1. Wen wi noa dat wi “need Gaad,” how dat help wi fi fain chroo hapinis?

 CHROO hapinis da noh jos wahn feelin weh kom ahn goh. Da sohnting weh wahn persn ku feel fi ih hoal laif. How dat pasabl? Jeezas mi help wi fi andastan how eena di Sermon Pahn di Mongtin, wen ih mi seh: “Di wan dehn hoo noa seh dehn need Gaad wahn bee hapi.” (Mach. 5:3.) Jeezas mi noa dat wi “need Gaad.” Hihn mi noa dat Jehoava Gaad, wi Kriyayta, mi mek wi wid wahn schrang dizaiya fi geh fi noa ahn wership Ahn. Ahn sins Jehoava da “di hapi Gaad,” enibadi weh wership hihn ku bee hapi tu.—1 Tim. 1:11.

2-3. (a) Hoo els Jeezas mi seh ku bee hapi? (b) Weh wi wahn taak bowt eena dis aatikl, ahn wai ih impoatant fi mek wi noa dis?

² Yu tink wi ku bee hapi onli if wi noh ga prablemz? No. Eena Jeezas Sermon Pahn di Mongtin, hihn mi seh sohnting weh mait sopraiz yu. Hihn mi seh dat eevn “di wan dehn weh di moan ahn baal,” maybi bikaaz dehn feel gilti fi dehn sinz er dehn ga seeryos prablemz, ku stil bee hapi. An ih mi seh dat “di wan dehn weh fays persikyooshan fi di sayk a raichosnis” er dehn wan “weh geh insolt op” jos bikaaz dehn da fi hihn falowaz ku bee hapi tu. (Mach. 5:4, 10, 11) Bot how wi ku stil bee hapi eevn wen wi di fays dehndeh kaina sichuwayshan?

³ Jeezas mi-di teech wi dat chroo hapinis noh dipen pahn wi sichuwayshan eena laif. Wi ku bee hapi if wi geh  fi noa Gaad ahn jraa kloas tu ahn. (Jay. 4:8) How wi ku du dat? Eena dis aatikl, wi wahn taak bowt chree tingz weh wi need fi du fi ga chroo hapinis.

4. Wat da di fers step weh ku help yu geh chroo hapinis? (Psalm 1:1-3)

⁴ STEP 1: Fi ga chroo hapinis, wi haftu tek een spirichwal food. Hyoomanz an animalz need fizikal food soh dat dehn ku liv. Bot onli hyoomanz ku tek een spirichwal food, ahn wi need it fi bee hapi. Dat da wai Jeezas mi seh: “Wahn man noh fi liv pahn jos food, bot ih fi liv pahn evri werd weh kom owta Jehoava mowt.” (Mach. 4:4) Wi noh fi mek nat eevn wan day paas widowt reed Gaad Werd di Baibl. Di saamis mi seh: ‘Di man hapinis wahn kohn fahn di laa a Jehoava, an ih wahn reed it day ahn nait.ʼ—Reed Psalm 1:1-3. *

5-6. (a) Weh wi ku laan fahn di Baibl? (b) How Baibl reedin ku help wi?

⁵ Laik how Jehoava lov wi, ih tel wi eena di Baibl how wi ku liv wahn hapi laif. Fi egzampl, ih teech wi wai ih mek wi, how wi ku bee ih fren, ahn weh wi need fi du fi mek ih fergiv wi sin dehn. Ahn wi laan bowt di wandaful hoap weh ih pramis wi fi di fyoocha. (Jer. 29:11)  Wi feel reeli hapi wen wi laan di chroot bowt dehndeh tingz fahn di Baibl!

⁶ Wi noa dat di Baibl gat een lata gud advais weh ku help wi eena wi evriday laif. Wen wi fala dehndeh advais, wi ku bee hapi. Soh wen wi feel diskorij bikaaz a prablemz eena wi laif, wi need fi spen moa taim di reed di Baibl ahn meditayt pahn weh wi reed. Jeezas seh: “Gaad wahn bles dehn wan weh lisn tu hihn ahn du weh ih seh!”—Look 11:28.

7. Weh yu need fi du if yu reeli waahn benifit fahn yu Baibl reedin?

⁷ Wen yu reed di Baibl, tek yu taim an injai weh yu di reed. Fi egzampl, tink bowt dis sichuwayshan: Imajin dat sohnbadi kuk yu fayvrit food, bot bikaaz yu mi deh eena wahn hori er yu main mi deh pahn sohnting els, yu swala dong di food widowt eevn injai it. Da noh til afta yu finish eet yu riyalaiz how faas yu mi eet, ahn yu wish dat yu mi sloa dong an injai it. Di saym ting ku hapm wid wi Baibl reedin. Wi mait jos rosh chroo it ahn noh geh fi injai it. Soh tek yu taim an injai yu Baibl reedin; put yuself eena di stoari, imajin dat yu di hyaa di vais a di peepl weh yu di reed bowt, ahn reeli tek taim fi tink bowt weh yu reed. Wen yu du dat, yu wahn feel hapiya.

8. Weh “di faytful ahn waiz slayv” di du fi help wi geh wi spirichwal food tu taim? (Koment pahn di futnoat.)

⁸ Jeezas gi “di faytful ahn waiz slayv” di rispansabiliti fi gi wi spirichwal food da di rait taim, ahn dehn di mek shoar dat wee ga aal di spirichwal food weh wi need. * (Mach. 24:45) Di Baibl da di mayn ingreedyent weh di faytful slayv yooz fi pripyaa wi spirichwal food. (1 Tes. 2:13) Ahn dis spirichwal food help wi fi geh fi noa how Jehoava tink, jos laik how ih deh eena di Baibl. Dat da wai wi reed di Wachtowa an Awayk! magazeen dehn an aala di ada aatikl weh deh pahn jw.org. Wi aalso pripyaa fi aala di meetin dehn ahn wach aala di JW Braadkyaastin weh kom owt evri mont. If wi mek shoar dat wi kantinyu reed ahn stodi di Baibl, dat wahn help wi fi tek di sekant step weh ku mek wi ga chroo hapinis.

9. Wat da di sekant step weh help wi fi ga chroo chroo hapinis?

⁹ STEP 2: Fi ga chroo hapinis, wi need fi obay aala Jehoava standadz. Di saamis mi seh: “Evribadi hoo fyaa Jehoava ahn hoo waak eena fi Hihn wayz wahn bee hapi.” (Ps. 128:1) Fi fyaa Jehoava meenz dat wi rispek ahn an dat wi chrai wi bes fi noh du notn weh hihn hayt. (Prov. 16:6) Dat da wai wi kantinyu du wi bes fi fala Jehoava standadz a weh rait ahn rang, weh hihn tel wi bowt eena di Baibl. (2 Kor. 7:1) Wi wahn bee hapi if wi du di tingz weh Jehoava lov ahn rijek di tingz weh hihn hayt.—Ps. 37:27; 97:10; Roam. 12:9.

10. Akaadn tu Roamanz 12:2, weh rispansabiliti eech wan a wi gat?

¹⁰ Reed Roamanz 12:2. Sohnbadi mait noa dat Jehoava ga di atariti fi disaid weh rait ahn weh rang, bot dehn haftu chooz fi aksep Gaad standadz fi dehnself. Fi egzampl, sohnbadi mait noa dat di govament ga di rait fi set di haiway speed limit, bot maybi dehn noh waahn aksep di speed limit weh di govament set, soh dehn jraiv faasa dan weh dehn sopoas tu.  Weh wee du shoa if wi reeli bileev dat fi fala Jehoava standadz da di bes way fi liv wi laif. (Prov. 12:28) Dayvid mi feel da way bowt Jehoava standadz bikaaz hihn mi seh: “Yu mi help mi fi noa di way tu laif; Ah feel lata jai wen Ai deh fronta yoo. If Ah stik tu yu rait han said, Ah wahn bee hapi fareva.”—Ps. 16:11.

11-12. (a) Wen wi feel schres owt er diskorij, weh wi need fi memba? (b) How Filipiyanz 4:8 ku help wi fi chooz gud entataynment?

¹¹ Wen wi feel schres owt er diskorij, wi mait feel laik wi need sohnting fi dischrak wi soh dat wi ku stap wori bowt wi prablemz. Dis naamal, bot wi haftu bee kyaaful dat wi noh du sohnting weh Jehoava hayt.—Ifee. 5:10-12, 15-17.

¹² Eena di apasl Paal leta tu di bradaz da Filipai, hihn mi inkorij dehn fi aalwayz tink bowt “tingz weh raichos, tingz weh pyoar, tingz weh moov peepl fi lov, [ahn] tingz weh gud.” (Reed Filipiyanz 4:8.) Eevn doa Paal neva di taak bowt entataynment eena dis vers, weh hihn mi rait shuda help wi fi chooz gud entataynment. Chrai dis: Weneva yu si di werd “tingz” kom op eena di vers, yooz di werd “sang,” “moovi,” “buk,” er “veedyo gaym” insted. Dis wahn help yu fi pik gud entataynment weh Gaad aksep. Wi waahn mek shoar dat wi obay Jehoava hai standadz. (Ps. 119:1-3) Den wi wahn ga wahn kleen kanshans ahn wi wahn ku fala di terd step weh leed tu chroo hapinis.—Aks 23:1.

13. Wat da di terd step weh ku help wi ga chroo chroo hapinis? (Jan 4:23, 24)

¹³ STEP 3: Mek shoar yu wership tu Jehoava da di moas impoatant ting eena yu laif. Sins Jehoava da di wan weh mek wi, hihn dizerv wi wership. (Rev. 4:11; 14:6, 7) Soh di moas impoatant ting eena wi laif shuda bee fi wership Jehoava di way hihn waahn, “wid spirit ahn chroot.” (Reed Jan 4:23, 24.) Wi waahn mek Gaad hoali spirit gaid wi soh dat wi wership ahn akaadn tu di chroot weh wi laan fahn fi hihn Werd di Baibl. Wi need fi put wi wership tu Jehoava fers eevn if wi liv sohnweh wehpaat wi werk deh anda ban. Rait now, oava 100 a wi bradaz ahn sistaz deh da prizn jos bikaaz dehn da Jehoava Witnisiz. * Eevn doa dehn deh da jayl, dehn hapi fi du wateva dehn kud fi pray, stodi, ahn tel adaz bowt Gaad an ih Kingdom. Wen peepl kritisaiz wi er persikyoot wi, wi ku bee hapi bikaaz wi noa dat Jehoava deh wid wi ahn hihn wahn bles wi!—Jay. 1:12; 1 Peet. 4:14.

14. Weh mi hapm tu wahn yong brada fahn Tajikistan, ahn wai?

¹⁴ Som a wi bradaz ahn sistaz mi gaahn chroo sohn haad sichuwayshan, bot dehn stil hapi bikaaz dehn mi fala dehnya chree steps weh wi jos taak bowt. Tek fi egzampl weh mi hapm tu wahn 19-yaa-oal yong man fahn Tajikistan weh naym Jovidon Bobojonov. Hihn mi rifyooz fi jain di aami. Pahn Aktoaba 4, 2019, dehn mi tek ahn fan ih hows ahn kehr ahn da prizn. Dehn mi kip ahn deh fi monts, ahn dehn chreet ahn laik wahn kriminal. Eena lata difrent konchri, di nyooz mi ripoat bowt how dehn beet ahn op ahn chrai presha ahn fi swayr fi serv eena di aami ahn put aan wahn  yoonifaam. Afta dat, di koat mi seh dat hihn gilti ahn dehn sen ahn da wahn kyamp fi werk. Hihn mi stay deh til di prezident a di konchri gi ahn wahn ofishal paadn ahn let ahn goh. Jovidon mi stay laayal ahn hapi di hoal taim. How? Bikaaz hihn mi noa dat ih need fi feed ihself spirichwali.

15. How Jovidon mi geh spirichwal food wail ih mi deh da prizn?

¹⁵ Wail Jovidon mi deh eena prizn, hihn mi kantinyu laan bowt Jehoava eevn doa ih neva ga wahn Baibl er eni a wi poblikayshan dehn. How hihn kuda mi du dat? Bradaz ahn sistaz weh mi kehr food far ahn wuda rait di dayli teks pahn di bag weh dehn put di food eena. Da way deh, hihn kuda mi reed di Baibl ahn meditayt pahn weh ih reed evri day. Afta hihn kom owta prizn, dis da-mi ih advais fi enibadi weh neva yet fays da kaina sichuwayshan weh hihn gaahn chroo: “Unu haftu tek ful advantij a unu freedom fi reed di Baibl ahn wi poblikayshan dehn soh dat yu ku laan moa bowt Jehoava.”

16. Weh Jovidon mi foakos pan?

¹⁶ Jovidon mi obay Jehoava standadz.  Insteda tink bowt rang dizaiyaz er du bad tingz, hihn mi foakos pahn Jehoava ahn di tingz weh impoatant tu Hihn. Jovidon mi admaiya Jehoava byootiful kriyayshan. Evri maanin hihn wuda wayk op di hyaa berd di sing, ahn da nait ih wuda luk op pahn di moon ahn staarz. Hihn seh: “Dehndeh gif fahn Jehoava mi mek Ah feel hapi ahn dehn mi inkorij mi.” Wen wee tankful fi di spirichwal ahn fizikal tingz weh Jehoava gi wi, wi feel hapi, ahn da jai ku help wi fi noh giv op.

17. How 1 Peeta 1:6, 7 ku help sohnbadi weh mait di fays wahn sichuwayshan laik weh Jovidon gaahn chroo?

¹⁷ Jovidon mi put ih wership tu Jehoava fers plays eena ih laif. Hihn mi noa dat ih impoatant fi stay laayal tu di chroo Gaad. Jeezas mi seh: “Da Jehoava yu Gaad yu fi wership, ahn da onli hihn wan yu fi serv.” (Look 4:8) Sohn aami komanda ahn soalja mi waahn mek Jovidon stap bee wan a Jehoava Witnisiz. Bot hihn mi poar owt ih haat tu Jehoava evri day an evri nait. Ih aks Jehoava fi help ahn fi noh giv op ahn fi mek ih stay faytful. Now hihn ku bee hapi bikaaz ih ga sohnting weh ih neva ga bifoa dehn mi ares ahn, beet ahn op, ahn kehr ahn da prizn. Hihn ga schranga fayt now bikaaz a weh ih gaahn chroo.—Reed 1 Peeta 1:6, 7.

18. How wee ku kantinyu ga chroo chroo hapinis?

¹⁸ Jehoava noa weh wi need soh dat wi ku ga chroo chroo hapinis. If yu fala di chree steps weh wi diskos, yu wahn ku kantinyu bee hapi noh mata weh yu goh chroo. Den yu wahn ku seh: “Enibadi hoofa Gaad da Jehoava onli hapi!”—Ps. 144:15.