1. Weh Kristyanz weh don baptaiz need fi kantinyu du?

YOO da wahn baptaiz servant a Jehoava? If di ansa da yes, wen yoo mi geh baptaiz yu mi shoa evribadi dat yu ga fayt eena Jehoava ahn dat yu wilin fi serv ahn lang wid fi hihn aaganaizayshan. * Fi shoar, yu need fi mek yu fayt eena Jehoava kantinyu groa. Ahn yu need fi kantinyu chros dat Jehoava di yooz fi hihn aaganaizayshan tudeh.

2-3. How Jehoava di leed fi hihn aaganaizayshan tudeh? Pleez yooz di egzampl eena di paragraaf.

² Tudeh, Jehoava di leed ih aaganaizayshan eena wahn way weh shoa weh kaina persn hihn, wat da ih perpos dehn, ahn wat da ih standad dehn. Mek wi diskos chree a Jehoava kwalitiz weh wi ku si eena fi hihn aaganaizayshan.

³ Fers, “Gaad chreet evribadi di saym way.” (Aks 10:34) Da bikaaz a lov Jehoava mi sen fi hihn Son fi pay di ransom prais soh dat “evribadi ku bee free fahn sin.” (1 Tim. 2:6; Jan 3:16) Jehoava yooz fi hihn peepl fi preech di gud nyooz tu evribadi hoo wahn lisn, ahn dis da how hihn help wahn lata peepl fi benifit fahn di ransom. Sekant, Jehoava da wahn Gaad a pees an aada. (1 Kor. 14:33, 40) Dats wai wi shuda ekspek dat di wan dehn weh wership hihn wuda serv ahn az wahn aaganaiz ahn peesful groop. Terd, Jehoava da di “Gran Inschrokta.” (Isa. 30:20, 21) Dat da wai ih aaganaizayshan werk haad fi teech peepl bowt ih Werd di Baibl eena di kangrigayshan an eena di minischri. How di Kristyanz eena di fers senchri mi kapi dehnya chree kwaliti weh Jehoava gat? How Jehoava peepl kapi dehnya kwalitiz tudeh? Ahn how hoali spirit ku help wi wail wi serv Jehoava lang wid fi hihn aaganaizayshan tudeh?

4. Akaadn tu Aks 1:8, weh Jeezas mi koman ih falowaz fi du, ahn how dehn mi wahn geh di help weh dehn mi need?

⁴ Eena di fers senchri. Di mesij weh Jeezas mi preech gi hoap tu aal hyoomanz. (Look 4:43) Hihn mi koman ih falowaz fi kantinyu di werk weh hihn mi staat ahn fi preech “aal oava di ert.” (Reed Aks 1:8.) Af koars, dehn kudn du dis werk bai dehnself, bot dehn mi wahn need hoali spirit, weh da “di helpa” weh Jeezas mi pramis dehn.—Jan 14:26; Zech. 4:6.

5-6. How hoali spirit mi help Jeezas falowaz?

⁵ Jeezas falowaz mi geh di hoali spirit da Pentikaas 33 C.E. Soh hoali spirit mi help dehn fi staat preech rait away, an eena wahn shaat taim towznz a peepl mi aksep di gud nyooz. (Aks 2:41; 4:4) Wen peepl mi staat tu tern gens dehn, di disaipl dehn neva geh frayd, bot dehn mi tern tu Gaad an aks ahn fi help. Dehn mi pray: “Gi yu slayv dehn di korij fi neva stap taak bowt yu werd tu adaz.” Dehn mi geh ful op wid hoali spirit ahn dehn mi kantinyu fi “taak di werd a Gaad wid korij.”—Aks 4:18-20, 29, 31.

⁶ Jeezas disaipl dehn mi ga ada chalenjiz tu. Fi egzampl, onli wahn fyoo kapiz a di Skripchaz mi egzis. Di disaiplz neva ga buks weh eksplayn di Baibl laik weh wee gat tudeh. Ahn di disaipl dehn mi haftu preech tu peepl weh mi taak difrent langwij. Bot eevn doa dehn mi ga difrent chalenjiz, dehn mi du sohnting weh mi luk impasabl fi du. Eena bowt 30 yaaz, dehn mi preech di gud nyooz “aal oava di werl.”—Kol. 1:6, 23.

7. Moa dan 100 yaaz agoa, how Jehoava servant dehn mi noa weh Gaad mi waahn fahn dehn, ahn weh dehn mi du?

⁷ Nowadayz. Jehoava kantinyu fi gaid ahn leed ih peepl ahn gi dehn di schrent weh dehn need fi du fi hihn wil. Hihn leed ahn gaid ih peepl chroo ih Werd, di Baibl, weh kohn fahn fi hihn hoali spirit. Eena di Baibl, wi reed bowt Jeezas minischri ahn di koman weh ih giv ih falowaz fi kantinyu di werk weh hihn mi staat. (Mach. 28:19, 20) Fahn way bak eena Joolai 1881, dis magazeen kuda mi seh: “Jehoava neva chooz wee soh dat hyoomanz ku aana wi er soh dat wi ku bee rich, hihn mi chooz wi soh dat wi kuda mi du aal weh wi kud fi preech di gud nyooz.” Di broashoar weh naym To Whom the Work Is Entrusted, weh mi geh poblish eena 1919, seh: “Lata werk deh fi du, bot dis da di Laad werk, ahn hihn wahn gi wi di schrent fi du it.” Yes, jos laik di Kristyanz bak den, dehndeh bradaz mi ga korij, ahn dehn mi werk haad ahn chros dat di hoali spirit mi wahn help dehn fi preech tu aal kaina peepl. Ahn wi aalso chros dat di hoali spirit wahn help wi tudeh.

8-9. Weh toolz Jehoava aaganaizayshan yooz fi spred di gud nyooz aal oava di werl?

⁸ Jehoava aaganaizayshan yooz di bes toolz fi spred di gud nyooz aal oava di werl. Dehnya toolz inklood poblikayshanz weh print, di “Photo-Drama of Creation,” rekad playaz, sohn kaar wid lowd speeka pahn dehn, rayjo proagram, ahn tudeh, dijital teknalaji. Gaad aaganaizayshan aalso di chranslayt infamayshan eena moa langwij dan eva bifoa! Wai? Soh dat peepl ku hyaa di gud nyooz eena fi dehn oan langwij. Jehoava chreet evribadi di saym way; hihn mi seh dat di gud nyooz wahn geh preech tu peepl “fahn evri nayshan ahn chraib, ahn tu peepl fahn difrent rays, ahn tu peepl weh taak aal difrent kaina langwij.” (Rev. 14:6, 7) Hihn waahn mek evribadi hyaa di Kingdom mesij.

⁹ How bowt di peepl weh wi kyaahn preech tu bikaaz dehn liv eena apaatment weh ga wahn wachman er weh liv da wahn  plays wehpaat wi kyaahn get een? Fi preech tu dehnya peepl, Jehoava moov ih aaganaizayshan fi yooz difrent faam a poblik witnisin. Fi egzampl, eena 2001, di Govanin Badi mi gi permishan tu di bradaz ahn sistaz eena France an ada konchriz fi yooz lichricha kyaat an ada wayz fi display di lichricha. Dehn mi ga gud rizolts. Eena 2011, wahn nyoo proagram mi staat op da di United States eena wan a di moas krowdid ayryaz da New York City. Eena di fers yaa, wi mi giv owt 102,129 buk ahn 68,911 magazeen. Ahn 4,701 peepl mi aks fi wahn Baibl stodi! Ih klyaa fi si dat Jehoava hoali spirit mi-di sopoat dis werk. Soh di Govanin Badi gi permishan tu wi bradaz ahn sistaz aal rong di werl fi yooz di lichricha kyaat dehn an ada wayz fi display lichricha.

10. Weh wee ku du fi preech ahn teech beta?

¹⁰ Weh yu ku du. Da wi Kristyan meetin dehn, Jehoava chrayn wi how fi preech, soh mek gud yoos a evriting weh wi laan deh. Mek it wahn habit fi preech wid yu feel servis groop. Di bradaz ahn sistaz eena yu groop ku help yu fi preech ahn teech beta, ahn dehn ku inkorij yu bai dehn gud egzampl. Kantinyu preech noh mata weh chalenjiz yu fays. Laik weh wi teem skripcha seh, da noh bikaaz a wi oan schrent wi du Gaad wil, bot da bai fi hihn hoali spirit. (Zech. 4:6) Ahn wi ku bee shoar dat hihn wahn gi wi ih hoali spirit bikaaz wi di du fi hihn werk.

11. How di govanin badi eena di fers senchri mi werk tugeda fi kip aada monks Gaad peepl?

¹¹ Eena di fers senchri. Di govanin badi mi werk tugeda fi kip aada ahn pees monks Gaad peepl. (Aks 2:42) Fi egzampl, di Kristyanz mi ga difrent opinyan bowt weda evribadi mi haftu geh serkomsaiz fi serv Jehoava. Soh anda di gaidans a di hoali spirit, di govanin badi mi diskos di ishu. Wai? Bikaaz if dis ishu mi kantinyu fi divaid di kangrigayshan, den dat mi wahn afek di way dehn preech. Eevn doa di apasl an elda dehn da-mi Jooz, dehn neva mek di Jooish chradishan er di wan dehn weh mi-di promoat dehndeh chradishan afek di way dehn handl dis ishu. Insteda dat, dehn  mi reed Gaad Werd an aks Gaad fi gi dehn ih hoali spirit fi mek di rait disizhan. (Aks 15:1, 2, 5-20, 28) Wat da-mi di rizolt? Jehoava mi bles dehn disizhan, di kangrigayshan mi stay peesful ahn yoonaitid, ahn dehn mi kip aan di preech di gud nyooz.—Aks 15:30, 31; 16:4, 5.

12. How wee noa dat Jehoava aaganaizayshan aaganaiz ahn peesful nowadayz?

¹² Nowadayz. Jehoava aaganaizayshan help Jehoava peepl fi mek dehn ku stay aaganaiz ahn peesful. Way bak eena 1895, di Novemba 15 kapi a di magazeen Zionʼs Watch Tower and Herald of Christʼs Presence mi gat een wahn aatikl weh naym “Decently and in Order,” weh bays pahn 1 Korintyanz 14:40. Di aatikl mi seh: “Di apasl dehn mi ga wahn lat fi seh bak den bowt how Kristyanz need fi ‘du evriting eena wahn deesent an aadali way.ʼ” Ahn den di aatikl mi seh dat sins “evriting weh mi geh rait dong fahn way bak mi geh rait dong fi teech wi,” ih wuda gud fi mek wi kantinyu du tingz aadali tudeh tu. (Roam. 15:4) Yes, jos laik eena di taim a di fers Kristyanz, Jehoava aaganaizayshan tudeh di werk haad fi kip di Kristyan kangrigayshan dehn aaganaiz ahn peesful. Fi egzampl: If yoo goh da wahn Wachtowa Stodi eena wahn nada kangrigayshan—eevn if da eena wahn nada konchri—di saym way how di bradaz kandok it ahn stodi it deh da di sayhn way how dehn du it eena yu oan kangrigayshan. Rait away, yu wahn feel laik yu deh hoam! Onli Gaad hoali spirit ku mek fi hihn peepl bee soh yoonaitid!—Zeph. 3:9, ftn.

13. Wen yu reed Jaymz 3:17, weh kweschanz ih mek yu aks yuself?

¹³ Weh yu ku du. Jehoava waahn ih peepl fi ‘kip di yooniti weh di spirit giv dehn ahn liv eena pees wid wan anada.ʼ (Ifee. 4:1-3) Soh aks yuself: ‘Ai promoat yooniti ahn pees eena di kangrigayshan? Ai obeedyant tu di wan dehn weh di tek di leed? Adaz ku pen pahn mee, espeshali if Ah ga wahn rispansabiliti eena di kangrigayshan? Ai aalwayz deh pahn taim, wilin fi help owt, ahn hapi fi serv mi bradaz ahn sistaz?ʼ (Reed Jaymz 3:17.) If yu si dat yu need fi du beta eena sohn ayryaz, den pray fi hoali spirit.  Kaaz di moa yu alow Gaad hoali spirit fi help yu ga wahn beta persnaliti ahn di moa yu alow it fi afek di tingz weh yu du, di moa yu bradaz ahn sistaz wahn lov yu an apreeshiayt dat yoo da paat a di kangrigayshan.

14. How Jehoava mi help ih peepl eena di fers senchri fi andastan di “kompleet nalij bowt fi hihn wil”?

¹⁴ Eena di fers senchri. Jehoava lov fi teech ih peepl. (Ps. 32:8) Hihn waahn dehn fi noa hihn, fi lov hihn, ahn fi liv fareva az fi hihn chiljren weh ih onli lov. Non a dat mi wahn bee pasabl if hihn neva teech ih peepl. (Jan 17:3) Jehoava mi yooz di Kristyan kangrigayshan eena di fers senchri fi teech ih peepl. (Reed Koloashanz 1:9, 10.) Hoali spirit—di “helpa” weh Jeezas mi pramis—mi aalso help ih disaipl dehn. (Jan 14:16) Hoali spirit mi help di disaipl dehn fi andastan Gaad Werd ahn memba evriting weh Jeezas mi seh ahn du, ahn dehn kuda mi reed bowt dehn tingz laytaraan eena di Gaspl Dehn. Dis mi help di Kristyanz bak den fi ga schranga fayt, ahn dehn lov fi Gaad, ih Son, ahn wan anada mi aalso groa schranga ahn schranga.

15. Eena weh wayz yoo si Jehoava mek ih pramis da Isaiah 2:2, 3 kohn chroo?

¹⁵ Nowadayz. Jehoava mi seh dat “eena di laas paat a di dayz” peepl fahn aal nayshanz wuda jain di wan dehn weh reeli wership hihn fi laan moa bowt fi hihn wayz. (Reed Isaiah 2:2, 3.) * Wee di si how da prafesi di kohn chroo tudeh. Ih klyaa fi si dat chroo wership beta dan eni kaina faals wership.  Ahn Jehoava di gi ih peepl wahn lata infamayshan bowt di Baibl! (Isa. 25:6) Jehoava di yooz “di faytful ahn waiz slayv” fi gi wi aala dis infamayshan, ahn wi ku injai dis infamayshan eena difrent wayz. Fi egzampl, wi ku reed difrent aatikl, lisn tu sohn taak, ahn wi ku eevn wach kaartoon an ada veedyo. (Mach. 24:45) Wi feel jos laik how Joab fren Ilaihyu mi feel wen ih mi seh: “Hoo ku teech laik [Gaad]?”—Job 36:22.

16. Weh yoo ku du fi benifit fahn weh Jehoava di teech wi?

¹⁶ Weh yu ku du. Gaad hoali spirit wahn help yu fi put intu praktis evriting weh yu reed ahn stodi eena fi hihn Werd. Pray jos laik di saamis hoo mi seh: “Oa Jehoava, teech mi bowt yu way. Ah wahn liv akaadn tu yu chroot. Help mi fi rispek yu naym wid aala mi haat.” (Ps. 86:11) Soh kantinyu fi reed ahn stodi di Baibl an ada poblikayshanz weh Jehoava aaganaizayshan provaid. Af koars, yu goal da noh jos fi geh hed nalij. Bot yu waahn kanvins yuself dat dis da di chroot; yu waahn mek di chroot reech yu haat soh dat yu ku yooz it eena yu laif. Jehoava hoali spirit ku help yu du dat. Aalso, yu need fi inkorij yu bradaz ahn sistaz. (Heeb. 10:24, 25) Wai? Bikaaz dehn da yu spirichwal famili. Soh pray fi mek Gaad hoali spirit help yu fi gi sinsyaa koments da di Kristyan meetin dehn ahn fi du yu bes weneva yu geh wahn asainment. Wen yu du dehnya tingz, yu di shoa Jehoava an ih Son dat yu lov fi dehn preshos “sheep.”—Jan 21:15-17.

17. How yoo ku shoa dat yu laayal tu Jehoava aaganaizayshan?

¹⁷ Soon, di onli aaganaizayshan weh wahn lef pahn di ert da di wan weh Jehoava hoali spirit di leed. Soh du yu bes fi werk lang wid Jehoava aaganaizayshan. Jos laik Gaad, shoa dat yu lov evribadi. Ahn yu ku du dat wen yu preech di gud nyooz tu evribadi weh yu meet. Fala fi hihn egzampl a lov an aada wen yu promoat yooniti eena di kangrigayshan. Lisn tu yu Gran Inschrokta ahn laan fahn di infamayshan weh ih gi wi. Den wen Saytan werl geh dischrai, yu noh wahn frayd. Insteda dat, yu wahn ga korij fi stan op monks di wan dehn weh di serv Jehoava ahn weh laayal tu fi hihn aaganaizayshan.