Di varanda da-mi paat a di enchrans tu di Hoali Room da di templ. Akaadn tu di kapiz a di New World Translation of the Holy Scriptures weh kom owt bifoa 2023, “di front varanda mi 20 kyoobit lang, weh da di saym mezhament az di wit a di hows, ahn di hait da-mi 120.” (2 Chron. 3:4) Sohn ada chranslayshan mi aalso seh dat di varanda roof mi “120 kyoobit” hai. Dat wuda mek di roof 175 fut (53 meeta) hai.

Di 2023 kapi a di New World Translation seh dat di roof oava varanda da di front a Salaman templ mi “20 kyoobit hai,” er bowt 30 fut (9 meeta) taal. a Mek wi luk pahn sohn reezn wai dis chaynj.

1 Kings 6:3 neva menshan how hai di varanda roof. Eena da vers, Jerimaiya mi onli menshan how lang ahn how waid di varanda, bot ih neva menshan how hai di roof oava it. Den eena di neks chapta, hihn mi diskraib sohn ada paats a di templ, laik di kapa baysn, di ten kehrij, ahn di too kolom weh mek owta kapa weh deh pahn di owtsaid a di varanda. (1 Ki. 7:​15-37) If di varanda roof mi haiya dan di res a di templ, den wai Jerimaiya neva menshan it? Eevn honjridz a yaaz layta, sohn Jooish raita mi seh dat di varanda roof neva haiya dan di res a Salaman templ.

Sohn ekspert dowt weda er nat di templ waal rong di varanda mi schrang inof fi stan 120 kyoobit hai. Eena Baibl taimz, wen dehn bil sohnting owta stoan er brik, laik di templ gayt dehn da Eejip, di batam paat wuda bee waida an ih wuda geh moa naro az ih goh da tap. Bot Salaman templ mi difrent. Sohn ekspert bileev dat di waal dehn neva moa dan 9 fut tik. Theodor Busink, wahn man weh stodi di hischri a bildinz, seh: “Bays pahn how tik di waal da di enchrans a di templ, di varanda mi wahn kyaahn bee 120 kyoobit [taal].”

Ih pasabl dat 2 Chronicles 3:4 mi geh kapi rang. Eevn doa sohn aynshent manyuskrip seh “120” eena dis vers, sohn ada teks weh wi ku chros, laik di fif-senchri Codex Alexandrinus ahn di siks-senchri Codex Ambrosianus, seh “20 kyoobit.” Wai wahn skraib kuda mi rait “120” bai mistayk? Wel, bikaaz di werd “honjrid” ahn di werd “kyoobit” luk simila eena Heebroo. Soh ih pasabl dat wahn skraib kuda mi rait “honjrid” insteda “kyoobit.”

Af koars, eevn doa wi chrai fi andastan di deetaylz bowt Salaman templ, wi foakos pahn weh di templ reprizent, di grayt spirichwal templ. Wi graytful dat Jehoava invait aala ih servants fi wership hihn eena da templ.—Heeb. 9:​11-14; Rev. 3:12; 7:​9-17.