1-2. (a) Weh sohn govament du tu Jehoava peepl, bot weh fi hihn peepl du? (b) How wi ku bee hapi eevn wen wi di fays persikyooshan? (Koment pahn di picha pahn di kova.)

 RAIT now, wi werk deh anda ban eena moa dan 30 konchri rong di werl. Eena som a dehndeh konchri, di govament put wi bradaz ahn sistaz eena prizn. Wai? Az faar az Jehoava kansaan, dehn noh du notn rang. Aal dehn du da reed ahn stodi di Baibl, tel ada peepl bowt weh dehn bileev, ahn goh da meetin wid dehn bradaz ahn sistaz. Ahn noh mata wat, dehn rifyooz fi tek paat eena palitiks ahn waar. Eevn anda schrang persikyooshan, Jehoava faytful servant dehn stay laayal tu hihn ahn noh mek notn brok dehn rilayshanship wid ahn. Ahn dehn hapi fi du dat!

² Fi shoar yu si pichaz a som a dehnya brayv bradaz ahn sistaz ahn yu si dehn di smail. Dehn hapi bikaaz dehn noa dat Jehoava pleez wid dehn sins dehn stay laayal tu ahn. (1 Chron. 29:17a) Jeezas mi seh: “Di wan dehn weh fays persikyooshan fi di sayk a raichosnis wahn bee hapi . . . Unu rijais ahn bee hapi, bikaaz unu wahn geh wahn big riwaad.”—Mach. 5:10-12.

3. Akaadn tu Aks 4:19, 20, weh Jeezas apaslz mi du wen dehn mi geh persikyootid, ahn wai dehn mi du dat?

³ Weh wi bradaz ahn sistaz di goh chroo rait now da di saym ting laik weh Jeezas apasl dehn mi gaahn chroo wen peepl mi persikyoot dehn bikaaz dehn mi-di preech bowt Jeezas. Oava ahn oava agen, di joj dehn eena di Jooish  Sopreem Koat “aada dehn fi stap preech bowt Jeezas.” (Aks 4:18; 5:27, 28, 40) Weh di apasl dehn mi du? (Reed Aks 4:19, 20.) Dehn mi noa dat sohnbadi wid moa atariti ‘mi aada dehn fi preech tu di peepl ahn fi giv wahn gud witnis tu dehnʼ bowt di Krais. (Aks 10:42) Peeta ahn Jan mi taak op fi di apaslz wid korij ahn seh dat dehn wahn obay Gaad insteda dehndeh joj, ahn dehn mi mek it klyaa dat notn mi wahn stap dehn fahn taak bowt Jeezas. Da laik if dehn mi-di aks di joj dehn, ‘Unu ga di nerv fi tink dat peepl shuda obay unu insteda Gaad?ʼ

4. Akaadn tu Aks 5:27-29, weh di apasl dehn mi du, ahn how wi ku fala fi dehn egzampl?

⁴ Di apasl dehn mi set wahn gud egzampl. Op tu tudeh, wahn lata wi bradaz ahn sistaz kapi fi dehn egzampl an ‘obay Gaad az dehn roola insteda man.ʼ (Reed Aks 5:27-29.) Afta dehn mi geh beet op bikaaz dehn stay laayal tu Jehoava, di apasl dehn mi lef di Sopreem Koat “di rijais bikaaz dehn mi feel dat da mi wahn privilij fi sofa shaym sayka Jeezas naym,” ahn dehn mi kantinyu preech!—Aks 5:40-42.

5. Weh kweschanz wi need fi ansa?

⁵ Di egzampl weh di apasl dehn set bring op sohn kweschan. Fi egzampl, how di apasl dehn mi obay Gaad insteda man ahn stilyet mi “wilin fi obay peepl weh ga atariti”? (Roam. 13:1) Ahn how wi ku “obay di govament an enibadi els weh ga atariti,” laik weh di apasl Paal seh, ahn stil stay laayal tu Gaad, hoo da wi haiyis Roola?—Taitos 3:1.

6. (a) How wi sopoas tu chreet “peepl weh ga atariti”? (Roamanz 13:1) (b) Humoch atariti hyooman roolaz gat?

⁶ Reed Roamanz 13:1. Eena dis vers, wen ih taak bowt “peepl weh ga atariti,” ih di taak bowt hyooman roolaz weh ga powa ahn kanchroal oava adaz. Kristyanz haftu obay dehnya roolaz. Bikaaz di roolaz waahn kip di pees, dehn mek shoar dat peepl obay di laa,  ahn sohntaim dehn eevn protek Jehoava peepl. (Rev. 12:16) Jehoava koman wi fi pay wi taks ahn fi pay di govament fi eniting els weh dehn chaaj wi fa. Ahn hihn tel wi fi rispek dehn ahn gi dehn di aana weh dehn aks fa. (Roam. 13:7) Bot di govament dehn eena dis werl onli ga atariti bikaaz Jehoava di alow dehn fi rool. Jeezas mi mek dat klyaa wen di Roaman govna, Ponchos Pailat, mi-di kweschan ahn. Wen Pailat mi tel Jeezas dat hihn kuda mi disaid weda fi kil ahn er mek ih liv, Jeezas ansa ahn seh: “Yoo wudn ga eni atariti oava mee anles Gaad gi yu di atariti.” (Jan 19:11) Jos laik how Pailat atariti mi ga limits, tudeh aal hyooman roola ahn palitishan onli ga wahn sertn amonk a atariti.

7. Wen wi noh sopoas tu obay hyooman roolaz, ahn weh dehn need fi memba?

⁷ Kristyanz obay aala di govament laa wans dehn noh goh gens Gaad laa dehn. Dat meenz wi noh fi obay hyooman roolaz wen dehn aks wi fi du sohnting weh Gaad seh wi noh fi du, er wen dehn tel wi fi noh du sohnting weh Gaad seh wi sopoas tu du. Fi egzampl, dehn mait waahn di yong man dehn jain di aami ahn fait fi dehn konchri. * Er dehn mait tel wi fi stap preech ahn goh da meetin, ahn dehn mait ban aala wi poblikayshan dehn ahn di Baibl. Wen dehn yooz dehn atariti eena di rang way ahn persikyoot Jeezas disaiplz, dehn haftu ansa tu Gaad far it. Jehoava di wach dehn!—Eccl. 5:8.

8. Wat da di difrens bitween Jehoava ahn peepl weh ga atariti, ahn wai wi need fi noa dat?

⁸ “Peepl weh ga atariti” oava adaz ku bee powaful ahn du gud, bot dat noh meenz dehn perfek er dat dehn da di bes wanz fi ga di atariti. Bot Jehoava perfek, ahn hihn haiya dan enibadi els. Sevral taimz di Baibl kaal hihn “di Moas Hai.”—Dan. 7:18, 22, 25, 27.

9. Weh di prafit Danyel mi si eena sohn vizhan?

⁹ Di prafit Danyel mi si sohn vizhan weh mek it klyaa dat Jehoava da di haiyis oava enibadi els weh ga atariti. Eena Danyel fers vizhan, hihn mi si foa big bees weh reprizent sohn werl powa eena di paas ahn tudeh day—Babilan, Meedo-Perzha, Grees, Roam, ahn di werl powa weh rool tudeh, Britain ahn di United States. (Dan. 7:1-3, 17) Afta dat Danyel mi si Jehoava Gaad di sidong pan ih chroan da hevn. (Dan. 7:9, 10) Weh Danyel mi si afta dat serv az wahn waanin fi roolaz nowadayz.

10. Akaadn tu Daniel 7:13, 14, 27, da hoo Jehoava giv atariti fi rool oava di ert, ahn weh dis shoa wi bowt Hihn?

¹⁰ Reed Daniel 7:13, 14, 27. * Gaad tek weh aal di atariti ahn powa weh aal hyooman govament gat ahn giv it tu adaz weh moa powaful ahn weh dizerv it moa. Tu hoo hihn giv it? Tu “sohnbadi weh luk laik wahn son a man,” Jeezas  Krais, ahn tu “di hoali peepl weh bilangz tu di Moas Hai,” di 144,000 weh wahn rool “fareva ahn eva.” (Dan. 7:18) Ih klyaa fi si dat Jehoava da “di Moas Hai,” bikaaz onli hihn ga di atariti fi du dat.

11. Wat els Danyel mi seh weh shoa dat Jehoava ga atariti oava aala di nayshan dehn?

¹¹ Di tingz weh Danyel mi si eena da vizhan mach op wid weh hihn mi si erliya. Danyel mi seh dat di Gaad a hevn “tek dong kingz ahn set op kingz.” Hihn mi aalso seh dat “di Moas Hai da di Roola oava di kingdom a man ahn dat hihn giv atariti tu hoosoeva hihn waahn.” (Dan. 2:19-21; 4:17) Soh da wen Jehoava mi tek dong sohn king fahn aafa dehn chroan er set op sohn king fi rool? Mek wi si!

12. Gi wahn egzampl a how Jehoava mi tek dong sohn kingz fahn dehn chroan eena di paas. (Koment pahn di picha.)

¹² Jehoava don shoa dat hihn faar moa powaful dan enibadi els “weh ga atariti.” Mek wi luk pahn chree egzampl. Jehoava peepl da-mi slayv da Eejip, ahn Fayro, di roola a Eejip, neva waahn set dehn free. Bot Gaad mi set dehn free an ih mi jrongdid Fayro eena di Red See. (Ex. 14:26-28; Ps. 136:15) Joorin wahn selibrayshan weh King Belshazar a Babilan mi gat, ih mi “staat tu tink dat [ih] grayta dan di Laad a hevn,” an insteda prayz Jehoava, ih mi “prayz op gaadz weh mek owta silva ahn goal.” (Dan. 5:22, 23) Bot Gaad mi tek dong da prowd man fahn bee king. Pahn “da saym nait,” dehn kil Belshazar, ahn di Meedz ahn di Perzhanz tek oava fi hihn kingdom. (Dan. 5:28, 30, 31) King Herod Agripa I fahn Palestain mi mek dehn kil di apasl Jaymz, an ih mi put Peeta eena jayl bikaaz ih mi plan fi kil hihn tu. Bot Jehoava neva mek Herod gaahn hed ahn kil Peeta. Insted, “di aynjel a Jehoava mek sohn wermz eet op Herod,” an ih mi ded.—Aks 12:1-5, 21-23.

13. Gi wahn egzampl a how Jehoava mi dischrai wahn hoal groop a roolaz.

¹³ Jehoava mi shoa dat hihn ga moa powa dan eni groop a roola weh jain op gens ahn. Ih mi fait fi di Izrelait dehn, an ih mi help dehn kil 31 Kaynanait king weh mi jain op gens dehn. Ih mi aalso help dehn fi tek oava wahn big paat a di  Pramis Lan. (Josh. 11:4-6, 20; 12:1, 7, 24) Jehoava mi aalso help di Izrelait dehn fi kompleetli dischrai King Ben-haydad ahn 32 ada Siriyan roolaz weh mi fait gens dehn.—1 Ki. 20:1, 26-29.

14-15. (a) Weh king Nebyukadneza ahn Daraiyos mi seh bowt Jehoava roolaship? (b) Weh di saamis mi seh bowt Jehoava ahn Fi Hihn nayshan?

¹⁴ Oava ahn oava agen, Jehoava shoa dat hihn da di Moas Hai! Jehoava mi mek King Nebyukadneza, di king a Babilan, geh krayzi bikaaz ih mi boas bowt ih ‘schrent ahn powa an ih gloari an ih kingship.ʼ Hihn neva hombl inof fi seh dat Jehoava da di Wan weh dizerv aala di prayz. Afta Jehoava mi heel ahn, Nebyukadneza mi “prayz di Moas Hai” an admit dat “[Jehoava] roolaship wahn laas fareva.” Ahn den ih mi seh: “Nobadi noh deh weh ku stap ahn.” (Dan. 4:30, 33-35) Danyel laayalti tu Jehoava mi geh put tu di tes wen dehn mi chroa ahn eena wahn deep hoal wid sohn laiyan. Afta Jehoava mi sayv Danyel, King Daraiyos mi gi dis koman: “Evribadi fi ga lata rispek fi Danyel Gaad bikaaz Hihn da di livin Gaad ahn hihn liv fareva. Ih kingdom wahn neva geh dischrai, an ih roolaship wahn laas fareva.”—Dan. 6:7-10, 19-22, 26, 27.

¹⁵ Di saamis mi seh: “Jehoava mi rooin di planz weh di nayshan dehn mek; hihn mi dischrai di peepl planz.” Hihn mi aalso seh: “Di nayshan weh ga Jehoava az dehn Gaad bles; dehn da hoo hihn chooz fi bee fi hihn speshal peepl!” (Ps. 33:10, 12) Dis da wahn gud reezn fi stay laayal tu Jehoava!

16. Joorin di “grayt chribyulayshan,” weh wi ku bee shoar bowt, ahn wai? (Koment pahn di picha.)

¹⁶ Wi reed bowt di tingz weh Jehoava mi du eena di paas. Bot weh wi ku ekspek eena di fyoocha? Wi ku bee shoar dat Jehoava wahn sayv fi hihn laayal servant dehn joorin di “grayt chribyulayshan”  weh wahn soon kohn. (Mach. 24:21; Dan. 12:1) Hihn wahn du dis wen wahn groop a nayshan, weh wi noa az Gag a Maygag, atak Gaad faytful peepl aal oava di werl. Eevn if da groop a nayshan inklood aala di 193 membaz a di United Nations, dehn wahn stil kyaahn fait gens di Moas Hai ahn fi hihn hevnli aami! Jehoava pramis wi: “Ah wahn shoa aala di nayshan dehn dat Ai powaful an Ai hoali. Dehn wahn noa da hoo mee den; dehn wahn haftu noa dat Ai da Jehoava.”—Ezek. 38:14-16, 23; Ps. 46:10.

17. Eena di fyoocha, weh di Baibl seh wahn hapm tu di king dehn weh liv pahn di ert ahn tu dehn wan weh laayal tu Jehoava?

¹⁷ Wen Gag atak Jehoava peepl, dat wahn leed op tu di fainal waar a Armagedon. Joorin da waar, Jehoava wahn dischrai “aala di king dehn a di ert.” (Rev. 16:14, 16; 19:19-21) Pahn di ada han, “onli di wan dehn weh raichos wahn liv pahn di ert, ahn di wan dehn weh aalwayz faytful [er, “laayal”] wahn stay pahn di ert.”—Prov. 2:21.

18. Weh wahn lata chroo Kristyanz wilin fi du, ahn wai? (Daniel 3:28)

¹⁸ Oava di yaaz, wahn lata chroo Kristyanz mi wilin fi giv op dehn freedom an eevn dehn laif bikaaz dehn lov Jehoava ahn dehn si hihn az fi dehn Moas Hai Roola. Dehndeh Kristyanz mi mek op dehn main fi stay laayal tu Jehoava jos laik di chree Heebroo bwai weh di Moas Hai mi sayv fahn owta di faiya bikaaz dehn mi stay laayal.—Reed Daniel 3:28. *

19. How Jehoava wahn joj ih peepl, ahn weh wi haftu du rait now?

¹⁹ Di saamis Dayvid mi rait bowt how ih impoatant fi stay laayal tu Gaad. Ih mi seh: “Jehoava wahn joj di nayshanz. Oa Jehoava, joj mi bays pahn weh Ah du fi shoa dat Ah raichos ahn laayal.” (Ps. 7:8) Dayvid mi aalso rait: “Mek mi laayalti ahn mi raichosnis protek mi.” (Ps. 25:21) Di bes way fi liv wi laif da fi stay faytful tu Jehoava ahn noh du notn weh wahn brok wi laayalti tu ahn, noh mata weh sichuwayshan wi mait fays! Den dis wahn mek wi feel jos laik how di saamis mi feel wen ih rait: “Enibadi weh stay laayal . . . , ahn weh obay Jehoava laa wahn bee hapi.”—Ps. 119:1, ftn.