrestid, som a wi bradaz aks di peepl fi dehn persnal kantak infamayshan soh dat dehn ku kaal dehn er sen dehn wahn teks fi mek dehn ku shayr sohnting fahn di Baibl wid dehn. Dehnya shaat diskoshan mait kantinyu fi monts ahn di Baibl styoodent mait stil noh mek proagres. Soh wahn Baibl styoodent weh noh mek efoat fi ih Baibl stodi moa dan laikli noh wahn mek proagres fi geh baptaiz.

5. Akaadn tu weh Jeezas mi seh da Look 14:27-33, how dat ku help wee fi mek disaiplz?

⁵ Wan taim Jeezas mi yooz wahn iloschrayshan fi eksplayn weh wahn persn need fi du fi bee fi hihn disaipl. Hihn mi taak bowt sombadi weh mi waahn bil wahn towa ahn wahn king weh mi waahn goh da waar. Jeezas mi seh dat di fers ting weh wahn persn weh waahn bil wahn towa fi du da “sidong ahn figa owt humoch evriting wahn kaas” soh ih ku finish bil di towa. Ahn di king mi wahn fers haftu sidong an aks fi advais fi si if dehn ku win di waar er nat. (Reed Look 14:27-33.) Saym way soh, Jeezas mi noa dat wahn persn weh waahn bee fi hihn disaipl fi kyaafuli tink bowt weh ih meen fi fala hihn. Dats wai wi need fi inkorij wi Baibl styoodents weh di mek  proagres fi stodi evri week. How wee ku du dat?

6. Weh wi mait chrai du fi mek wi Baibl styoodent mek proagres?

⁶ Yu ku staat aaf di mek dehndeh shaat Baibl diskoshan lee bit langa. Maybi yu ku staat tu diskos moa dan wan skripcha wid ahn. Ahn wen di Baibl styoodent geh yoostu yoo di kohn fi lee langa, aks ahn if ih noh ga sohnweh wehpaat unu ku sidong fi mek unu ku kantinyu di diskoshan. Di way di Baibl styoodent ansa wahn shoa if ih seeryos er nat bowt ih stodi. Fi mek yu Baibl styoodent laan faas, yu ku aks ahn fi stodi too taimz fi di week. Bot fi stodi wan er too taim fi di week noh wahn inof.

7. How di teecha ku pripyaa fi eech Baibl stodi?

⁷ Az di teecha, yu haftu pripyaa gud bifoa yu goh pahn eech Baibl stodi. Fers, yu ku reed weh unu wahn stodi tugeda ahn luk op aala di skripchaz. Mek shoar yu andastan di mayn point. Tink bowt di taitl a di lesn, di sobhedin dehn, di stodi kweschan dehn, di reed skripcha dehn, di picha dehn, an eni veedyo weh help eksplayn di tapik. Den, tink bowt yu styoodent ahn tek di taim fi si how yu ku teech ahn di infamayshan eena wahn way weh eezi fi mek ih andastan soh dat ih ku yooz it eena ih laif.—Neh. 8:9; Prov. 15:28a.

8. Weh Koloashanz 1:9, 10 teech wi bowt wai wi haftu pray fi wi Baibl styoodent?

⁸ Wen yu di pripyaa fi di Baibl stodi, pray tu Jehoava bowt yu Baibl styoodent ahn bowt how di infamayshan ku help ahn eena ih laif. Aks Jehoava fi help yu yooz di Baibl fi teech ahn eena wahn way weh wahn reech ih haat. (Reed Koloashanz 1:9, 10.) Aks yuself if eni infamayshan weh yu wahn stodi wuda bee haad fi mek yu styoodent andastan er aksep. Memba dat yu goal da fi help ahn kwalifai fi geh baptaiz.

9. How di teecha ku help di styoodent pripyaa fi ih stodi? Pleez eksplayn yu ansa.

⁹ Wi hoap dat wen wi stodi wid wi Baibl styoodent pahn wahn regyula baysis, ih wahn laan fi apreeshiayt weh Jehoava ahn Jeezas du far ahn, an dat ih wahn waahn laan moa. (Mach. 5:3, 6) Fi mek di Baibl styoodent get di moas owta ih stodi, ih haftu foakos pahn weh ih di laan. Chrai yu bes fi mek ih andastan dat ih  impoatant fi pripyaa bifoa evri Baibl stodi. Ih ku reed di infamayshan heda taim ahn tink bowt how ih ku yooz it eena ih laif. How yoo ku help ahn fi du dat? Pripyaa wahn lesn wid yu styoodent soh dat ih ku laan how fi du it. * Shoa ahn how fi fain di ansa tu di kweschanz, ahn wen ih maak jos wahn fyoo werdz ih wahn help ahn memba di ansa. Den aks ahn fi ansa di kweschan eena ih oan werdz. Wen ih du dat, yu wahn ku si if ih andastan di infamayshan er nat. Dehn ga sohnting els weh yu ku teech ahn tu.

10. Wai wahn Baibl styoodent haftu reed di Baibl evri day, ahn weh ih need fi du fi benifit fan ih Baibl reedin?

¹⁰ Wahn styoodent wahn benifit fan ih Baibl stodi evri week, bot ih wahn benifit moa if ih du sohn ada tingz pan ih oan. Ih haftu kamyoonikayt wid Jehoava. How ih ku du dat? Ih haftu lisn tu Jehoava an ih haftu taak tu ahn. Ih ku lisn tu Gaad wen ih reed di Baibl evri day. (Josh. 1:8; Ps. 1:1-3) Shoa ahn dat ih ku yooz di “Baibl Reedin Skejul” weh deh pahn jw.org. * Af koars, fi benifit fan ih Baibl reedin, yu ku inkorij ahn fi tek di taim fi tink bowt weh ih di laan bowt Jehoava ahn how ih ku yooz weh ih di laan eena ih laif.—Aks 17:11; Jay. 1:25.

11. How wahn styoodent ku laan fi pray eena di rait way, ahn wai ih impoatant fi mek dehn pray tu Jehoava regyula?

¹¹ Inkorij yu Baibl styoodent fi pray tu Jehoava evri day. Mek shoar yu pray fahn yu haat da di biginin an en a eech Baibl stodi ahn menshan yu styoodent eena dehndeh pryaaz. Wen ih lisn tu how yu pray, ih wahn laan fi pray fan ih haat tu Jehoava chroo Jeezas Krais naym. (Mach. 6:9; Jan 15:16) Imajin how yu styoodent ku geh kloasa ahn kloasa tu Jehoava Gaad if ih reed ih Baibl (lisn tu Jehoava) ahn pray (taak tu Jehoava) evri day! (Jay. 4:8) If ih du dat evri day, ih wahn help ahn kwalifai fi dedikayt ih laif tu Jehoava ahn geh baptaiz. Wat els ku help ahn?

12. How wahn teecha ku help wahn styoodent fi bee Jehoava fren?

¹² Ih gud if di styoodent andastan weh  ih di laan fahn di Baibl stodi, bot moa impoatant dan dat, di tingz weh ih di laan haftu toch ih haat. Wai? Wi waahn wi styoodent laan bowt Jehoava. Bot di tingz weh ih di laan need fi toch ih haat soh dat ih wahn waahn yooz dehn eena ih laif. Jeezas mi teech peepl lata tingz, ahn dehn mi laik laan fan ahn. Bot peepl mi aalso fala hihn bikaaz weh hihn mi teech toch dehn haat. (Look 24:15, 27, 32) Yu styoodent haftu laan fi si Jehoava az wahn reel Persn, az sombadi weh ku bee ih Faada, ih Gaad, an ih kloas kloas Fren. (Ps. 25:4, 5) Joorin di stodi, help yu styoodent fi si Jehoava byootiful kwalitiz noh mata weh tapik unu di diskos. (Ex. 34:5, 6; 1 Peet. 5:6, 7) Help yu styoodent fi si weh kaina Persn Jehoava. Help yu styoodent fi si Jehoava byootiful kwalitiz, laik lov, kainis, ahn kompashan. Jeezas mi seh dat di fers ahn di moas impoatant komanment da fi “lov Jehoava yu Gaad.” (Mach. 22:37, 38) Help yu styoodent fi laan fi lov Jehoava wid aala ih haat.

13. Giv wahn egzampl weh shoa how fi teech wahn styoodent bowt Jehoava byootiful kwalitiz.

¹³ Wail yu di taak wid yu Baibl styoodent, mek shoar yu tel ahn wai yoo lov Jehoava. Dat wahn help yu styoodent fi si dat ih need fi bee wahn kloas fren wid Jehoava ahn laan fi lov ahn. Fi egzampl, if di stodi poblikayshan seh sohnting bowt Jehoava lov, wizdom, jostis, er powa, yu ku tel yu styoodent dat dis da wan a di reezn wai yoo lov Jehoava. Bot yu styoodent haftu du sohnting els fi kwalifai fi geh baptaiz.

14. Weh Heebrooz 10:24, 25 tel wi bowt wi meetin dehn weh ku help wahn styoodent fi mek spirichwal proagres?

¹⁴ Aala wi waahn wi Baibl styoodent dehn fi mek proagres ahn kwalifai fi geh baptaiz. Wan way wi ku help dehn da fi inkorij dehn fi kohn da wi kangrigayshan meetin dehn. Bradaz ahn sistaz weh don teech lata styoodents aredi seh dat wen di styoodent dehn goh da meetin rait away dehn mek proagres faas. (Ps. 111:1) Dehn tel dehn Baibl styoodent dehn dat if dehn reeli waahn laan weh di Baibl teech, dehn haftu stodi di Baibl ahn goh da meetin. Reed Heebrooz 10:24, 25 wid yu styoodent an eksplayn tu ahn how ih wahn benifit if ih goh da meetin. Play di veedyo Weh Aal Hapm da Wahn  Kingdom Haal? * Help yu styoodent fi mek di meetin dehn bee wahn impoatant paat a ih laif.

15. Weh yu ku du fi inkorij yu styoodent fi goh da meetin regyula?

¹⁵ Weh yu ku du if yu styoodent neva yet gaahn da meetin er if ih onli goh sohntaim? Tel ahn bowt sohnting weh yoo laan da di meetin ahn how hapi ih mek yu feel. Wen ih si how yoo feel bowt di meetin, ih mait waahn kohn tu. Gi ahn wahn kapi a di Wachtowa er di Laif ahn Minischri Meetin Werkbuk weh wi di yooz da di meetin. Shoa ahn weh wi wahn diskos da di neks meetin an aks ahn wich paat song inchrestin tu ahn. Weh yu styoodent si ahn hyaa da ih fers Kristyan meetin wahn bee beta dan eniting weh ih eva si er hyaa da eni ada rilijos meetin. (1 Kor. 14:24, 25) Ih wahn meet adaz weh set wahn gud egzampl weh ih ku fala ahn weh wahn help ahn fi kwalifai fi geh baptaiz.

16. Weh yu haftu du fi help yu Baibl styoodent kwalifai fi geh baptaiz, ahn weh wi wahn diskos eena di neks aatikl?

¹⁶ Weh wi ku du fi help wi Baibl styoodent kwalifai fi geh baptaiz? Wi help wi styoodent wen wi inkorij ahn fi noh mis ih stodi ahn fi pripyaa fi eech stodi, ahn den ih wahn si dat di stodi veri impoatant. Wi waahn inkorij wi Baibl styoodent fi kamyoonikayt wid Jehoava evri day ahn bee ih kloas kloas fren. Wi aalso waahn inkorij di styoodent fi goh da aala di kangrigayshan meetin dehn. (Si di baks “ Weh Wahn Styoodent Need fi Du fi Kwalifai fi Geh Baptaiz.”) Di neks aatikl wahn diskos faiv moa tingz weh wi need fi du fi help wi Baibl styoodent dehn kwalifai fi geh baptaiz.