1. How Jehoava feel bowt wi?

 JEHOAVA noatis evriting weh wi di goh chroo. Hihn si wen wi hapi, ahn wen wi sad. (Saa. 37:​18) Wen hihn si wi di du wi bes fi serv ahn eevn doa wi di sofa, hihn prowd a wi an ih eega fi help wi ahn komfert wi.

2. Weh Jehoava du fi dehn wan weh sofa payn eena dehn haat, ahn how dehn ku benifit fahn how hihn tek kayr a dehn?

² Wen sohnbadi sofa payn eena dehn haat, Saam 147:3 seh dat Jehoava “ban dehn op wehpaat dehn get hert.” Dis skripcha di seh dat Jehoava jentl wid wi wen hihn di tek kayr a wi. Weh wi need fi du if wi waahn benifit fahn aal di wayz how Jehoava tek kayr a wi? Tink bowt dis iloschrayshan: Wahn dakta ku du wahn lat fi help sombadi weh geh hert. Bot fi mek di persn geh beta, ih haftu lisn ahn du weh di dakta seh. Eena dis aatikl, wi wahn si weh Jehoava seh tu peepl weh di sofa, ahn wi wahn taak bowt how dehn ku benifit fahn fi hihn lovin advais.

JEHOAVA KIP DI TEL WI DAT WI PRESHOS TU HIHN

3. Wai som peepl feel laik dehn noh wert notn?

³ Wi liv eena wahn werl weh peepl noh ga lov. Dehn chreet peepl bad ahn mek dehn feel laik dehn noh wert notn. Wahn sista weh naym Helen a seh: “Mai payrents neva shoa no lov. Mi pa mi vailent, an ih tel wi evri day dat wi yoosles.” Maybi sohnbadi chreet yoo bad er dehn kritisaiz yu, ahn dehn stay di mek yu feel laik yu noh wert  notn. Sayka dat, yu mait bileev dat nobadi reeli lov yu.

4. Bays pahn Saam 34:​18, how Jehoava feel bowt peepl weh di sofa eena dehn haat, ahn weh hihn waahn wi memba?

⁴ Eevn doa ada peepl chreet yu bad, yu ku bee shoar dat Jehoava lov yu ahn dat yu preshos tu hihn. Jehoava dehn “kloas tu dehn wan weh di sofa eena dehn haat.” (Reed Saam 34:​18.) If yoo feel diskorij, memba dat Jehoava jraa yu kloas tu ahn bikaaz ih si di gud tingz eena yu haat. (Jan 6:​44) Jehoava aalwayz redi fi help yu bikaaz yu preshos tu ahn.

5. Weh wi ku laan fahn di way Jeezas mi chreet peepl weh mi feel wertles?

⁵ Jeezas egzampl ku teech wi how Jehoava feel. Wen Jeezas mi deh pahn ert, hihn mi deh rong wahn lata peepl weh adaz luk dong pan. How hihn mi chreet dehn? Hihn mi pay atenshan tu dehn an ih mi kain tu dehn. (Mach. 9:​9-​12) Wan taim, wahn laydi weh mi-di sofa wahn terabl siknis mi toch Jeezas kloaz bikaaz ih mi-di hoap ih mi wahn geh heel. Jeezas mi komfert ahn an komen ahn fi ih fayt. (Maak 5:​25-​34) Jeezas kapi ih Pa egzampl eena evriting. (Jan 14:9) Soh if dat da how Jeezas feel bowt peepl, den yu ku bee shoar dat Jehoava feel di saym way. Yoo preshos tu hihn, ahn hihn noatis aal di gud tingz eena yu. Hihn noa di fayt weh yu shoa, ahn humoch yu lov ahn.

6. Weh yu ku du if yu feel wertles?

⁶ eh yu ku du if yu feel wertles? Reed sohn Baibl vers weh rimain yu dat yu preshos tu Jehoava. (Saa. 94:​19) Tek taim fi tink bowt dehndeh vers. b How bowt if yu  kyaahn reech wahn goal weh yu set er yu feel diskorij bikaaz yu kyaahn du az moch az adaz? Noh foakos pahn weh yu kyaahn du, ahn noh kompyaa yuself wid adaz. Jehoava noh ekspek wi fi du moa dan weh wi ku du. (Saa. 103:​13, 14) Wat if sohnbadi chreet yu bad er abyooz yu? Memba dat da noh fi yoo faalt. Ahn noh ferget dat Jehoava wahn joj dehn wan weh chreet peepl bad, bot hihn wahn help peepl weh sofa abyoos. (1 Peet. 3:​12) Sandra, hoo mi geh abyooz az wahn pikni, seh: “Ah pray tu Jehoava evri day fi help mi si di gud kwalitiz weh hihn si eena mi.”

7. How yu ku yooz yu ekspeeryens eena laif eena Jehoava servis?

⁷ Jehoava ku yooz yu fi help adaz, dat da fi shoar. Da wahn privilij fi werk lang wid ahn wen wi preech. (1 Kor. 3:9) Weh yu ekspeeryens eena laif mek it eeziya fi andastan how adaz feel wen dehn di sofa. Yu ku du wahn lat fi help dehn. Helen, weh wi mi taak bowt erliya, geh help, ahn now shee di help adaz az wel. Shee seh: “Ai yoostu feel wertles, bot Jehoava mek Ah feel laik hihn lov mi, ahn hihn yooz mi fi help ada peepl.” Shee hapi di serv az wahn regyula painyaa.

JEHOAVA WAAHN WI AKSEP IH FERGIVNIS

8. Weh Jehoava pramis wi da Isaiah 1:​18?

⁸ Wahn lata Jehoava servants stil feel reeli bad fi di tingz weh dehn mi du, eeda bifoa dehn mi geh baptaiz er afta dehn mi geh baptaiz. Bot ih impoatant fi memba dat Jehoava lov wee soh moch dat ih mi wilin fi giv op ih son az wahn sakrifais. Da sakrifais da wahn gif fahn Jehoava, ahn hihn waahn mek wi aksep it. Jehoava tel wi dat wans wi “fiks tingz” c bitween wee ahn hihn, hihn wahn neva bring op di bad tingz wi mi du eena di paas agen. (Reed Isaiah 1:​18.) d Jehoava soh lovin dat ih chooz fi ferget wi sin dehn, bot ih wahn aalwayz memba di gud tingz weh wi du.​—Saa. 103:​9, 12; Heeb. 6:​10.

9. Wai yu shuda foakos pahn weh yu di du rait now ahn weh yu wahn ku du eena di fyoocha insteda foakos pahn weh yu mi du eena di paas?

⁹ Yoo ga tingz eena yu paas weh yu wish yu neva du, er tingz weh yu wish yu neva giv op? If dat da di kays, du yu bes fi foakos pahn weh yu di du rait now ahn weh yu wahn ku du eena di fyoocha. Tink bowt di apasl Paal egzampl. Paal mi feel reeli bad bikaaz ih yoostu persikyoot Kristyanz eena di paas. Bot hihn mi noa dat Jehoava don fergiv ahn. (1 Tim. 1:​12-​15) Yu tink Paal mi kip aan di tink bowt aal di bad tingz weh ih mi du eena di paas? No, non ataal. An ih neva stay tink bowt how haad ih mi werk fi bee wahn Farisee ahn how peepl yoostu luk op tu ahn eena dehndeh dayz. (Fil. 3:​4-8, 13-​15) Paal mi noa dat hihn kudn du notn fi chaynj weh mi hapm eena di paas. Hihn mi stay bizi di preech, an ih mi foakos pahn di praiz weh ih mi wahn get eena di fyoocha. Jos laik Paal, yu ku foakos pahn di tingz yu  di du rait now fi Jehoava ahn di blesinz weh hihn pramis yu wahn get eena di fyoocha.

10. Weh yu ku du if yu mi hert sohnbadi eena di paas?

¹⁰ Wat if yoo mi hert sohnbadi eena di paas ahn yu stil feel reeli bad fi weh yu mi du? Seh sari fahn yu haat ahn du aal weh yu kud fi mek tingz beta. (2 Kor. 7:​11) Aks Jehoava fi help di persn weh yu hert. Jehoava ku help yoo ahn da persn fi bayr op ahn ga pees.

11. Weh di prafit Joana egzampl teech wi? (Koment pahn di picha.)

¹¹ Laan fahn yu mistayk, an alow Jehoava fi kantinyu yooz yu. Mek wi si weh wi ku laan fahn di prafit Joana egzampl. Jehoava mi koman Joana fi goh da Niniveh, bot insted Joana mi chooz fi gaahn sohnweh els. Sayka dat, Jehoava disiplin ahn, an Joana mi laan fahn ih mistayk. (Joan. 1:​1-4, 15-​17; 2:​7-​10) Jehoava neva giv op pahn Joana, soh ih mi giv ahn wahn nada chaans fi goh da Niniveh. Dis taim, hihn mi obay Jehoava koman. Eevn doa hihn mi feel reeli bad fi weh ih mi du, hihn neva alow dat fi stap ahn fahn mek Jehoava kantinyu yooz ahn az wahn prafit.—Joan. 3:​1-3.

JEHOAVA YOOZ IH HOALI SPIRIT FI KOMFERT WI

12. If wee di sofa bikaaz sohnting terabl hapm tu wi, how Jehoava ku help wi? (Filipiyanz 4:​6, 7)

¹² If yoo eva gaahn chroo sohnting reeli terabl, Jehoava ku yooz ih hoali spirit fi komfert yu. Tink bowt Brada Ron ahn Sista Carol ekspeeryens. Fi dehn son mi kil ihself. Dehn seh: “Owta aala di bad tingz wi eva gaahn chroo, dis da mi di wers ting weh eva hapm. Wahn lata taimz wen wi kudn sleep, wi pray tu Jehoava, an afta dat wi wuda feel di pees weh Filipiyanz 4:​6, 7 taak bowt.” (Reed.) If yoo di sofa bikaaz sohnting terabl hapm tu yu, yu ku bayg Jehoava fi help yu. Yu ku pray tu ahn eni taim yu waahn ahn fi howeva lang yu waahn. (Saa. 86:3; 88:1) Aks Jehoava oava ahn oava agen fi mek ih gi yu ih hoali spirit. Hihn wahn aalwayz lisn tu yu ahn gi yu weh yu aks fahn.​—Look 11:​9-​13

13. How Jehoava hoali spirit ku help wi kantinyu serv ahn? (Ifeezhanz 3:​16)

¹³ Yoo eva gaahn chroo sohnting terabl weh mek yu feel laik yu kyaahn goh nohmoh? Jehoava hoali spirit ku gi yu di schrent fi kantinyu serv ahn. (Reed Ifeezhanz 3:​16.) Tink bowt weh mi hapm tu wahn sista weh naym Flora. Shee an ih hozban mi-di serv az mishineri, bot fi shee hozban mi cheet pan ahn, soh dehn mi divoas. Shee seh: “Aal Ai kuda mi tink bowt da humoch hihn mi hert mi. Ah mi pray fi mek Jehoava gi mi ih hoali spirit soh dat Ah noh giv op. At fers, Ai mi feel laik ih noh pasabl fi get oava di payn weh Ai mi-di feel. Bot Jehoava gi mi weh Ah mi need fi heel ahn fi bayr op.” Sista Flora mi si how Jehoava help shee fi chros eena ahn eevn moa dan bifoa. An ih chros dat Hihn wahn kantinyu tek kayr a shee noh mata weh shee goh chroo. Shee seh, “Saam 119:​32 diskraib how Jehoava mi help mi. Ih seh: ‘Ai redi fi obay yu komanment dehn bikaaz yu help mi fi andastan dehn.ʼ”

14. Weh wi ku du fi geh Jehoava hoali spirit?

¹⁴ Jehoava wilin fi gi wi ih hoal spirit, bot wi haftu du moa dan jos aks ahn far it. Fi mek fi hihn hoali spirit help wi, wi haftu kip wiself bizi di du spirichwal  tingz. Dis meenz dat wi haftu goh da aala wi meetin dehn ahn kantinyu preech. Wi haftu reed wi Baibl evri day soh dat di way Jehoava tink aalwayz dehn pahn wi main. (Fil. 4:​8, 9) Wail yu reed yu Baibl, pay atenshan tu di tof sichuwayshanz som a Jehoava servants mi gaahn chroo ahn foakos pahn how Jehoava mi help dehn fi kantinyu bayr op. Sandra, weh wi mi menshan erliya, mi gaahn chroo wahn lata chraiyalz wan afta di ada. Shee seh: “Joazef egzampl reeli inkorij mee. Eevn doa hihn gaahn chroo wahn lata bad tingz eena ih laif, ahn non a dehndeh tingz mi fyaa tu hihn, hihn neva alow ih rilayshanship wid Jehoava fi geh week.”​—Jen. 39:​21-​23.

JEHOAVA YOOZ WI BRADAZ AHN SISTAZ FI KOMFERT WI

15. Hoo ku gi wi komfert, ahn how dehn ku help wi? (Koment pahn di picha.)

¹⁵ Wen wi di sofa, wi bradaz ahn sistaz ku ‘gi wi lata komfert.ʼ (Kol. 4:​11) Jehoava yooz wi bradaz ahn sistaz fi shoa wi humoch ih lov wi. Fi egzampl, wi bradaz ku lisn tu wi wen wi need fi taak bowt how wi feel. An eevn if dehn noh noa weh fi seh, jos dat dehn dehdeh fi wi ku mek wi feel beta. Dehn ku aalso shayr wahn skripcha wid wi, rimain wi bowt di way how Jehoava tink, er pray wid wi. e  (Roam. 15:4) Maybi dehn kud eevn kuk sohnting fi wi, ahn dat ku help wi feel beta. Aala dehnya tingz wahn help wi fi kantinyu bayr op.

16. If wi waahn wi bradaz ahn sistaz help wi, weh wi need fi du?

¹⁶ Fi mek wi bradaz ahn sistaz bee aybl fi help wi, wi haftu aks dehn fi help. Wi bradaz ahn sistaz lov wi, ahn dehn waahn help wi. (Prav. 17:​17) Bot dehn noh noa how wi feel, er dehn noh mait noa weh dehn ku du fi help wi. (Prav. 14:​10) If yu feel sad, bee wilin fi taak tu wahn fren bowt how yu feel. Mek ih noa weh ih ku du fi help yu. Yu ku taak tu wan er too eldaz weh yu feel komfatabl wid. Sohn sistaz chooz fi taak tu wahn sista weh spirichwali machoar.

17. Wat da sohn sichuwayshan weh ku mek wi aalwayz waahn deh bai wiself, ahn how wi ku deel wid dehn?

¹⁷ Chrai yu bes fi noh aalwayz deh bai yuself, eevn if dat da weh yu wuda waahn. Wen yu feel dong, yu mait noh waahn deh rong peepl. Ahn sohntaim wi bradaz ahn sistaz mait noh andastan how wi feel, er dehn mait seh sohnting weh hert wi. (Jay. 3:2) Noh mek dehndeh tingz stap yu fahn get di inkorijment weh yu need. Wahn elda weh naym Gavin sofa fahn dipreshan. Hihn seh: “Sohntaim di laas ting Ai wuda waahn du da taak tu mi frenz.” Eevn doa Brada Gavin feel da way, hihn noh mek fi hihn feelinz stap ahn fahn geh di inkorijment ih need fahn ih bradaz ahn sistaz. Wahn sista weh naym Amy seh: “Ai ga wahn haad taim di chros peepl bikaaz a sohn tingz weh mi hapm tu mi eena di paas. Bot Ah di laan fi chros mi bradaz ahn sistaz laik how Jehoava chros dehn. Ai noa dat wen Jehoava si mi di du dat, hihn hapi, ahn dat mek mee hapi tu.”

JEHOAVA PRAMIS DEHN KU GI YU KOMFERT

18. Weh wi luk faawod tu eena di fyoocha, ahn weh wi ku du now?

¹⁸ Wi ku luk faawod tu di fyoocha wid hoap bikaaz wi noa dat soon Jehoava wahn fiks eniting weh mek wi sofa eena eni kaina way. (Rev. 21:​3, 4) Wen da taim kohn, aala di tingz weh hert wi eena di paas “noh wahn afek wi haat.” (Isa. 65:​17) Eevn now, Jehoava tek kayr a wi wen wi di sofa. Soh tek ful advantij a aala di tingz weh Jehoava gi yu fi help yu ahn fi komfert yu. Aalwayz memba dat hihn ‘kay bowt yu.ʼ​—1 Peet. 5:7.