Yoo fain it haad fi memba weh yu jos stodi? Yoo da noh di onli wan. Dat hapm tu aala wi sohntaim. Soh weh ku help wi? Wi need fi goh oava di mayn points weh wi jos stodi.

Wail yu di stodi, stap lang di way ahn goh oava weh yu jos laan. Dat da weh Paal mi du wen ih mi rait wahn leta tu wan a di kangrigayshan eena fi hihn taim. Ih mi help di bradaz ahn sistaz fi memba di mayn point. Ih tel dehn: “Now di mayn point a weh wi di seh da dis.” (Heeb. 8:1) Dis mi help dehn fi si how aal di points weh Paal mi-di mek mi kanek tu di mayn aidyaa eena ih leta. Dat mi help dehn fi andastan beta weh hihn mi-di rait bowt.

Ih gud fi tek sohn taim afta yu stodi fi goh oava di mayn points. Maybi yu kuda tek wahn lee ten minits er soh fi tink bowt weh yu laan. If yu kyaahn memba di mayn points, weh yu ku du? Yu ku luk pahn di sobhedin dehn agen er reed di fers sentens eena eech paragraaf. If yu laan sohnting nyoo, chrai put it eena yu oan werdz an eksplayn it. Wen yu goh oava di tingz yu jos laan, dat wahn mek it eeziya fi memba di mayn points an ih wahn help yu andastan beta how fi yooz it eena yu laif.