1-2. Weh mi hapm tu di disaiplz pahn di road tu Emayos?

 DA MI Naisan 16, 33 C.E., ahn Jeezas disaipl dehn mi feel sad ahn frayd. Too a ih disaipl lef Jeroosalem ahn gaahn da Emayos, wahn vilij weh deh bowt sevn mailz fahn Jeroosalem. Dehndeh too disaipl mi feel soh diskorij bikaaz dehn mi-di hoap dat di Mesaiya wuda du wandaful tingz fi di Jooz, bot now hihn mi ded. Bot sohnting hapm weh dehn neva ekspek.

² Wahn man weh dehn neva rekonaiz meet dehn pahn di road ahn staat tu waak wid dehn. Di disaipl dehn tel ahn bowt aala di terabl tingz weh mi hapm tu Jeezas. Soh di man staat taak bowt tingz weh dehn neva mi wahn ferget. Hihn mi yooz di Skripchaz ahn di prafesi dehn fi eksplayn wai di Mesaiya mi haftu sofa ahn ded. Wen dehn reech Emayos, di disaiplz riyalaiz dat di man da-mi akchwali Jeezas. Wi ku onli imajin how hapi di disaipl dehn mi hapi fi noa dat di Mesaiya mi alaiv!—Look 24:​13-35.

3-4. How Jeezas disaiplz staat tu feel, ahn weh wi wahn laan eena dis aatikl? (Aks 1:3)

³ Jeezas mi spen 40 dayz pahn ert bifoa ih gaahn bak da hevn. Joorin da taim, hihn mi apyaa tu ih disaiplz lata taim. (Reed Aks 1:3.) Jeezas mi noa how ih disaipl dehn mi feel, soh ih inkorij dehn. Sayka dat, dehn mi hapi ahn ga di korij fi preech ahn teech di gud nyooz bowt di Kingdom. a

 ⁴ Wi benifit wen wi stodi bowt weh Jeezas mi du joorin dehndeh 40 dayz. Eena dis aatikl, wi wahn si how Jeezas mi yooz ih taim (1) fi inkorij ih disaipl dehn, (2) fi help dehn andastan di Skripchaz beta, ahn (3) fi chrayn dehn fi du di werk weh dehn wuda haftu du eena di fyoocha. Eena dehndeh wayz wi wahn si how wi ku kapi Jeezas egzampl.

INKORIJ ADAZ

5. Wai Jeezas disaiplz mi need inkorijment?

⁵ Wai Jeezas disaiplz mi need inkorijment? Wel, som a dehn mi lef dehn hows, dehn famili, ahn dehn bizniz fi fala Jeezas. (Mach. 19:27) Ahn peepl mi chreet som a dehn bad bikaaz dehn da-mi Jeezas disaiplz. (Jan 9:22) Dehn mi wilin fi mek dehndeh sakrifais bikaaz dehn mi bileev dat Jeezas da-mi di Mesaiya. (Mach. 16:16) Bot wen Jeezas mi ded, dehn mi feel sad bikaaz dehn neva noa weh mi wahn hapm tu di Jooz.

6. Weh Jeezas mi du wen ih geh rezorek?

⁶ Jeezas mi andastan dat ih mi naamal fi mek ih disaiplz feel sad wen ih ded. Ahn hihn mi noa dat jos bikaaz dehn sad dat noh meenz dat dehn neva ga schrang fayt. Soh, pahn di saym day Jeezas geh rezorek, ih staat tu inkorij ih frenz. Fi egzampl, hihn mi apyaa tu Mayri Magdaleen wen shee mi-di krai da ih toom. (Jan 20:​11, 16) Hihn mi aalso apyaa tu di too disaiplz weh mi-di goh tu Emayos. An ih mi apyaa tu di apasl Peeta. (Look 24:34) Weh wi ku laan fahn Jeezas egzampl? Noatis weh mi hapm wen hihn mi apyaa tu Mayri Magdaleen.

7. Weh Jeezas si Mayri di du, ahn weh hihn du far ahn? (Jan 20:​11-16) (Koment pahn di picha.)

⁷ Reed Jan 20:​11-16. Pahn Naisan 16, sohn laydi weh mi laayal tu Jeezas gaahn da Jeezas toom erli eena di maanin. (Look 24:​1, 10) Wan a dehn da-mi Mayri Magdaleen. Wen shee gaahn da di toom, Jeezas badi neva dehdeh. Soh shee ron gaahn tel Peeta ahn Jan. Den chree a dehn ron bak da di toom. Peeta ahn Jan mi si fi dehnself dat Jeezas badi neva dehdeh fi chroo, soh dehn gaahn bak hoam. Bot Mayri neva gaahn hoam, shee stay deh di krai. Shee neva noa dat Jeezas mi deh rait deh di wach ahn. Hihn si ahn di krai far ahn, an ih mi waahn komfert ahn. Soh hihn apyaa tu Mayri an ih giv ahn wahn asainment an ih tel ahn fi  goh tu ih disaiplz fi gi dehn di gud nyooz dat hihn mi rezorek. Dis mi reeli inkorij Mayri.—Jan 20:​17, 18.

8. How wi ku kapi Jeezas egzampl?

⁸ How wi ku kapi Jeezas egzampl? Wi ku kapi Jeezas wen wi inkorij wi bradaz ahn sistaz fi kantinyu serv Jehoava. Laik Jeezas, wi need fi si wen tingz noh eezi fi adaz, wi need fi andastan how dehn feel, ahn wi need fi gi dehn komfert. Noatis di ekspeeryens a Sista Jocelyn. Fi shee sista mi ded eena wahn bad aksident. Shee seh: “Ai mi liv sad fi wahn gud wail.” Bot afta sohn monts, wahn brada an ih waif mi invait ahn tu dehn hows ahn dehn lisn tu how shee mi-di feel. Dehn mi chreet ahn eena wahn kain way ahn dehn tel ahn dat shee veri preshos tu Jehoava. Jocelyn seh: “Jehoava mi yooz dis brada ahn sista fi sayv mi laif bikaaz Ah mi feel laik if Ah neva ga no hoap, laik if Ah mi-di jrongdid deep eena see. Dehn help mi geh bak mi dizaiya fi kip di serv Jehoava.” Wee tu ku inkorij wi bradaz an alow dehn fi ekspres how dehn feel ahn lisn tu dehn. Wen wi du dat, wi ku komfert dehn ahn help dehn fi kantinyu serv Jehoava.—Roam. 12:15.

HELP ADAZ ANDASTAN DI SKRIPCHAZ

9. Weh chalenj di disaipl dehn mi gat, ahn how Jeezas mi help dehn?

⁹ Jeezas disaiplz mi bileev weh Gaad Werd seh ahn dehn du dehn bes fi obay Jehoava. (Jan 17:6) Bot dehn stil kudn andastan wai Jeezas mi ded az wahn kriminal. Jeezas mi noa dat ih disaiplz mi ga fayt ahn dehn mi lov Jehoava, bot hihn mi riyalaiz dat dehn mi need fi andastan di Skripchaz beta. (Look 9:​44, 45; Jan 20:9) Soh hihn mi help dehn fi andastan di meenin a weh dehn reed eena di Skripchaz. Noatis how ih mi du dat wen ih mi apyaa tu di too disaiplz weh mi-di chravl tu Emayos.

10. How Jeezas mi help ih disaiplz andastan dat hihn da-mi di Mesaiya? (Look 24:​18-27)

¹⁰ Reed Look 24:​18-27. Yu mi noatis dat Jeezas neva tel di too disaiplz rait away da hoo hihn? Wai hihn du dat? Maybi hihn mi waahn mek dehn tel ahn how dehn feel. Ahn dat da egzakli weh dehn mi du bikaaz dehn tel ahn dat dehn mi ekspek Jeezas fi bee King oava Izrel ahn rool oava dehn insteda ga di Roamanz di rool oava dehn. Jeezas mi lisn gud az dehn mi-di eksplayn how dehn mi-di feel. Den hihn yooz di Skripchaz fi help di too disaiplz si dat lata prafesi bowt di Mesaiya mi don kohn chroo. b Da saym eevnin, hihn mi meet op wid ih ada disaiplz an eksplayn tu dehn weh dehndeh prafesi meen. (Look 24:​33-48) Weh wi ku laan fahn Jeezas egzampl?

11-12. (a) Weh wi laan fahn di way how Jeezas mi teech Baibl chroots? (Koment pahn di picha dehn.) (b) How Nortey Baibl teecha mi help ahn?

¹¹ How wi ku kapi Jeezas egzampl? Fers, wen yu di teech yu Baibl styoodents, aks dehn di rait kweschanz soh dat dehn ku tel yu how dehn reeli feel. (Prav. 20:5) Wans yu andastan how dehn feel, shoa dehn how dehn ku fain spesifik skripchaz weh ku help dehn. Noh tel dehn weh fi du. Insted, aks dehn kweschanz bowt di Skripchaz ahn help dehn fi tink bowt weh dehn di reed ahn how dehn ku yooz it eena dehn laif. Noatis di ekspeeryens  a wahn brada fahn Ghana weh naym Nortey.

¹² Nortey mi 16 yaaz oal wen ih staat tu stodi di Baibl. Ih famili neva hapi bowt dat ahn dehn mi deh gens ahn. Weh mi help ahn fi kantinyu stodi di Baibl? Di brada weh mi stodi wid ahn mi don taak bowt weh Machyu chapta 10 seh bowt how dehn wahn persikyoot Kristyanz. Nortey seh: “Wen dehn staat persikyoot mi, Ah mi noa fi shoar dat dis da di chroot.” Ih Baibl teecha mi aalso shoa ahn Machyu 10:16 weh seh fi bee alert. Den ih mi taak bowt how dis skripcha ku help ahn taak tu ih famili wid rispek bowt weh ih bileev eena. Afta Nortey mi geh baptaiz, ih mi waahn painyaa, bot ih pa mi waahn ih goh da yooniversiti. Nortey Baibl teecha neva tel ahn weh fi du. Insted, hihn aks ahn kweschanz weh mi help ahn fi tink bowt Baibl prinsiplz weh mi wahn help ahn mek di rait disizhan. Weh Nortey mi du? Hihn mi disaid fi staat tu regyula painyaa, ahn soh ih pa mi put ahn owta di hows. How Nortey feel bowt aal weh hapm tu ahn? Hihn seh: “Ai noa fi shoar dat Ah mek di rait disizhan.” Wen wi help adaz fi meditayt pahn di Skripchaz, wi help dehn fi ga schranga fayt ahn fi kip di serv Jehoava.—Ifee. 3:​16-19.

CHRAYN BRADAZ FI BEE “LAIK GIFS” FI DI KANGRIGAYSHAN

13. Weh Jeezas mi du fi mek shoar dat di preechin werk mi kantinyu eevn afta hihn gaahn bak da hevn? (Ifeezhanz 4:8)

¹³ Wail Jeezas mi deh pahn ert, hihn mi du egzakli weh ih Pa aks ahn fi du. (Jan 17:4) Bot Jeezas neva tink dat hihn da-mi di onli wan weh kuda du weh Jehoava waahnt. Joorin di chree an a haaf yaaz weh hihn mi preech pahn ert, hihn mi chrayn adaz fi du di werk. Jeezas mi chros ih disaiplz. Hihn mi gi dehn di rispansabiliti fi preech ahn teech di gud nyooz ahn fi luk afta Jehoava preshos peepl. Som a di disaiplz weh mi-di tek di leed eena dis werk mi praabli neva eevn 30 yaaz oal. (Reed Ifeezhanz 4:8.) Dehnya man mi werk haad wid Jeezas ahn dehn mi laayal tu hihn. Bot bifoa hihn gaahn da hevn, hihn mi gi dehn eevn moa chraynin soh dat dehn ku bee  “bradaz weh da laik gifs.” How hihn mi chrayn dehn?—Reed di stodi noat pahn Ifeezhanz 4:8 eena di Study Bible.

14. Weh Jeezas mi teech ih disaiplz fi du joorin ih laas 40 dayz pahn ert? (Koment pahn di picha.)

¹⁴ Eena wahn kain way, Jeezas mi gi dehn kongsl weh dehn mi need fi hyaa. Fi egzampl, hihn mi noatis dat som a ih disaiplz neva reeli bileev dat hihn mi ded ahn geh rezorek. Soh hihn gi dehn kongsl fi help dehn andastan di chroot. (Look 24:​25-27; Jan 20:27) Hihn mi tel dehn fi foakos moa pahn Jehoava peepl insteda pahn mek moni. Dehn mi fi luk afta Jehoava peepl jos laik how wahn shepad luk afta ih sheep. (Jan 21:15) Hihn mi aalso rimain dehn noh fi kompyaa weh dehn du eena Jehoava servis wid weh adaz ku du. (Jan 21:​20-22) Ahn hihn mi help dehn karek eni rang aidyaaz weh deh mi ga bowt di Kingdom an ih help dehn foakos pahn di preechin a di gud nyooz. (Aks 1:​6-8) How eldaz ku kapi Jeezas egzampl?

15-16. (a) Eena weh wayz eldaz ku kapi Jeezas egzampl? Pleez eksplayn yu ansa. (b) How Brada Patrick mi benifit fahn sohn kongsl weh ih mi get?

¹⁵ How eldaz ku kapi Jeezas egzampl? Eldaz need fi chrayn bradaz, eevn dehn wan weh yong, fi du moa werk eena di kangrigayshan. c Af koars, di eldaz andastan dat dehnya bradaz noh perfek; dehn need fi laan lata tingz. Di eldaz need fi kongsl yong bradaz eena wahn lovin way soh dat dehn laan fi bee hombl, fi bee wahn persn weh adaz ku pen pahn, ahn fi bee wilin fi help adaz.—1 Tim. 3:1; 2 Tim. 2:2; 1 Peet. 5:5.

¹⁶ Noatis how Brada Patrick mi benifit fahn sohn kongsl weh ih mi get. Wen hihn mi yonga, hihn yoostu taak ahn chreet adaz rof, inkloodin sistaz. Wahn spirichwali machoar elda mi noatis dat Patrick mi need fi mek chaynjiz, an eena wahn kain way ih giv ahn klyaa kongsl.  Patrick seh: “Ai glad di elda help mi fi si weh Ah need fi werk pan. Ah mi feel diskorij wen Ah si ada bradaz geh wahn rispansabiliti eena di kangrigayshan weh Ai mi waahnt. Bot di kongsl weh di brada gi mi help mi fi si dat Ah need fi bee hombl ahn lov mi bradaz ahn sistaz insteda foakos pahn geh wahn privilij.” Bikaaz a di help weh Patrick mi get, hihn mi geh apointid fi serv az wahn elda wen ih mi 23 yaaz oal.—Prav. 27:9.

17. How Jeezas mi shoa dat ih chros ih disaipl dehn?

¹⁷ Jeezas mi gi ih disaipl dehn di rispansabiliti fi preech ahn teech di gud nyooz tu peepl. (Si di stodi noat “teaching them” pahn Machyu 28:20 eena di Study Bible.) Di disaipl dehn mosi mi tink dat dehn kudn du di werk weh Jeezas mi gi dehn fi du. Bot Jeezas mi shoar dat dehn kuda mi du di werk. Hihn mi chros dehn soh moch dat ih tel dehn: “Jos laik how di Faada sen mee intu di werl, da rait soh Ai di sen unu intu di werl.”—Jan 20:21.

18. How eldaz ku kapi Jeezas egzampl?

¹⁸ How eldaz ku kapi Jeezas egzampl? Eldaz chrayn bradaz fi tek kayr a sertn rispansabiliti eena di kangrigayshan. (Fil. 2:​19-22) Fi egzampl, eldaz ku aks yong bradaz fi help kleen ahn du mantaynans da di Kingdom Haal. Eldaz ku aalso asain bradaz fi du wahn sertn werk, shoa dehn how fi du it, ahn chros dat dehn wahn du it di rait way. Wahn nyoo elda weh naym Matthew mi reeli tankful dat di eldaz mi chrayn ahn fi du difrent asainment eena di kangrigayshan ahn dat dehn mi chros ahn fi du di werk di rait way. Hihn seh, “Wen Ah mek wahn mistayk, dehn help mi fi si how Ah ku laan fahn da mistayk ahn du beta neks taim.” d

19. Weh wi mek op wi main fi du?

¹⁹ Jeezas yooz ih laas 40 dayz pahn ert fi inkorij, teech, ahn chrayn adaz. Mek wi mek op wi main fi fala Jeezas egzampl kloas-wan. (1 Peet. 2:21) Fi shoar, hihn wahn help wi. Aftaraal, dis da weh ih pramis wi: “Ah wahn deh wid unu evri day til di en a dis sistem a tingz.”—Mach. 28:20.