Joorin da saym yaa, di aaganaizayshan mi mek sohn chaynjiz weh mi help di Baibl Styoodents fi bee moa yoonaitid eena dehn wership. The Watch Tower mi staat tu poblish sohn koment weh mi eksplayn di skripcha weh dehn mi wahn taak bowt da di Prayer, Praise, and Testimony Meeting weh dehn mi ga evri week. Di Baibl Styoodents mi print owt wahn kalinda weh mi shoa weh skripcha dehn wuda mi yooz evri week da di meetin dehn ahn wahn sang weh dehn kuda mi sing joorin dehn persnal stodi er joorin dehn famili wership.

Da dehndeh meetinz, di Baibl Styoodents wuda mi taak bowt wahn ekspeeryens weh dehn mi ga eena feel servis, seh wai dehn feel tankful tu Jehoava, sing wahn sang, er eevn seh wahn pryaa. Sista Eva Barney, weh mi geh baptaiz eena 1923 wen shee mi 15 yaaz oal, mi seh: “If yu mi waahn gi wahn koment, yu kuda mi jos stan op ahn seh sohnting laik, ‘Ah wuda waahn tank di Laad fi aal di gud tingz weh hihn du fi mi.ʼ” Som a di bradaz mi lov gi koments. Sista Barney mi seh: “Dehn mi ga wahn lee oal brada weh naym Brada Godwin. Hihn mi ga soh moch ting fi tank di Laad fa. Bot wen ih waif si dat di brada weh mi-di kandok di meetin mi-di staat geh lee angshos, shee wuda haal pahn ih hozban koat tayl, ahn hihn wuda stap taak ahn sidong.”

Wans a mont, eech kangrigayshan mi ga wahn speshal Prayer, Praise, and Testimony Meeting. The Watch Tower fi Aypril 1, 1923, mi seh: “Yooz haaf a di meetin fi gi koments ahn taak bowt sohn ekspeeryens weh di bradaz ahn sistaz mi gat eena di minischri an inkorij dehn wan weh goh owt ahn preech. . . . Wi feel laik dehnya inkorijin meetin wahn help di frenz fi jraa kloasa tugeda ahn bee moa yoonaitid.”

Brada Charles Martin, wahn 19-yaa-oal poblisha fahn Vancouver, Canada, mi reeli benifit fahn dehnya meetinz. Hihn mi seh: “Dis da wehpaat Ah mi fers laan weh fi seh wen Ah goh preech. Wahn lata taim, sombadi wuda taak bowt wahn ekspeeryens weh dehn mi ga wen dehn mi-di preech. Soh dat mi gi mi aidyaaz bowt how fi ansa peepl weh neva agree wid weh wi bileev.”

Di bradaz mi geh kloasa tu wan anada wen evribadi wuda goh owt ahn preech pahn servis dayz. Di Aypril 1, 1923, kapi a The Watch Tower mi  seh: “Soh dat aala wi ku bee yoonaitid eena di saym werk . . . , Choozdeh, May 1, 1923, wahn bee wahn speshal servis day. Fahn now aan, di fers Choozdeh a evri mont wahn bee wahn servis day . . . Evribadi fahn evri kangrigayshan shuda goh owt goh preech.”

Eevn yong Baibl Styoodents mi gaahn preech. Sista Hazel Burford memba how tingz mi stan wen shee mi onli 16 yaaz oal. Shee seh: “Di Bulletin mi gat een sohnting laik wahn sampl kanvasayshan weh wi kuda memoraiz. a Mee ahn mi grampa mi werk haad fi tek paat eena aala dehnya aktiviti.” Bot Sista Burford mi geh sopraiz bai di way how wahn brada mi feel bowt shee di preech. Shee seh: “Wahn lee oal brada mi reeli feel laik Ai shudn taak tu peepl. Rong da taim, som a di bradaz ahn sistaz neva andastan dat aal di Baibl Styoodents, eevn di ‘yong bwai ahn yong gyal dehnʼ shuda prayz wi Kriyayta.” (Ps. 148:​12, 13, King James Version) Bot Sista Burford neva mek dat stap ahn fahn preech. Laytaraan shee mi aten di sekant Gilyad Skool klaas, an ih mi serv az wahn mishineri da Panama. Afta wahn wail dehndeh bradaz mi chaynj dehn atichood bowt yong wanz eena di minischri.

Di kanvenshan dehn mi aalso help di bradaz fi bee yoonaitid. Wahn lata dehnya kanvenshan mi ga dayz weh dehn kuda goh owt pahn feel servis. Fi egzampl, evribadi weh mi gaahn da di kanvenshan da Winnipeg, Canada, mi geh invaitid fi preech eena da siti pahn Maach 31. Pahn dehnya speshal preechin dayz, dehn mi preech tu wahn lat moa peepl, ahn dehn mi si wahn lata gud rizolts. Pahn Aagas 5, dehn mi ga wahn nada kanvenshan da Winnipeg an oava 7,000 peepl mi gaan. Rong da taim, dat da-mi di bigis kanvenshan weh dehn mi eva ga da Canada.

Di moas impoatant kanvenshan weh Jehoava peepl mi ga eena di yaa 1923 da-mi da Los Angeles, California, pahn Aagas 18-26. Di nyoozpaypa dehn mi advataiz di kanvenshan sohn weeks bifoa ih mi hapm, ahn di Baibl Styoodents mi giv owt moa dan 500,000 chrak fi advataiz di kanvenshan.  Dehn mi aalso put op bana pahn sohn poblik chransportayshan ahn pahn peepl kaar.

Pahn Satideh, Aagas 25, Brada Rutherford mi gi wahn taak weh naym “Sheep and Goats,” weh mi eksplayn dat di “sheep” da peepl weh ga di rait haat kandishan weh wahn liv fareva pahn di ert. Hihn mi reed wahn staytment wid di taitl “A Warning.” Dis staytment mi kandem faals rilijan an ih mi inkorij dehn wan wid di rait haat kandishan fi get owt fahn “Babilan di Grayt.” (Rev. 18:​2, 4) Laytaraan, lata Baibl Styoodents aal rong di werl mi eega fi giv owt milyanz a chrak weh mi gat een da staytment.

Pahn di laas day a di kanvenshan, oava 30,000 peepl mi lisn tu Brada Rutherford giv wahn taak weh mi naym “All Nations Marching to Armageddon, but Millions Now Living Will Never Die.” Di Baibl Styoodents mi noa dat wahn lata peepl mi wahn kohn da di kanvenshan, soh dehn mi rent owt wahn nyoo staydyom weh dehn mi jos bil da Los Angeles. Da staydyom mi ga wahn nyoo kaina lowd speeka sistem, ahn di bradaz mi yooz dat fi mek shoar evribadi kuda mi hyaa di proagram gud. Lata peepl mi aalso hyaa di proagram oava di rayjo.

Eena di yaa 1923, dehn mi staat tu preech eevn moa da Africa, Europe, India, ahn South America. Da India, Brada Joseph mi-di tek kayr a ih waif ahn siks pikni, an ih mi aalso di help projoos lichricha eena Hindi, Tamil, Telugu, an Urdu.

Da Sierra Leone, too Baibl Styoodents, Brada Alfred Joseph ahn Brada Leonard Blackman, mi rait wahn leta tu di werl hedkwaataz da Brooklyn, New York, di aks fi help. Pahn Aypril 14, 1923, dehn mi geh wahn ansa. Brada Alfred seh, “Layt wahn Satideh nait, Ah mi geh wahn foan kaal weh Ah neva mi-di ekspek.” Hihn seh ih mi hyaa wahn deep vais weh aks ahn, “Da yoo mi rait tu di Watch Tower Society fi aks fi moa peepl fi kohn preech?” Den Brada Alfred seh, “Yes.” Di persn ansa seh, “Wel, da mee dehn sen.” Dat da-mi Brada William Roland Brown. Hihn mi jos reech da day wid ih waif Antonia, ahn dehn too lee daata, Louise ahn Lucy. Di bradaz neva mi wahn haftu wayt lang fi meet Brada Brown an ih famili.

Az Brada Alfred kantinyu ih stoari, ih seh: “Di neks maanin mee ahn Leonard mi-di ga di Baibl diskoshan weh wi ga evri week, den sodn-wan wi mi si wahn taal man di stan op bai di doa. Da mi Brada Brown. Hihn mi soh eega fi taak bowt di chroot dat ih mi waahn giv wahn poblik taak di  neks day.” Eena les dan wahn mont, Brada Brown mi gi weh aal di lichricha weh ih mi bring wid ahn. Ahn den ih mi geh 5,000 moa buk, ahn bifoa yu eevn noa it, ih mi need moa. Jooring ih laif az wahn faytful servant a Jehoava, peepl neva noa Brada Brown az sombadi weh sel buk. Dehn mi kaal ahn Baibl Brown bikaaz ih mi aalwayz yooz di Baibl wen ih giv taak.

Da Germany, di bradaz mi disaid fi moov owta di branch aafis da Barmen bikaaz ih mi tu smaal fi dehn. Ahn dehn mi aalso fain owt dat di French aami mi wahn soon invayd da siti. Di Baibl Styoodents mi fain wahn plays da Magdeburg weh mi perfek fi mek dehn set op wahn plays fi print owt dehn lichricha. Pahn Joon 19, di bradaz mi finish pak op dehn printin masheen ahn di ada tingz weh dehn mi ga, ahn dehn mi moov tu di nyoo Betel da Magdeburg. Di neks day wen dehn mi tel hedkwaataz dat dehn mi don moov, di nyoozpaypa dehn mi anonks dat di French aami mi tek oava Barmen Siti. Di bradaz mi tank Jehoava bikaaz dehn mi reeli si how hihn mi-di protek dehn ahn help dehn.

Da Brazil, Brada George Young, hoo mi chravl aal oava fi preech di gud nyooz, mi set op wahn nyoo branch aafis ahn staat tu poblish The Watch Tower eena Portuguese. Wahn fyoo monts afta dat, hihn mi giv owt moa dan 7,000 poblikayshan. Wahn laydi weh mi naym Sarah Ferguson mi hapi wen Brada Young mi vizit shee an ih famili. Sins 1899 shee di reed The Watch Tower dehn, bot shee neva geh di chaans fi geh baptaiz. Wahn fyoo monts afta ih mi meet Brada Young, Sista Ferguson an ih foa pikni mi fainali geh di chaans fi geh baptaiz.

Da di en a di yaa, The Watch Tower fi Disemba 15, 1923, mi taak bowt how di chaynjiz tu di meetin dehn, di kanvenshan dehn, ahn di minischri mi benifit di Baibl Styoodents. Ih seh: “Ih klyaa fi si dat di bradaz ahn sistaz eena di kangrigayshan ga lata fayt . . . Mek wi geh redi fi werk eevn haada ahn serv Gaad wid eeganis ahn jai joorin di nyoo yaa weh di kohn.”

Di neks yaa, 1924, mi wahn bee wahn reeli eksaitin yaa fi di Baibl Styoodents tu. Di bradaz da Betel mi-di werk haad fi monts pahn wahn pees a lan da Staten Island, weh mi deh kloas tu di hedkwaataz da Brooklyn, New York. Dehn mi finish bil di bildin dehn da da nyoo plays da di biginin a 1924, an ih mi help di bradaz fi stay yoonaitid ahn preech di gud nyooz eena nyoo wayz weh neva pasabl bifoa.