Di bradaz da Betel mi werk fi oava wahn yaa fi bil wahn rayjo stayshan. Dis da-mi di WBBR rayjo stayshan da Staten Island, New York City. Bifoa di bradaz mi staat bil, dehn mi klyaa di lan. Afta dat, dehn mi bil wahn big hows fi di werkaz ahn di bildin fi di rayjo stayshan. Afta di bradaz finish di kanschrokshan werk, dehn staat werk fi geh di ikwipment weh dehn mi need fi braadkyaas pahn di rayjo. Bot dis neva eezi fi dehn, sayka sohn prablemz weh dehn mi fays.

Di bradaz mi ga wahn reeli haad taim di chrai put op di mayn antena fi di rayjo stayshan. Di antena mi 300 fut (91 meeta) lang ahn dehn mi haftu heng it bitween too boad poas. Eech poas mi 200 fut (61 meeta) hai. Di fers taim dehn chrai set op di antena ih neva werk. Bot wid Jehoava help, di bradaz mi aybl fi du it. Brada Calvin Prosser, hoo mi werk pahn dis proajek, seh: “If tingz mi werk owt di fers taim wi chrai it, wi mi wahn prayz wiself ahn seh, ‘Luk pahn weh wee du!ʼ” Bot insteda du dat, dehn mi prayz Jehoava bikaaz da hihn mi werk tingz owt. Now, dehn mi ga wahn neks prablem weh kom op.

Bak den rayjo stayshan da-mi sohnting nyoo, an ih mi haad fi geh nyoo ikwipment weh dehn mi need fi staat braadkyaas pahn di rayjo. Soh di bradaz mi fain sekant-han ikwipment weh sombadi eena di ayrya mi put tugeda. An insteda bai wahn maik, dehn mi jos yooz wan owta wahn foan. Afta dehn mi get evriting dehn mi need, dehn mi tes it owt wahn nait eena Febiweri. Fi tes owt if di ikwipment dehn werk, di bradaz mi sing sohn Kingdom sang ahn braadkyaas it pahn di rayjo. Brada Ernest Lowe, wahn brada weh mi sing da nait, mi memba wahn foni stoari weh mi hapm wid  Brada Rutherford. Brada Rutherford mi deh da Brooklyn, weh deh laik 15 mailz (25 kilomita) fahn di rayjo stayshan. Hihn mi hyaa dehn di sing oava di rayjo, ahn hihn mi kaal dehn.

Brada Rutherford mi tel dehn: “Stap mek naiz, unu song laik pus di baal!” Dehn mi feel wahn lee bit shaym, soh dehn hori stap braadkyaas. Bot dehn mi noa fi shoar dat peepl kuda mi hyaa dehn pahn di rayjo.

Di fers ofishal braadkyaas pahn di rayjo mi hapm pahn Febiweri 24, 1924. Pahn da day, wen Brada Rutherford mi dedikayt di rayjo stayshan, ih mi seh dat dehn mi wahn yooz di rayjo stayshan “fi du di werk weh Krais di King mi gi dehn fi du.” An ih mi seh dat di rayjo stayshan mi wahn “help evribadi fi andastan di Baibl ahn fi si how impoatant di taimz weh dehn mi-di liv eena.”

Di fers braadkyaas mi gaahn reeli gud. Ahn fi 33 yaaz, Jehoava peepl mi yooz di WBBR rayjo stayshan fi reech peepl.

Eena Joolai 1924, di Baibl Styoodents mi ga wahn kanvenshan da Columbus, Ohio. Baibl Styoodents fahn aal oava di werl mi gaahn da dis kanvenshan. Dehn kuda mi hyaa di taak dehn eena dehn oan langwij, laik Arabic, English, French, German, Greek, Hungarian, Italian, Lithuanian, Polish, Russian, Ukrainian, ahn di Scandinavian langwij dehn. Peepl kuda mi lisn tu som a di taak dehn pahn di rayjo, ahn di bradaz mi aks wahn loakal nyoozpaypa fi rait sohn aatikl bowt di kanvenshan taak dehn evri day.

Pahn Terzdeh, Joolai 24, moa dan 5,000 bradaz ahn sistaz weh mi gaahn da di kanvenshan mi gaan owt fi preech. Dehn mi plays bowt 30,000 buk ahn staat towznz a Baibl stodi wid peepl. The Watch Tower mi seh dat da-mi “di bes paat a di kanvenshan.”

Sohnting inchrestin mi hapm da di kanvenshan pahn Fraideh, Joolai 25, joorin Brada Rutherford taak. Joorin fi hihn taak, hihn mi reed wahn dakyument weh mi kaal owt di politikal, rilijos, ahn bizniz leedaz fi aal di rang weh dehn du. Di dakyument seh dat dehn mi-di “stap peepl fahn laan di chroot bowt Gaad Kingdom, weh Gaad mi wahn yooz fi fiks di ert,” ahn dat dehndeh leedaz mi rang bikaaz dehn mi “sopoat di League of Nations ahn seh dat ‘Gaad mi-di yooz da aaganaizayshan fi rool di ert.ʼ” Di Baibl Styoodents mi need korij fi preech dis mesij tu peepl.

Laytaraan, The Watch Tower mi print wahn aatikl weh taak bowt how di bradaz ahn sistaz mi feel  afta dehn lisn tu di taak dehn da di kanvenshan da Columbus. Ih mi reeli schrentn dehn fayt, an ih mi bil op dehn korij fi preech eevn if peepl mi chrai stap dehn. Brada Leo Claus seh: “Wen di kanvenshan mi en, wi mi feel eksaitid fi goh bak hoam ahn preech da mesij.”

Eena Aktoaba, di Baibl Styoodents mi staat giv owt milyanz a di chrak weh naym Ecclesiastics Indicted. Da chrak mi ga di saym mesij weh Brada Rutherford mi reed da di kanvenshan. Wahn brada weh naym Frank Johnson mi-di giv owt di chrak eena wahn smaal tong da Oklahoma, U.S.A. Bot hihn mi finish kwik an ih mi haftu wayt 20 minits bifoa di ada poblishaz mi wahn pik ahn op. Bot dat neva sayf bikaaz sohn man fahn da saym tong mi-di luk fi ahn. Dehn mi beks wid ahn bikaaz ih mi-di preech eena dehn tong. Soh Brada Johnson mi disaid fi haid eena wahn cherch kloas tu wehpaat ih mi deh. Di cherch mi emti, soh ih mi lef som a di chrak eena di cherch. Hihn mi put dehn pahn eech seet ahn wan eena di preecha Baibl. Hihn mi du dat soh faas dat ih stil mi ga moa taim bifoa di bradaz pik ahn op. Soh ih gaahn da too moa cherch ahn du di saym ting.

Afta dat, Brada Johnson mi hori gaahn bak wehpaat ih mi fi meet di bradaz. Wail ih mi-di wayt, ih haid baka wahn gyas stayshan soh dat di peepl weh mi-di luk far ahn neva fain ahn. Di man dehn mi jraiv rait paas di gyas stayshan, bot dehn neva si ahn. Lee bit afta dat, di bradaz mi reech fi pik ahn op.

Wan a di bradaz weh mi gaahn meet ahn seh: “Wen wi mi-di lef fahn da tong, wi mi jraiv paas di chree cherch weh Brada Johnson mi lef di chrak dehn eena. Wi mi si bowt 50 peepl di stan op fronta eech a di cherch. Som a di peepl mi-di reed di chrak ahn som a dehn mi-di shoa it tu dehn preecha. Sayka di big komoashan weh mi-di hapm fronta di cherch dehn, wi mi noa wi lef da jos di rait taim! Wi mi tank Jehoava fi protek wi, bikaaz da hihn help wi fi noh geh kech wail wi mi-di giv owt di chrak.”

Di Baibl Styoodents eena ada konchriz neva frayd fi preech needa. Eena France, Brada Józef Krett mi preech tu sohn werkaz fahn Poland weh mi-di werk da France. An ih mi fi gi wahn taak weh naym “The Resurrection of the Dead Soon.” Soh di bradaz ahn sistaz mi invait peepl eena da ayrya fi kohn lisn tu di taak. Bot wahn prees mi waan di peepl fahn ih cherch fi noh goh. Bot insted, di opozit mi hapm. Moa dan 5,000 peepl mi kohn lisn tu di taak, an eevn di prees mi dehdeh! Brada Krett mi invait di prees fi kom op an eksplayn ih bileef dehn, bot di prees neva waahn. Afta di taak, Brada Krett mi gi di peepl aal di lichricha weh ih mi gat, bikaaz ih mi si dat dehn mi reeli inchrestid fi laan moa.—Amos 8:11.

Wahn nada plays weh di Baibl Styoodents neva frayd fi preech da-mi Africa. Brada Claude Brown mi gi lata taak ahn giv owt lata lichricha da Ghana. Dis mi help peepl fi laan di chroot faas. Wahn man weh naym John Blankson, weh mi-di stodi medisn, mi hyaa wan a Brada Brown taak. Rait away hihn mi noa dat da-mi di chroot. John mi seh: “Di chroot mi mek Ah feel soh hapi, an Ah mi shayr it wid lata peepl weh mi-di goh da skool wid mi.”

John mi laan dat di bileef bowt di Chriniti noh kohn fahn di Baibl. Soh wahn day ih gaahn vizit di prees da di Anglikan cherch fi kweschan ahn bowt it. Bot di prees chays ahn weh ahn hala: “Yoo da noh wahn Kristyan. Yoo da fahn di Devl. Goh fahn ya!”

Soh John gaahn hoam ahn rait wahn leta tu di prees fi invait ahn fi difen di Chriniti fronta ada  peepl. Bot di prees gaahn da John skool fi mek di hed teecha noa weh mi-di hapm. Soh di hed teecha kaal John da ih aafis fi aks ahn if ih mi rait wahn leta tu di prees fi chroo.

John seh: “Yes, Ser.”

Bot di teecha tel John dat ih mi haftu rait wahn leta fi apolojaiz tu di prees. Soh John rait wahn leta ahn seh:

“Ser, Mi teecha tel mi fi rait wahn leta fi apolojaiz tu yu. Ai noh main du dat az lang az yoo admit dat di tingz weh yu teech noh kohn fahn di Baibl.”

Di teecha mi sopraiz, an ih aks John: “Blankson, dis da weh yoo wahn tel di prees?”

John tel di teecha, “Yes, Ser. Dat da aal Ah ku tel ahn.”

Den di teecha seh: “Wi wahn haftu kik yu owta skool bikaaz yu di taak gens di prees ahn yu di goh gens di cherch weh di govament sopoat.”

John seh: “Bot, Ser, wen yu di teech wi ahn wi noh andastan sohnting, wee noh aks yu kweschanz?”

Di teecha seh: “Yes, unu ku aks kweschanz.”

Soh hihn seh: “Wel, Ser, dat da aal weh Ai mi-di du. Di prees mi-di teech wi bowt di Baibl an Ai aks ahn wahn kweschan. If hihn kyaahn ansa mai kweschan, den wai Ai need fi rait wahn leta fi apolojaiz tu ahn?”

Di teecha neva kik John owta skool. Ahn hihn neva sen no leta fi apolojaiz tu di prees.

Dis da weh The Watch Tower seh bowt aala di werk weh wi mi du da yaa: “Wi feel jos laik how Dayvid mi feel wen ih seh: ‘Yoo wahn gi mi di schrent fi fait.ʼ (Saam 18:39) Dis yaa mi reeli gud. Wi mi geh inkorij wahn lat bikaaz wi si how Jehoava help wi eena di minischri. Di bradaz ahn sistaz onli hapi di preech di gud nyooz.”

Rong di en a di yaa, di bradaz mi mek planz fi set op wahn nada rayjo stayshan weh mi wahn deh da Chicago. Dis nyoo rayjo stayshan mi naym WORD. Dehn naym it laik dat bikaaz dehn mi wahn yooz dis rayjo stayshan fi preech Gaad Werd. Di bradaz mi geh ikwipment weh mi eevn beta dan di wan weh dehn mi ga da di ada rayjo stayshan. Soh peepl kuda mi hyaa di Kingdom mesij weh mi liv honjridz a mailz fahn Chicago. Peepl mi eevn aybl fi hyaa it aal di way da Canada.

Di neks yaa, 1925, mi wahn bee eksaitin fi di Baibl Styoodents. Jehoava mi help dehn fi ga wahn beta andastandin a Revilayshan chapta 12. Sayka da nyoo andastandin, som a di bradaz ahn sistaz mi stap serv Jehoava. Bot wahn lat moa mi waahn andastan dis pasij beta. Dehn mi hapi fi noa moa bowt di tingz weh mi hapm da hevn ahn how dehndeh tingz mi wahn afek Gaad peepl pahn di ert.