MYOOZIK da-mi wahn impoatant paat a di Izrelait dehn kolcha. Lata taimz di Baibl taak bowt peepl di play difrent inschrument ahn sing sang. Akchwali, som a di buk dehn eena di Baibl da sangz. Fi egzampl, Saamz, Salaman Sang, ahn Lamentations mi geh rait dong fi mek peepl sing dehn. Wahn buk weh naym Music in Biblical Life seh dat di Baibl “shoa wi dat di Izrelait dehn mi yooz myoozik eena wahn lata difrent paat a dehn laif.”

Myoozik eena dehn evriday laif. Di Izrelait dehn mi play myoozik fi ekspres di way how dehn mi feel. (Isa. 30:29) Di laydi dehn yoostu play di tambareen, sing, ahn daans wen wahn nyoo king staat tu rool, wen di soalja dehn win wahn waar, ahn fi difrent festival weh dehn goh tu fi wership. (Joj. 11:34; 1 Sam. 18:​6, 7; 1 Ki. 1:​39, 40) Wen sohnbadi mi ded, di Izrelait dehn mi sing sohn sad sang fi dehn. (2 Chron. 35:25) McClintock and Strongʼs Cyclopedia mi seh dat ih klyaa fi si dat “di Heebrooz da-mi peepl weh reeli lov myoozik.”

Di king dehn mi injai myoozik. King Saal mi kehr Dayvid da ih palis fi play di haap far ahn. (1 Sam. 16:​18, 23) Laytaraan wen Dayvid mi staat tu rool az king, hihn mi invent sohn myoozik inschrument, ih mi rait sohn byootiful sang, an ih mi aaganaiz wahn groop a peepl fi play myoozik da Jehoava templ. (2 Chron. 7:6; Amos 6:5) King Salaman mi ga mayl ahn feemayl singaz da ih palis tu.—Ikl. 2:8.

Di Izrelait dehn mi yooz myoozik fi wership Jehoava. Da di templ da Jeroosalem, dehn mi ga 4,000 man weh mi play inschrument. (1 Chron. 23:5) Dehn mi play di simbal, di chrompit, di haap, ahn sohn ada inschrument weh mi ga schring. (2 Chron. 5:12) Dehndeh man mi play myoozik gud, bot dehn da neva di onli wanz weh mi yooz myoozik fi wership Jehoava. Wahn lata di Izrelait dehn mi sing wen dehn mi-di chravl da Jeroosalem fi selibrayt di festival dehn. Dehn yoostu sing Saamz 120 tu 134. An akaadn tu di Jooish hischri, di Izrelait dehn mi sing som a di Saamz a joorin di Paasoava dina.

Tudeh, myoozik stil impoatant tu Jehoava peepl. (Jay. 5:13) Wi sing az paat a wi wership tu hihn. (Ifee. 5:19) Ahn wen wi sing tu Jehoava wid wi bradaz ahn sistaz, wi jraa kloasa tu dehn. (Kol. 3:16) Wen wi sing, play, er lisn tu myoozik weh taak bowt Jehoava, dat inkorij wi an ih help wi soh dat wi ku bayr op chroo wi prablemz. (Aks 16:25) Myoozik da wahn byootiful way fi shoa dat wi lov Jehoava ahn dat wi ga fayt eena ahn.