1. Weh Jehoava mi du fi help ih servants dehn eena Baibl taimz?

 EENA di Baibl, wi reed bowt sohn faytful man weh mi schrang. Bot sohntaim dehn neva feel schrang. Fi egzampl, sohntaim King Dayvid mi feel laik ih mi “schrang laik wahn mongtin,” bot ada taimz ih mi feel “fraitn no miks.” (Ps. 30:7) Gaad spirit mi gi Samson lata schrent, bot Samson mi noa dat widowt di powa fahn Jehoava, ih mi wahn ‘geh week ahn bee laik evri ada man.’ (Judg. 14:​5, 6; 16:17) Jehoava da di wan weh mi giv ih servants di schrent weh dehn mi need.

2. Weh Paal mi meen wen ih seh dat wen ih mi week ih mi powaful saym taim? (2 Korintyanz 12:​9, 10)

² Di apasl Paal mi noa dat hihn tu mi wahn need Jehoava help. (Reed 2 Korintyanz 12:​9, 10.) Paal da-mi wahn aadineri man laik eni wan a wi ahn hihn mi fays lata helt prablem. (Gal. 4:​13, 14) Sohntaim, hihn mi haftu fait fi du weh rait. (Roam. 7:​18, 19) Ih mi wori wahn lat bowt weh mait hapm tu ahn. (2 Kor. 1:​8, 9) Bot wen Paal mi week, dat da wen ih mi ga powa. How? Jehoava mi gi Paal di schrent weh ih mi need fi bayr op anda wateva chraiyalz ih mi gaahn chroo.

3. Weh kweschanz wi wahn ansa eena dis aatikl?

³ Jehoava pramis aala wi dat hihn wahn gi wi di schrent weh wi need fi bayr op tu. (1 Peet. 5:10) Bot fi geh di help, wi need fi du wi paat. Mek wi luk pahn wahn egzampl. Di injin eena wahn kaar ga di powa fi moov di kaar, noh chroo? Bot di jraiva need fi mash di agz fi mek ih ku jraiv wehpaat ih need fi goh. Saym way soh, Jehoava gi wi di  schrent weh wi need, bot wi need fi du wi paat fi mek wi ku benifit fan it. How Jehoava help wi soh dat wee ku bee schrang? Ahn weh wi haftu du soh dat wi ku geh da help fahn Jehoava? Fi ansa dehndeh kweschan, mek wi luk pahn how Jehoava mi schrentn di prafit Joana, Jeezas ma Mayri, ahn di apasl Paal. Wi wahn aalso si how Jehoava di kantinyu fi schrentn ih servants tudeh, jos laik how ih mi du eena di paas.

4. Weh wi ku du fi geh schrent fahn Jehoava?

⁴ Wan way wi ku geh schrent fahn Jehoava da wen wi pray tu ahn. Jehoava ansa wi pryaaz wen ih gi wi di “powa weh hyoomanz noh naamali gat.” (2 Kor. 4:7) Wahn nada way weh wi geh di schrent ahn help da wen wi reed di Baibl ahn tink bowt weh wi reed. (Ps. 86:11) Di mesij weh Jehoava gat eena di Baibl “ga lata powa.” (Heeb. 4:12) Soh wen wi pray tu Jehoava ahn reed di Baibl, wi geh di schrent weh wi need soh dat wi ku bayr op, bee hapi, er tek aan wahn tof asainment. Mek wi si how Jehoava mi help di prafit Joana fi du ih asainment.

5. Wai Joana mi need lata schrent ahn korij?

⁵ Di prafit Joana mi need schrent ahn korij fi du ih asainment. Hihn mi frayd fi du di asainment weh Jehoava mi giv ahn, soh ih mi ron weh ahn kech wahn boat fi goh sohnweh els. Sayka dat, evribadi weh mi deh eena di boat wid ahn mi nayli ded bikaaz a wahn bad staam. Soh di man dehn pahn di boat en op di dash Joana eena di see, ahn wahn big fish mi swala Joana. How yu tink Joana mosi mi feel? Yu tink hihn mi-di wanda if ih mi wahn ded eena di fish beli? Praabli hihn mi tink dat Jehoava mi wahn lef ahn fi ded. Dis mosi mi mek Joana wori wahn lat.

6. Akaadn tu Jonah 2:​1, 2, 7, weh mi help Joana fi ga di schrent weh ih mi need wail ih mi deh eena di big fish beli?

⁶ Weh mi gi Joana di schrent fi bayr op wen di big fish mi swala ahn? Hihn mi pray tu Jehoava. (Reed Jonah 2:​1, 2, 7.) b Eevn doa Joana neva obay Jehoava, hihn mi sari fi weh ih du an ih mi noa dat Jehoava mi wahn lisn wen ih pray. Joana mi tink bowt skripchaz weh ih mi reed eena di paas. How wi noa dis? Eena fi hihn pryaa da Joana chapta 2, hihn mi yooz simila werdz tu weh deh eena di buk a Psalms. (Fi egzampl, kompyaa Jonah 2:​2, 5 wid Psalm 69:1; 86:7.) Dis shoa wi dat Joana mi noa dehndeh vers gud. Dehndeh skripchaz mi mek Joana feel shoar dat Jehoava mi wahn help ahn. Afta dat, di big fish mi vamit owt Joana, ahn hihn mi redi fi du di asainment weh Jehoava mi giv ahn fi du.—Jonah 2:10–3:4.

7-8. Weh mi gi Zhiming di schrent fi bayr op chroo ih chraiyalz?

⁷ Joana egzampl ku help wi wen wi di goh chroo wahn tof sichuwayshan. Fi egzampl, Brada Zhiming, c hoo liv da Taiwan, mi-di sofa bikaaz ih mi ga sohn seeryos helt prablem. Pahn tap a dat, som a ih famili membaz mi-di chreet ahn bad bikaaz ih mi-di serv Jehoava. Bot hihn mi geh aala di schrent weh ih mi need wen ih mi pray ahn stodi. Zhiming seh, “Sohntaim wen Ah di goh chroo prablemz, Ah geh soh angshos dat Ah kyaahn foakos  wen Ah di du mi persnal stodi.” Bot wen dat hapm, hihn noh giv op. Hihn seh, “Di fers ting weh Ah du da pray tu Jehoava. Den Ah wuda put aan mi hedfoan ahn lisn tu wi Kingdom sang dehn. Ahn sohntaim, Ah wuda sing lang wid di sang dehn eena wahn loa vais til Ah feel kaam. Den Ah wuda staat stodi.”

⁸ Zhiming mi sopraiz fi si how ih persnal stodi mi help ahn fi ga di schrent weh ih mi need. Fi egzampl, wail hihn mi-di rikova fahn wahn serjri, wahn ners tel ahn dat hihn mi wahn need blod chransfyoozhan bikaaz ih red blod sel mi loa. Bot hihn mi memba dat di nait bifoa ih geh di serjri, hihn mi reed bowt wahn sista egzampl. Da sista mi geh di saym serjri laik di wan weh hihn mi get. Fi shee red blod sel mi eevn loawa dan fi hihn wan, bot shee stil neva aksep wahn blod chransfyoozhan an ih mi geh beta. Da ekspeeryens mi help Zhiming fi stay faytful.

9. If wahn chraiyal mek yu feel week, weh yu ku du? (Koment pahn di picha.)

⁹ Yu eva gaahn chroo wahn prablem weh mek yu soh angshos dat yu kyaahn pray an tel ahn Jehoava how yu reeli feel? Er yu feel dat yu soh week dat yu kyaahn eevn stodi? Memba dat Jehoava andastan egzakli weh yu di goh chroo. Soh eevn if yu onli ku seh wahn simpl lee pryaa, yu ku bee shoar dat Jehoava wahn gi yu di help weh yu need. (Ifee. 3:20) If yu di fain it haad fi reed ahn stodi bikaaz yu sik, week, er eevn di wori, maybi yu ku lisn tu sohn rikaadn a di Baibl er wan a wi poblikayshan dehn weh bays pahn di Baibl. Yu ku eevn lisn tu som a di sang dehn er wach wahn veedyo pahn jw.org. Jehoava waahn help wi, ahn hihn wahn du dat wen wi pray tu ahn an yooz di Baibl an evriting els weh hihn gi wi fi fain di ansa tu wi pryaaz. Wen wi du dat da laik wi di invait Jehoava fi help wi.

10. How wi bradaz ahn sistaz ku schrentn wi?

¹⁰ Jehoava ku yooz wi bradaz ahn sistaz fi gi wi di schrent weh wi need. Dehn gi wi “lata komfert,” espeshali wen wi di goh  chroo chraiyalz er wen wi geh wahn haad asainment. (Kol. 4:​10, 11) Wi reeli need frenz wen wi di goh chroo “haad taimz.” (Prov. 17:17) Soh wen wi feel laik wi noh schrang inof fi deel wid wateva wi di goh chroo, wi bradaz ahn sistaz deh rait deh fi komfert wi, inkorij wi, ahn help wi fi stay faytful tu Jehoava. Mek wi luk pahn how Jeezas ma Mayri mi geh schrent fahn adaz.

11. Wai Mayri mi need schrent?

¹¹ Mayri mi need lata schrent fi du weh Jehoava mi aks ahn fi du. Jos imajin how shee mosi mi feel wen di aynjel Gaybral tel ahn dat shee mi wahn geh pregnant bifoa ih mi eevn marid. Shee neva noa how fi rayz wahn pikni, bot stilyet shee mi wahn haftu tek kayr a di Mesaiya. Pahn tap a dat, how shee mi wahn tel Joazef dat shee mi pregnant if shee neva ga seks wid ahn yet?—Look 1:​26-33.

12. Akaadn tu Look 1:​39-45, how Mayri mi geh di schrent weh ih mi need?

¹² How Mayri mi geh di schrent fi du da haad asainment weh Gaad mi aks ahn fi du? Shee mi aks adaz fi help ahn. Fi egzampl, shee mi aks di aynjel Gaybral fi giv ahn moa infamayshan bowt weh ih mi need fi du. (Look 1:34) Lee wail afta dat, Mayri gaahn da wahn siti fi vizit Ilizabet, hoo da-mi ih faamli. Ilizabet mi liv “op eena di mongtin dehn” da wahn siti eena Jooda. Mayri mi hapi dat ih mi mek da chrip deh. Jehoava mi yooz Ilizabet fi komen Mayri ahn tel shee di prafesi bowt di baybi weh ih mi wahn gat. (Reed Look 1:​39-45.) Mayri mi seh dat Jehoava du “powaful tingz wid ih han.” (Look 1:​46-51) Jehoava mi yooz di aynjel Gaybral an Ilizabet fi gi Mayri di schrent weh ih mi need.

13. Weh mi hapm wen Dasuri mi aks ih bradaz ahn sistaz fi help?

¹³ Jos laik Mayri, yu tu ku geh lata help fahn wi bradaz ahn sistaz. Fi egzampl, Dasuri, wahn sista weh liv da Bolivia, mi geh di schrent ahn help weh ih mi need. Wen ih dadi mi en op da haaspital kaaz a wahn siknis weh mi wahn kil ahn, shee mi waahn deh wid ih dadi di hoal taim wen hihn mi deh da haaspital. (1 Tim. 5:4) Ih neva eezi fi Dasuri. Shee seh, “Lata taimz Ah mi feel laik Ah kyaahn bayr op.” At fers, shee neva aks fi help. Ih seh, “Ah neva wahn bada mi bradaz ahn sistaz. Ah mi noa dat Jehoava mi wahn gi mi di help ahn schrent weh Ah mi need. Bot Ah mi riyalaiz dat ih neva gud fi du tingz bai miself ahn chrai deel wid mi prablemz pahn mi oan.” (Prov. 18:1) Dasuri mi mek op ih main fi rait sohn letaz tu som a ih frenz ahn tel dehn weh aal shee mi-di goh chroo. Shee seh: “Ah kyaahn eevn tel yu how di bradaz ahn sistaz mi inkorij mi fi bayr op. Dehn mi bring food fi mi da di haaspital ahn shayr sohn komfertin skripchaz wid mi. Ih soh komfertin fi noa dat wi noh deh pahn wi oan. Wi da reeli paat a Jehoava big famili. Ahn wi bradaz ahn sistaz aalwayz redi fi help wi weneva wi need dehn. Dehn wilin fi krai wid wi wen wi di sofa an inkorij wi soh dat wi ku stay faytful tu Jehoava lang wid dehn.”

14. Wai wi shuda aksep help fahn di eldaz?

¹⁴ Wan way weh Jehoava gi wi di schrent ahn help weh wi need da chroo di eldaz. Dehn da laik wahn gif fahn Jehoava weh hihn yooz fi help wi ahn komfert wi wen wi di goh chroo wahn prablem. (Isa. 32:​1, 2) Soh wen wi di wori, wi noh waahn mek notn hoal wi bak fahn tel di eldaz di prablemz weh wi di fays. Den aksep di help  weh dehn gi wi, kaaz da chroo di eldaz Jehoava ku gi yu di schrent fi bayr op.

15. Wat da di hoap weh aal Kristyanz luk faawod tu?

¹⁵ Di pramis dehn weh wi reed eena di Baibl gi wi hoap ahn schrent fi kantinyu serv Jehoava. (Roam. 4:​3, 18-20) Sohn Kristyanz ga di hoap fi goh liv da hevn fareva, wail adaz ga hoap fi liv fareva eena wahn byootiful paradais rait ya pahn ert. Wi hoap help wi fi bayr op chroo wateva chraiyalz wi mait fays, preech di gud nyooz, ahn help owt eena di kangrigayshan. (1 Tes. 1:3) Da saym hoap da weh mi gi di apasl Paal di schrent fi bayr op.

16. Wai di apasl Paal mi need schrent?

¹⁶ Paal mi need lata schrent. Eena di leta weh ih mi rait tu di Korintyanz, hihn mi kompyaa ihself tu wahn klay pat weh eezi fi brok. Sohntaim Paal mi “fays lata prablemz fahn aal bowt,” ih neva “noa weh fi du,” peepl mi “persikyoot” ahn, peepl mi “chroa [ahn] dong,” an eevn ih laif mi eena daynja. (2 Kor. 4:​8-10) Paal mi rait bowt aala dis joorin ih terd mishineri chrip. An afta hihn mi rait bowt dehndeh tingz, hihn mi gaahn chroo sohn moa tof sichuwayshan. Wahn krowd a peepl mi atak ahn, ih mi geh arestid, ih gaahn chroo shiprek, an ih mi eevn gaahn da jayl.

17. Akaadn tu 2 Korintyanz 4:​16-18, weh mi schrentn Paal fi deel wid di chraiyalz weh ih mi-di fays?

¹⁷ Paal mi geh di schrent fi bayr op bikaaz ih mi fokoas pahn ih hoap fi di fyoocha. (Reed 2 Korintyanz 4:​16-18.) Paal mi tel di Korintyanz dat eevn doa ih badi mi-di “ways weh,” hihn neva mi wahn mek dat diskorij ahn. Insted, hihn mi fokoas pahn di fyoocha. Paal hoap fi liv fareva da hevn mi “faar grayta dan eniting els,” soh ih mi wilin fi bayr op chroo eni haad sichuwayshan fi geh da riwaad. Bikaaz Paal mi meditayt pahn da hoap, fi hihn fayt mi geh “schranga ahn schranga evri day.”

18. How Tihomir an ih famili mi geh inkorijment wen dehn mi fokoas pahn dehn hoap fi di fyoocha?

 ¹⁸ Tihomir, wahn brada fahn Bulgaria, mi geh lata schrent wen ih mi fokoas pahn di rezorekshan hoap. Sohn yaaz agoa, fi hihn lee breda, Zdravko, mi ded eena wahn kaar aksident. Sayka dis, Tihomir mi sofa lata pain. Fi deel wid di sadnis, Tihomir an ih famili chrai imajin weh di rezorekshan wahn bee laik. Hihn seh: “Fi egzampl, wi taak bowt wehpaat wi wahn meet op wid Zdravko, weh kaina food wi wahn mek far ahn, hoo wi wahn invait fi di fers gyadarin wen ih geh rezorek, ahn weh wi wahn tel ahn bowt di laas dayz.” Wen Tihomir an ih famili tink bowt di rezorekshan hoap, dat help dehn fi bayr op ahn wayt fi di taim wen Jehoava wahn bring Zdravko bak tu laif.

19. Weh wi ku du fi schrentn wi hoap? (Koment pahn di picha.)

¹⁹ How yu ku schrentn yu hoap? Fi egzampl, if yu hoap da fi liv fareva pahn di ert, yu ku reed weh di Baibl seh bowt di Paradais ahn meditayt pan it. (Isa. 25:8; 32:​16-18) Tink bowt weh laif wahn bee laik eena di nyoo werl. Picha yuself rait deh. Hoo yu ku si? Weh yu ku hyaa? How yu feel? Fi help yu imajin weh di Paradais wahn bee laik, luk fi pichaz eena wi poblikayshan dehn er wach wi myoozik veedyo dehn, laik Di Paradais Soon Kohn, Rait Rong di Kaana, er Imajin di Fyoocha. If wi kip di tink bowt weh di nyoo werl wahn bee laik, den wi wahn feel laik wi onli haftu fays wi prablem dehn “fi wahn shaat taim.” (2 Kor. 4:17) Chroo da fyoocha hoap, Jehoava gi wi schrent fi bayr op wateva chraiyalz wi mait di goh chroo.

20. Eevn wen wi feel week, how wi ku geh di schrent weh wi need?

²⁰ Eevn wen wi feel week, “Gaad wahn gi wi powa.” (Ps. 108:13) Jehoava don gi wi evriting weh wi need soh dat wi geh di schrent fi bayr op. Soh wen yu need help fi du wahn asainment, fi bayr op anda chraiyal, er fi kip yu jai, pray tu Jehoava ahn du persnal stodi fi luk fi di gaidans weh hihn gi wi. Wen yu bradaz ahn sistaz inkorij yu, aksep dehn help. An aalwayz tek taim fi tink bowt yu wandaful hoap fi di fyoocha. Den Gaad wahn “yooz ih grayt powa fi schrentn [yu] soh dat [yu] ku bayr op anda difrent chraiyalz wid payshens ahn jai.”—Kol. 1:11.