1-2. Wat da di bes way fi reed ahn stodi di Baibl? Yooz di egzampl eena di paragraaf.

 IMAJIN yu di luk fi bai wahn hows. Weh yu wuda waahn si bifoa yu bai it? Ih wuda bee inof fi jos si wahn picha fahn fronta di hows? No, noh chroo? Yu wuda waahn goh si di hows fi yuself soh dat yu ku chek how di owtsaid stan ahn goh aal eena di room dehn fi mek shoar dat evriting deh eena gud kandishan. Maybi yu wuda eevn waahn si di hows planz fi si how dehn bil it. Fi shoar, yu wuda waahn chek owt di hows gud gud bifoa yu bai it.

² Da jos laik dat wen wi reed ahn stodi di Baibl. Wan Baibl ekspert seh dat di mesij eena di Baibl da laik “wahn big taal bildin weh geh bil pahn wahn deep fongdayshan.” Soh den, how yu ku fain owt weh aal deh eena di Baibl? If yu jos reed it kwik, yu mait onli laan di baysik tingz—“di fers tingz weh [yu] mi laan fahn Gaad werd.” (Heeb. 5:12) Jos laik how yu wuda goh eena di hows fi laan moa bowt it, yu need fi stodi di Baibl gud fi andastan it. Wahn reeli gud way fi stodi di Baibl da fi si how weh wan paat seh mach op wid weh wahn nada paat seh. Chrai yu bes fi noh onli andastan weh Baibl teechinz yoo bileev eena bot aalso wai yu bileev eena dehndeh teechinz.

3. Weh Paal mi inkorij di bradaz ahn sistaz fi du, ahn wai? (Ifeezhanz 3:​14-19)

³ If wi waahn andastan evriting weh deh eena di Baibl, wi haftu du deep stodi. Di apasl Paal mi inkorij di bradaz  ahn sistaz fi stodi Gaad Werd gud soh dat dehn kuda “andastan evriting bowt how waid, ahn how lang, ahn how hai, ahn how deep di chroot.” Den if dehn du dat, dehn fayt wahn “stan op schrang pahn di fongdayshan, jos laik how di roots a wahn chree mek ih stan op schrang.” (Reed Ifeezhanz 3:​14-19.) Wi need fi du di saym ting wen wi dig deep eena Gaad Werd fi andastan di meenin moch beta. Mek wi si how wi ku du dat.

4. Weh wi ku du fi jraa kloasa tu Jehoava? Gi sohn egzampl.

⁴ Az servants a Jehoava, wi noh jos waahn noa di baysik teechinz a di Baibl. Wi waahn laan “eevn di deep tingz a Gaad,” ahn dat ku onli hapm wid di help a ih hoali spirit. (1 Kor. 2:​9, 10) Maybi yu ku staat wahn persnal Baibl stodi proajek fi help yu geh kloasa tu Jehoava. Fi egzampl, yu ku stodi bowt how Gaad mi shoa ih lov fi ih servant dehn eena di paas ahn how dat proov dat ih lov yoo tu. Yu ku aalso stodi bowt di way how Jehoava mi waahn di Izrelaits wership ahn bak eena fi dehn taim ahn kompyaa it tu how ih waahn wi wership ahn rait now. Er maybi yu ku stodi bowt di prafesi dehn weh Jeezas mi fulfil wen ih mi deh ya pahn ert.

5. Yu ga wahn tapik weh yu wuda wahn risaach moa bowt?

⁵ Sohn bradaz ahn sistaz weh laik du risaach pahn deep Baibl tapiks menshan sohn tingz weh dehn wuda waahn noa moa bowt. Som a di tapiks weh dehn menshan deh eena di baks “ Tapiks fi Persnal Stodi Proajeks.” Yu ku injai stodi bowt tapiks laik dehndeh wen yu yooz di Watch Tower Publications Index er di Risaach Gaid fi Jehoava Witnisiz. Wen yu du wahn deep stodi a Gaad Werd, ih mek yu fayt geh schranga ahn yu wahn “fain di nalij a Gaad.” (Prov. 2:​4, 5) Mek wi taak bowt sohn deep Baibl teechinz weh wi ku laan moa bowt.

6. (a) Wai Jehoava plan kyaahn fayl? (b) Wai wi ku seh dat Jehoava perpos fi hyoomanz ahn fi di ert wahn laas fareva? (Ifeezhanz 3:11)

⁶ Tink bowt weh di Baibl seh bowt Gaad perpos. Gaad perpos kyaahn fayl. Wai? Bikaaz wen Jehoava disaid fi du sohnting hihn wahn du it, noh mata if hihn haftu fain ada wayz fi mek ih perpos kohn chroo. Wi hapi dat eena di Baibl Jehoava tel wi lee bit bai lee bit “weh [Hihn] mi waahn du fahn di biginin.” (Si di stodi noat pahn Ifeezhanz 3:11 eena di Study Bible.) Noh mata wat, Jehoava aalwayz “mek evriting werk owt gud soh dat ih perpos ku kohn chroo.” (Prov. 16:4) Ahn bikaaz a dat, wateva hihn du wahn laas fareva. Bot wat da Jehoava perpos, ahn weh hihn du fi mek ih kohn chroo?

7. Afta di fers hyoomanz mi sin gens Gaad, weh hihn mi du fi mek ih perpos stil kohn chroo? (Machyu 25:34)

⁷ Gaad mi tel di fers hyoomanz wat da-mi fi hihn perpos fi dehn. Hihn mi tel dehn dat dehn mi fi “ga lata pikni ahn ful op di ert, ahn tek kayr a it,” ahn dat dehn mi “wahn bee in chaaj a . . . aala di animal dehn weh di liv pahn di ert.” (Jen. 1:28) Sayka weh Adam ahn Eev mi disobay Jehoava, aal hyoomanz da sinaz. Bot dat neva stap Jehoava fahn du weh ih waahn du. Hihn mi fain wahn nada way fi mek ih perpos kohn chroo. Rait away Jehoava mi disaid fi set op ih Kingdom da hevn, ahn dat mek it pasabl fi mek hihn du weh ih waahn du fi hyoomanz ahn fi di ert. (Reed Machyu 25:34.) Soh, Jehoava mi chooz wahn taim fi sen ih Son dong pahn di ert fi teech peepl bowt di Kingdom ahn fi giv ih laif fi sayv aal hyoomanz fahn sin ahn det. Den Jehoava mi rezorek Jeezas fi goh bak da hevn fi rool az King a Gaad Kingdom. Bot wi stil ga lat moa fi laan bowt Gaad perpos.

8. (a) Wat da di moas impoatant mesij eena di Baibl? (b) Laik weh Ifeezhanz 1:​8-11 seh, wat els Jehoava wahn du? (Koment pahn di picha pahn di kova.)

⁸ Di moas impoatant mesij eena di Baibl teech wi dat Jehoava wahn mek ih naym hoali wen ih yooz fi hihn Kingdom wid Jeezas Krais az King fi mek Ih perpos fi di ert kohn chroo. Nobadi kyaahn chaynj Jehoava perpos. An evriting weh Jehoava pramis wahn hapm egzakli di way ih seh. (Isa. 46:​10, 11, ftns.; Heeb. 6:​17, 18) Soon, Jehoava wahn ton dis hoal ert intu wahn byootiful paradais wehpaat Adam ahn Eev raichos disendant dehn wahn ku “injai laif fareva.” (Ps. 22:26) Bot dis da noh aal weh Jehoava pramis fi du. Fi hihn perpos da fi gyada tugeda aala ih servants da hevn ahn pahn ert. Den evribadi wahn obay Jehoava az dehn Roola. (Reed Ifeezhanz 1:​8-11.) Yu noh tink ih wandaful how Jehoava aalwayz mek ih perpos kohn chroo?

9. Wen yu reed di Baibl, how faar eena di fyoocha yu ku si?

⁹ Tink bowt di prafesi weh Jehoava mi seh eena di gyaadn da Eedn, weh wi ku reed da Jenisiz 3:15. b Dis prafesi rifaa tu tingz weh wahn hapm fi mek Jehoava perpos kohn chroo, bot dehnya tingz mi wahn hapm towznz a yaaz afta Jehoava mek di prafesi. Fi egzampl, Jehoava mi tel Aybraham dat wan a fi hihn disendant dehn mi wahn bee di Krais. (Jen. 22:​15-18) Den, eena 33 C.E., Jeezas mi  geh bait pan ih heel, jos laik weh da prafesi mi seh. (Aks 3:​13-15) Di laas paat a da prafesi wahn hapm wen Saytan hed geh mash. Dat wahn hapm oava 1,000 yaaz fahn now. (Rev. 20:​7-10) Di Baibl tel wi wahn lat bowt weh wahn hapm bitween Saytan sistem ahn Jehoava aaganaizayshan az wi geh kloasa ahn kloasa tu di en.

10. (a) Weh wahn soon hapm? (b) Weh wi haftu du fi pripyaa wi main ahn haat? (Koment pahn di futnoat.)

¹⁰ Mek wi tink bowt som a di eksaitin tingz weh di Baibl seh wahn hapm. Fers, di nayshanz wahn anonks dat wi di “liv eena pees ahn wi sayf!” (1 Tes. 5:​2, 3) Den “sodn-wan” di grayt chribyulayshan wahn staat wen di nayshanz atak aala faals rilijan. (Rev. 17:16) Afta dat, dehn mait ga sohn sain weh shoa dat “di Son a man di kom eena di klowd dehn a hevn wid powa ahn lata gloari.” (Mach. 24:30) Jeezas wahn joj peepl ahn separayt di sheep fahn di goat dehn. (Mach. 25:​31-33, 46) Rong dehn taim deh, Saytan wahn stil di werk gens Jehoava peepl. Bikaaz hihn hayt dehn soh moch, hihn wahn mek wahn groop a nayshanz atak Jehoava servants. Di Baibl kaal da groop Gag a di lan a Maygag. (Ezek. 38:​2, 10, 11) Joorin di grayt chribyulayshan, di anointid Kristyanz weh stil deh pahn ert wahn goh da hevn fi jain op wid Jeezas ahn fi hihn hevnli aami fi fait eena Armagedon, di waar weh wahn en dis sistem a tingz. c (Mach. 24:31; Rev. 16:​14, 16) Den Jeezas wahn staat rool oava di ert fi wahn towzn yaaz.—Rev. 20:6.

11. Weh di hoap a evalastin laif meen fi yoo? (Koment pahn di picha.)

¹¹ Now tink faar faar eena di fyoocha. Di Baibl tel wi dat wi Kriyayta “put eena [wi] haat di dizaiya fi liv fareva.” (Eccl. 3:11) Imajin weh dis meen fi yoo ahn yu rilayshanship wid Jehoava. Noatis weh di Draw Close to Jehovah buk seh pahn payj 319: “Wen wi don liv fi honjridz,  towznz, milyanz, an eevn bilyanz a yaaz, wi wahn noa lat moa bowt Jehoava dan weh wi noa rait now. Bot wi wahn stil feel laik wi ga lat moa amayzin tingz fi laan bowt ahn. Wi kyaahn eevn imajin how laif wahn bee eena di Paradais. Bot di moas byootiful ting wahn bee dat wi wahn ku jraa kloasa ahn kloasa tu Jehoava.” Meenwail, az wi kantinyu stodi di Baibl, wat els wi ku laan bowt Jehoava?

12. How wi ku luk op hai da hevn? Yooz di egzampl eena di paragraaf.

¹² Di Baibl tel wi amayzin tingz bowt Jehoava ahn di tingz weh hihn du “hai op da hevn.” (Isa. 33:5) Ih aalso tel wi bowt di paat a ih aaganaizayshan weh deh da hevn. (Isa. 6:​1-4; Dan. 7:​9, 10; Rev. 4:​1-6) Fi egzampl, wi ku reed bowt di wandaful tingz weh Izeekyel mi si wen “di hevnz mi oapm op an [ih] mi staat si sohn vizhan fahn Gaad.”—Ezek. 1:1.

13. How yoo feel bowt aal weh Jeezas di du da hevn? (Heebrooz 4:​14-16)

¹³ Tink bowt weh Jeezas di du da hevn az wi King ahn Hai Prees. Hihn ku andastan wi sichuwayshan, ahn chroo hihn wi ku pray ahn goh “kloas tu di chroan a di Gaad hoo gi grayt kainis . . . soh dat wi ku geh mersi ahn help da di rait taim.” (Reed Heebrooz 4:​14-16.) Noh mek wahn singl day paas widowt yu tink bowt weh Jehoava ahn Jeezas di du fi wi fahn hevn. Di lov weh dehn ga fi wi shuda toch wi haat ahn moov wi fi waahn serv Jehoava wid evriting weh wi gat.—2 Kor. 5:​14, 15.

14. Wat da wan a di bes tingz wi ku du fi shoa Jehoava ahn Jeezas dat wi tankful fi weh dehn du fi wi? (Koment pahn di picha dehn.)

¹⁴ Weh wi ku du fi shoa Jehoava ahn  Jeezas dat wi tankful fi weh dehn du? Wan a di bes tingz weh wi ku du da fi chrai help adaz fi staat serv Jehoava ahn bee Krais disaipl. (Mach. 28:​19, 20) Dat da weh di apasl Paal mi du fi shoa dat hihn mi tankful fi weh Jehoava ahn Jeezas du far ahn. Hihn mi noa dat Jehoava waahn mek “aal kaina peepl geh sayv ahn geh di karek andastandin a di chroot.” (1 Tim. 2:​3, 4) Soh Paal mi du aal weh hihn kud fi help az moch peepl fi geh fi noa Gaad “soh dat if pasabl, [ih] ku sayv som a dehn.”—1 Kor. 9:​22, 23.

15. Akaadn tu Psalm 1:​2, weh wahn mek wi hapi?

¹⁵ Di man weh mi rait di fers saam mi seh dat fi mek wi reeli bee hapi ahn liv wahn gud laif, wi “hapinis wahn kohn fahn di laa a Jehoava,” ahn wi wahn “reed ahn meditayt pahn fi Hihn laa day ahn nait.” (Ps. 1:​1-3) Joseph Rotherham, wahn Baibl chranslayta, mi rait wahn buk weh naym Studies in the Psalms. Wen ih mi-di rait bowt dis saam, ih seh dat wahn persn shuda “waahn Gaad help soh moch dat ih goh luk far it, stodi it, ahn spen lata taim di tink bowt weh ih reed.” Hihn mi aalso seh dat if wahn persn weh reed di Baibl “mek wahn day paas widowt ih reed di Baibl, ih ku seh da day gaahn tu ways.” Yu ku injai yu Baibl reedin wen yu laan bowt di amayzin tingz weh ih taak bowt ahn wen yu si how aala di teechinz eena di Baibl goh tugeda. Soh wi geh lata hapinis wen wi laan moa ahn moa bowt deep Baibl teechinz.

16. Weh wi wahn taak bowt eena di neks aatikl?

¹⁶ Dehnya byootiful teechinz weh Jehoava gi wi eena di Baibl noh tu haad fi andastan. Eena di neks aatikl, wi wahn taak bowt wahn deep teechin weh Paal mi rait bowt eena ih leta tu di Heebroo Kristyanz—Jehoava spirichwal templ. Yu wahn geh lata jai az yu laan moa bowt dis tapik.