STODI AATIKL 44
Yu Chiljren Wahn Serv Gaad Wen Dehn Groa Op?
“Az Jeezas kantinyu fi groa, ih geh waiza ahn waiza, ahn Gaad an evribadi mi lov ahn.”—LOOK 2:52.
SANG 134 Pikni Da Wahn Rispansabiliti Fahn Gaad
WEH WI WAHN DISKOS? *
1. Wat da di bes disizhan enibadi ku mek?
YOOZHWALI, di disizhanz weh payrents mek afek dehn chiljren fi wahn lang taim. Soh if payrents mek bad disizhanz, dehn ku kaaz prablemz fi dehn chiljren. Bot if dehn mek gud disizhanz, dehn di giv dehn chiljren wahn chaans fi liv wahn hapi laif. Bot chiljren need fi mek gud disizhanz tu. Ahn di bes disizhan weh enibadi ku mek da fi serv wi lovin hevnli Faada, Jehoava.—Ps. 73:28.
2. Weh gud disizhanz Jeezas an ih payrents mi mek?
2 Mayri ahn Joazef mi waahn help dehn chiljren fi serv Jehoava, ahn di disizhanz weh dehn mi mek mi shoa dat fi serv Jehoava da-mi di moas impoatant ting eena dehn laif. (Look 2:40, 41, 52) Jeezas mi aalso mek gud disizhanz weh mi help ahn fi du weh Jehoava mi waahn hihn du. (Mach. 4:1-10) Jeezas mi groa op fi bee wahn laayal, kain, ahn brayv man. Aal payrents hoo lov Jehoava wuda mi bee prowd ahn hapi fi ga wahn son laik hihn.
3. Weh kweschanz wi wahn ansa eena dis aatikl?
3 Eena dis aatikl, wi wahn ansa dehnya kweschan: Weh gud disizhanz Jehoava mi mek bowt Jeezas? Weh Kristyan payrents ku laan fahn di disizhanz weh Joazef ahn Mayri mi mek? Ahn weh yong Kristyanz ku laan fahn di disizhanz weh Jeezas mi mek?
LAAN FAHN JEHOAVA
4. Weh impoatant disizhan Jehoava mi mek bowt ih Son?
4 Jehoava mi chooz di bes payrents fi Jeezas. (Mach. 1:18-23; Look 1:26-38) Mayri sinsyaa werdz weh deh eena di Baibl shoa humoch shee mi lov Jehoava ahn fi hihn Werd. (Look 1:46-55) Ahn di way how Joazef mi fala Jehoava inschrokshanz mi shoa humoch hihn lov Jehoava ahn dat ih mi waahn mek Jehoava hapi.—Mach. 1:24.
5-6. Weh Jehoava mi alow ih Son fi goh chroo?
5 Noatis dat Jehoava neva pik rich peepl fi bee Jeezas payrents. Di sakrifais weh Joazef ahn Mayri mi aafa op afta Jeezas mi baan shoa dat dehn mi poa. (Look 2:24) Joazef mi praabli werk az wahn kyaapenta eena wahn smaal shap weh mi deh neks tu ih hows da Nazaret. Moa dan laikli, dehn neva ga wahn lata moni er tingz, espeshali bikaaz dehn mi en op di gat sevn er moa chiljren.—Mach. 13:55, 56.
6 Jehoava mi protek Jeezas fahn sertn daynjaz, bot Hihn neva protek ahn fahn evri chalenj. (Mach. 2:13-15) Fi egzampl, Jeezas mi haftu deel wid famili membaz weh neva bileev eena ahn. Imajin how bad Jeezas mosi mi feel bikaaz fi hihn oan famili membaz neva bileev dat hihn da di Mesaiya. (Maak 3:21; Jan 7:5) Aalso, Joazef mi praabli ded wen Jeezas mi yong, ahn dis mosi mi reeli hert Jeezas. Ahn sins Jeezas da-mi di oaldis son, hihn mosi mi haftu tek op di famili bizniz afta Joazef mi ded. (Maak 6:3) Wen Jeezas mi groa op, hihn laan how fi tek kayr a ih famili. Ahn hihn mi praabli haftu werk haad fi get di moni ahn tingz weh dehn mi need. Soh hihn mi noa weh ih feel laik fi bee taiyad afta wahn lang day a werk.
Payrents, unu mos teech unu chiljren how fi fain advais eena Gaad Werd soh dat dehn ku pripyaa fi eniting weh ku hapm eena laif (Paragraaf 7) *
7. (a) Weh kweschanz wahn help marid koplz fi bee gud payrents? (b) How Proverbs 2:1-6 ku help payrents fi chrayn dehn chiljren?
7 If yu marid, ahn yoo ahn yu mayt waahn ga chiljren, aks unuself dehnya kweschan: ‘Wee da hombl peepl weh lov Jehoava ahn fi hihn Werd? Jehoava wuda chooz wee fi tek kyaa a wahn preshos lee baybi?ʼ (Ps. 127:3, 4) If yoo da don wahn payrent, aks yuself: ‘Ai di teech mai chiljren dat ih gud fi werk haad?ʼ (Eccl. 3:12, 13) ‘Ai di du mai bes fi protek mai chiljren fahn di daynjaros tingz weh dehn mait haftu fays eena Saytan werl?ʼ (Prov. 22:3) Yu kyaahn protek yu chiljren fahn aala di chalenjiz weh dehn mait fays. Dat impasabl! Bot yu ku pripyaa dehn fi fays prablemz eena laif wen yu teech dehn how fi goh tu Gaad Werd fi advais. (Reed Proverbs 2:1-6.) * Fi egzampl, if wan a yu famili membaz chooz fi stap wership Jehoava, help yu chiljren fi laan fahn Gaad Werd wai ih impoatant fi mek dehn stay laayal tu Jehoava. (Ps. 31:23) Er if sohnbadi weh yu lov ded, shoa yu chiljren sohn skripchaz weh ku help dehn fi get chroo da taim a sadnis ahn fi fain pees.—2 Kor. 1:3, 4; 2 Tim. 3:16.
LAAN FAHN JOAZEF AHN MAYRI
8. Akaadn tu Deuteronomy 6:6, 7, weh Joazef ahn Mayri mi haftu du?
8 Joazef ahn Mayri mi help Jeezas fi groa op fi bee sohnbadi weh Gaad lov, bikaaz dehn mi fala Jehoava inschrokshanz tu payrents. (Reed Deuteronomy 6:6, 7.) * Joazef ahn Mayri mi ga wahn deep lov fi Jehoava ahn dehn moas impoatant goal da-mi fi inkorij dehn chiljren fi ga da saym lov fi Jehoava.
9. Weh impoatant disizhanz Joazef ahn Mayri mi mek?
9 Joazef ahn Mayri mi chooz fi wership Jehoava regyula lang wid dehn chiljren. Fi shoar, dehn gaahn da di meetin dehn weh mi tek plays evri week eena di sinagag da Nazaret, an evri yaa dehn gaahn da di Paasoava da Jeroosalem. (Look 2:41; 4:16) Dehn mosi mi yooz dehndeh chrip tu Jeroosalem fi teech Jeezas an ih breda ahn sista dehn bowt di hischri a Jehoava peepl, ahn maybi lang di way dehn mi vizit sohn plays weh di Skripchaz menshan. Wen Joazef ahn Mayri mi ga moa chiljren, ih mosi neva eezi fi mek dehn kip aan di wership Jehoava regyula. Bot bikaaz dehn mi du dehn bes, dehn mi get wahn lata blesinz! Ahn sins dehn mi put dehn wership tu Jehoava fers, dehn famili mi aybl fi ga wahn kloas rilayshanship wid Jehoava.
10. Wat da sohn lesn Kristyan payrents ku laan fahn Joazef ahn Mayri egzampl?
10 Wat da sohn lesn Kristyan payrents ku laan fahn Joazef ahn Mayri egzampl? Di moas impoatant lesn da fi teech yu chiljren dat yu reeli lov Jehoava bai di tingz weh yu seh ahn du. Di bes gif weh yoo ku gi dehn da fi help dehn lov Jehoava. Ahn wahn nada impoatant lesn weh yu ku teech dehn da fi gat gud spirichwal habits laik, fi stodi, pray, goh da di meetin dehn, ahn goh pahn feel servis. (1 Tim. 6:6) Af koars, yu haftu gi yu chiljren dehn di mateeryal tingz weh dehn need tu. (1 Tim. 5:8) Bot memba, di tingz weh yu chiljren oan da noh weh wahn help dehn fi servaiv di en a Saytan sistem, da dehn kloas rilayshanship wid Jehoava wahn help dehn get eena Gaad nyoo werl. *—Ezek. 7:19; 1 Tim. 4:8.
Ih toch wi haat wen wi si Kristyan payrents mek gud spirichwal disizhanz fi dehn famili! (Paragraaf 11) *
11. (a) How di advais weh deh eena 1 Timoti 6:17-19 wahn help payrents fi mek gud disizhanz wen dehn di rayz dehn chiljren? (b) Weh goalz yu famili mait set ahn weh blesinz yu ku get? (Koment pahn di baks “ Weh Goalz Yoo Wahn Set?”)
11 Ih reeli inkorijin fi si wahn lata Kristyan payrents di mek gud spirichwal disizhanz soh dat dehn famili ku stay kloas tu Jehoava! Dehn aalwayz wership Jehoava tugeda. Dehn goh da di meetin ahn kanvenshan dehn tugeda. Ahn dehn goh pahn feel servis tugeda tu. Sohn famili ku eevn preech eena sohn teritori weh di kangrigayshan noh get fi kova az aafn. Ahn sohn ada famili vizit Betel er sopoat som a di kanschrokshan proajek weh tek plays eena Jehoava aaganaizayshan. Wahn famili mait haftu sakrifais sertn tingz soh dat dehn ku gat inof moni fi du dehndeh aktiviti. An ih mait bee reeli haad fi dehn. Bot fi shoar Jehoava wahn bles dehn, ahn hihn noh wahn hoal notn bak. (Reed 1 Timoti 6:17-19.) Chiljren weh groa op dis way kantinyu fi du dehnya tingz, ahn dehn hapi dat dehn payrents mi rayz dehn eena da way! *—Prov. 10:22.
LAAN FAHN JEEZAS
12. Wai Jeezas mi haftu mek gud disizhanz?
12 Jeezas hevnli Faada aalwayz mek gud disizhanz, ahn Joazef ahn Mayri mi mek gud disizhanz tu. Bot az Jeezas mi groa op, hihn mi haftu mek ih oan disizhanz. (Gal. 6:5) Hihn kuda mi chooz fi ihself weh ih mi wahn du wid ih laif, jos laik di res a wi. Hihn kuda mi chooz fi bee selfish ahn noh du weh Gaad waahn ih du. Bot insteda dat, hihn mi chooz fi mantayn wahn kloas rilayshanship wid Jehoava. (Jan 8:29) How fi hihn egzampl ku help yong peepl tudeh?
Yong wanz, aalwayz lisn tu yu payrents (Paragraaf 13) *
13. Weh impoatant disizhan Jeezas mi mek wen ih mi yong?
13 Wen Jeezas mi smaal, hihn mi chooz fi obay fi hihn payrents. Hihn neva feel laik hihn mi noa beta dan dehn, soh ih mi aalwayz du weh dehn tel ahn fi du. Di Baibl seh dat “hihn mi kantinyu fi obay dehn.” (Look 2:51) Sins hihn da-mi di oaldis son, hihn mi ga sohn rispansabiliti eena di hows, ahn moa dan laikli, hihn mi tek dehndeh rispansabiliti seeryos. Jeezas mi werk haad fi laan how fi bee wahn kyaapenta fan ih hyooman pa, Joazef. Da way deh, Jeezas kuda mi help mek moni fi sopoat ih famili.
14. How wee noa dat Jeezas mi stodi Gaad Werd?
14 Jeezas payrents mi praabli tel ahn bowt di mirakl weh Jehoava mi du fi mek Jeezas kuda mi baan pahn di ert ahn weh di aynjelz mi seh bowt ahn. (Look 2:8-19, 25-38) Bot Jeezas neva satisfai wid jos di hyaa dehndeh tingz; hihn mi stodi di Baibl fi ihself. How wee noa dat Jeezas mi stodi Gaad Werd? Bikaaz wen Jeezas da-mi wahn lee bwai an ih mi deh da Jeroosalem, di rilijos teechaz “mi impres wid humoch tingz hihn mi andastan ahn wid di way ih mi-di ansa dehn.” (Look 2:46, 47) Ahn wen Jeezas mi jos 12 yaaz oal, hihn mi don proov tu ihself dat Jehoava da-mi fi hihn hevnli Faada.—Look 2:42, 43, 49.
15. How Jeezas mi shoa dat hihn mi chooz fi du weh Jehoava mi waahn ih du?
15 Wen Jeezas mi fain owt weh Jehoava mi waahn ih du, hihn mi wilin fi du it. (Jan 6:38) Ahn hihn mi noa dat lata peepl mi wahn hayt ahn. An eevn doa hihn neva waahn dat hapm tu ahn, ih mi stil chooz fi obay Jehoava. An afta hihn mi geh baptaiz eena 29 C.E., di moas impoatant ting tu hihn da-mi fi du weh Jehoava mi waahn ih du. (Heeb. 10:5-7) Eevn wen hihn mi-di ded pahn di taacha stayk, hihn stil neva giv op fi du weh ih Pa waahn ih du.—Jan 19:30.
16. Wat da wahn lesn weh chiljren ku laan fahn Jeezas?
16 Obay yu payrents. Joazef ahn Mayri neva perfek, ahn fi yoo payrents noh perfek needa. Bot Jehoava gi fi yoo payrents di rispansabiliti fi protek yu, chrayn yu, ahn gaid yu. If yu lisn tu dehn advais ahn rispek dehn atariti, “yu ku ga wahn gud laif.”—Ifee. 6:1-4.
17. Akaadn tu Joshua 24:15, weh disizhan yong peepl haftu mek fi dehnself?
17 Disaid hoo yu wahn serv. Yu haftu proov tu yuself hoo da Jehoava, wat da fi hihn perpos, weh hihn waahn fahn yoo, ahn how yu ku yooz yu laif fi du weh hihn waahnt. (Roam. 12:2) Den dat wahn help yu fi mek di bes disizhan eena yu laif, di disizhan fi serv Jehoava. (Reed Joshua 24:15; * Eccl. 12:1) If yu kip di reed ahn stodi di Baibl regyula, yu lov fi Jehoava wahn kantinyu fi groa ahn yu fayt wahn kantinyu fi geh schranga ahn schranga.
18. Weh disizhan yong peepl haftu mek, ahn how dehn wahn benifit?
18 Chooz fi du weh Jehoava waahn yu du. Saytan werl pramis yu dat if yu yooz yu skilz onli fi benifit yuself, yu wahn bee hapi. Bot reeli, peepl weh onli foakos pahn mateeryal tingz onli “en op di kaaz dehnself wahn lata payn.” (1 Tim. 6:9, 10) Pahn di ada han, if yu lisn tu Jehoava ahn chooz fi du weh hihn waahn yu du ahn mek dat bee di moas impoatant ting eena yu laif, yu wahn ga sokses ahn “yu wahn ak wid wizdom.”—Josh. 1:8.
WEH YU WAHN CHOOZ FI DU?
19. Weh payrents haftu memba?
19 Payrents, unu need fi du unu bes fi help unu famili serv Jehoava. Pen pahn Jehoava, ahn hihn wahn help yu fi mek gud disizhanz. (Prov. 3:5, 6) Memba dat di tingz weh yu du wahn afek yu chiljren way moa dan di tingz weh yu seh. Soh mek disizhanz weh wahn help yu chiljren fi pleez Jehoava.
20. Weh blesinz yong peepl wahn get if dehn chooz fi serv Jehoava?
20 Yong peepl mos memba dat dehn payrents ku help dehn fi mek gud disizhanz eena dehn laif. Bot if yoo da wahn yong persn, yu haftu mek gud disizhanz fi yuself soh dat yu ku pleez Jehoava. Soh kapi Jeezas egzampl ahn chooz fi serv yu lovin hevnli Faada. If yu du dat, yu wahn ga wahn bizi an eksaitin laif weh ful a meenin. (1 Tim. 4:16) An eena di fyoocha, yu wahn ku liv di hapiyis laif yu kuda eva liv!
SANG 133 Wership Jehoava Wail Yu Yong
^ párr. 5 Kristyan payrents waahn dehn chiljren bee hapi ahn serv Jehoava wen dehn groa op. Weh disizhanz payrents ku mek soh dat dehn chiljren reech dehn goal fi serv Jehoava? Weh disizhanz yong Kristyanz need fi mek soh dat dehn ku ga reel sokses eena laif? Eena dis aatikl, wi wahn ansa dehndeh kweschan.
^ párr. 7 Proverbs 2:1-6: “Mi son, aksep di ting dehn weh Ah tel yu ahn chrezha mi komanment dehn. 2 Mek yu ayz pay atenshan tu wizdom, an oapm op yu haat tu gud jojment. 3 Pahn tap a dat, hala owt fi andastandin ahn bayg fi moa andastandin. 4 Kip aan di luk fi dehn laik if yu di luk fi silva, ahn kip aan di saach fi dehn laik if yu di saach fi beri chrezha. 5 If yu du aala dehnya tingz, den yu wahn andastan weh ih meenz fi fyaa Jehoava, ahn yu wahn fain di nalij a Gaad, 6 kaaz da Jehoava ihself gi wizdom, ahn nalij ahn gud jojment kohn fahn fi hihn mowt.”
^ párr. 8 Deuteronomy 6:6, 7: “Dehnya werdz weh Ah di koman yu tudeh need fi deh eena fi yoo haat, 7 ahn yu need fi teech dehn tu yu chiljren oava an oava ahn taak bowt dehn wen yu di sidong eena yu hows ahn wen yu di waak pahn di road ahn wen yu di lidong ahn wen yu get op.”
^ párr. 11 Si di baks “I Couldnʼt Imagine Having Better Parents” eena di Awake! a Aktoaba 2011, payj 20, ahn di aatikl “A Special Letter to Their Parents” eena di Awake! a Maach 8, 1999, payj 25.
^ párr. 17 Joshua 24:15: “Now if unu tink ih bad fi serv Jehoava, den unu fi chooz tudeh if unu wahn serv di gaad dehn a di Amorait dehn, er di gaad dehn weh unu ansestaz yoostu serv pahn di ada said a di Riva eena di lan weh unu di liv. Bot az fi mee ahn mai famili, wee wahn serv Jehoava.”
^ párr. 69 DI PICHA: Mayri mi teech Jeezas fi ga wahn schrang lov fi Jehoava. Ahn tudeh, di ma dehn ku du di sayhn ting weh Mayri mi du ahn teech dehn chiljren fi lov Jehoava.
^ párr. 71 DI PICHA: Ih mosi mi impoatant tu Joazef fi goh da di sinagag lang wid ih famili. Tudeh, di pa dehn ku kapi Joazef egzampl ahn mek shoar dat dehn goh da meetin wid dehn famili.
^ párr. 73 DI PICHA: Jeezas mi laan yoosful skilz fan ih pa. Yong peepl tudeh ku laan skilz fahn fi dehn pa tu.
