1. Weh hoap Jehoava gi wi?

 JEHOAVA gi wi di amayzin hoap fi liv fareva. Som ga di hoap fi liv fareva da hevn. (1 Kor. 15:50, 53) Moas a wi ga di hoap fi ga wahn hapi laif fareva rait ya pahn ert wid perfek helt. (Rev. 21:3, 4) Wi hoap onli preshos tu wi, weda da fi liv da hevn er rait ya pahn ert.

2. Weh wi hoap bays pan, ahn wai wi ku seh dat?

² Wen di Baibl yooz di werd “hoap,” ih meen dat “yu di wayt fi mek gud tingz hapm.” Yu ku bee shoar dat fi yoo hoap fi di fyoocha wahn kohn chroo bikaaz da Jehoava pramis wi dat. (Roam. 15:13) Wi noa weh aal Jehoava pramis wi, ahn wi noa dat hihn aalwayz kip ih pramis. (Num. 23:19) Wee noa fi shoar dat Jehoava ga di powa ahn di dizaiya fi du evriting weh hihn seh ih wahn du. Soh wi hoap da noh jos sohnting weh wee imajin er sohnting weh wi wish ku hapm, bot da sohnting reel weh wi noa wahn hapm.

3. Weh wi wahn diskos eena dis aatikl? (Psalm 27:14)

³ Wi Pa, Jehoava, lov wi soh moch ahn hihn waahn mek wi chros ahn wid aala wi haat. (Reed Psalm 27:14.) * Wen wi hoap eena Jehoava schrang, ih help wi fi bayr op ahn ga korij ahn jai noh mata weh wi mait goh chroo. Mek wi taak bowt how wi hoap ku protek wi. Bot fers, mek wi taak bowt how hoap da laik wahn anka ahn laik wahn helmit. Den wi wahn diskos how wi ku schrentn wi hoap.

4. Akaadn tu Heebrooz 6:19, how wi hoap da laik wahn anka?

⁴ Wen Paal mi rait ih leta tu di Heebrooz, hihn mi kompyaa wi hoap tu wahn anka. (Reed Heebrooz 6:19.) Paal yoostu chravl pahn boat wahn lat. Soh hihn mi noa dat dehn yooz wahn anka fi mek di boat noh jrif weh. Wan taim wen Paal mi-di chravl pahn wahn boat, dehn mi gaahn chroo wahn big staam. Joorin da staam, hihn mi si how di sayla dehn chroa dong di anka eena di see fi stap di boat fahn krash intu sohn big rak. (Aks 27:29, 39-41) Jos laik how wahn anka help wahn boat fi noh jrif weh joorin wahn staam, wi hoap kip wi kloas tu Jehoava soh dat wi noh jrif weh wen wi di goh chroo sohn tof sichuwayshan. Wi hoap help wi fi stay kaam bikaaz wi noa dat tingz wahn geh beta. Ahn memba, Jeezas mi waan wi dat dehn mi wahn persikyoot wi. (Jan 15:20) Soh wen wi meditayt pahn di pramis weh Jehoava gi wi fi di fyoocha, ih help wi fi kantinyu serv ahn.

5. How hoap mi mek Jeezas stay faytful eevn doa hihn mi noa dat dehn mi wahn kil ahn?

⁵ Mek wi si how hoap mi help Jeezas fi stay faytful eevn doa hihn mi noa dat ih mi wahn sofa ahn ded. Pahn Pentikaas 33 C.E., Peeta mi menshan paat a wahn prafesi fahn di buk a Psalms weh diskraib how Jeezas mi stay kaam ahn how ih mi kanfident joorin da taim. Hihn mi seh: “Ai wahn liv di chros eena yoo. Yoo noh wahn lef mi eena di Grayv, ner wahn alow mi badi fi ratn, bikaaz Ai laayal tu yoo. . . . Ah feel lata jai wen Ai deh fronta yoo.” (Aks 2:25-28; Ps. 16:8-11) Eevn doa Jeezas mi noa dat ih wahn ded, hihn mi ga schrang hoap dat Jehoava wahn rezorek ahn, an dat ih mi wahn ga di jai fi goh bak wid ih Pa da hevn.—Heeb. 12:2, 3.

6. Weh wahn brada mi seh bowt hoap?

⁶ Wi hoap help wahn lata bradaz ahn sistaz fi noh giv op. Mek wi luk pahn di egzampl a wahn faytful brada weh naym Leonard Chinn, weh mi liv da England. Joorin di Fers Werl Waar, hihn mi rifyooz fi jain di aami. Fi too monts dehn mi gat ahn eena wahn jayl sel bai ihself. Afta dat, dehn mi foas ahn fi du haad werk. Laytaraan hihn seh: “Mai ekspeeryens help mi fi riyalaiz humoch wi need hoap soh dat wi ku bayr op. Jeezas, di apasl dehn, ahn di prafit dehn set wahn gud egzampl fi wi. Wi aalso ga di wandaful pramis weh wi reed bowt eena di Baibl. Aala dis gi wi wahn brait hoap fi di fyoocha. An ih help wi fi ga schrang fayt fi bayr op eena wateva sichuwayshan.” Jos laik how hoap da-mi wahn anka fi Leonard, ih ku bee wahn anka fi wee tu.

7. How wi chraiyalz help wi fi ga schranga hoap? (Roamanz 5:3-5; Jaymz 1:12)

⁷ Wen wi bayr op ahn si how Jehoava help wi, wi riyalaiz dat hihn hapi wid wi. Dis mek wi hoap geh schranga. (Reed Roamanz 5:3-5; Jaymz 1:12.) Soh now wi hoap moch schranga dan wen wi mi fers geh fi laan di chroot. Saytan waahn mek wi chraiyalz diskorij wi, bot wid Jehoava help wi ku mek it chroo aala dehndeh chraiyalz ahn noh giv op.

8. Eena weh way hoap da laik wahn helmit? (1 Tesaloanyanz 5:8)

⁸ Di Baibl kompyaa wi hoap tu wahn helmit. (Reed 1 Tesaloanyanz 5:8.)  Wahn soalja wuda wayr wahn helmit fi protek ih hed wen ih enimi atak ahn. Wee deh eena wahn spirichwal fait, soh wi need fi protek wi main bikaaz Saytan di atak wi. Hihn yooz difrent tingz fi temp wi ahn fi korop wi tinkin. Jos laik di helmit weh protek wahn soalja hed, fi wee hoap protek wi tinkin soh dat wi ku stay faytful tu Jehoava.

9. How peepl weh noh ga no hoap liv dehn laif?

⁹ Wi ku mek waiz disizhanz bikaaz wi ga hoap fi liv fareva. Bot if wi hoap geh week, wi ku staat tu tink onli bowt weh wee waahn ahn ferget bowt wi hoap fi liv fareva. Dis mi hapm tu sohn Kristyanz weh mi liv da Korint. Dehn mi looz fayt eena di impoatant pramis a di rezorekshan weh Jehoava mi gi dehn. (1 Kor. 15:12) Paal mi seh dat peepl weh noh bileev eena di rezorekshan onli liv fi tudeh. (1 Kor. 15:32) Nowadayz, lata peepl weh noh ga no hoap du eniting fi chrai ga fon ahn bee hapi now. Bot wee difrent fahn dehn bikaaz wi bileev eena di pramis weh Gaad gi wi fi di fyoocha. Wi hoap da laik wahn helmit weh protek wi tinkin ahn help wi fi noh onli tink bowt wiself, bikaaz da kaina tinkin ku damij wi rilayshanship wid Jehoava.—1 Kor. 15:33, 34.

10. How fi wee hoap protek wi fahn rang tinkin?

¹⁰ Fi wee hoap help wi fi noh tink dat wi wahn ku neva pleez Jehoava. Fi egzampl, sohn peepl mait feel laik dehn noh wahn bee monks dehn wan weh wahn liv fareva. Maybi dehn feel laik dehn noh gud inof ahn dat dehn wahn ku neva obay Gaad standadz. Elifaz mi tel Joab: “Wahn man ku eva bee kleen fronta Gaad? . . . Luk ya! Gaad noh chros eena ih hoali peepl an eevn hevn noh kleen tu hihn.” (Job 15:14, 15) Dehnya da-mi sohn terabl lai, noh chroo? Wi need fi memba dat Saytan deh bihain dehnya kaina tinkin. Hihn noa dat if wi kip di tink laik dat, wi wahn stap bileev eena di hoap weh Jehoava pramis wi. Insteda tink laik dat, wi waahn rijek aala Saytan lai dehn ahn foakos pahn di pramis weh Jehoava gi wi. Aalwayz chros dat Jehoava waahn yu liv fareva ahn dat hihn wahn help yu fi reech da goal.—1 Tim. 2:3, 4.

11. Wai wi shuda ga payshens wail wi di wayt fi mek wi hoap fi di fyoocha kohn chroo?

¹¹ Ih noh aalwayz eezi fi mek wi kip wi hoap schrang. Wi ku geh taiyad a wayt fi mek Gaad pramis dehn kohn chroo. Tu wee ih mait feel laik wi di wayt fi wahn lang taim, bot hihn noh si taim di way wee seeʼt. (2 Peet. 3:8, 9) Jehoava wahn mek ih pramis dehn kohn chroo eena di bes way pasabl, bot hihn mait noh du tingz wen wee ekspek ahn fi du it. Weh ku help wi fi kip wi hoap schrang wail wi wayt fi mek Jehoava pramis dehn kohn chroo?—Jay. 5:7, 8.

12. Akaadn tu Heebrooz 11:1, 6, weh hoap ga fi du wid fayt?

¹² Wi ku kip wi hoap schrang wans wi stay kloas tu Jehoava, bikaaz hihn da di wan weh wahn mek wi hoap kohn chroo. Fi mek wi ku ga hoap, wi haftu ga schrang fayt dat Jehoava egzis ahn dat “hihn wahn bles di wan dehn weh di chrai dehn bes fi du ih wil.” (Reed Heebrooz 11:1, 6.) Soh if wi reeli bileev dat Jehoava egzis, wi wahn bee moa kanfident dat hihn wahn mek ih pramis dehn kohn chroo. Mek wi kansida sohn  wayz how wi ku ga wahn schrang rilayshanship wid Jehoava ahn kip wi hoap schrang.

13. How wi ku jraa kloas tu Gaad?

¹³ Pray tu Jehoava, ahn reed di Baibl. Eevn doa wi kyaahn si Jehoava, wi ku jraa kloas tu ahn. Wi ku pray tu hihn ahn bee shoar dat ih wahn lisn tu wi. (Jer. 29:11, 12) Wi lisn tu Gaad wen wi reed di Baibl ahn meditayt pan it. Wi hoap wahn geh schranga wen wi reed bowt how Jehoava tek kayr a ih laayal servants eena di paas. Evriting eena di Baibl mi “geh rait dong fi teech wi ahn gi wi hoap, bikaaz di Skripchaz gi wi komfert ahn help wi fi bayr op.”—Roam. 15:4.

14. Wai ih gud fi tink bowt weh Jehoava du fi adaz?

¹⁴ Meditayt pahn how Jehoava aalwayz kip ih pramis. Tink bowt weh Gaad mi du fi Aybraham ahn Saara. Dehn mi tu oal fi ga pikni, bot Jehoava mi pramis dehn dat dehn mi wahn ga wahn son. (Gen. 18:10) How Aybraham mi rispan? Di Baibl tel wi dat “Aybraham mi kanvins dat hihn wuda mi bee di faada a lata nayshanz.” (Roam. 4:18) Eevn doa Aybraham neva noa how Gaad pramis mi wahn kohn chroo, hihn mi noa fi shoar dat Jehoava mi wahn du weh ih seh. Ahn Jehoava neva let ahn dong. (Roam. 4:19-21) Dehndeh Baibl vers teech wi dat wi ku aalwayz chros dat Jehoava wahn mek ih pramis dehn kohn chroo, eevn wen di sichuwayshan mait luk impasabl tu wee.

15. Wai ih impoatant fi tink bowt weh Jehoava don du fi wi?

¹⁵ Luk pahn weh Jehoava don du fi yoo. Tink bowt how yoo don benifit persnali fahn di pramis dehn weh deh eena di Baibl. Fi egzampl, Jeezas pramis dat ih Pa  wahn gi yu evriting weh yu need. (Mach. 6:32, 33) Jeezas aalso pramis yu dat Jehoava wahn gi yu ih hoali spirit if yu aks ahn far it. (Look 11:13) Op tu now Jehoava di kip dehndeh pramis. Maybi yu ku tink bowt sohn ada pramis fahn Jehoava weh yu si kohn chroo eena yu laif. Fi egzampl, hihn pramis dat ih wahn fergiv yu, komfert yu, ahn gi yu weh yu need fi stay kloas tu ahn. (Mach. 6:14; 24:45; 2 Kor. 1:3) Wen yu meditayt pahn weh Gaad don du fi yoo, dis wahn schrentn yu hoap eena weh hihn pramis fi du fi yu eena di fyoocha.

16. Wai wi ku seh dat hoap da wahn preshos gif?

¹⁶ Wi hoap fi liv fareva da wahn preshos gif weh Gaad gi wi. Wi ku luk faawod tu wahn wandaful fyoocha ahn bee shoar dat ih wahn kohn chroo. Dis hoap da laik wahn anka weh help wi fi bayr op wen wi di goh chroo chraiyalz, persikyooshan, an eevn wen wi di fays det. Ahn da laik wahn helmit weh protek wi tinkin, an ih mek wi rijek weh rang ahn stik tu weh rait. Di hoap weh di Baibl taak bowt help wi fi geh fi noa Gaad beta, an ih shoa wi humoch hihn lov wi. Wee ku benifit wahn lat if wi kip wi hoap schrang.

17. Wai wi hoap mek wi hapi?

¹⁷ Eena di leta weh Paal rait tu di Roamanz, hihn inkorij wi fi “rijais sayka di hoap weh wi gat.” (Roam. 12:12) Paal mi hapi bikaaz hihn mi noa dat if ih mi stay faytful, hihn mi wahn liv fareva da hevn. Wee tu ku bee hapi fi di hoap weh wi ga bikaaz wi noa fi shoar dat Jehoava wahn kip ih pramis dehn. Laik weh di saamis seh, “hapinis bilangz tu di persn . . . hoo put ih hoap eena Jehoava ih Gaad, . . . di Wan weh aalwayz stay faytful.”—Ps. 146:5, 6.