1. Weh aala Gaad servants dehn waahn du, ahn wai? (Koment pahn di picha pahn di kova.)

JEEZAS KRAIS mi koman ih disaipl dehn fi “goh ahn chrayn peepl fahn owta aala di nayshan dehn fi bee [ih] disaipl dehn.” (Mach. 28:19) Aala Gaad servants tudeh waahn laan how dehn ku “finish di jab weh Gaad gi [dehn] fi du.” (2 Tim. 4:5) Aftaraal, dis da di moas impoatant werk weh need fi geh don; no ada werk grayta dan dis. Bot stil, ih ku bee wahn big chalenj fi spen az moch taim az wi wuda waahn eena di minischri.

2. Wat da sohn tingz weh mek it wahn chalenj fi du wi bes eena wi servis tu Gaad?

² Dehn ga lata ada impoatant tingz weh tek op wi taim ahn enerji. Fi egzampl, wi mait haftu werk ful-taim fi provaid fi wiself ahn wi famili. Er, wi mait di schrogl wid ada famili rispansabiliti, er maybi wi mait di fays wahn siknis er di goh chroo dipreshan. Wahn neks ting ku bee dat wi di ekspeeryens di ayks ahn paynz weh kohn wid oal ayj. Bot how wi ku stil du wi bes eena wi servis tu Gaad eevn wen wi di goh chroo chalenjin taimz eena laif?

3. Weh wi ku laan fahn Jeezas werdz da Machyu 13:23?

³ How wi shuda feel if wi sichuwayshan mek it haad fi spen moa taim eena di minischri? Wi noh fi feel diskorij. Jeezas mi noa dat noh aala wi wuda bee aybl fi bayr di saym amonk a froot eena wi minischri. (Reed Machyu 13:23.) Jehoava valyu evriting weh wi du eena wi servis  tu ahn az lang az wi di du wi veri bes. (Heeb. 6:10-12) Pahn di ada han, wi mait feel laik wi sichuwayshan eena laif wuda alow wi fi du moa. Eena dis aatikl, wi wahn si how wi ku put di minischri fos plays eena wi laif, how wi ku liv wahn simpl laif, ahn how wi ku improov eena wi preechin ahn teechin skilz. Bot fos, weh ih reeli meenz fi du wi bes eena wi servis tu Gaad?

4. Weh ih meenz fi du wi bes eena wi servis tu Gaad?

⁴ Eena simpl werdz, fi du wi bes eena wi servis tu Gaad * meenz dat wi fi du az moch az wi kud eena di teechin ahn preechin werk. Bot da noh jos di amonk a taim weh wi spen eena di minischri weh konk, da di reezn wai wi du it. Dat da weh impoatant tu Jehoava. Wee giv Gaad wi veri bes bikaaz wi lov hihn ahn wi nayba. (Maak 12:30, 31; Kol. 3:23) Fi serv Gaad wid evriting weh wi ga meenz dat wi yooz wi schrent ahn enerji an evriting weh wi ga eena wi servis tu hihn. Wen wi apreeshiayt di privilij weh wi ga fi preech, ih mek wi waahn shayr di gud nyooz wid az moch peepl az pasabl.

5-6. How wahn persn weh onli ku spen wahn lee bit a taim eena di minischri ku stil put di preechin werk fos plays eena ih laif? Yooz di egzampl eena di paragraaf.

⁵ Imajin wahn yong man weh lov fi play di gitaar. Hihn lov fi play myoozik weneva ih kud. Az taim paas, ih geh wahn jab fi play ih myoozik da wahn lee restorant pahn di weeken. Bot di moni weh ih mek noh inof fi pay ih bilz. Soh ih aalso werk az wahn kashyaa da wahn shap fahn Mondeh tu Fraideh. Eevn doa ih spen moas a ih taim di werk az wahn kashyaa, myoozik da weh ih lov fi du. Hihn waahn bee wahn ful-taim myoozishan, bot fi du dat ih haftu improov ih skilz. Soh di yong man tek advantij a evri apachooniti weh ih ga fi play ih myoozik.

⁶ Sayhn way soh, yu mait ku onli spen  wahn lee bit a taim eena di preechin werk. Bot stil, dat da weh yu lov fi du. Yu waahn du yu bes fi reech di peepl dehn haat wid di gud nyooz. Bot yu mait di wanda: ‘How Ah ku mek di preechin werk di moas impoatant ting eena mi laif?ʼ

7-8. How wi ku kapi Jeezas atichood tuwaadz di minischri?

⁷ Jeezas mi ga di perfek atichood tuwaadz di minischri. Di moas impoatant ting eena ih laif da-mi fi taak tu peepl bowt Gaad Kingdom. (Jan 4:34, 35) Hihn mi waak mailz ahn mailz fi taak tu az moch peepl az pasabl. Hihn mi yooz evri apachooniti fi taak tu peepl noh mata wehpaat dehn mi deh. Jeezas mi reeli put di minischri fos plays eena ih laif.

⁸ Wen wi luk fi wayz fi taak tu peepl bowt di gud nyooz, wi di kapi Jeezas egzampl. Wi wilin fi giv op wahn komfatabl laif fi di preechin werk. (Maak 6:31-34; 1 Peet. 2:21) Som eena di kangrigayshan ku serv az speshal, regyula, er agzilari painyaa. Adaz laan fi taak wahn nyoo langwij er moov tu wahn ayrya weh need help eena di preechin werk. Bot wahn lata di preechin werk di geh don bai di regyula poblishaz weh kyaahn painyaa, bot hoo stil di du di bes dehn kud. Noh mata if wi du lat er lee bit eena di minischri, Jehoava noh ekspek moa dan weh wi ku akchwali gi ahn. Hihn waahn aala wi injai wi saykrid servis az wi shayr ‘di wandaful Gud Nyooz a wi blesid [er, “hapi,” NW] Gaad.ʼ—1 Tim. 1:11; Deut. 30:11.

9. (a) How Paal mi mek di preechin werk di moas impoatant ting eena ih laif? (b) Weh Aks 28:16, 30, 31 shoa bowt Paal atichood tuwaadz ih minischri?

⁹ Di apasl Paal mi mek di preechin werk di moas impoatant ting eena ih laif, ahn dat set wahn gud egzampl fi wee. Wen hihn mi deh da Korint joorin ih sekant mishineri jerni, ih mi ga lee bit a moni lef soh ih mi haftu werk di mek tent. Bot ih neva kansida dat di moas impoatant ting eena ih laif, da mi laik ih paat-taim jab. Hihn neva waahn berdn di Korintyan bradaz kaaz ih mi waahn shayr di gud nyooz “widowt pay.” (2 Kor. 11:7) Eevn doa Paal mi haftu werk, ih mi kantinyu fi put di preechin werk fos, an ih mi preech pahn evri Sabat. Afta ih sichuwayshan mi geh beta, Paal mi “spen aala ih taim di preech tu di Jooish peepl dehn di chrai kanvins dehn dat Jeezas da-mi di Krais.” (Aks 18:3-5; 2 Kor. 11:9) Wen Paal mi deh anda hows ares da Roam fi too yaaz, ih mi preech tu peepl weh mi vizit ahn an ih mi rait letaz. (Reed Aks 28:16, 30, 31.) Paal neva mi mek notn dischrak ahn fahn di preechin werk. Hihn mi rait: “Da Gaad . . . , gi wi dis speshal werk fi du, wi noh wahn giv op.” (2 Kor. 4:1) Jos laik Paal, eevn if wi haftu spen lata taim da wi jab, wi ku stil mek di preechin werk di moas impoatant ting eena laif.

10-11. How wi ku du wi bes eena di preechin werk eevn if wi ga helt prablemz?

¹⁰ If wi kyaahn preech fahn doa tu doa az moch az wi wuda waahn kaaz a helt prablemz er bikaaz wi di geh oalda, wi stil ku preech eena ada wayz. Fos-senchri Kristyanz mi preech tu peepl eniway wehpaat dehn mi deh. Dehn mi tek advantij a evri apachooniti fi shayr di  gud nyooz— eena poblik, fahn hows tu hows, ahn eena di maakit. Evri day dehn wuda goh wehpaat peepl mi deh. (Aks 17:17; 20:20) If wi kyaahn waak az moch az wi yoostu, wi mait ku sidong da wahn ayrya wehpaat peepl deh ahn preech wen dehn paas bai. Er wi mait ku du infamaal witnisin, rait letaz, er du foan witnisin. Lata poblishaz weh kyaahn goh fahn doa tu doa fi preech bikaaz a dehn helt er ada prablemz, ku stil injai dehnya ada wayz fi du di preechin werk.

¹¹ Eevn if yu ga helt prablemz, yoo ku stil “finish di jab weh Gaad gi yu fi du.” Agen, mek wi kansida di egzampl a di apasl Paal. Hihn mi seh: “Da Jeezas Krais gi mi schrent fi fays eniting!” (Fil. 4:13) Paal mi need da schrent wen ih mi geh sik joorin wan a ih mishineri chrip dehn. Hihn mi tel di peepl da Galaysha: “Memba Ah mi sik wen Ah mi fos preech di Gud Nyooz bowt Jeezas Krais tu unu.” (Gal. 4:13) Sayhn way soh, yu helt prablemz ku gi yu di apachooniti fi preech di gud nyooz tu adaz, laik daktaz, ners, ahn adaz weh help tek kayr a yu. Moas a dehn deh da werk wen di poblishaz di preech rong weh dehn liv.

12. Weh ih meenz fi kip yu aiy “foakos”?

¹² Jeezas mi seh: “Yu aiy dehn da laik lamp fi yu badi. If yu aiy dehn foakos [er, “simpl,” ftn.], den di hoal a yu badi wahn bee brait.” (Mach. 6:22, NW) Weh hihn mi meen? Hihn mi meen dat wi need fi kip wi laif simpl er foakos pahn  wahn spesifik goal er perpos ahn noh geh dischraktid. Jeezas ihself mi set di egzampl. Hihn mi foakos ih laif pahn ih minischri, an ih mi help ih disaipl dehn fi foakos pahn di Kingdom ahn dehn servis tu Gaad. Di skripcha seh: “weh unu fi aym fa fos, da fi bee paat a di kingdom . . . ahn liv rait.” Wen wi du dat wi di kapi Jeezas egzampl.—Mach. 6:33.

13. Weh ku help wi foakos eena wi minischri?

¹³ Wan way fi foakos moa pahn wi minischri da fi spen les taim di du tingz weh noh impoatant ahn spen moa taim di help adaz fi noa ahn lov Jehoava. * Fi egzampl, ih pasabl fi ajos wi werk skejul soh dat wi ku spen moa taim eena di minischri joorin di week? Ih pasabl fi balans di taim weh wi spen di ga fon soh dat wi ga moa taim fi di minischri?

14. Weh chaynjiz wahn kopl mi mek soh dat dehn kuda mi spen moa taim eena di minischri?

¹⁴ Dis da weh wahn elda weh naym Elias an ih waif mi du. Hihn seh: “Bak den, wi mi kyaahn painyaa bot dehn mi ga tingz weh wi mi haftu du soh dat wi kuda mi staat spen moa taim eena di preechin werk. Soh wi mi staat lee bit bai lee bit. Fi egzampl, wi mi staat spen les moni. Aalso, wi mi riyalaiz dat wi mi-di spen tu moch taim di ga fon soh wi kot dong pahn dat tu. Ahn wi mi aks wi baas fi chaynj wi werk skejul soh dat wi wuda ga moa taim fi di preechin werk. Kaaz a dehn chaynjiz weh wi mi mek, wi mi aybl fi staat tu preech eena di eevnin, kandok moa Baibl stodiz, an eevn tek paat eena di preechin werk joorin di week twais a mont. Dis mek wi reeli hapi!”

15-16. Akaadn tu 1 Timoti 4:13, 15, how wi ku kantinyu fi du beta eena wi preechin ahn teechin skilz? (Si di baks “ Goalz fi Help Mi Du Mi Bes Eena Mi Servis tu Gaad.”)

¹⁵ Wahn neks way fi du wi bes eena wi servis tu Gaad da fi improov eena wi preechin skilz. Peepl weh du sertn kaina werk haftu geh chraynin evritaim sohnting nyoo kom owt soh dat dehn ku improov dehn nalij ahn skilz. Wee az Jehoava Witnisiz haftu du di sayhn ting. Wi need fi kantinyu fi laan how fi improov eena wi preechin ahn teechin skilz.—Prov. 1:5; reed 1 Timoti 4:13, 15.

¹⁶ Bot how wi ku kantinyu mek proagres eena wi minischri? Wen wi pay kloas atenshan tu di inschrokshan weh wi geh eena di Laif ahn Minischri Meetin. Di chraynin weh wi geh da dis meetin help wi fi kantinyu mek proagres eena wi preechin skilz. Fi egzampl, di kongsl weh di chyaaman gi tu styoodents ku provaid yoosful points fi help wi du beta eena di minischri. Wee ku put dehndeh sojeshanz intu praktis di neks taim wi taak bowt di gud nyooz tu sombadi. Wi ku aks wi feel servis groop oavaseeya fi help er werk wid ahn eena di minischri. Er maybi wi ku werk wid wahn nada poblisha weh ga ekspeeryens, er wid wahn painyaa er wid di serkit oavaseeya. Az wi yooz wi Teechin Toolbaks moa ahn moa, wi wahn geh moa skilz ahn wi wahn injai di preechin ahn teechin werk eevn moa.

17. How yu wahn feel if yu du yu bes eena yu servis tu Gaad?

¹⁷ Da wahn aana fi bee “paadna” weh werk lang wid Gaad! (1 Kor. 3:9) Wen yu “mek shoar a di moa impoatant tingz” ahn foakos pahn di minischri, yu wahn “serv Jehoava wid jai.” (Fil. 1:10, NW; Ps. 100:2) Az wahn servant a Jehoava, yoo ku bee shoar dat hihn wahn giv yu di powa fi finish di jab weh ih gi yu fi du, noh mata weh chalenjiz er prablemz yu mait gat. (2 Kor. 4:1, 7; 6:4) Weda yu serkomstans alow yu fi preech lat er lee bit, yoo ku ‘feel gud bowt yuselfʼ kaaz yu du yu veri bes. (Gal. 6:4) Wen yu du dis, yu shoa humoch yu lov Jehoava ahn yu nayba, ahn “yu wahn sayv dehn wan weh di lisn tu yu, ahn yuself tu.”—1 Tim. 4:16.