1. Wai ih ku bee haad fi mek wi obay?

 YOO eva fain it haad fi obay? Wen King Dayvid mi feel da way, hihn mi pray tu Jehoava. Ih tel ahn: “Gi mi di dizaiya fi waahn obay yu.” (Ps. 51:12) Dayvid mi lov Jehoava. Bot stilyet, hihn mi fain it haad fi bee obeedyant. Jos laik Dayvid, wee aalso fain it haad fi obay. Wai? Fers, aala wi inherit imperfekshan. Sekant, Saytan aalwayz di chrai mek wi ribel gens Jehoava, jos laik weh hihn du. (2 Kor. 11:3) Terd, wi deh monks peepl eena dis werl weh ga wahn ribelyos atichood, “di spirit weh ga powa oava peepl weh noh obeedyant.” (Ifee. 2:2) Wi need fi werk haad fi fait gens wi sinful naycha, fi fait gens di presha weh Saytan ahn dis werl put pahn wi fi disobay, ahn wi need fi chrai wi bes fi obay Jehoava ahn dehn wan weh hihn apoint fi ga atariti oava wi.

2. Weh ih meen fi bee “redi fi obay”? (Jaymz 3:17)

² Reed Jaymz 3:17. Jaymz mi seh dat wahn persn weh waiz “redi fi obay.” Weh Jaymz mi meen wen ih mi seh dat? Wi need fi bee redi ahn wilin fi obay dehn wan weh Jehoava put fi ga som atariti oava wee. Bot Jehoava noh ekspek wi fi obay sombadi weh aks wi fi brok Fi Hihn komanment dehn.—Aks 4:​18-20.

3. Wai ih impoatant tu Jehoava fi mek wi obay dehn wan weh hihn put fi ga atariti oava wee?

³ Wi mait feel dat ih eeziya fi obay Jehoava insteda hyoomanz bikaaz Jehoava aalwayz gi perfek inschrokshanz. (Ps. 19:7) Bot di peepl weh ga atariti oava wi noh perfek. Stilyet, doh, Jehoava gi som atariti tu payrents, govament ofishalz, an eldaz. (Prov. 6:20; 1 Tes. 5: 12; 1 Peet. 2:​13, 14) Wen wi obay dehn, wi akchwali di obay Jehoava. Mek wi si how wi ku obay di hyoomanz weh Jehoava gi atariti tu, eevn doa sohntaim wi mait noh agree wid dehn dairekshan er wi mait noh waahn fala weh dehn tel wi fi du.

4. Wai lata chiljren noh obay dehn payrents?

⁴ Lata wi yong bradaz ahn sistaz deh rong ada yong wanz weh ‘noh obay dehn payrents.ʼ (2 Tim. 3:​1, 2) Wai lata chiljren noh waahn bee obeedyant? Som a dehn feel laik dehn payrents da hipokrit, bikaaz dehn du di opozit a weh dehn tel dehn fi du. Adaz feel laik di advais weh dehn payrents giv owt-daytid, noh mek sens, er tu schrik. If yoo da wahn yong persn, yoo eva feel laik dat? Ih ku bee haad fi fala Jehoava komanment weh seh: “Unu mos obay unu payrents eena wahn way weh pleez di Laad, bikaaz dat da di rait ting fi du eena Gaad sait.” (Ifee. 6:1) Weh ku help yu obay da koman?

5. Akaadn tu Look 2:​46-52, wai Jeezas da di bes egzampl a wahn yong persn weh obay ih payrents?

⁵ Sins Jeezas set di bes egzampl a obeedyans, yu ku laan fahn hihn. (1 Peet. 2:​21-24) Hihn da-mi wahn perfek hyooman weh mi ga imperfek payrents. Bot Jeezas mi obay ih payrents eevn wen dehn mi mek mistayk er neva andastan ahn. (Eks. 20:12) Mek wi si weh mi hapm wen Jeezas mi 12 yaaz oal. (Reed Look 2:​46-52.) Jeezas gaahn wid ih payrents da Jeroosalem, bot wen dehn mi-di kohn bak hoam, dehn neva noatis dat Jeezas neva deh wid dehn. Joazef ahn Mayri mi ga di rispansabiliti fi mek shoar dat aala dehn pikni mi-di chravl wid dehn afta di festival don. Wen Joazef ahn Mayri mi fain Jeezas, Mayri mi blaym Jeezas fi aala di chrobl hihn mi put dehn chroo. Jeezas kuda mi tel dehn dat weh dehn mi-di seh neva fyaa. Bot insteda dat, hihn mi ansa dehn eena wahn kaam ahn rispekful way. Joazef ahn Mayri “neva andastan weh hihn mi-di tel dehn.” Stilyet, Jeezas mi “kantinyu fi obay dehn.”

6-7. Weh ku help yong peepl fi obay dehn payrents?

⁶ Yong peepl, unu eva fain it haad fi obay unu payrents wen dehn mek mistayk er wen dehn noh andastan unu? Weh ku help unu? Fers, mek wi tink bowt how Jehoava feel. Di Baibl seh dat wen unu obay unu payrents, “di Laad wahn pleez wid unu.” (Kol. 3:20) Jehoava noa dat sohntaim yu payrents noh andastan yu er dat sohntaim dehn mek roolz weh noh eezi fi obay. Eevn if dat da di kays, wen yu chooz fi obay yu payrents, yu mek Jehoava hapi.

⁷ Sekant, tink bowt how yu payrents feel. Wen yu obay yu payrents, yu mek dehn hapi ahn dehn chros yu eevn moa. (Prov. 23:​22-25) If yu du dat, yoo ku ga wahn beta rilayshanship wid dehn tu. Wahn yong brada fahn Belgium weh naym Alexandre seh: “Wen Ah staat tu du moa ahn moa a weh mi payrents aks mi fi du, wi mi feel kloasa tu eech ada ahn wi mi hapiya.” b Ahn terd, if yu laan fi obay yu payrents, tingz gwehn gud fi yu eena di fyoocha. Paulo, wahn brada weh eena ih erli 20ʼs weh liv da Brazil, seh: “Wen Ah laan fi obay mi payrents, ih help mi fi obay Jehoava an adaz weh ga atariti.” Di  Baibl gi wi sohn gud reezn fi mek wi obay wi payrents. Ih seh: “Yu ku ga wahn gud laif ahn yu ku liv wahn lang taim pahn di ert.”—Ifee. 6:​2, 3.

8. Wai wahn lata yong peepl chooz fi obay dehn payrents?

⁸ Wahn lata yong peepl si how gud tingz werk owt fi dehn wen dehn obay dehn payrents. Luiza, wahn teenayj sista fahn Brazil, mi fain it haad fi andastan wai ih payrents neva alow ahn fi ga wahn foan, espeshali sins wahn lata yong peepl rong fi shee ayj mi ga wan. Bot den shee mi riyalaiz dat ih payrents mi-di chrai protek ahn. Shee seh: “Now Ah riyalaiz dat wen Ah obay mi payrents da noh laik wahn hankof, bot da laik wahn seet belt weh ku sayv mi laif.” Elizabeth, wahn yong sista fahn di United States weh 18, stil fain it haad fi obay ih payrents. Shee seh: “Wen Ah noh andastan wai mi payrents mek wahn sertn rool, Ah memba di ada taimz wen fi dehn roolz mi protek mi.” Monica, wahn 17-yaa-oal sista weh liv da Armenia, seh dat tingz mi aalwayz werk owt beta fi shee wen ih obay ih payrents dan wen ih neva obay dehn.

9. How peepl feel bowt obay di laa?

⁹ Wahn lata peepl admit dat wi need di govament dehn ahn dat wi shuda obay at lees som a di laa dehn weh di “peepl weh ga atariti” set. (Roam. 13:1) Bot dehndeh saym peepl mait noh waahn obay wahn sertn laa bikaaz dehn noh laik it er bikaaz dehn feel laik ih noh fyaa. Fi egzampl, dehn mait noh laik di taks laa. Eena wahn konchri da Europe, dehn mi du wahn servay ahn wahn lata peepl seh dat “yu noh haftu pay taks if yu feel laik ih noh fyaa.” Sayka dat, eena da konchri di peepl onli pay som a di taks weh di govament aks dehn fi pay.

10. Wai wi haftu obay eevn di laa dehn weh wi noh laik?

¹⁰ Di Baibl seh dat hyooman govaments di kaaz sofarin bikaaz dehn deh anda Saytan kanchroal, ahn dehn wahn soon geh dischrai. (Ps. 110:​5, 6; Eccl. 8:9; Look 4:​5, 6) Ih aalso tel wi dat “enibadi weh goh gens di peepl weh ga atariti oava dehn di goh gens Gaad araynjment.” Jehoava alow di govaments fi rool soh dat dehn ku kip tingz anda kanchroal, ahn hihn ekspek wi fi obay dehn. Dat da wai wen wi pay taks, shoa rispek, an obay, wi di “giv evribadi weh dehn aks fa.” (Roam. 13:​1-7) Sohntaim wi mait feel laik wahn laa noh fyaa er ih tu haad fi obay. Bot wi obay di ataritiz bikaaz Jehoava tel wi fi du it, az lang az dehn noh aks wi fi goh gens Fi Hihn koman dehn.—Aks 5:29.

11-12. Weh Joazef ahn Mayri mi du fi obay wahn laa weh neva eezi fi mek dehn fala, ahn wat da-mi di rizolt? (Look 2:​1-6) (Koment pahn di picha dehn.)

 ¹¹ Wi ku laan fahn Joazef ahn Mayri egzampl bikaaz dehn mi redi fi obay di atariti dehn eevn wen ih neva eezi. (Reed Look 2:​1-6.) Wen Mayri mi bowt nain monts pregnant, di govament mi aks Joazef ahn Mayri fi du sohnting weh mi haad fi mek dehn du. Agostos, hoo mi-di rool di Roaman Empaiya, mi waahn evribadi goh rejista da dehn hoamtong. Soh Joazef ahn Mayri mi haftu chravl 93 mailz fi goh da Betlihem. Dat da-mi wahn lang jerni op ahn dong lata hil. Fi shoar da chrip neva mi wahn bee komfatabl fi Mayri. Dehn mosi mi-di wori bowt Mayri helt ahn dehn baybi weh neva baan yet. Wat if shee mi ga di baybi wen dehn mi deh pahn di road? Dehn mosi mi wahn feel veri angshos fi kip di baybi sayf sins hihn da-mi di Mesaiya. Yu tink dehn kuda mi yooz dat az wahn ekskyoos fi noh obay di govament?

¹² Eevn doa Joazef ahn Mayri mi-di wori, dehn mi stil obay di laa. Ahn bikaaz dehn mi obeedyant, Jehoava mi tek kayr a dehn. Mayri mi reech sayf da Betlihem, shee mi gi bert tu wahn helti baybi, an ih eevn help mek Baibl prafesi kohn chroo!—Mic. 5:2.

13. How wi obeedyans ku afek wi bradaz ahn sistaz?

¹³ Wen wi obay dehn wan weh ga atariti, wee an adaz benifit. How dat pasabl? Wel, wi noa dat if wi du dat, wi noh wahn sofa di kansikwens laik dehn wan weh brok di laa. (Roam. 13:4) Wen wi obay dehn wan weh ga atariti, dehn wahn ku si dat Jehoava Witnisiz da obeedyant peepl. Fi egzampl, sohn yaaz agoa da Nigeria, dehn mi ga sohn soalja weh mi gaan eena wahn Kingdom Haal joorin wahn kangrigayshan meetin. Dehn mi-di luk fi peepl hoo neva pay dehn taks, bot  di aafisa weh mi in chaaj mi tel di soaljaz fi lef fahn deh. Ih tel dehn: “Jehoava Witnisiz aalwayz pay dehn taks.” Wen yu obay di laa, yu help kip di gud repyutayshan weh Jehoava Witnisiz gat. Ahn wan day, da gud repyutayshan wahn ku help protek wi bradaz ahn sistaz.—Mach. 5:16.

14. Weh mi help Joanna fi bee “redi fi obay” di ataritiz?

¹⁴ Stilyet, doh, wi mait noh aalwayz waahn obay peepl weh ga atariti. Joanna, wahn sista fahn di United States, seh: “Ih mi reeli haad fi mek Ah obay di ataritiz bikaaz dehn neva fyaa wid som a mi famili membaz.” Bot Joanna mi riyalaiz dat shee mi haftu chaynj ih tinkin. Di fers ting weh shee mi du da stap reed di poas dehn pahn soashal meedya weh taak bad bowt peepl eena atariti. (Prov. 20:3) Sekant, shee mi pray tu Jehoava fi help ahn chros eena Hihn insteda aks fi wahn chaynj a govament. (Ps. 9:​9, 10) Terd, shee mi reed sohn aatikl eena wi poblikayshan dehn weh taak bowt how fi stay nyoochral. (Jan 17:16) Joanna seh dat bikaaz shee rispek an obay di atariti dehn, shee “feel kaam ahn kantentid.”

15. Wai ih ku bee haad di fala di dairekshan weh kohn fahn Jehoava aaganaizayshan?

¹⁵ Jehoava aks wi fi “obay di wan dehn weh di tek di leed” eena di kangrigayshan. (Heeb. 13:17) Jeezas, wi Leeda, perfek, bot di bradaz weh hihn apoint fi tek di leed noh perfek. Soh wi mait fain it haad fi obay dehn sohntaim, espeshali wen dehn aks wi fi du sohnting weh wi noh waahn du. Dis mi hapm tu di apasl Peeta. Wen wahn aynjel mi tel ahn fi eet di animalz weh neva kleen akaadn tu di Laa a Moaziz, Peeta tel di aynjel chree taimz dat ih noh wahn eet dehn! (Aks 10:​9-16) Wai ih neva waahn du it? Bikaaz tu hihn, dis nyoo inschrokshan neva mek no sens. Da inschrokshan mi difrent fahn weh hihn mi-di du ih hoal laif. If Peeta mi fain it haad fi obay di dairekshan a wahn perfek aynjel, ih shudn sopraiz wi wen wee fain it haad fi fala di dairekshan a wahn imperfek hyooman!

16. Eevn doa Paal neva andastan di dairekshan weh hihn mi geh, weh hihn mi du? (Aks 21:​23, 24, 26)

¹⁶ Di apasl Paal mi “redi fi obay” eevn wen hihn mi geh dairekshan weh ih neva andastan. Di Jooz mi hyaa wahn rooma dat Paal mi-di preech “gens di Laa a Moaziz” ahn dat ih mi-di disrispek it. (Aks 21:21) Di eldaz mi tel Paal fi kehr foa man da di templ ahn tek paat eena di Jooish kleenin chradishan fi shoa dat hihn neva mi-di goh gens di Laa a Moaziz. Paal mi noa dat di Kristyanz neva mi deh anda da Laa nohmoh ahn dat hihn neva du notn rang. Bot stilyet, Paal gaahn du weh di eldaz tel ahn fi du. “Di neks day Paal ahn di foa man dehn gaahn tek paat eena di Jooish kleenin chradishan.” (Reed Aks 21:​23, 24, 26.) Bikaaz Paal mi obay di dairekshan a di eldaz, dat mi help kip di yooniti monks di bradaz.—Roam. 14:​19, 21.

17. Weh yu laan fahn Stephanie ekspeeryens?

¹⁷ Wahn sista weh naym Stephanie mi fain it haad fi obay wahn disizhan weh di rispansabl bradaz eena fi shee konchri mi mek. Shee an ih hozban mi hapi di serv eena wahn farin-langwij groop. Bot den di branch aafis mi si di need fi stap di groop, ahn di kopl mi geh asain bak tu wahn kangrigayshan eena dehn mada tong. Stephanie mi seh: “Ai neva hapi wid  da disizhan ataal. Ai neva tink dat fi wee langwij mi need help.” Stilyet, shee mi disaid fi obay di dairekshan weh ih mi get. Shee seh: “Laytaraan, Ah mi si dat di bradaz mi mek wahn waiz disizhan. Eena wi nyoo kangrigayshan, dehn ga lata bradaz ahn sistaz weh noh ga ada famili membaz eena di chroot. Soh wee mek dehn bee paat a wi famili ahn wi inkorij dehn. Ah di stodi wid wahn sista weh yoostu bee inaktiv. Ahn now Ah ga moa taim fi persnal stodi. Ah feel gud an Ah ga wahn kleen kanshans, kaaz Ah du mi bes fi obay dairekshanz.”

18. How wi benifit wen wi obay?

¹⁸ Wee ku laan fi obay. Jeezas “mi laan fi obay,” noh bikaaz hihn mi-di liv eena perfek kandishanz, bot “chroo di tingz weh ih sofa.” (Heeb. 5:8) Jos laik Jeezas, wi ku laan fi bee obeedyant eevn wen tingz haad fi wi. Fi egzampl, yoo mi fain it haad fi obay wen di COVID-19 pandemik mi jos staat ahn dehn aks wi fi stap meet da wi Kingdom Haal dehn ahn fi stap preech fahn hows tu hows? Bot yu obeedyans mi protek yu, ih help kip di kangrigayshan yoonaitid, ahn yu mi mek Jehoava hapi. Dat wahn help aala wi fi feel redi fi obay eni inschrokshanz weh wi wahn geh joorin di grayt chribyulayshan. If wi obay dehndeh inschrokshanz, wi wahn ku sayv wi laif!—Job 36:11.

19. Wai yoo waahn bee obeedyant?

¹⁹ Wi laan dat wen wi obay ih bring wahn lata blesin. Bot moa impoatant, wi chooz fi obay Jehoava bikaaz wi lov hihn ahn wi waahn mek hihn hapi. (1 Jan 5:3) Wi kuda neva pay bak Jehoava fi aal weh hihn du fi wi. (Ps. 116:12) Bot wee kud obay hihn ahn dehn wan weh ga atariti oava wi. If wi obeedyant, wi shoa da wi waiz. Ahn wen wi waiz wi mek Jehoava hapi.—Prov. 27:11.