1. Wat da sohn tingz Jeezas du fi wee?

 NO HYOOMAN pahn ert mi eva du az moch az Jeezas fi help adaz. Wen hihn mi deh pahn ert, hihn mi du lata miraklz fi help peepl. (Look 9:​12-17) Hihn eevn giv op ih oan laif fi wee, ahn dat da di bes gif enibadi kuda mi eva gi wi. (Jan 15:13) Eevn afta Jeezas mi geh rezorek, hihn kantinyu help peepl. Jeezas mi aks Jehoava fi gi wee ih hoali spirit fi teech ahn komfert wi, jos laik weh hihn mi pramis. (Jan 14:​16, 17, ftn.; 16:13) Hihn stil di help wi tudeh. Hihn di chrayn wi chroo wi meetin dehn soh dat wi ku teech peepl aal oava di werl ahn help dehn fi bee fi hihn disaipl.—Mach. 28:​18-20.

2. Hoo da di “bradaz weh da laik gifs” weh Ifeezhanz 4:​7, 8 taak bowt?

² Tink bowt wahn nada gif weh Jeezas gi wee. Di apasl Paal mi seh dat afta Jeezas gaan da hevn, hihn mi gi wi “bradaz weh da laik gifs.” (Reed Ifeezhanz 4:​7, 8.) Fi wat? Wel, Paal mi eksplayn dat Jeezas gi wi dehnya bradaz fi sopoat di kangrigayshan. (Ifee. 1:​22, 23; 4:​11-13) Eena fi wee taim, dehnya “bradaz weh da laik gifs” da di ministeeryal servants, di eldaz eena wi kangrigayshan, ahn di serkit oavaseeya dehn. a Dehndeh bradaz noh perfek, dehn mek mistayk jos laik wee. (Jay. 3:2) Stilyet, wi haftu memba dat Jeezas di yooz dehn fi help wi, ahn hihn gi wi dehn az gifs.

3. Gi wahn egzampl weh shoa how wi ku sopoat di bradaz weh Jeezas gi wi az gifs.

³ Jeezas mi asain di “bradaz weh da laik gifs” fi schrentn di kangrigayshan. (Ifee. 4:12) Wi ku mek tingz eeziya  fi dehn wen wi sopoat dehn. Tink bowt it dis way: Fi wahn Kingdom Haal kanschrokshan proajek, dehn ga bradaz ahn sistaz weh akchwali help bil di Kingdom Haal. Bot ada bradaz ahn sistaz wuda sopoat di proajek eena ada wayz. Maybi dehn kehr food, dehn help wid chransportayshan, er ada tingz. Soh jos laik how dehndeh bradaz ahn sistaz help sopoat wahn Kingdom Haal proajek, saym way soh aala wi ku sopoat di ministeeryal servants, di eldaz, ahn di serkit oavaseeyaz wid weh wi du ahn weh wi seh. Eena dis aatikl, wi wahn taak bowt how wi benifit fahn dehn haad werk ahn how wi ku shoa Jeezas ahn dehndeh bradaz dat wi tankful fi dehn.

MINISTEERIYAL SERVANTS HELP DI KANGRIGAYSHAN

4. Wat da som a di tingz di ministeeryal servants mi du eena di fers senchri?

⁴ Eena di fers senchri, sohn bradaz mi geh apointid az ministeeryal servants. (1 Tim. 3:8) Ih seemz da dehn di apasl Paal mi-di taak bowt da 1 Korintyanz 12:28 wen ih seh dat som a dehn mi-di “help adaz.” Di werk weh dehn mi du mi impoatant, bikaaz dat mi help di eldaz foakos pahn di teechin ahn di shepadin werk. Fi egzampl, maybi ministeeryal servants mi help mek kapiz a di Skripchaz weh mi avaylabl bak den, er maybi dehn mi bai di mateeryal fi du dat.

5. Wat da som a di tingz ministeeryal servants du eena di kangrigayshan?

⁵ Tink bowt aal weh di ministeeryal servants dehn du eena yu kangrigayshan. (1 Peet. 4:10) Dehn help tek kayr a di akonks, di teritori, er di aadyo veedyo eena di kangrigayshan. Dehn help aada lichricha ahn mek shoar di bradaz ga di lichricha weh dehn need. Dehn aalso serv az atendant ahn help mantayn di Kingdom Haal. Aala dehnya tingz impoatant fi mek tingz werk owt gud eena di kangrigayshan. (1 Kor. 14:40) Pahn tap a dat, ministeeryal servants du paats pahn di Laif ahn Minischri Meetin ahn dehn gi poblik taak. Wahn ministeeryal servant ku aalso geh apointid fi help owt wahn groop oavaseeya, ahn sohntaim, if wahn ministeeryal servant kwalifai, ih ku jain di eldaz fi du shepadin vizit.

6. Weh da sohn reezn wai wi apreeshiayt wi ministeeryal servants dehn soh moch?

⁶ How wi benifit fahn weh di ministeeryal servants dehn du eena di kangrigayshan? Wahn sista weh naym Beverly, b weh liv da Bolivia, seh: “Ai reeli injai mai meetinz bikaaz a aal weh di ministeeryal servants dehn du. Bikaaz dehn help wid lata tingz, Ah ku sing, gi mi koments, lisn tu taaks, ahn laan fahn veedyoz ahn pichaz joorin di meetin. Dehn aalso du sikyoariti joorin di meetin ahn dehn mek shoar dat di bradaz weh jain di meetin onlain ku injai di meetinz tu. Afta meetin, dehn help kleen di Kingdom Haal, dehn help wid akonks, ahn dehn mek shoar wi ga di lichricha weh wi need. Ah reeli tankful fi dehn.” Wahn sista weh naym Leslie, weh liv da Colombia ahn weh marid tu wahn elda, seh: “Mi hozban need di ministeeryal servants fi help tek kayr a difrent asainments. Widowt dehn, hihn mi wahn bee moch moa biziya. Ah tankful fi dehn bikaaz dehn eega ahn wilin fi help eena di kangrigayshan.” How yoo feel bowt ministeeryal servants?—1 Tim. 3:13.

7. How wi ku shoa wi ministeeryal servants dehn eena di kangrigayshan dat wi apreeshiayt dehn?

 ⁷ Da chroo wi mait feel tankful fi weh di ministeeryal servants dehn du, bot di Baibl tel wi dat wi fi “shoa wahn tankful atichood.” (Kol. 3:15) Kristofer, wahn elda da Finland, shoa dat ih tankful dis way: “Ah wuda sen dehn wahn lee kyaad er wahn lee mesij. Ah wuda rait wahn skripcha fi dehn an Ah tel dehn sohnting weh dehn du weh inkorij mi er Ah wuda tel dehn wai Ai apreeshiayt weh dehn du.” Wahn kopl weh liv da New Caledonia, weh naym Pascal ahn Jael, pray fi ministeeryal servants. Brada Pascal seh: “Laytli wi staat pray fi di bradaz weh geh apointid eena di kangrigayshan. Wi tank Jehoava fi dehn, ahn wi aks Jehoava fi help dehn ahn fi bee wid dehn.” Jehoava lisn tu dehndeh kaina pryaaz, ahn di hoal kangrigayshan benifit fahn dehn haad werk.—2 Kor. 1:11

ELDAZ WERK HAAD EENA DI KANGRIGAYSHAN

8. Wai Paal mi seh dat di eldaz eena di fers senchri werk haad? (1 Tesaloanyanz 5:​12, 13)

⁸ Eldaz eena di fers senchri mi werk haad fi di kangrigayshan. (Reed 1 Tesaloanyanz 5:​12, 13; 1 Tim. 5:17) Dehn mi gaid di kangrigayshan, kandok meetin, ahn werk tugeda fi mek disizhanz fi di kangrigayshan. Dehn mi gi dehn bradaz ahn sistaz lovin kongsl fi help kip dehn fayt schrang. (1 Tes. 2:​11, 12; 2 Tim. 4:2) Pahn tap a dat, dehn mi haftu werk haad fi tek kayr a dehn oan famili. Ahn dehn mi haftu kantinyu mek shoar dat dehn fayt ahn dehn rilayshanship wid Jehoava stay schrang.—1 Tim. 3:​2, 4; Tai. 1:​6-9.

9. Wat da sohn rispansabiliti weh di eldaz gat?

⁹ Jos laik di eldaz eena di fers senchri, di eldaz eena wi kangrigayshan da bizi peepl. Dehn preech di gud nyooz. (2 Tim. 4:5) Dehn tek di leed eena di preechin werk ahn dehn set wahn gud egzampl. Dehn aaganaiz it, ahn dehn chrayn wi how fi teech. Wen wahn Kristyanz komit wahn seeryos sin, di eldaz serv az joj. Dehn shoa mersi ahn chreet di persn fyaa. Eldaz du dehn bes fi help da persn fiks dehn rilayshanship wid Jehoava. Bot saym taim, dehn mek shoar dehn kip di kangrigayshan kleen. (1 Kor. 5:​12, 13; Gal. 6:1) Di mayn ting weh di eldaz du da shepad di kangrigayshan. (1 Peet. 5:​1-3) Dehn pripyaa taaks weh bays pahn di Baibl, ahn dehn du dehn bes fi geh fi noa evribadi eena di kangrigayshan. Ahn dehn aalso araynj vizits fi inkorij difrent bradaz ahn sistaz. Sohn eldaz help owt eena Kingdom Haal kanschrokshan er dehn help mantayn di Kingdom Haal. Som aaganaiz kanvenshanz, werk wid di Hospital Liaison Committees ahn di Patient Visitation Groups, er help owt eena ada asainments. Eldaz werk reeli haad fi di kangrigayshan!

10. Wai wi soh tankful fi di eldaz eena wi kangrigayshan?

¹⁰ Jehoava prafesai dat shepadz wuda tek gud kayr a wi ahn dat wi “noh wahn feel frayd ner geh fraitn nohmoh.” (Jer. 23:4) Wahn sista fahn Finland weh naym Johanna geh fi ekspeeryens weh dat meen wen ih ma mi reeli sik. Shee seh: “Eevn doa ih haad fi taak tu adaz bowt how Ah feel, wahn elda weh Ah neva reeli noa mi payshent wid mee, ih mi pray wid mi, an ih mi rimain mi bowt humoch Jehoava lov mi. Ah noh memba aal weh ih mi seh, bot Ah memba dat Ah mi feel sayf. Ah noa dat Jehoava mi sen hihn egzakli  wen Ah mi need it.” How di eldaz eena yu kangrigayshan help yoo?

11. How yu ku shoa eldaz dat yu apreeshiayt weh dehn du? (Koment pahn di picha.)

¹¹ Jehoava waahn mek wi shoa di eldaz humoch wi lov an apreeshiayt dehn “bikaaz a di werk weh dehn du.” (1 Tes. 5:​12, 13) Henrietta, wahn sista weh liv da Finland, seh: “Eldaz aalwayz redi fi help adaz. Bot dat noh meenz dat dehn ga lata taim an enerji, an ih noh meenz dat dehn noh goh chroo tof sichuwayshanz. Sohntaim Ai jos tel dehn, ‘Yu noa sohnting, bredz, yu da wahn reeli gud elda. Ah jos waahn yu noa dat.ʼ” Sera, wahn sista weh liv da Türkiye, c seh: “Eldaz need wahn lee inkorijment fi kantinyu bee wahn gud shepad.” Yu ku tink bowt eni elda yu reeli tankful fa? Du sohnting fi shoa ahn how yu feel bowt weh ih du.—1 Kor. 16:18.

SERKIT OAVASEEYAZ SCHRENTN DI KANGRIGAYSHAN

12. Hoo els Jeezas mi giv fi schrentn di kangrigayshan eena di fers senchri? (1 Tesaloanyanz 2:​7, 8)

¹² Di serkit oavaseeya dehn da wahn nada gif weh Jeezas gi wi. Hihn mi gaid di eldaz da Jeroosalem fi sen owt chravlin oavaseeyaz laik Paal, Baarnabas, an ada faytful bradaz. (Aks 11:22) Dehndeh bradaz mi du di saym ting az eldaz ahn ministeeryal servants, dehn schrentn di kangrigayshan. (Aks 15:​40, 41) Dehnya bradaz mi lef bihain wahn lata tingz ahn dehn mi eevn put dehn laif eena daynja fi teech an inkorij adaz.—Reed 1 Tesaloanyanz 2:​7, 8.

13. Weh aal wahn serkit oavaseeya du?

¹³ Serkit oavaseeyaz aalwayz di chravl,  ahn sohntaim dehn haftu chravl faar. Eech taim wahn serkit oavaseeya vizit wahn kangrigayshan, ih gi taaks, ih du shepadin vizits, ih du painyaa meetin, ih du eldaz meetin, an ih kandok aal di meetinz fi servis. Ih aaganaiz serkit asembliz ahn kanvenshanz ahn pripyaa taak fi dehnya ivents. Ih teech da painyaa skoolz, ih aaganaiz speshal meetin wid di painyaa dehn eena ih serkit, ahn sohntaim di branch wuda aks ahn fi du ada impoatant asainments.

14. Wai wee cherish di serkit oavaseeya dehn?

¹⁴ Wai di serkit oavaseeya dehn da laik gifs tu di kangrigayshan? Wahn brada fahn Türkiye seh dis bowt di serkit oavaseeya dehn weh hihn meet: “Eech taim dehn vizit mi, ih moov mi fi waahn spen moa taim wid mi bradaz ahn sistaz. Ai meet lata serkit oavaseeyaz aredi, bot non a dehn eva mek Ah feel laik dehn noh waahn taak tu mi er dat dehn tu bizi fi mi.” Johanna, weh wi mi menshan erliya, mi werk wid wahn serkit oavaseeya eena servis, ahn dehn neva fain nobadi fi preech tu. Shee seh: “Ah stil memba da day. Too a mi sistaz mi jos moov, an Ah mi-di mis dehn wahn lat. Di serkit oavaseeya mi inkorij mi ahn help mi fi si dat eevn doa wi noh deh tugeda rait now, eena paradais wi wahn ga fareva fi spen taim tugeda.” Lata wi cherish wi serkit oavaseeya ahn di way dehn help wi.—Aks 20:37–21:1.

15. (a) Bays pahn 3 Jan 5-8, how wi ku shoa dat wi apreeshiayt di serkit oavaseeya dehn? (Koment pahn di picha.) (b) Wai wi shuda shoa dat wi tankful fi di waif a di bradaz weh serv eena di kangrigayshan, ahn how wi ku shoa dehn dat wi tankful? (Koment pahn di baks weh naym  “Memba Dehn Waif.”)

¹⁵ Di apasl Jan mi inkorij Gaiyos fi mek  shoar dat di bradaz weh mi-di vizit feel welkom, an ih tel ahn mek ih “sen dehn aaf eena wahn way weh pleez Gaad.” (Reed 3 Jan 5-8.) Wan way wi ku du dat da wen wi invait di serkit oavaseeya dehn fi eet. Wahn nada ting wi ku du da goh da aala di meetinz fi feel servis weh di serkit oavaseeya kandok. Leslie, wahn sista weh wi mi menshan erliya, tel wi how shee shoa dat ih tankful fi dehn. Shee seh: “Ah pray tu Jehoava mek ih kantinyu tek kayr a dehn. Mee ahn mi hozban wuda rait letaz fi mek dehn noa how dehn vizit mi help wi.” Wi haftu memba dat dehn goh chroo prablemz jos laik wee, ahn dehn geh taiyad tu. Som a dehn geh sik, dehn ga woriz, ahn dehn ku eevn geh diskorij. Yu neva noa how Jehoava ku yooz yu kain werdz er yu lee gif fi ansa dehn pryaaz!—Prav. 12:25.

WI NEED MOA “BRADAZ WEH DA LAIK GIFS”

16. Weh Praverbz 3:27 inkorij bradaz fi du?

¹⁶ Jehoava aaganaizayshan need moa bradaz fi serv eena di kangrigayshan dehn. If yoo da wahn brada weh don baptaiz, yu tink yu ku help yu kangrigayshan moa? (Reed Praverbz 3:27.) Yoo wilin fi werk haad fi bee wahn ministeeryal servant? If yoo da don wahn ministeeryal servant, yoo wilin fi werk haad fi bee wahn elda? d Yoo wilin fi mek chaynjiz soh dat yu ku aplai fi di Skool fi Kingdom Ivanjelaizaz? Da skool wahn chrayn yu fi mek Jeezas ku yooz yu eevn moa. If yu feel laik yu noh kwalifai rait now, pray tu Jehoava. Aks ahn fi ih hoali spirit soh dat yu ku du eni asainment weh yu get.—Look 11:13; Aks 20:28.

17. Weh di gifs weh Jeezas gi wi proov bowt hihn?

¹⁷ Di bradaz weh Jeezas gi wi az “gifs” da proof dat Jeezas di gaid wi eena dehnya laas dayz. (Mach. 28:20) How yoo feel fi ga wahn King weh lovin, weh help peepl, weh noa weh wi need, ahn weh gi wi bradaz fi help wi? Tankful, noh chroo? Wel, fain wayz fi shoa dehn dat yu tankful fi di haad werk weh dehn du. Ahn neva ferget fi tank Jehoava, bikaaz “evri gud ahn perfek gif kohn fahn hihn.”—Jay. 1:17.